1. 1) ¿Kunatsa Supay contra saytʼasiñasa? 2) ¿Supayar atipjsnati, kunjamatsa uk yattanjja?

SUPAYAJJ aka Oraqenkasipki uka ajllit cristianonak contra ukhamarak ‘yaqha uwijanakjam’ uñtʼatäpki ukanak contraw nuwasi (Juan 10:16). Jukʼa tiemponikïtap yatisisajja, Diosan servirinakapat waljaniruw jitheqtayañ muni (Apocalipsis 12:9, 12 liytʼañataki). Ukampis Supay contrajj saytʼassnawa. Bibliajj akham siwa: “Supayatakisti saytʼasipjjarakim, uka Supayasti jumanakatjja jaltawayjjarakiniwa” sasa (Sant. 4:7).

2, 3. 1) ¿Kunatsa Supayajj jupan jan utjatap jaqenakar amuyayañ muni? 2) ¿Kunjamatsa Supayan utjatap yattanjja?

² ‘Supayajj janiw utjkiti’ sasaw waljanejj sapjje. Supayasa sajjranakapasa libronakana, videonakana, anatañ videonakanaksa uñstkaspa ukhamwa jaqenakajj amuyapjje. Jupanakajj sapjjewa: “Jan amuytʼasir mä jaqekiw Supayana ukhamarak sajjranakan utjatap creyispa” sasa. Ukham amuyapjjatap laykojj ¿Supayajj coleraspachati? Janiwa. Antisas jupan utjatapat pächasipki ukanakarojj jukʼampwa amuyunakap chʼamaktʼayi (2 Cor. 4:4). Ukhamasti Supayajj sajjranakan jan utjatap jaqenakajj amuyapjjaspa ukwa muni, uka amuyumpiw jaqenakar sallqjjaski.

 ³ Jehová Diosan servirinakapjamajja, janiw Supayampi engañjat jaqenak taypinktanti. Supayajj utjaskapuniwa, uk sumwa yattanjja. ¿Kunjamatsa uk yattanjja? Supayaw mä katari toqejj Evar parljjayäna (Gén. 3:1-5). Ukatsti Job chachajj interés laykukis Diosar sirvkaspa ukhamwa Jehová Diosar Supayajj sarakïna (Job 1:9-12). Jupaw Jesusarus yantʼarakïna (Mat. 4:1-10). 1914 maran Diosan Reinopajj uttʼayasjjäna ukhat aksarojja, Supayajj aka Oraqenkasipki uka ajllit cristianonak contraw nuwasiñ qalltawayi (Apo. 12:17). Jichhakamas Diosan servirinakap contrajj nuwasiskakiwa. ¿Kunatsa? Diosatwa jupanakar jitheqtayañ muni. Supayar atipañatakejja, jupa contraw saytʼasiñasa, ukatsti Diosarojj taqe chuymaw confiyañasaraki. ¿Kunjamsa uk lursna? Ukwa aka yatichäwin kimsa toqet yatjjatañäni.

4. ¿Kunjamsa Supayajj jachʼa jachʼa tukurïtap uñachtʼayi?

⁴ Supayajj janipuniw altʼat chuymanïkiti. Jupajja, Taqe Kunjjaru Munañani Jehová Dios contraw saytʼasïna, diosjam uñjayasiñ munarakïna, ukatwa uka ñanqha angelajj wali jachʼa jachʼa tukurïpachawa sasin sissnajja. Ukhamajj jupa contra saytʼasiñatakejj janiw jachʼa jachʼa tukuñampejj apayasiñasäkiti, jan ukasti altʼat chuymanïñasawa (1 Pedro 5:5 liytʼañataki). Ukampis ¿kunas jachʼa jachʼa tukuñajja, mä arunjja, orgullojja? Ukajj ¿jan walipunïpachati?

5, 6. 1) Orgullojj ¿jan walipunïpachati? Uk qhanañchtʼam. 2) Jachʼa jachʼa tuksna ukhajja, ¿kunas pasaspa? 3) ¿Khitinakas jachʼa jachʼa tukupjjäna?

⁵ Yaqhep arunakanjja, orgullo siski uka arojj ‘mayni pachpa sum uñjasiña respetasiña’ sañwa munaspa. Cheqas maynejj aski luratapatwa orgulloso jan ukajj kusisita jikjjatasispa, ukajj janiw sinti jan walïkiti. Apóstol Pablojj akhamwa Tesalónica markankirinakar säna: “Diosan [tamanakapanjja] nanakpachaw kusisiñampi jumanakjjata parlapjjta, llampʼu chuymanïpjjatanakamata, iyawsäwinakama taqe tʼaqhesiñ taypina uñachtʼayapjjatamata, ukhamarak llakisisina tʼaqhesipjjatanakamatsa” sasa (2 Tes. 1:4). Ukhamasti mayninakan aski luratanakapatsa jiwasan aski luratanakasatsa kusisit jikjjatasiñajj walikïskiwa. Janirakiw familiasatsa, costumbresatsa, kawkhantï nasktan ukatsa phenqʼasiñasäkiti (Hech. 21:39).

⁶ Maysa toqetjja, yaqha kasta orgullow utji, ukajj jachʼa jachʼa tukuñawa, ukaw Jehová Diosampi jan sum apasiykistaspati. Jiwasatï ukham jachʼa jachʼa tukurïsna ukhajja, ewjjanak katoqasajj colerasjjaksnawa, altʼat chuymampi ewjjanak katoqasiñat sipansa, janiw katoqasiñ munjjsnati (Sal. 141:5). Khititï jachʼa jachʼa tukki ukajja, ‘jupa pachpat wal jachʼañchasi’, jan ukajj ‘mayninakat sipans jupakis askïkaspa ukham amuyasi’. Ukham jachʼa jachʼa tukurinakarojj Jehová Diosajj uñisiwa (Eze. 33:28; Amós 6:8). Ukampis Supayajja, jupjama jachʼa jachʼa tukur jaqenakar uñjasajj wal kusispacha. Kunapachatï Nemrod, Faraón, Absalón chachanakajj jachʼa jachʼa tukupkäna ukhajja, walpun Supayajj kusispachäna (Gén. 10:8, 9; Éxo. 5:1, 2; 2 Sam. 15:4-6). Caín chachajj jachʼa jachʼaw tukurakïna. Jehová Diosajja, jan walir jan purtʼasiñapatakejj Cainar ewjjtʼänwa, ukampis Cainajj janiw istʼkänti. Ukhamatwa jan walir purtʼasiwayi (Gén. 4:6-8).

7, 8. 1) ¿Kunjamas jañchi toqet yaqhachasiñajja? 2) ¿Kunatsa jaqenakajj yaqha kasta jañchinïpjjatapat yaqhachasipjje? 3) ¿Kunjamsa jachʼa jachʼa tukuñajj tama taypin jan waltʼayaspa?

⁷ Jichhürunakanjja, kunayman jan walinak lurasaw jaqenakajj jachʼa jachʼa tukurïpjjatap uñachtʼayapjje. Jachʼa jachʼa tukuñatwa jañchi toqet yaqhachasiñajj utjaspa. Jañchi toqet yaqhachasiñatjja, mä diccionariojj akham siwa: “Yaqhachaña, yaqha kasta jañchinïtapat uñisiña. Ukatjja, yaqha kasta jañchininakajj chuymanakapansa luräwinakapansa, janiw kikpäkiti”, ukatsti “yaqhepanakajj yaqha jañchinïpjjatap  laykojj mayninakat sipansa jukʼamp askïpjjewa, yaqhepasti janiraki” sasa. Jachʼa jachʼa tukuñ utjatapatwa chʼajjwañasa, guerrasa, jiwayasiñasa utjawayi.

⁸ Ukampis Jehová Diosan markapanjja, janiw ukham jachʼa jachʼa tukuñajj utjañapäkiti. Cheqas tama taypin jan waltʼayasiñajj jachʼa jachʼa tukuñatwa awisajj utjaspa, ukaw jan walirojj purtʼasiyistaspa. Khä nayrïr patak maranakanjja, yaqhep cristianonakampejj ukaw pasäna. Ukatwa Santiagojj jupanakar akham säna: “¿Kawkitsa juti jumanak taypin jan waltʼañanakajja, ukhamarak guerranakasa?” sasa (Sant. 4:1). Jiwasantï uñisisiñasa, jan ukajj mayninakat sipan jukʼamp askïksnas ukham amuyasiñas utjaspa ukhajja, mayninakaruw arumpisa, luratanakampis chuyma ustʼaysna (Pro. 12:18). Ukhamajja, jachʼa jachʼa tukuñ utjatapatwa tama taypin sumankañajj jan utj-jjaspati.

9. ¿Kunjamsa Bibliajj jañchi toqet jan yaqhachasiñatakisa, jachʼa jachʼa jan tukuñatakis yanaptʼistu? (14 janankir foto uñjjattʼam.)

⁹ Mayninakat sipansa jukʼampïksnas ukham amuyasstan ukhajja, ak amtañasawa: “[Jehová Diosajj] jachʼa jachʼa tukur jaqenakarojj uñisiwa” (Pro. 16:5). Ukatjja, kunjamsa yaqha jañchininakarusa, yaqha markankirinakarusa, jan ukajj yaqha costumbrenïpki ukanakarus uñjasktan uksa amuyasiñasarakiwa. Jiwasatï markasatsa jañchisatsa jachʼa jachʼa tukuskstan ukhajja, Diosajj janis ‘mä sapa jaqetaki taqe kast jaqenak mirtaykaspa’ ukham amuyataswa uñachtʼaysna (Hech. 17:26). Jehová Dios nayraqatanjja, taqenis mä sapa kasta jañchinikïtanwa. ¿Kunatsa? Taqeniw Adanat jutirïtanjja. Ukhamasti yaqhepanakajj yaqha jañchinïpjjatap laykojj jukʼamp askïpkaspasa, yaqhepajj janirakisa, ukham amuyañajj janipuniw walïkaspati. Ukham amuysna ukhajja, Supayan amtaparjamaw lurasksna, jupajj cristianonakan munasipjjañapsa mayachtʼatäpjjañapsa janiw munkiti (Juan 13:35). Supay contra saytʼasiñatakisa atipjañatakisa, janiw jachʼa jachʼa tukuñampejj apayasiñasäkiti (Pro. 16:18).

10, 11. 1) ¿Kunjamatsa maynejj akapachampi apayasispa? 2) ¿Kunjamsa Demas chachajj akapachar munatap uñachtʼayäna?

¹⁰ Supayaw ‘akapach apnaqerejja’, akapachajj jupan munañapankiwa (Juan 12:31; 1 Juan 5:19). Ukhamajj kunanakatï akapachan utjki ukanakat jila partejj jan waliwa. Ukampis niyakejjay akapachajj Supayan munañapankchejja, kunanakatï akapachan utjki ukanak munayasaw Supayajj juchar puriyistaspa, jan ukajj akapachar munañasatakiw apistaspa, ukhamat Jehová Diosat jitheqtañasataki (1 Juan 2:15, 16 liytʼañataki).

¹¹ Nayrïr patak maranakan jakir cristianonakajj akapachar munañampiw apayasipjjäna. Amuytʼañataki, Pablojj akham sänwa: “Demas satajj jaytanukuwayjjetuwa, jupasti aka oraqen yänakaparuw jukʼampi munäna” sasa (2 Tim. 4:10). Akapachan kunanakar munasas Demas chachajj Pablor jaytäna uk Bibliajj janiw qhanañchkiti. Inas Diosar serviñat sipans yänakar jukʼamp munchïna. Ukhamächïna ukhajja, Diosar serviñan kuna lurañanakatï utjki ukanakwa aptʼasiskäna. ¿Ukham luratapajj walikïpachänti? Janiwa. Kunanaktï Demas chachajj Diosar servisajj jikjjatkaspäna ukanakjja, janiw akapachan jikjjatkasapänti (Pro. 10:22).

12. ¿Kunanakampis Supayajj sallqjjañ munistu?

¹² Demas chacharjamarakiw jiwasar pasistaspa. Cristianonakjamajja jiwasatakisa, familiasatakisa, yänakanïñ munañajj janiw jan walïkiti (1 Tim. 5:8). Jehová Diosajj sum jakasiñaswa muni. Jupajj qalltan Adanampiru Evampirojj mä suma jardinaruw sum jakasipjjañapatak usküna (Gén. 2:9). Ukampis Supayajj ukham sum jakasiñ munir chuymanïtas laykuw ‘qamir kankañan engañonakapampi’ sallqjjestaspa  (Mat. 13:22, MT). Walja jaqenakajja, qollqenïsakisa, yänakanïsakisa kusisit jakasiñajj utjkaspa ukham amuyapjje. Uka amuyumpi apayassna ukhajja, Jehová Diosamp sum apasitaswa aptʼassna. Jesusasti akham sasaw arkirinakapar ewjjtʼäna: “Janiw khitis pä patronarojj sirvkaspati, maynirojj munaniwa, maynirusti uñisirakiniwa, jan ukajj maynirojj jachʼachaniwa, maynirusti jiskʼacharakiniwa; Diosampiru qollqempirojj janiw khitis sirvkaspati” sasa (Mat. 6:24). Jiwasatï qollqeruk munjjsna ukhajja, Jehová Diosarojj janiw sirvjjsnati. Cheqas ukwa Supayajj muni. Ukhamajj janipuni qollqesa ni yänakasa Diosar serviñat jitheqtayistpati. Ukhamasti, Supay contra saytʼasiñatakejj janiw yänakarojj sinti munañasäkiti (1 Timoteo 6:6-10 liytʼañataki).

13. ¿Kunjamsa akapachankir jaqenakajj matrimonior uñjapjje?

¹³ Supayan yaqha sipitapajj wachoqa juchawa. Jichhürunakanjja, casadökasin yaqhampi sarnaqañajj walikïkaspas ukhamwa waljanejj amuyapjje. Ukat casadonakajj janis librëjjapjjaspa, nayra tiempokis casadösin yaqhampi sarnaqañajj juchäkaspäna ukhamwa amuyapjjaraki. Amuytʼañataki, wali uñtʼat mä actriz warmejj akham siwa: “Taqeniw casadöjjasin yaqhampi sarnaqapjje. Janiw casadonakat ni maynirus chachapampiki jan ukajj warmipampiki sarnaqer uñtʼkti” sasa. Mä actor chachajj sarakiwa: “Janiw maynimpiki jiwañkam jakañatak luratäktanti” sasa. Niyakejjay matrimoniojj Diosan mä regalopächejja, kunapachatï wali uñtʼat jaqenakajj matrimoniot jan wal parlapjje ukhajja, Supayajj walpun kusispacha. Jupajj janiw chacha warminakan sum jakasipjjañapatakejj yanaptʼkiti ni munkarakisa. Ukhamasti, Supay contra saytʼasiñatakisa atipjañatakisa, Jehová Diosan uttʼayat matrimoniorojj wali respetompiw uñjañasa.

14, 15. ¿Kunsa wachoq juchar jan purtʼasiñatakejj lurañama?

¹⁴ Solteronakasa, casadonakasa wachoqa juchar jan purtʼasiñatakejj taqe chuymaw chʼamachasiñasa. Ukampis ukajj chʼamakïspawa. Sañäni, jumatï waynäsksta, jan ukajj tawaqöskstajja, inas yateqer masinakamaru maynimpi ikthapitapata, jan ukajj sexteo, mä arunjja, wachoq jucha lurañ toqet parlir arunaka celular toqe qellqasipjjatapata, jan isini jaqenakan fotonaka pasayasipjjatapat parlasir istʼirïsta. Ukajj yaqhep markanakanjja, pornografía infantil jan ukajj wawanakampi qʼañunak luraskir uñchʼukiñamp sasiwa. Bibliajj siwa: “Wachoqa jucha lurañajj pachpa janchimpi jucha lurañawa” sasa (1 Cor. 6:18). Walja jaqenakajja, yaqhanakamp ikthapisaw jan wali usunak katkatayasipjje, ukatwa tʼaqhesipjje yaqhepasti jiwapjjaraki. Janïr casaratäkasin yaqhanakampi ikthapir wayn tawaqonakajja, ukham lurapjjatapat qhepatakwa wal amtasipjje. Akapachan utjki uka libronakasa, videonakasa, musicanakasa, wachoq jucha lurasin Diosan kamachinakap pʼakintañajj walikïkaspasa ukham amuyayañ munistu. Ukanakampi apayasisaw jaqenakajj ‘juchan engañoparu’ jaltʼapjje (Heb. 3:13, MT).

¹⁵ Wachoq juchar jan purtʼasiñatak chʼamachasisksta ukhajja, ¿kunsa ukar jan purtʼasiñatakejj lurañama? Kunanakatï wachoq juchar purtʼasiykiristam ukanak janiw lurañamäkiti (Rom. 7:22, 23). Jehová Diosaruw yanaptʼa oracionan mayisiñama (Fili. 4:6, 7, 13). Kunanakas wachoq juchar purtʼasiyiristam ukanakatsa amuyasiñamawa (Pro. 22:3). Wachoq juchar purtʼasiñataki yantʼata uñjasïta ukhajja, ratukiw jaltjjañama (Gén. 39:12).

16. Supayan yantʼata uñjasisajja, ¿kamsänsa Jesusajja, ukat kunsa jupat yateqassna?

¹⁶ Supayan yantʼanakapar saykatañatakejj Jesusatwa yateqassna. Jupajj janiw Supayan arunakapar istʼkänti, janirakiw ‘uka arunakar istʼañajj walïspati janicha’ sasas pächaskänti.  Antisas akham sänwa: “Diosan arupanjja qellqatawa” sasa (Mateo 4:4-10 liytʼañataki). Jesusajj Diosan Arupat sum yatïna, ukatwa Supayan yantʼanakapar saykatkasajj Diosan Arupat jankʼaki aytäna. Ukhamajj Supay contra saytʼasiñatakisa atipjañatakisa, wachoq juchar purtʼasiñataki Supayajj yantʼkistu ukanakampejj janipuniw apayasiñasäkiti (1 Cor. 6:9, 10).

17, 18. 1) ¿Supayan yaqha yantʼanakapajj utjarakiti, ukat kunatsa ukhaman uñjasisajj jan sustjasiñasäki? 2) ¿Kunas Supayampejj pasani, ukat kunjamsa ukajj aguantañataki chʼamañchistu?

¹⁷ Jachʼa jachʼa tukuñasa, yänak munañasa, wachoq juchasa, Supayan kimsa yantʼanakapakiwa. Ukampis walja yantʼanakapaw utji. Sañäni: yaqhep cristianonakajja, familiapan jarkʼataw uñjasipjje, yaqhepasti yateqer masinakapampi phiskasita ukatsti yaqhepajj jan yatiyapjjañapataki autoridadanakan jarkʼataw uñjasipjjaraki. Ukhamanakan uñjasisajj janiw sustjasiñasäkiti, ¿kunatsa? Jesús pachpaw akham säna: “Taqe jaqenakarakiw jumanakarojj uñisipjjätam nayar arkapjjatam layku, ukampis khititejj tukuykama saytʼkani ukawa qhespiyatäni” sasa (Mat. 10:22).

¹⁸ ¿Kunjamatsa Supay contra saytʼassna ukat atipjaraksna? Jesusasti arkirinakaparojj sänwa: “Jumanakatejj chʼaman saytʼapjjätajja, wiñay jakañ katoqapjjäta” sasa (Luc. 21:19). Jehová Diosampi sum apasiñatjja jiwasakiw jitheqtsna, janiw khitis jitheqtaykistaspati (Rom. 8:38, 39). Diosan servirinakapajj jiwapkchisa, janiw ukampejj Supayajj atipkiti, Jehová Diosaw jupanakar jaktayjjani (Juan 5:28, 29). Maysa toqetjja, Supayajj niyaw jan mayampitaki tʼunjatäjjani. Kunapachatï aka jan wali pachajj tukjatäjjani ukhajja, Supayajj waranqa maranakaw mikʼayar jaqontatäni (Apo. 20:1-3). Ukatjja, waranqa maranak tukuyarojja, mä qawqha tiempotakiw wasitat ‘antutatäni’ ukhamat jan juchanëjjapjjani uka jaqenakar yantʼañapataki. Ukjjarusti, Supayajj jan mayampitaki jiwayatäniwa (Apo. 20:7-10). Supayatakejj janiw kuna suytʼäwis utj-jjeti, ukampis jumajj suytʼäwinïtawa. Ukhamajj Supay contra saytʼasim ukatsti Diosar taqe chuyma confiyam, ¡atipjätawa!