Nayrajja, walja markanakanwa jan wali luririnakat yaqheparojj mä qoqaru jan ukajj mä lawar chʼakkatas jiwayapjjerïna. Romanonakajj mä lawaruw ñachkatapjjerïna jan ukajj chʼakkatapjjerïna, ukat walja urunak jan manqʼata, umat pharjata, lupjata, thayjata ukat yaqha ukhamanakan tʼaqhesisaw jiwapjjerïna. Romanonakatakejj ukham jiwayañajj maynir jiskʼachañatakïnwa, ukatwa jan askit uñjata jan wali luririnakarojj ukham jiwayapjjerïna.

¿Ukhamarakti nayra Israel markan jiwayapjjerïpachäna? Moisesar churat Leyinakajj akham sänwa: ‘Kawkïri jaqetejj mä jachʼa jucha luratap layku jiwayatäsin lawar chʼakkatatäni’ (NM) ukat “janchipajj janiw uka arumajj ukan warkusiñapäkiti, jan ukasti uka kipka urpachaw imantjjapjjañama” sasa (Deu. 21:22, 23). Ukhamajja, Hebreo Arut Qollan Qellqatanaka qellqaskäna uka tiemponjja, jiwayañatak juchañchat jaqejj nayraqatajj jiwayatänwa ukatwa mä qoqaru jan ukajj mä lawar chʼakkatatäna.

Uka toqetjja akham sasaw Levítico 20:2 qellqatajj qhanañchi: “Kawkïri israelita jaqetejja jan ukajj jumanak taypina jakiri yaqha markat jutiri jaqenakasa, wawanakapa Moloc sat diosaru sacrificiot loqtani ukasti qalampi kʼupjasina jiwayatäñapawa, taqe jaqenakaw juparojj kʼupjapjjañapa” sasa. Ukhamajja, khitinakatï ‘ñanqha ajayunïna, jan ukajj yatirïna’ ukanakajj ukhamarakiw taripatäñapäna, mä arunjja, jiwayañkamaw ‘qalampi kʼupjatäñapäna’ (Lev. 20:27).

Ukat Deuteronomio 22:23, 24 qellqatajj akham sarakiwa: “Mä jan chacha uñtʼir tawaqotejj casarasiñatak parlatächi, ukatsti yaqha jaqempi markan jikintasisinjja ikintarakini, ukanakajj panpachaniw markan tribunalapar apatäpjjani, kawkhantejj qalampi kʼupjasina juchañchasin jiwayatäpjjani, tawaqosti markan jan artʼasitap layku, chachasti jaqe masipan warmipar deshonratap laykuraki. Ukhamatwa jumanak taypin ñanqha lurir jaqenakarojj tukjapjjäta” sasa. Ukhamasti, nayra israelitanakajj sinti jan walinak luririnakarojj qalampi kʼupjasaw jiwayapjjerïna. *

Deuteronomio 21:23 qellqatajj akham siwa: “Diosansti maldecitaw kawkïri jaqetejj qoqar warkkatata jiwki ukajja” sasa. Mä jan wali luriri, mä arunjja, ‘Diosan maldecita’ jaqen cuerpopjja, taqenin uñjapjjañapatakiw qoqaru jan ukajj lawaru chʼakkatapjjäna, ukhamat mayni israelitanakan amuyasipjjañapataki.