JESUSAJJ 12 apostolonakanïnwa, uk waljaniw yatipjje. Ukampis uka apostolonak taypinjja warminakas utjarakïnwa, maynïrejj Juana satänwa (Mat. 27:55; Luc. 8:3).

¿Kunjamsa Juanajj Diosan arunakap yatiyañ Jesusar yanaptʼäna? ¿Kunsa jupat yateqsna?

Juanan chachapajj Cuza satänwa, jupajj Herodes Antipas chachan serviripäpachänwa. Jesusajj walja warminakar qollkäna ukanakat maynïrejj Juanawa. Jupasti mayni warminakampi chikaw Jesusampi apostolonakapamp yatiyir sarirïna (Luc. 8:1-3).

Judionakan religionap pʼeqtʼirinakan yatichäwiparjamajja, warminakajj janiw yaqha chachanakamp chikachasipjjañapäkänti ni viajipjjañapäkänsa. Chachanakas janiw mä warmimpejj parlapjjañapäkänti. Ukampis Jesusajj janiw uka costumbrerjam sarnaqkänti, Juanasa, Diosar iyawsiri mayni warminakasa, Jesusampi apostolonakampi chikaw yatiyir sarapjjäna.

Jesusampi apostolonakampi chikachasitapatjja, Juanajj jaqenakan yaqhachataw uñjasiñapäna. Jesusamp chika yatiyir saririnakajja, jakäwip mayjtʼayañatakejj wakichtʼasipjjañapänwa. Ukatwa Jesusajj jupanakat akham säna: “Diosan arunakap istʼapki ukat ukarjam sarnaqapkaraki ukanakawa taykajjasa, jilanakajjasa” sasa (Luc. 8:19-21; 18:28-30). Jesusajja, jupar arkañatak chʼamachasipki ukanakarojja wali askitwa uñji, uk yatiñajj wal chʼamañchtʼistu.

Juanasa, yaqha warminakasa, yänakapampiw Jesusarusa, apostolonakarus yanaptʼapjjäna (Luc. 8:3). Libronak qellqer mä jaqejj siwa: “Warminakaw phayapjjäna, platonak jaripjjäna, isinaksa watapjjäna sasajj janiw Lucasajj siskiti. Inas warminakajj ukhampun yanapapjjchïna” sasa. Amuyatajja, warminakajj qollqempi yänakapampiw yanaptʼapjjäna.

Jesusasa apostolonakasa, yatiyir sarapkäna ukhajja, janiw trabajipjjerïkänti. Ukhamajj manqʼa alañatakisa, kunanakatï 20 jaqenakatak munaskaspa ukanaka alañatakis inas qollqejj jan utjkchïnti. Yaqhepajj wali sumsa jupanakar katoqapkchïnjja, janiw taqe cheqan ukhampun katoqatäñ suyapkänti, ukatwa “qollqe bolsjja” apasipjjapunirïna (Juan 12:6; 13:28, 29). Inas Juanampi mayni warminakampejj jupanakar qollqempi yanaptʼapjjerïchïna.

Yaqhep jaqenakajja, ‘judía warminakajj janiw qollqenïpkänsa ni kunanïpkänsa’ sasaw sapjje.  Ukampis uka tiemponakat parlir libronakajja, mä judía warmejj kunayman toqetwa qollqe jikjjataspäna sasaw qhanañchi. 1) Familian mä yoqall wawajj jan utjkäna ukhajja, awkejj phuchaparuw herencia churirïna, 2) yänaksa, jan ukajj qollqsa mayninakatwa mä wajjtʼjam katoqapjjerïna, 3) chacha warmejj jaljtapkäna ukhajja, chachaw warmirojj jaljtatapat qollqe churirïna, 4) chachajj jiwjjäna ukhajja, warmiw ganancianak katoqäna, 5) trabajisaw qollqe jikjjatasipjjerïna.

Jesusan arkirinakapajj kunampitï yanaptʼirjamäpkäna ukampiw yanaptʼapjjäna. Uka arkirinakat inas qamiri warminakajj utjchïna. Yaqhepajja, Juanajj qamirïnwa sapjjewa, ¿kunatsa? Chachapajj Herodesan serviripänwa, ukatwa ukham sapjjpacha. Jesusajj uchaskäna uka jan chʼukuni isjja inasa Juanajj churchïna. Libronak qellqeri mä warmejj akham siwa: “Chawlla katur chachan warmipajja, janiw ukham isi churkasapänti” sasa (Juan 19:23, 24).

Juanajj qollqempiw yanaptʼirïna sasin Bibliajj janiw siskiti. Ukampis yanaptʼirjamäkäna ukampiw yanaptʼäna. Jiwasajj Juanat yateqasisaw Diosan arunakap yatiyasiñapatakejj kunatï utjkistu ukampi yanaptʼsna. Ukampis taqe chuymaw uk lurañasa, ukaw Diosatakejj jukʼamp askejja (Mat. 6:33; Mar. 14:8; 2 Cor. 9:7).

Kunjamsa Jesusar jiwayapjjäna ukjja Juanasa, mayni warminakasa uñjapjjpachänwa. Uka warminakaw ‘Jesusajj Galilean sarnaqkäna ukapachajj jupar arkapjjäna yanapapjjarakïna’. Ukhamarus Jesusar Jerusalenkam arkanipkäna ukanakas ukankapjjarakïnwa (Mar. 15:41). Jesusan cuerpopajj lawat apaqatäjjäna ukhajja, ‘Galileat Jesusampi chika jutapkatayna uka warminakaw sepultur uñjiri sarapjjäna’, “ukatsti sum uñjapjjäna kunjäm uchatäkäntejj Jesusan janchipajj ukjja. Utar kuttanjjasinsti suma qʼapkir qollanak wakiyapjjäna”. Lucas qellqatarjamajja, semana qallta urojj wasitampiw María Magdalena, Juana, Santiagon María taykapajj sepulturar kuttʼapjjäna, ukampis angelanakakiw ukankapjjäna, jupanakasti Jesusajj jaktjjewa sasaw yatiyapjjäna (Luc. 23:55–24:10).

Pentecostés 33 maranjja, Jesusan arkirinakapaw Jerusalenan tantachasipjjäna, Jesusan María taykapasa jilanakapasa ukankapjjänwa, Juanajj inas ukankarakchïna (Hech. 1:12-14). Juanan chachapajja, Herodesatakiw trabajïna, ukhamajj chachap toqew Juanajj Herodesat yatpachäna, inas taqe ukanak Juanajj Lucasar awisirïchïna. Ukatwa Lucasajj Herodesat qellqpachäna. Ukhamarusa, Lucasakiw Juana sutjja libropan ayti (Luc. 8:3; 9:7-9; 23:8-12; 24:10).

Juanan sarnaqäwipajj wali yateqaskayawa. Kunampitï yanaptʼirjamäkäna ukampiw Jesusar yanaptʼäna. Kuntï churkäna ukajj kunjamsa Jesusarusa, 12 apostolonakarusa, mayni discipulonakarusa viajiñataki ukhamarak yatiyapjjañapataki yanaptʼäna uk uñjasajja, walpun Juanajj kusispachäna. Jesusasa arkirinakapas jan walinakan uñjasipkäna ukhajja, Juanajj yanaptʼaskakïnwa, janipuniw Jesusar jaytkänti. Ukham chuymanïñjja, taqe cristiana warminakaw yateqasipjjaspa.