1, 2. 1) ¿Kuna uñachtʼäwitsa Jesusajj amigonakapar parläna? (Aka janankir dibujo uñjjattʼam.) 2) Uwijanakampita cabritonakampita uñachtʼäwitjja, ¿kuna jisktʼanakarusa aka yatichäwin qhanañchaskañäni?

JESUSAJJA, Pedro, Andrés, Santiago, ukat Juan amigonakapampiw parlaskäna. Jupajja, amuyasiri cheqapa uywatata, tunka virgen tawaqonakata, ukat qollqe katoqeri uywatanakat parlañwa tukuyaski. Ukampis mä uñachtʼäwit parlañajj utjaskakiwa. Kuna tiemponsa “jaqen Yoqapajj” ‘markanakar’ juzgañataki jutani uka toqetwa Jesusajj parlañ qallti. ¿Kunjamsa discipulonakajj istʼapjjpachäna uk amuysnati? Uka uñachtʼäwit parlkasajja, pä tamatwa parläna: uwijanakampita cabritonakampita. Ukjjarojja, ‘reyin jilanakapatwa’ parlarakïna (Mateo 25:31-46 liytʼañataki).

² Jehová Diosan markapatakejja, uka uñachtʼäwit yatiñajj wali askipuniwa. ¿Kunatsa? Ukanjja, kunjamsa jaqenakajj jutïrin uñjasipjjani uka toqetwa qhanañchi. Uka uñachtʼäwinjja, Jesusajj pä tamatwa parläna, mä tamajj tʼunjatäñapänwa, maynisti wiñay jakañwa katoqañaparakïna. Ukhamasti, uka uñachtʼäwejj kun sañsa muni uk sum amuyañasawa ukat ukarjamaw sarnaqañasaraki, ukham lurasakiw wiñay jakañ katoqañäni jan ukajj tʼunjatas uñjasiñäni. Aka yatichäwinjja, aka jisktʼanakaruw qhanañchaskañäni:  ¿Kunjamsa Jehová Diosajj uka uñachtʼäwi amuytʼañatak yanaptʼawayistu? Yatiyañajj wali wakiskirïtapwa qhanañchi sasajja, ¿kunatsa sissna? ¿Khitinakas Diosan arunakap yatiyapjjañapa? ¿Kunatsa ‘reyirusa’ ‘jilanakaparusa’ jan jitheqtas jichhürunakan yanaptʼañasa?

3, 4. 1) Uwijanakampita cabritonakampit parlir uñachtʼäwit sum amuyañatakejja ¿kunsa yatiñasa? 2) ¿Kunsa Zionʼs Watch Tower revistajj 1881 maran qhanañchäna?

³ Uwijanakampita cabritonakampit parlir uñachtʼäwit sum amuyañatakejja, khitinakatsa parli, ukat kunapachas jaqenakar juzgasini ukanakwa yatiñasa. Ukatjja, kunatsa yaqhep jaqenakarojj uwijanakarjama, yaqhepanakarusti cabritonakarjam uñjaspacha uksa yatiñasarakiwa.

⁴ Khä 1881 maranjja, Zionʼs Watch Tower revistajj akhamwa qhanañchäna: ‘“Jaqen Yoqapa” sasin “reyit” parlki ukajj Jesusawa’ sasa. Ukat Jesusajj ‘jilanakapat’ parlkäna uka toqet akham sasaw uka tiempon Bibliat Yatjjatirinakajj amuyapjjäna: “Criston jilanakapajja, alajjpachan jupamp chika apnaqapkani ukanakawa, ukat jan juchanëjjasin aka Oraqen jakapkani ukanakas jilanakaparakiwa” sasa. Ukatjja, ‘Jesusajj waranqa maranak apnaqjjani ukhaw uwijanakampiru cabritonakampirojj jaljasini, khitinakatï Diosat munasirïñ yateqapkani ukanakajja, uwijanakjam uñtʼatäpjjaniwa’ sasaw amuyapjjarakïna.

5. Uwijanakampita cabritonakampit parlir uñachtʼäwitjja, ¿kunas 1920 maranakan qhanañchasïna?

⁵ Uwijanakampita cabritonakampit uñachtʼäwejja, kun sañsa muni uk sum amuytʼañatakiw Jehová Diosajj 1920 maranak qalltan yanaptʼawayistu. The Watch Tower octubre 15, 1923 revistajja, akham sasaw wasitat qhanañchäna: “‘Jaqen Yoqapajja’ Jesusawa” sasa. Ukampis Criston jilanakapajja, khitinakatï alajjpachan jupamp chik apnaqapkani ukanakaw sañatakisa, ukat uwijanaka sasin uñtʼatäpki ukanakajj Jesusan apnaqataw aka Oraqen jakasipjjani sañatakisa, Biblian walja jiskʼa tʼaqanakapampiw qhanañchäna. ¿Kunapachas uwijanakampiru cabritonakampirojj jaljaspachäni uk qhanañchpachänti? Jïsa, qhanañchänwa. Uñachtʼäwinjja, Criston jilanakaparu yanaptʼir jaqenakampita, jan yanaptʼir jaqenakampitwa parli. Ajllitanakajj Jesusamp chik waranq maranak apnaqañataki janïr alajjpachar sarapkani ukhawa, mä arunjja, aka Oraqenkasipkani ukhaw uka jaqenakarojj jaljasiñapäna. ¿Kunatsa jaqenakarojj uwijanakarjam uñtʼasiñapäna? Uka revistajj sänwa: “Jesusar iyawsatapata ukat Diosan Reinopakiw sumankañ aka Oraqer apanini sasin iyawsatapatwa jaqenakarojj uwijanakarjam uñtʼasini” sasa.

6. Uwijanakampita cabritonakampit parlir uñachtʼäwitjja, ¿kunjamas 1995 maran amuyasjjäna?

⁶ Walja maranakaw Jehová Diosan Qhanañchirinakapajj akham sasin amuyayätanjja: “Jaqenakajj aka qhepa urunakanwa juzgatäsipki, Diosan arunakaparojj istʼasipkiti janicha ukarjamaw uwijati jan ukajj cabritocha ukajj yatisi” sasa. Ukampis 1995 maranjja, uka uñachtʼäwejj jukʼamp sumaw amuyasjjäna. La Atalaya octubre 15, 1995 revistanjja pä yatichäwinakaw apsusïna, ukanjja Mateo 24:29-31 (liytʼañataki) ukat Mateo 25:31, 32 (liytʼañataki) qellqatanakan Jesusan arunakapajj uñstki ukaw qhanañchasïna. * Nayrïr yatichäwinjja, akham sänwa: “Uwijanakampiru cabritonakampirojja, jutïr urunakanwa jaljasini” sasa. Ukhamajj ¿kunapachas ukajj pasañapäna? Uka pachpa yatichäwejj saskakïnwa: “Mateo 24:29, 30 qellqatan parlaski uka ‘llakisiña urojj [jan  ukajj tʼaqhesiñajj]’ qalltkani, ukat jaqen Yoqapajj ‘jachʼa kʼajkir kankañapampi’ jutkani ukapachaw ukajj phoqasini. [...] Ukatjja, aka ñanqha pachajj tukuskani ukhaw Jesusajj jaqenakar juzgani, juchañchani ukat tukjarakini” sasa.

7. Uwijanakampita cabritonakampit parlir uñachtʼäwit ¿kunjamsa jichhürunakan amuytanjja?

⁷ Jichhürunakanjja, uwijanakampita cabritonakampit parlir uñachtʼäwit sum amuyjjtanjja. ¿Khitinakatsa parlejja? “Jaqen Yoqapajja” jan ukajj “reyejja” Jesusawa. “Jilanakapasti”, jupamp chika alajjpachan apnaqapkani uka ajllit cristianonakawa (Rom. 8:16, 17). “Ovejanakampi” “cabritonakampejja” taqe markanakankir jaqenakawa. ¿Kunapachas taqe uka jaqenakarojj jaljasini? Niya qalltañampïski uka jachʼa tʼaqhesiñ uru tukuyarüniwa. ¿Kunatsa yaqhep jaqenakarojj uwijanakarjam uñtʼasini, yaqhepanakarusti cabritonakarjamaraki? Aka Oraqenkasipki uka ajllit cristianonakarojja, mä arunjja, Criston jilanakapar kunjamsa uñjapjje ukarjamaw juzgasini. Kunjamtï uñjktanjja, Jehová Diosajj marat maratjamaw Mateo 24 ukat 25 jaljanakan jikjjataski uka uñachtʼäwinak qhanañchistu. Ukham qhanañchatapat walpun Jupar yuspärtanjja.

8, 9. ¿Kunatsa uwijanakarjam uñtʼatäpki ukanakarojj ‘aski jaqenaka’ sasejja?

⁸ Uwijanakampita cabritonakampit parlir uñachtʼäwinjja, Jesusajj janiw Diosan arunakap yatiyañat parlkänti. Ukhamajja, yatiyañajj wali wakiskirïtapwa qhanañchi sasajja, ¿kunatsa sistanjja?

⁹ Nayraqatajj ak amtañasawa: Jesusajj mä uñachtʼäwitwa parlaskäna, janiw cheqpach uwijanakampiru cabritonakampiru jaljañat parlkänti. Janirakiw uwijanakarjam uñtʼaski ukanakajj cheqpachapun Criston jilanakapar manqʼa churapjjañapata, isiyapjjañapata, carcelanakar uñjiris sarapjjañapata parlkänti. Jan ukasti, kunjam chuymanïpjjañapasa ukwa uka uñachtʼäwimpejj qhanañchañ munaskäna. ‘Aski jaqenaka’ sasaw Jesusajj jupanakar säna, ¿kunatsa? Jupanakajja, ajllit cristianonakat mä qawqhani aka Oraqen utjaskatapwa amuyapjje, ukatjja taqe chuymaw jupanakar aka qhepa urunakan yanaptʼapjje (Mat. 10:40-42; 25:40, 46; 2 Tim. 3:1-5).

10. ¿Kunjamsa uwijanakajj Criston jilanakapar yanaptʼapjjaspa?

¹⁰ Ukatsti, kuna toqetsa Jesusajj parlaskäna uk amuytʼañasarakiwa. Kunapachatï uwijanakampita cabritonakampit Jesusajj parläna ukhajja, jupan kuttʼaniñapata ukat aka qhepa urunakan kunanakas pasañapäna uka toqenakatwa yatichaskäna (Mat. 24:3). Amuytʼañataki, jupajj akham sänwa: “Diosan reinopat aka suma yatiyäwisti aka oraqpachanwa yatiyatäni” sasa (Mat. 24:14). Ukat uwijanakampita cabritonakampita janïr parlkasajja, qollqe katoqerinaka uñachtʼäwitwa parläna. Kunjamtï pasïr yatichäwin uñjawayktanjja, Jesusajj uka uñachtʼäwimpejja, jan inaktʼas yatiyapjjañapatakiw ajllit ‘jilanakapar’ amtayaskäna. Ukampis Jesusajj alajjpachan apnaqañapäkäna uka tiemponjja, ¿kunjamsa aka Oraqenkir mä qawqha ajllitanakajj Oraqpachan yatiyapjjañapäna? Uwijanakampita cabritonakampita parlir uñachtʼäwejja, yanaptʼirinïpjjaniwa sasaw qhanañchäna. ¿Kunjamsa uwijanakajj yanaptʼapjjañapäna? Mä suma yanaptʼajja, Diosan arunakapat yatiyañawa. ¿Kun sañsa ukajj muni? ¿Qollqe churasakiti ukat yatiyasipkakim sasin chʼamachtʼasakit yanaptʼsna, jan ukajj kunamp lurañach wakisispa?

11. ¿Kunsa yaqhepanakajj jisktʼasipjjaspa, ukat kunatsa?

¹¹ Jichhürunakan Jehová Diosan Qhanañchirinakapajj niya kimsaqallqo millonäjjapjjewa.  Jupanakat jilapartejj janiw ajllit cristianonakäpkiti. Ukhamajja, Jesusajj uywatanakapar talento qollqe churkäna ukjja janiw jupanakajj katoqawayapkiti (Mat. 25:14-18). Ukatwa yaqhepanakajj akham sasin jisktʼasipjjaspa: “¿Alajjpachar sarañataki jan ajllit cristianonakajj yatiyapjjañapati?” sasa. Jïsa, yatiyapjjañapawa. ¿Kunatsa? Uk jichhajj yatjjatañäni.

12. ¿Kunsa Mateo 28:19, 20 tʼaqanakan jikjjataski uka arunakat amuysna?

¹² Jesusajj taqe arkirinakaparuw ‘yatiyapjjañamawaʼ sasin säna. Jaktjjäna uka qhepatjja, Jesusajj akhamwa arkirinakapar säna: “Jaqenakar yatiyir sarapjjam, nayar arkir tukuyapjjam; [...] yatichapjjarakim taqe kuntejj nayajj jumanakar yatichapksma ukanaka phoqaña” sasa (Mateo 28:19, 20 liytʼañataki). Ukhamajj qhanawa, alajjpachar sarañataki ajllitanakasa, aka Oraqen jakañataki suytʼäwinïpki ukanakasa, taqeniw yatiyapjjañapa (Hech. 10:42).

13. Apóstol Juanajj mä visión uñjkäna ukajja, ¿kunsa yatichistu?

¹³ ‘Yaqha jaqenakaw ajllitanakamp chikajj yatiyapjjaniʼ sasaw Apocalipsis librojj qhanañchi. Mä visionanjja apóstol Juanajj mä casarasir tawaqoruw uñjäna, ukanjja uka tawaqojj jaqenakaruw ‘jakañ umat umtʼapjjañapatak’ invittʼaskäna. ¿Khitïpachas uka casarasir tawaqojja? Cristomp chik alajjpachan apnaqañatak ajllitäpki uka 144.000 cristianonakäpjjewa (Apo. 14:1, 3; 22:17, NM). Umasti ¿kunampi sasirakpachasa? Kunanaktï Jehová Diosajj Jesusan jiwatap toqejj jaqenakaru juchampita jiwañampit qhespiyañatak lurawayki taqe ukanakawa (Mat. 20:28; Juan 3:16; 1 Juan 4:9, 10). Ukatwa Diosan arunakapat yatiykasajj qhespiyäwi toqetpun parltanjja. Ajllit cristianonakas ukhamarakiw jaqenakarojj kunjamsa qhespiyäwi toqejj Diosamp sumankapjjaspa uk amuyapjjañapatak yanaptʼapjje (1 Cor. 1:23). Ukampis visionanjja, Juanajj janiw casarasir tawaqoruk uñjkänti, jan ukasti yaqha jaqenakaruw uñjarakïna. Jupanakarusti “jutam” sasin sapjjañapatakiw chʼamañchasïna. ¿Khitinakäpachas uka yaqha jaqenakajja? Aka Oraqen wiñayatak jakasipkani ukat alajjpachar sarañatak jan ajllitäpki  uka cristianonakäpjjewa. Jupanakasti jakañ uma umtʼapjjañapatakiw jaqenakar invittʼapjjaraki. Ukhamajj ¿kunsa ukajj uñachtʼayistu? Diosan arunakapjja taqeniw yatiyapjjañapa.

14. ¿Kunsa “Criston leyip” phoqañatakejj lurañasa?

¹⁴ “Criston leyip” phoqañ munirinakajja, yatiyapjjañapawa (Gál. 6:2). Jehová Diosan leyinakapajj taqenitakiwa, janiw jupajj khitirus yaqhachkiti. Ukatwa israelitanakar akham säna: “Aka leyisti taqetakiwa, markas taypin naski ukanakataki, ukhamarak jumanak taypin jakapki uka yaqha markankir jaqenakataki” sasa (Éxo. 12:49; Lev. 24:22). Cristianonakajj janis Moisesan Leyiparjam sarnaqjjstanjja, alajjpachar sarañataki ajllitästansa janisa, taqeniw “Criston leyip” phoqañasa. Uka leyejja, kuntï Jesusajj yatichkäna taqe ukanakawa. Maynïr jachʼa yatichäwipajj akham siwa: “Jaqe masimarojj juma kikparjam munam” sasa. Ukhamajja, Jesusan arkirinakapajj munasiñwa uñachtʼayapjjañapäna (Juan 13:35; Sant. 2:8). Amuytʼañäni, ¿kunjamatsa Diosarusa, Jesusarusa, jaqenakarus munasiñ uñachtʼaysna? Diosan Reinopat suma yatiyäwinak yatiyasaw uk uñachtʼaysna (Juan 15:10; Hech. 1:8).

15. Jesusan taqpach arkirinakapaw yatiyapjjañapa sasin ¿kunatsa sistanjja?

¹⁵ Awisajja, kuntï Jesusajj siskäna ukajj waljanitakïnwa. Amuytʼañataki, Reinotak pactojj 144.000 jaqenakatakïchïnsa, Jesusajj uka pactjja 11 apostolonakampikiw luräna (Luc. 22:29, 30; Apo. 5:10; 7:4-8). Jesusajj jiwatat jaktjjäna uka qhepatjja, uka kikparakiw mä qawqha arkirinakaparuki ‘jaqenakar yatiyir sarapjjam’ sasin säna (Hech. 10:40-42; 1 Cor. 15:6). Ukampis nayrïr patak maranakanjja, taqpach cristianonakaw Jesusan uka arunakaparjam phoqapjjäna. ¿Kunatsa? Uka arunakajj jiwasamppachatakiw arsusïna sasin amuyasaw taqpachanejj yatiyapjjäna (Hech. 8:4; 1 Ped. 1:8). Jiwasanakatjja janiw khitis Jesusarojj ‘yatiyapjjam’ sasin lakapat mistur arunak istʼktanti. Ukampis jichhürunakanjja niya kimsaqallq millón Jehová Diosan Qhanañchirinakapaw yatiyasktanjja. ¿Kunatsa uk lurtanjja? Ukhamatwa Jesusar cheqpachapuni iyawsatas uñachtʼaytanjja (Sant. 2:18).

16-18. 1) ¿Kunjamsa Criston jilanakapar yanaptʼsna? 2) ¿Kunatsa ajllit cristianonakarojj jichhürunakan yanaptʼañasa?

¹⁶ Aka Oraqenkasipki uka ajllit cristianonak contraw Supayajj nuwasiski. Ukat ‘tiempopan jukʼakïtap yatisinjja’ jukʼampiw jupanakar yantʼaski (Apo. 12:9, 12, 17). Ajllit cristianonakajj taqe uka yantʼanakar aguantasas Diosan arunakap yatiyasiñapatak pʼeqtʼasipkakiwa. Janipuniw kunapachas Oraqpachan ukham yatiyasirïkänti. Cheqansa, Jesusajj jupanakan chʼamachasitaparojj bendiciskiwa, yanaptʼaskarakiwa (Mat. 28:20).

¹⁷ Criston jilanakapar yanaptʼañajj wali askipuniwa. Jupanakarojj janiw Diosan arunakapat yatiyasakejj yanapktanti, jan ukasti, qollqempi, Tantachasiñ Utanakajj luraski ukanakan irnaqtʼasa, Jachʼa Tantachäwi Utanaka ukat sucursal utanakajj luraski ukanakan trabajisaw yanaptʼtanjja. Ukatjja, irpir chuymaninakarusa, ‘amuyasiri cheqapa uywatan’ (MT) uttʼayatäpki uka jilatanakarus istʼtan ukhajja, ajllit cristianonakaruw yanaptʼasktanjja (Mat. 24:45-47; Heb. 13:17).

¹⁸ Criston jilanakapat aka Oraqenkasipki uka ajllitanakajja, niyaw qhepïr sello katoqapjjani. Ukatsti, jarkʼasipki uka thayanak niyaw angelanakajj antutapjjani, ukhamatwa jachʼa tʼaqhesïwejj qalltani (Apo. 7:1-3). Jesusajja, janïr Armagedón qalltkipanwa ajllitanakarojj alajjpachar apjjani (Mat. 13:41-43). Uwijanakjam uñtʼatäñ munstan ukhajja, jichhaw Criston jilanakapar jan jitheqtas yanaptʼañasa.