1. Guerranak utjkäna ukhajja, ¿kunsa cristianöpjjtwa sirinakan pʼeqtʼirinakapajj lurapjjäna?

CRISTIANONAKAJJ guerranakar sarasin yaqha markankir jaqenakar jiwarayapjjaspa ukti ¿Diosajj munpacha? Cheqansa, ukwa pasïr patak maranakan cristianöpjjtwa sirinakajj lurawayapjje. Catoliconakan pʼeqtʼirinakapasa ukhamarak cristianot uñtʼat yaqha religionanakan pʼeqtʼirinakapasa, soldadonakampiru armamentonakapampiruw bendiciwayapjje, ukhamat jaqe masinakapar jiwarayapjjañapataki. Payïr Jachʼa Chʼajjwäwinwa kunjamsa uka religionanakajj guerranakar yanaptʼawayapjje ukajj qhan uñjasiwayi.

2, 3. Payïr Jachʼa Chʼajjwäwirusa, yaqha guerranakarusa, ¿Jehová Diosan Qhanañchirinakapajj mitisipjjänti, ukat kunatsa?

² Jehová Diosan Qhanañchirinakapajja, janiw Payïr Jachʼa Chʼajjwäwirojj mitisipkänti. Jupanakajja, kuntï Jesusajj lurkäna ukat yatichkarakïna ukarjamaw sarnaqapjjäna. Jesusasti sänwa: “Jumanakatejj maynit maynikama munasipjjätajja, taqeniw amuyapjjani nayan discipulonakajjäpjjatama” sasa (Juan 13:35). Ukatjja, uka jilat kullakanakajj kuntï apóstol Pablojj Corinto markankir cristianonakar qellqkäna uka arunakarjamaw  sarnaqapjjarakïna (2 Corintios 10:3, 4 liytʼañataki).

³ Cheqa cristianonakajj kuntï Bibliajj siski ukarjamaw concienciap yatichapjje ukat ukarjamaw sarnaqapjjaraki, ukatwa nuwasiñsa jan yateqapkiti, ni guerranakarus sarapkiti. Bibliarjam sarnaqapjjatap laykojja, kunayman marani walja waranqa jilat kullakanakaw arknaqata uñjasiwayapjje. Waljaniw carcelanakan llawintata, chʼama tukuñ trabajonakan tʼaqhesiyata uñjasiwayapjje. Alemanian nazismo gobiernojj apnaqkäna ukhajja, yaqhep jilat kullakanakajj jiwayat kunaw uñjasipjjäna. Ukham jan walinsa uñjasipkchïnjja, Europa toqenkir jilat kullakanakajj Jehová Diosan Reinopat yatiyañjja janiw armasipkänti. Ukatwa carcelanakansa, campos de concentración sat lugaranakansa ukat jaya markanakaru apatäpkäna ukanakansa Diosan Reinopat yatiyapjjäna. * 1994 maranjja, kunapachatï Ruanda markan jiwarayasipkäna ukhajja, janiw jilat kullakanakajj mitisipkänti. Janirakiw nayra Yugoslavia sat markajj tʼaqjjtasin guerrankkäna ukhasa mitisipkänti.

4. Guerranakar jan mitisir uñjapjjestu ukhajja, ¿kunsa walja jaqenakajj amuyapjje?

⁴ Jehová Diosan Qhanañchirinakapjamajja, janipuniw guerranakar mitisktanti, uk uñjasaw walja jaqenakajj cheqapuni Diosampiru jaqe masisampiru munasitas amuyapjje. Ukatwa cheqa cristianot uñtʼapjjestu. Ukatjja, ¿kunanak uñjasarakis cheqa cristianöpjjatas walja jaqenakajj amuyapjje?

5. ¿Kuna mayjtʼäwsa Jesusan nayra arkirinakapajj uñjawayapjje?

⁵ Kunapachatï Jesusajj aka Oraqen Diosat yatichañ qalltkäna ukhajja, qawqha wakiskiris Diosan Reinopat yatiyañajj ukwa uñachtʼayäna. Aka oraqpachan yatiyasiñapatakejja, Jesusajj nayraqatjja 12 arkirinakaparuw ajllïna, ukjjarusti 70 arkirinakaparurakiw Diosan Reinopat yatiyapjjañapatakejj wakichtʼarakïna (Luc. 6:13; 10:1). Jupanakajj judionakaruw qalltan yatiyapjjañapäna, ukampis qhepat ukajj ¡mayjtʼänwa! Jesusan arkirinakapajj aka oraqpachankir markanakaruw puripjjañapäna (Hech. 1:8).

6. ‘Diosatakejj taqe casta jaqes mayakiwa’ sasajj ¿kunatsa Pedrojj säna?

⁶ Diosajja, Cornelio sat chachan utaparuw apóstol Pedrorojj khitäna, Corneliosti yaqha markankirïnwa, janiw judiökänti. Ukanwa, “Diosatakejj taqe casta jaqes mayakïtapa” Pedrojj amuyäna. Qhepatsti, Cornelio chachasa utapankirinakasa bautisasjjapjjarakïnwa (Hech. 10:9-48). Ukhat aksaruwa Diosan Reinopat aka oraqpachan yatiyasiski. Ukhamatwa taqe markankir jaqenakajj kunatï cheqäki uk istʼapjje ukat ukarjamas sarnaqapjjaraki.

7, 8. Walja jaqenakaru Diosan Reinopat yatiyañatakejja, ¿kunsa Jehová Diosan markapajj luraski? (7 janankir foto uñjjattʼam.)

⁷ Jichhürunakanjja, Jehová Diosan Qhanañchirinakapar pʼeqtʼasipki uka jilatanakajja, ukhamarakiw Diosan Reinopat yatiyasiñapatakis yatichasiñapatakis wal chʼamañchtʼasipki. Niya kimsaqallqo millón jilat kullakanakaw Criston yatiyäwinakapa sojjta patakatsa jila arunakat yatiyasipki, ukat jukʼamp arunakatwa yatiyapjjarakini. Jehová Diosan Qhanañchirinakapajja, utat uta yatiyirita ukhamarak callenakan yatiyirit uñtʼatäpjjewa. Callenakansti awisajj Bibliat apstʼat qellqatanakjja, mesanakaru ukat carritonakaruw uttʼayapjje.

⁸ Biblia ukhamarak Bibliat apstʼat qellqatanaka yaqha arunakar jaqokipañatakejja, 2.900 jila traductoranakaruw sum wakichtʼasiwayi. Jupanakajj janiw wali uñtʼat arunakaruki jaqokipapkiti, jan ukasti jan uñtʼat arunakarusa jaqokipapjjarakiwa.  Yaqhep arunakajj janis uñtʼatäkchejja, walja millón jaqenakaw uka arunak parlapjje. Amuytʼañataki, España markanjja, walja millón jaqenakaw catalán sat aru parlapjje. Jichhanakakiw catalán aru ukhamaraki uka arut saraqer arunaka parlasiñapatakejj wasitamp chʼamañchasiwayi. Jehová Diosan Qhanañchirinakapajja, catalán arurojj walja qellqatanakwa apsjjapjje, ukatjja, uka arutwa tantachäwinakas apasjjaraki, ukhamat chuymanakaparu purtʼañataki.

9, 10. Diosan markapajj taqe jaqenakan Diosar uñtʼapjjañapwa muni sasajj ¿kunatsa sissna?

⁹ Walja markanakanwa Diosan arunakapajj yaqha arunakaru jaqokipasiski ukat yatichasiskaraki. Amuytʼañataki, México markanjja, jilapartejj español arwa parlapjje, ukampis waljaniw utanakapanjja yaqha arunaka parlasipjjaraki. Uka arunakat maynïrejja, maya sat aruwa. Uka arur jaqokipirinakarojja, sucursalajj kawkhantï uka aru parlapki uka markan traducipjjañapatakiw khitawayi, ukhamat sapüru uka aru parlapjjañapataki ukat istʼapjjañapataki. Nepal sat markat parltʼarakiñäni, uka markanjja 29 millón jaqenakaw jakasipjje. Ukanjja, 120 jila arunakwa parlapjje, ukampis 10 millonats jilaniw nepalés sat arjja parlapjje, yaqha aru parlirinakatsa waljaniw nepalés sat arjja yatipjjaraki. Bibliat apstʼat qellqatanakasas uka arut apsusiskarakiwa.

¹⁰ Diosan Reinopat suma yatiyäwinakajj taqe markanakaru yatiyasispa ukwa Jehová Diosan markapajj muni, ukatwa uk sum phoqañatakejj walja arunakaru jaqokipasiñapataki wal chʼamañchaski. Jehová Diosan Qhanañchirinakapajja, walja millón tratadonaka, folletonaka ukhamarak revistanakwa aka oraqpachan ukhamaki lakirasipki. Qawqha qollqetï wakiski ukjja, sapa mayniw chuymapatjam irthaptʼasipjje, ukhamatwa Jesusan arunakaparjam phoqasipki. Jupasti sänwa: “Taqe akanaksti inakiw lurapjjäta, ukanak lurañataki chʼam inaki katoqapjjatam layku” sasa (Mat. 10:8).

11, 12. Jehová Diosan Qhanañchirinakapana aka oraqpachan yatiyapjjatapatjja, ¿kunsa waljanejj amuyapjje?

¹¹ Jehová Diosan Qhanañchirinakapajja, cheqa yatichäwi jikjjatasajja, taqe chuymaw chʼamachtʼasipjje taqe markanakaru kunayman parlani jaqenakaru purtʼañataki. Waljanirakiwa qawqhatï jakañatakejj wakiski ukampik jakasisa yatiyasipki, yaqha arunaksa yateqapjje ukat yaqha markanakarus sarapjjaraki.  Jehová Diosan Qhanañchirinakapajj Diosan Reinopat aka oraqpachan yatiyasiñapatakiw chʼamachasipjje, uk uñjasaw walja jaqenakajj Jesusan cheqa arkirinakapätas amuyapjje.

¹² Cheqankatasatjja janiw mä jukʼsa pächasktanti, ukatwa taqe ukanak lurtanjja. Ukampis ¿kunanakampi uñjasas akapunïskiw cheqa religionajja sasin waljanejj sapjje? (Romanos 14:17, 18 liytʼañataki.)

13. ¿Kunjamsa Jehová Diosan Qhanañchirinakapajj qʼoma sarnaqapjje?

¹³ ¿Kunatsa jichha tiempo cristianonakajj cheqa religionäpjjatapat jan pächasipki? Walja maranaka Diosar servir mä jilatajj akham siwa: ‘Jehová Diosan markapan qʼomäñapatakejja, wal chʼamachasi, khitir cheqañchañ wakischi ukhasa, cheqañchasiwa’ sasa. ¿Kunjamatsa Diosan markapan ukham qʼoma sarnaqañajj utji? Kuntï Diosan Arupan siski ukarjam sarnaqañatakiw jilat kullakanakajj chʼamachasipjje, ukat Jesusampita arkirinakapampita yateqasiñatakiw chʼamachasipjjaraki. Diosan kamachinakapar jan istʼapjjatapatjja, mä qawqhanikiw Diosan markapat jaqsuta uñjasipjje. Jehová Diosan Qhanañchirinakapat niya taqpachaniw jan juchanak lurasa qʼoma sarnaqapjje, khitinakatï nayrajj jan Diosatakjam sarnaqapkäna ukanakasa ukhamarakiw Dios nayraqatan qʼom sarnaqjjapjje (1 Corintios 6:9-11 liytʼañataki).

14. Diosan markapat jaqsuta uñjasiwayapki ukanakat waljanejj ¿kunsa lurawayapjje, ukat kunjamas tamajj jikjjatasi?

¹⁴ Khitinakatï Bibliarjama Diosan markapat jaqsuta uñjasiwayapki ukanakajja, jan wali luratanakapat arrepentisisajj waljaniw wasitampi kuttʼanjjapjje, ukat Diosan markapansti wali sum katoqjjapjjaraki (2 Corintios 2:6-8 liytʼañataki). Diosan kamachinakaparjam sarnaqatas laykojja, tamajj wali qʼomaw jikjjatasi. Yaqha religionanakanjja, munañaparjamakiw sarnaqapjje, ukampis Jehová Diosan Qhanañchirinakapajja, kuntï Diosajj siskistu ukarjamaw sarnaqtanjja, ukatwa waljanejj cheqa yatichäwinakarjamapuni sarnaqatas amuyapjje.

15. Cheqa religionankatapat jan pächasiñatakejja, ¿kunas mä jilatar yanaptʼawayi?

¹⁵ Walja maranak Diosar serviri yaqhep jilat kullakanakajj ¿kunatsa cheqa religionanktanwa sasin sapjje? 54 marani mä jilatajj akham siwa: “Waynäkayäta ukhatpachwa aka kimsa yatichäwinakarjam Diosar serviwayta: 1) Diosajj utjaskapuniwa, 2) Bibliajj Diosan arupawa, 3) Jehová Diosajja, Qhanañchirinakaparuw bendiciski ukat amtanakapsa jupanak toqerakiw phoqaski. Walja maranaka Bibliat yatjjatasajja, uka kimsa yatichäwinakat wal amuykipirïta, ukhamat kuntï yateqkta ukajj ukarjamapunïskiti uk sum amuyañataki. Uka kimsa yatichäwin cheqapunïskatapjja, sapa maratwa jukʼamp sum amuyawayta, ukaw Diosar jukʼamp confiyañataki ukat cheqa religionankatajat jan pächasiñataki yanaptʼawayitu” sasa.

16. Cheqa yatichäwit jan pächasiñatakejja, ¿kunas mä kullakarojj yanaptʼawayi?

 ¹⁶ Nueva York markankir Betel utan irnaqer mä casada kullakajj akham siwa: “Jehová Diosan Qhanañchirinakapakiw Diosan Jehová sutipjja yatiyapjje. ¡Diosan sutipasti niya 7.000 kutiw Biblianjja uñsti!” sasa. Ukatjja, kullakajj 2 Crónicas 16:9 qellqatwa aytarakïna, ukansti akham siwa: “[Jehová] Tatitusti sumwa uñjaski taqe akapachana kunanakatejj lurasiski ukanakjja, ukhamata chʼama churañataki khitinakatejj cheqpachana juparu iyawsasipki [mä arunjja, ‘taqe chuyma servipki’, NM] ukanakaru” sasa. Ukjjarusti kullakajj sarakïnwa: “Cheqa yatichäwinakaw taqe chuyma serviñataki yanaptʼawayitu, ukhamat Jehová Diosan chʼamapa katoqañataki. Jehová Diosamp sum apasiñaw taqe kunat sipansa nayatakejj wali askejja. Ukhamarusa wal Jesusarojj yuspärarakta, jupaw Diosar uñtʼañataki yanaptʼawayistu. Ukanak yatiñaw nayrar sartaskakiñatakejj yanaptʼitu” sasa.

17. Diosajj janiw utjkiti sasin nayrajj amuykäna uka mä jilatajja, ¿kamsisa, ukat kunatsa? Uk qhanañchtʼam.

¹⁷ Diosajj janiw utjkiti sasin nayrajj amuykäna uka mä jilatajj akham siwa: “Kunapachatï Diosan luratanakap uñjkta ukhajja, Diosajj jiwasan kusisita jakasiñas munatapwa amuyta. Ukhamasti Jehová Diosajj niyaw tʼaqhesiñanak chhaqtayjjani. Ukatjja, akapachajj sapürutjamaw qʼal aynachtʼaski, ukampis Diosan markapanjja, munasiñasa, kusisiñasa, Diosar confiyañasa jukʼampiw jiljjattaski. Jehová Diosan ajayupakiw ukham milagro utjayaspa” sasa (1 Pedro 4:1-4 liytʼañataki).

18. ¿Kunsa jumajj uka pä jilatanakan arsupjjatapat amuytʼasma?

¹⁸ Walja maranak Diosar servir mä jilatajja, cheqankatapat akham sarakïnwa: “Nayrïr cristianonakjam sarnaqañatakiw Jehová Diosan Qhanañchirinakapajj wal chʼamachasipjje, ukwa walja maranaka Bibliat yatjjatasajj amuyawayta. Walja markanakar viajesajja, jilat kullakanakajj kunja mayachtʼatäpjjesa ukwa uñjaniwayta. Biblian cheqa yatichäwinakap yatisajja, wali kusisita chuymas chuyma ukhamaw jikjjatasta” sasa. Sojjta tunkatsa jila marani mä jilatajja, Jehová Diosan Qhanañchirinakapajj Jesusaruw taqe chuyma iyawsapjje sasaw arstʼäna. Jupasti sänwa: “Jiwasajj Jesusan sarnaqäwipsa, yatichäwinakapsa wali sum yatjjattanjja, ukat wali askit uñjaraktanjja. Ukhamarusa, Jesús toqe Diosar jakʼachasiñatakejja, nayra jakäwinakasjja apanukuwaytanwa. Jupan jiwatap toqekirakiw qhespsna. Ukatjja, jiwatanak taypit Jesusan jaktanitapsa yatiraktanwa, kunattejj uñjirinakaw utjäna” sasa (Hechos 10:40-43 liytʼañataki).

19, 20. 1) Roma markankir cristianonakarojja, ¿kunsa Pablojj amtayäna? 2) Cristianonakjamajja, ¿kunsa lurañasa?

¹⁹ Niyakejjay Biblian cheqa yatichäwinakap yatstanjja, janiw jiwasatakik uk imjjasiñ munktanti, jan ukasti jaqe masisar munasitas laykojj yatichañwa muntanjja. Pablojja, Roma markankir jilat kullakanakarojj akham sänwa: “Lakamampitejj Jesusarojj Tatituw sätajja, ukat chuymamansti iyawsarakïta Diosajj jiwatanak taypit [‘jaktayatapa’, NM] ukkhajja, qhespiyatäyätawa. Chuymampiwa iyawsañajja Diosampi katoqatäñatakejja, lakampisti arsuñawa Jesucriston qhespiyatäñatakejja” sasa (Rom. 10:9, 10).

²⁰ Jehová Diosan Qhanañchirinakapajj cheqankatasat janiw pächasktanti. Ukatjja, Diosan Reinopat yaqhanakar yatichañajj kunja askisa uksa sum yatiraktanjja. Ukhamajj yatiykasajja, Bibliampipuni suma amuytʼayañäni, ukat cheqankatasjja sarnaqatasampi uñachtʼayarakiñäni.