Bibliajj akham sasaw ewjjtʼistu: “Chuyma manqhatwa jan wali amtañanakajj juti, jaqe jiwayañanaka, wachoqa juch lurañanakasa, lunthatasiñanaka, kʼarisiñanaka, ukhamaraki jaqjjata jan wali parlañanakasa” sasa (Mat. 15:19). Kunanaktï Diosatakejj jan walïki ukanakajj walikïkaspas ukham amuyañasatakiw chuymasajj sallqjjestaspa. Ukat inas lurjjtan uka qhepatak jan walïtap amuyassna. Janïr ukhamar purtʼaskasajja, ¿kunsa chuymasajj muni uk kunjamatsa amuysna?

Biblia sapüruw liytʼañasa ukat lupʼiñasaraki.

Apóstol Pablon qellqataparjamajja, “Diosan arupasti jakaskiwa, jachʼa chʼamanirakiwa. Purapar arini espadat sipansa jukʼampi ariraki, ukasti almampir ajayumpirojj jukʼamp manqhakamaw puri, lupʼïwinaksa, chuyman amtäwinakapsa qhanstayarakiwa” (Heb. 4:12). Kunas chuymasan utji uk yatiñatakejja, Bibliaw yanaptʼistaspa. Ukhamasti, Biblia sapür liyiñasa ukat ukjjat lupʼiñasa, wali wakiskiripuniwa. Ukhamatwa kunjamtï Jehová Diosajj amuyki ukham amuyarakiñäni.

Biblian ewjjtʼanakaparjam sarnaqañajja, suma conciencianïñatakiw yanaptʼistu. Ukhamtï lurañänejja, uka concienciasaw kunas jan walïki uk amuytʼasiñ yanaptʼistani ukat janirakiw chuymasan amtanakaparjamakejj kuna jan walinaksa lurjjañäniti  (Rom. 9:1). Ukhamarusa, Biblian utjki uka sarnaqäwinakajj jiwasan amuytʼasiñasatakiw yanaptʼarakistu (1 Cor. 10:11). Uka sarnaqäwinakat yateqasaw jan waltʼäwinakat jitheqtsna. ¿Kunanakampsa lursna?

Oracionanwa yanaptʼa mayisiñasa.

Jehová Diosaw chuymas uñakipaski (1 Cró. 29:17). “Diosajj jukʼamp jachʼawa chuymasat sipansa, jupasti taqe kunwa yatiraki.” (1 Juan 3:20.) Ukhamasti, janiw Juparojj sallqantksnati. Kunjamas chuymasan jikjjatastan, kunas llakisiyistu ukat kunsa munaraktan ukanak Diosar yatiyañäni ukhajja, kunas chuymasan utji uk yatiñatakiw yanaptʼistani. Ukat “qʼoma chuymay” churita sas kunaw mayiraksna (Sal. 51:10). Kunas chuymasan utji uk yatiñatakiw oracionajj yanaptʼarakistu.

Tantachäwinakan wali amuyumpi istʼañäni.

Ukhamtï lurañänejja, kunas chuymasan utji uk sumwa amuytʼasiñäni. Ukat sapa tantachäwinakan janis mä machaq yatichäwejj utjapunkchinejja, wali amuyumpi istʼañajj wakiskiripuniwa. Ukat Biblian yatichäwinakap sum amuytʼañatakiw yanaptʼistu. Maysa toqetjja, tantachäwinakan ewjjtʼkistu ukanakajja, jakäwisat amuytʼasiñataki ukat askirjam sarnaqañatakiw yanaptʼistu. Ukat jilat kullakanakan arstʼäwinakapas wali askirakiwa (Pro. 27:17). Jiwasatï jilat kullakanakampi jan tantachasjjañäni ukhajja, lurañanakasatakwa llakisjjañäni ukat jan wali amtanakarukiw purjjañäni (Pro. 18:1). Ukhamasti, ak jisktʼasiñasaw wakisispa: ‘¿Taqpacha tantachäwinakaruti sartjja, ukat askinak yateqaskti?’ (Heb. 10:24, 25).

Chuymasajj wali sallqätapat kunayman jan walinakaruw purtʼayistaspa. Uk pusi toqet amuytʼañäni: qollqe chuymanïñata, machjayir umañanakata, amigonakata ukat kʼuchirtʼäwinakata.

Qollqe chuymanïña.

Kunanakatï jakäwitakejj wakiski ukatak trabajañajj janiw kuna jan walïkisa. Ukampisa, qollqe chuymäñajj kunatsa jan waliki uk sumwa Jesusajj amuytʼayawayistu. Mä uñachtʼäwipanjja, qamiri mä jaqetwa parläna. Jupasti yapunakap apthapisinwa imkati, ukat jutïr maratakejj janiw kawkhar imañapas utjkiti, ukatwa jiskʼa utanak allthapisajj yaqha jukʼamp jachʼa utanaka lurañ amtäna. Uka jaqejj akham amuyäna: “Ukaruw taqe juyranaksa, ukhamarak taqe kuna utjirejjsa imäjja. Ukatsti sarakïwa: Walja yänakaw jichhajj utjitu, walja maranakatak imata, ukatsti samarasï, manqʼasï, umasï, kusisirakï” sasa. Uka qamiri jaqesti janiw amuyaskänti uka aruma jiwañapjja (Luc. 12:16-20).

Jilïr jaqëjjasajja, chuymankipstatäjjä ukhajj kuna qollqempikiraki jakasïsti sasaw llakissnajja. Ukatwa tantachäw urunakajj jila horanak trabajañätwa sasin parljjsna, jan ukajj inas kuntï cristianjamajj lurañasäki ukanak jan phoqksnati. Ukajj janipuniw walïkaspati. Ukhamajja wayn tawaqöskstan ukat Diosatak sapürutjam irnaqtʼañajj wali askïtap yatstan ukhajj ¿kunsa lurañani? ¿Qollq imañatak trabajiñätwa sasin amuyasati precursorjam irnaqtʼañ jaytjjañäni? ¿Janit wayn tawaqökasin Diosatak jukʼampi irnaqtʼañajj wakiskaspa? Cheqansa, qharürojj jakaskchiñäni janis uk janiw yatktanti.

 Machjayir umañanaka.

“Machir jaqenakampejj jan mayachasimti” sasaw Proverbios 23:20 qellqatajj ewjjtʼistu. Maynitï machjayir umañanaka wal umañ munchejja, sapüruw umjjaspa, ukat janiw machjasiñ amtampi umkti, jan ukasti kusistʼañatakikiwa sasaw parljjaspa. Jiwasatï kusistʼañataki machjayir umanak umstanjja, kunas chuymasan utji uk wali amuyumpi amuytʼasiñäsawa.

Amigonaka.

Kunjamatsa Diosar jan iyawsiri jaqenakampejj parlakipuntanwa. Sañäni, yateqeri jan ukajj trabajonkir masinakasampi, jan ukasti Diosan Arupat yatiyktan uka jaqenakampi. Ukampis jupanakampi sarnaqasksna jan ukajj amigopäñ munsna ukhaw jan walïkaspati. Ukhamächi ukhajja, suma jaqenakächejjaya sasak inas parljjsna. Ukampis Bibliajj qhan akham amuytʼayistu: “Jan sallqjayasipjjamti [...]. ‘Jan wali jaqenakampi sarnaqañajj suma luräwinaka chhaqhayañawa’” sasa (1 Cor. 15:33). Kunjamtï mä jukʼa venenojj suma umar jan waltʼayjjaspajja, ukhamarakiw Diosar jan yupaychiri jaqempi chikachasisajj Diosar yupaychañanjja jan walin uñjassna. Ukat tiempompejja, jupanakjamaw amuysna, isissna, parlsna ukat kuns luraraksna.

Kʼuchirtʼäwinaka.

Jichhaki uñstki uka aparatonakajja, kunayman toqetwa kʼuchirtʼayistaspa. Ukampis ukanakat yaqhepajj janiw mä cristianotakejj walïkiti. Qʼañu arunakajj janipuniw kunäkipansa jumanak taypin aytasiñapäkiti sasaw Pablojj säna (Efe. 5:3, MT). Ukat ¿chuymasatï jan walinak uñjaña jan ukajj ischʼukiñ munchi ukhasti? Kunjam samartʼañasa ukat kʼuchirtʼañasa sapa maynitäjjewa sasin inas maynejj sischispa. Ukampisa, Pablon ewjjtʼanakapat amtapuniñäni, janipuniw kunäkipansa jan walinak uñchʼukiñasäkiti ni istʼañasäkisa.

Jiwasatï chuymasampi sallqjayasisa amuyusarjamak jan walinak lurañ yatitästan ukhajja, ukanak apanuksnawa (Efe. 4:22-24). Pä sarnaqäwit parltʼañäni.

Miguel * jilatajja, kuntï yänakanïñat amuykäna uk mayjtʼayañapaw wakisïna. Jupajj akham siwa: “Warmijampi, yoqajampi nayampejja, kawkïr markantï suma qamasiñasa ukat wali suma ukat jichhak uñsti uka aparatonakanïñajj wali askit uñjatäki uka markatäpjjtwa. Jan qollqe chuymäsaw akapachan utjki uka yänak jikjjatä sasaw amuyayäta. Ukat mä qhawqha tiempotjja, yänak jikjjatañajj jan tukuskiri mä thakinjam sarañäkaspas ukhamätapwa amuyasiyäta. Jan qollqe chuymäñataki ukat kuna amtanakatï chuymajan utjki ukanak apanukuñatakiw Jehová Diosar mayista. Ukat familiajajj taqe chuyma Jumar yupaychañ muni sasaw sarakta. Kunatï jakasiñatak munaski ukampik jakasiñatakiw amtawayapjjta ukat kawkhantï Diosan Arup yatiyirinakajj munaski ukharuw sarjjapjjta. Ukat mä qhawqha tiempotjja precursoräjjapjjayätwa. Kusisita ukat sum jakasiñatakejja janiw akapachan taqe yänakanïñajj wakiskiti, ukwa amuyapjjta”.

Kunatsa chuym wali amuyumpi uñakiptʼasiñasa, ukwa Lee sat jilatan sarnaqäwipajj uñachtʼayi. Uk lurasajja jan wali amigönakapwa jaytanuküna ukat akham sarakiwa: “Trabajojanjja, anqa markanakat jutiri aljirinakampiw tantachasiñajäna. Uka tantachäwinakan machjayir umañanak utjatap yatchiyätsa, wal ukankañ muniriyäta. Walja kutiw niya machjasiñampiyäta, ukat qhepatak chuym wal pisayasirïta. Ukhaw chuymaj wali amuyumpi uñakipasiñajäna. Kunansa pantjasiskayäta ukjja, Biblian ewjjtʼanakapa ukat irpir chuymaninakan ewjjtʼanakapaw amuytʼasiñ yanaptʼawayitu. Jehová Diosar jan munasir amigonakwa thaqhaskatätjja. Jichhajja, teléfono toqew negocionak lurjjta ukat aljirinakampejj janiw sinti chikachaskti”.

Kunas chuymasan utji ukjja, jiwas pachpaw uk wali amuyumpi amuytʼasiñasa. Ukatakejja Jehová Diosaruw mayisiñasa, Jupaw “chuyma manqhankir amtäwinak” sum yati (Sal. 44:21). Ukat Diosan Arupaw utjarakistu, ukajj mä espejor uñtatawa, ukaw kunjam jaqëtansa uk amuyasiñ yanaptʼarakistu (Sant. 1:22-25). Ukhamarusa, Jehová Diosajj Bibliat apstʼat qellqatanakana ukat tantachäwinakansa wali suma ewjjtʼanakwa churarakistu. Taqe ukanakampiw chuymas jarkʼaqasiñäni ukat kunatï Diosar kusisiyki uk lurarakiñäni.