JEHOVÁ DIOSAN mesapat manqʼaña, mä arunjja, jachʼa tantachäwinakar sarañajj nayratpachaw wali askïnjja. Ukanjja, Diosat yateqasa ukat jilat kullakanakamp junto manqtʼasisaw kusisit jikjjatastanjja.

Septiembre 1919 maranwa Bibliat Yatjjatirinakajja, Cedar Point (Ohio, Estados Unidos) sat markan kimsaqallqo urunak mä jachʼa tantachäwin tantachasipjjäna. Yaqha markat jutir jilat kullakanakajj hotelanakanwa qorpachasipjjañapäna ukat manqtʼasipjjañaparakïna, ukampis waljanipuniw purintanipjjäna. Uk uñjasajja, manqʼañ utanakan trabajirinakajj janiw irnaqañ munjjapjjänti. Ukatwa cafetería uñjir mä chachajja, ‘¿khitinakas irnaqañ munapjjasma?’ sasin wayn tawaqo jilat kullakanakar jisktʼäna ukat waljaniw iyaw sapjjäna. Sadie Green kullakajj akham siwa: “Ukhapuniw manqʼa pastʼayirjam irnaqayäta, ukajj jan armkañapunïnwa” sasa.

Tiempompejja, jachʼa tantachäwinakan manqʼa phayasiñapatakiw amtasïna, ukanjja walja jilat kullakanakaw yanaptʼapjjäna. Diosar yupaychirinakamp irnaqtʼañajja, walja wayn tawaqonakaruw Diosar jukʼamp yupaychapjjañapatak yanaptʼawayi. Gladys Bolton kullakajj 1937 maranwa manqʼa phayañan yanaptʼäna, jupajj akham siwa: “Yaqha markankir jilat kullakanakaruw uñtʼawayta. Kunjamsa jupanakajj jan waltʼäwinakar saykatasipkäna uk istʼañaw precursorjam irnaqtʼañatakejj chʼamañchtʼawayitu” sasa.

Beulah Covey kullakajj siwa: “Taqe chuymaw manqʼa phaytʼapjjäna, ukatwa taqe kunas sum mistüna” sasa. Ukampis ukham irnaqtʼañajj chʼamakïnwa. 1969 maranjja, Los Ángeles (California) markanwa Dodgers sat estadionan mä jachʼa tantachäwejj apasïna. Angelo Manera jilatarojj ukar purkäna ukhakiw ‘jumaw manqʼa phayasiñapatak pʼeqtʼäta’ sasin yatiyapjjäna. Jupajj siwa: “Janipuniw ukham yanaptʼañ suykayätti” sasa. ¡Cocinar tubonak toqe gas puriyañatakejja, 400 metronak mä zanja pʼiysuñaw wakisïna!

Sierra Leona markanjja, 1982 maranwa jilat kullakanakajj jachʼa tantachäwejj apasiñapäkäna uka cheq qʼomachtʼapjjäna, manqʼañ uts wakichtʼapjjarakïna. 1951 marana Frankfurt (Alemania) markanjja, jilatanakajj trenar uñtata vaporamp sariri mä locomotora alquilapjjäna ukat vaporampiw 40 phukhunakar manqʼa qhatiyapjjäna. Mä horanakwa 30.000  platonak lakirasïna. 576 jilat kullakanakaw platonak jariñan yanaptʼapjjäna, jupanakan jan sint qaripjjañapatakejja, tantachasirinakaw cucharanakap apasipjjäna. Yangón (Myanmar) markanjja, walja waykʼanwa phayapjje. Ukampis jilat kullakanakajja, yaqha markat jutirinakatakejj janiw ukham phayapkänti.

Estados Unidos markanwa 1950 maran mä jachʼa tantachäwejj apasïna, ukanjja manqʼa mayisiñatakiw jilat kullakanakajj filasisipkäna ukat wali lupirakïnwa. Ukankañajj Annie kullakatakejj wali askipunïnwa, jupajj akham siwa: “Europa toqetwa pä kullakajj barcot puripjjatayna, jupanakajj kunjamsa parltʼasisipkäna ukwa istʼaskayäta. Diosajj kunjamsa uka jachʼa tantachäwir sarapjjañapatak yanaptʼäna uka toqet parltʼasisajja, wali kusisitäpjjänwa. Jupanakatakejj jaya tiempo lupin filasiñajj janiw kunäkänsa” sasa.

Yaqhep tantachäwinakanjja, jachʼa carpanakwa waktʼayapjjarakïna, ukanjja saytʼat manqtʼasiñatakiw wali alto mesanakajj utjäna. ¿Kunatsa? Mayninakan mantapjjañapatakiw jankʼak manqtʼasipjjañapäna. Ukhamatwa waranq waranqanakajj chika urun manqtʼasipjjasapäna. Uk uñjasaw mä chachajj akham säna: “Aka religionankirinakajj mayjäpjjewa. Saytʼataw manqtʼasipjje” sasa.

Militaranakasa ukat gobiernonkir autoridadanakas jilat kullakanakar sum irnaqtʼir uñjasajja, wal muspharapjjäna. Nueva York (Estados Unidos) markanjja, Yankees sat estadionanwa mä jachʼa tantachäwejj apasïna, kunjamsa ukan manqʼa phaytʼasipkäna ukwa Estados Unidos markankir ejercitojj uñjir saräna. Uka qhepatjja, ‘kunjamsa irnaqtʼapjje uk uñjir sarañamawa’ sasaw Faulkner sat capitanar sapjjäna (jupajj Departamento de Guerra británica ukan pʼeqtʼirïnwa). Jupajj esposapampiw 1955 maran Twickenham (Inglaterra) markan apaskäna uka jachʼa tantachäwir saräna, uka tantachäwejj “Reino Triunfante” sat pʼeqeñchäwinïnwa. Jupajj sänwa: “Wali munasirïpjjatapatwa manqʼa sum phaytʼapjje” sasa.

Walja maranakaw jilat kullakanakajj jachʼa tantachäwinakan suma manqʼanak wakichtʼasajj cristian masinakapar yanaptʼawayapjje ukat janirakiw walja qollqejj mayiskänti. Ukampis jilat kullakanakajj walja horanakaw irnaqtʼapjjañapäna, awisajj kuntï tantachäwin yatichaskäna uksa janiw sum istʼapkänti. Ukatwa 1970 maranak tukuyarojja, manqʼajj janiw sint phayasjjänti. 1995 maranjja, ‘tantachasirinakaw manqʼa apasipjjañapa’ sasaw yatiyasïna. Ukhamajj manqʼa phayiri jilat kullakanakajj kuntï jachʼa tantachäwin yatichaskäna uk sum istʼjjapjjäna ukat mayninakamp parltʼasiñatakis tiemponipjjarakïnwa. *

Manqʼa phayasa jilat kullakanakar yanaptʼapkäna uka cristianonakarojj wali munasiñampiw Jehová Diosajj amtpacha. Kunjamsa manqʼa phaytʼapjjäna uk janiw yaqhep jilat kullakanakajj armapkiti. Cheqansa, jilat kullakanakajj kunja munasirïpjjesa uk qhanwa jachʼa tantachäwinakan amuysna (Juan 13:34, 35).