MÄ KUTEJJA, mamajajj akham sasaw jisktʼitäna: “¿Kunatsa nayra achachilanakasar yupaychañ jan munkta? Jupanak laykuw jumajj jakasktajja ¿janit uk amuyaskta? Mara maraw uka costumbrenakajj lurasi, kamisarak ukanak jan lurañ munjjätasti. Nayra achachilanakasar jan yupaychañ munasajja, jupanakar jiskʼachkasmas ukhamawa” sasa. Ukanak sasinsti mamajajj wal jachäna.

Mä qawqha phajjsinak nayrajja, Jehová Diosan Testigonakapaw mamajarojj ‘Bibliat yatichapjjäma’ sasin sapjjatayna. Jupajj janiw munkänti, ukampis respetonïtap laykuw ‘wawajamp Bibliat yateqapjjam’ sasin satayna. Ukampis costumbrenakarjam jan sarnaqañ munjjayäta ukhajja, nayatak wal coleräna. Taqe kunanwa jupar istʼirïta, ukampis Jehová Diosar istʼañ munataj laykojja, janiw jupar istʼjjayätti. Ukajj chʼamäkchïnsa, Jehová Diosaw yanaptʼawayitu.

Japón markankirinakajj niya jila partew budista religionankapjje, familiajas ukankarakïnwa. Testigonakampi pä phajjsi yatjjatasajja, Bibliajj cheq yatichatapwa amuyjjayäta. Jehová Diosan utjatap yatisajja, jukʼampiw Jupar uñtʼañ munayäta. Bibliat kuntï yateqkayäta ukjja, mamajampejj wali sumwa parltʼasipjjerïta. Domingonakas tantachäwinakar sarjjayätwa. Diosar jukʼamp uñtʼasajja, mamajar akham sayätwa: “Janiw budista religionan costumbrenakap lurjjäti” sasa. Ukham satajj walpun mayjtʼasïna, ukatsti sitänwa: “Familias taypin nayra achachilanakasar jan yupaychiri utjañapajja mä phenqʼapuniwa” sasa. “Janiw Bibliat yatjjatañamäjjeti, ni tantachäwinakarus sarañamäjjeti” sasaw sarakitäna. Mamajan ukham sañapjja ¡janipuniw suykayätti! Janis mamajäkaspa ukhamänwa.

Tatajasa, mamajan pachpa amuyupanirakïnwa. Efesios 6 jaljanjja awk taykar istʼañ toqetwa yateqayäta. Familiajan wasitat kusisita jakasjjapjjerista ukwa munayäta. Ukatwa akham lupʼiyäta: “Nayatï awk taykajar istʼäjja, qhepat jupanakajj istʼapjjarakitaniwa” sasa. Uka tiemponjja, colegion examenanakatakiw wakichasiñajäna. Ukatwa kuntï awk taykajajj sapkitäna ukar istʼayäta. Ukampis Jehová Diosarojj akham sayätwa: “Kimsa phajjsitjja, wasitampiw tantachäwinakar sarjjä” sasa.

Ukham amtatajajj janipuniw walïkänti. Kimsa phajjsinjja, Diosar serviñ munatajajj janiw thayarkaniti sasaw amuyayäta. Ukampis janiw ukhamäjjänti, Diosar serviñ munatajajj thayarjjänwa. Ukatjja, awk taykajas Diosar serviñ jaytañajatakejj walpunwa chʼamachasipjjarakïna.

Tantachasiñ Utanjja, nayjam uñjasir jilat kullakanakajj waljaw utjäna. Jehová Diosaw chʼam churätam sasaw jupanakajj chʼamañchtʼapjjetäna (Mat. 10:34-37). Ukatsti sapjjarakitänwa: “Jumatï Jehová Diosat jan jitheqtkäta ukhajja, familiamajj Diosar uñtʼañ munapjjarakispawa” sasa. Jehová Diosampiw yanaptʼayasiñ munayäta, ukatwa Jupar wal mayisiyäta.

Familiajajj kunayman toqetwa Jehová Diosat jitheqtayañ munapjjetäna. Mamajajj Bibliat jan yateqañajatakejj wal ruwitäna. Kunayman toqetwa amuytʼayañ munarakitäna. Jila partejj amukiw mamajar istʼirïta. May kun arsurïta ukhajja, jiskhisiñwa qalltapjjerïta. Cheqas sapa mayniw amuyunakaj arjjatañ munapjjerïta. Nayatï mamajan amuyunakapsa, creenciapsa respetiriskayäta ukhajja, janiw jan waltʼayasiñajj utjkasapänti. Awk taykajajja, utat jan mistuñatakejja, walja lurañanakwa churapjjetäna. Awisajja, anqaruw llawinukupjjerïtu, awisasti janiw manqʼsa churapjjerïkituti.

Diosar serviñ jaytañajatakejja, mamajajj mayninakaruw nayamp parlapjjañapatak yanaptʼa mayïna. Maynejj profesorajänwa, inamayaw jupajj nayamp parläna. Ukatsti mamajajj jefepan ukaruw irparakitäna, jupasti taqe religionanakajj inamayakiwa sitänwa. Janiw ukakïkänti, mamajajj jachtʼasisaw familiaranakajar yanaptʼa mayisa telefonot jawsatayna. Ukham luratapat walpun colerasiyäta. Ukampis tantachäwinjja, tamajankir irpir chuymaninakajj sapjjetänwa: “Mamitamajja, ukham yaqhanakar parlasajj Dios toqetwa yatiyaski” sasa.

Mä suma trabajo jikjjatañajatakejja, awk taykajajj universidadar sarañajwa munapjjäna. Ukampis uka toqet parlañatakejj janiw familjamajj sum  jikjjatasipkayätti, ukatwa jan jiskhisiñatakejj cartanak toqe amtanakaj jupanakar sirïta. Tatajajj walpun colerasïna, ukatwa akham sitäna: “Trabaj kunjamjjay jikjjatchïta, arumanthitakitï trabaj jan jikjjatkäta ukhajja, utatwa alisnuküma” sasa. Jehová Diosaruw yanaptʼa mayisiyäta. Qhepürojja, Diosan arupat yatiyiriw sarayäta. Ukanwa pä kullakanakajj jiskʼa imill wawanakapar yatichañajatak mayipjjetäna. Ukham trabajo jikjjatatajatjja awkijajj janiw kusiskänti, ukatsti janirakiw nayampis parlañ munjjänti. Mamajas akham sitänwa: “Jehová Diosan Testigopäñamat sipansa, jan wali jaqet uñtʼatäñamajj walikïspawa” sasa.

Awisajja, Jehová Diosajj awk taykaj contra saytʼasiñaj cheqapunit munpacha sasaw jisktʼasirïta. Jehová Diosaruw mayisirïta, Biblia liytʼasas munasiñapatwa lupʼirakirïta, ukaw jan aynachtʼañatakejj yanaptʼawayitu. Cheqas awk taykajajj nayat llakisisaw Bibliat jan yateqañaj munapkänti. Jehová Diosaw suma amtanakar puriñatak yanaptʼawayitu. Ukhamarusa Diosan Arupat jukʼamp yatiyasajj jukʼamp kusisitaw jikjjatasiyäta. Ukatwa precursorat serviñ amtayäta.

Yaqhep kullakanakajj precursorat serviñ munataj yatipjjäna ukhajja, sapjjetänwa: “Awk taykamajj jan sinti coleratäjjani ukhakam suytʼam” sasa. Ukhamïpansti Diosaruw yatiñ kankaña mayiyäta ukatsti qellqatanakansa yanaptʼa thaqarakiyätwa. Kunatsa precursorat serviñ munta uksa amuytʼasirakiyätwa, experienciani jilat kullakanakampis parltʼarakiyätwa. Ukaw Jehová Diosar kusisiyasa serviñatakejj yanaptʼitäna. Nayatï precursorat serviñ mä jukʼamp suytʼäjja, awk taykajajj naya contrakïskaniwa sasaw amuytʼasirakiyäta.

Qhep qhepa mara colegionkasinwa, precursorat serviñ qalltawayta. Mä qawqha tiempotjja, kawkhantï yatiyirinakajj wal munaski ukar sarañwa munayäta. Ukampis awk taykajajj janiw utat sarañaj munapkänti. Ukhamajj 20 maranïñkamaw suytʼayäta. 20 mara phoqasinsti Japón markat aynach toqeru, kawkhantï familiaranakajajj jakasipki uka cheqar khitatäñatakiw sucursalar mayiyäta, cheqas ukhamatakwa mamajajj jan sinti llakiskasapänti.

Uksa toqen servisinsti Bibliat yateqerinakajatjja, waljaniruw bautisasir uñjawayta. Ukatjja, Diosan arunakapat jukʼamp yatiyañatakejja, inglés aru yateqañwa qalltarakiyäta. Tamajanjja, precursor especialat servir pä jilatanakaw utjäna. Kunjamsa jupanakajj mayninakar yanaptʼapjjäna uk uñjasajja, jupanakjamaw precursor especialjam serviñ munarakïyäta. Uka tiemponjja, mamajajj pä kutiw sint usuntäna. Uka pä kutiw jupar yanaptʼañataki utar kuttʼayäta. Uk uñjasin wal muspharasajja, munasiñampiw uñj-jjetäna.

Paqallqo maranak qhepatsti, Atsushi precursor especial jilataw mä carta apayanitäna. Jupajj parlaniwayapksma ukanakat maynïr jilatawa. Cartapanjja sitänwa: “Casarasiñwa amtaskta, ¿jumajj nayamp casarasiñ munasmati?” sasa. Atsushi jilatampiñjja janipuniw kunapachas amuyirïkti. Jupas janiw nayampiñ amuykpachati sasaw amuyirïta. Mä phajjsitwa cartapar ‘jukʼamp uñtʼañ munirismawaʼ sasin jaysta. Uñtʼaskasinjja, Diosar serviñan niya pachpa amtanïpjjatajwa amuyapjjayäta. Panpachaniw Diosar sapüru serviñ munapjjayäta, Diosan markapar yanaptʼañatakejj kunsa lurakiñäniwa sasaw amtapjjayäta. Qhepatjja casarasjjaptwa. Mamajasa, tatajasa, mayni familiaranakajas casarasïwijarojj jutapjjänwa, ukajj walpun kusisiyitäna.

Precursor regulärat sirvkasajja, Atsushi esposojarojj tamanak tumptʼirin yanapiripatwa uttʼayapjjäna. Ukatjja, yaqha bendicionanakajj utjaskakïnwa,  precursor especialjama ukhamarak tamanak tumptʼirjamaw irnaqtʼjjapjjayäta. Visittʼapjjañajäkäna uka tamanak tumptʼañ tukuyjjasajja, sucursalatwa jawsanipjjetäna, akham sasaw jisktʼapjjetäna: “¿Nepal markan tamanak tumptʼirjam serviñ munapjjasmati?” sasa

Jayar saratajat awk taykajaw llakisini sasaw llakisiyäta. Jupanakampi teléfono toqe parlasajja, awkijajj sitänwa: “Mä suma cheqaruw sarapjjäta” sasa. Mä semana nayrajja, mä amigopaw Nepal markat parlir mä libro churatayna, ukatwa kunjamänsa uka markajj uk yatïna. Ukhamarus visitañatakejj mä suma cheqäspawa sasaw amuyatayna.

Nepal markankir jaqenakajj wali suma chuyman jaqenakäpjjewa, jupanakampejj wali sumaw jikjjatasipjjayäta. Qhepatsti Bangladesh markankir tamanaksa tumptʼapjjarakiyätwa. Uka markajj Nepal markat wali jakʼankkchïna ukasa, mayjänwa, yatiyañas janiw pachpäkänti. Phesqa maranak qhepatjja, Japón markaruw kuttʼayapjjetäna, ukanwa jichhajj tamanaka tumptʼasipkta.

Japón, Nepal, Bangladesh markanakan servisajja, jukʼampiw Jehová Diosar uñtʼawayta. Uka markanakan jakir jaqenakanjja, costumbrenakapasa, sarnaqäwinakapasa mayj mayjawa, jaqenakas kunayman chuymanïpjjarakiwa. Kunjamsa Jehová Diosajj taqe jupanakar munasi, yanaptʼi, katoqe, bendiciraki uk sumwa uñjawayta.

Jehová Diosar yuspärañajj waliw utjitu. Jupaw markapar irpasinitu, ukatsti munañap lurañatakis yanaptʼarakitu, Jehová Diosarakiw mä suma esposo churawayitu. Suma amtanakar puriñatakisa yanaptʼawayarakituwa. Jichhajja, Jehová Diosampisa, familiajampisa wali sumaw apasjjta. Diosan yanaptʼapampis mamajampejj wasitampiw wali suma apasjjta, wali kusisitapuniw jikjjatasta.