Armagedonanxa Diosax taqi nuwasiñanakwa chhaqtayani

“Jaqi masipar jiwayañax jupanakatakix wali ñanqhat uñjatawa. Kunatsa guerranakax utjpacha ukxa janiw amuyapkiti ukat axtaskañarakiwa janiw arupansa guerra arux utjkiti.” (GROENLANDIANKIR INUIT SAS UÑTʼAT JAQINAKAT ARSTʼÄWI, UKSTI FRIDTJOF NANSEN SAT YATXATTʼIR NORUEGO JAQIW SÄNA [1888]).

KUNATSA guerranakax utjpacha uk ‘jan amuyapkaspa’ ukat ‘axtasipxarakispa’, ukham jaqinak taypin jakasiñxa ¡taqiniw munsnaxa! Jan khitis guerra jan ukax chʼaxwaña uka aru parlxaspati, ¿janit ukhaman jakasiñ munksna? Ukham jakañax janiw chiqäspaw sañjamäkiti, yamas jaqix janiw ukham jakañx apankaspati.

Ukampis Diosax Isaías libronwa ukham jakasiñaw utjani sasin arsutayna: “Uka markanakasti espadanakapxa qhulliñ aradoruw tukuyxapxani, lansanakapsti yawthapiñ hocenakaruraki. Janirakiw kawkïr markas yaqha markampix nuwasiñatak sartkaniti. janirakiw guerran nuwasiñatakis yatichäwinakxa katuqapkaniti” sasa (Isaías 2:4).

Jichhürunakanxa aka uraqix 20.000.000 soldadonakampi wakichrantatäskiwa ukat niya pä tunka chiqanakanwa markanakax chʼaxwankasipki, ukhamax uka arunak phuqasiñapatakixa walja mayjtʼäwinakaw munasispa. Ukampis taqi chʼamani Jehová Diosaw jaqinakarux taripani. Jehová Diosan uka taripäwipasti Armagedonanwa tukuyxani siw Bibliaxa (Apocalipsis 16:14, 16).

Aka uraqpachan guerra nuclear satäki uka chʼaxwäwis Armagedón satäkaspa ukham sasaw aka qhipa urunakanxa parlapxi, ukampis kunas Armagedonax uka tuqitxa Enciclopedia Hispánica sat qillqatax akham siwa: “Aski tuqit saytʼirinakampi jan wali tuqit saytʼirinakampi taqi chʼamani Diosan urupana nuwasiñataki tantachasipkani uk sañ muni” sasa. Chiqpachapuniti aski tuqit saytʼirinakax ñanqhanakarux tukjpachäni, ¿jan ukax siw säwikïpachacha?

Ñanqhax jan ukax jan walinakax chhaqtayatäxaniw sasinxa walja kutiw Biblian qhanañchasi uk yatiñawa wal chuymachistu. Sañäni, Salmo libronxa akham siwa: “Jucharar jaqinakax aka uraqin tukusipxpan, ñanqha lurir jaqinakax jiwarapxpan” sasa (Salmo 104:35). Ukat Proverbios librox akham sarakiwa: “Aski luriri qʼuma jaqinakasti, aka uraqinwa wiñayatak jakapxani. Ukampis jan wali sarnaqir jaqinakasa, jan sum phuqhasa sarnaqirinakasa, aka uraqitxa apanukuta tukjatäpxaniwa” sasa (Proverbios 2:21, 22).

Akapachankir qhuru jaqinakax janiw munañanïñap sumat apanukuñ munapkaniti sasaw Bibliax qhanañcharaki; ukatwa Diosax jankʼaki  qhuru jaqinakarusa chʼaxwañanakarusa chhaqtayani (Salmo 2:2). Biblian Armagedón siski uka arux kamsañs muni uka tuqit jichhax yatxatañäni, uk yatiñaxa wakiskiriwa.

Meguidó satäkis uka jakʼan nuwasïwinaka

“Meguidó qullu” siski uka arutwa Armagedón uka arux juti, ukat Meguidó markansa vallenakapansa, mä arunxa, Jezreel vallensa chʼaxwasax atipasipxapunirïnwa. The Battles of Armageddon (Armagedonan nuwasïwinaka) sat libropanxa, Eric H. Cline sat yatxatir jaqix akham sasaw qillqatayna: “Meguidó markansa ukhamaraki Jezreel vallensa markanakax chʼaxwankapxapunirïnwa, ukan atipasipxataparjamaw taqi kunas mayjtʼirïna” sasa.

Kunjamtix uka yatxattʼir jaqix siskänxa, Meguidó jakʼanxa jachʼa chʼaxwäwinakaw apasirïna. Kunapachatix khä 1200 maranakan Mongolía markankir soldadonakax Asia tuqinkir markanakar uraq aparañataki mantanipkäna ukhaxa, Jezreel vallenwa nayraqat atipayasipxäna. Ukat Nayrïr Jachʼa Chʼaxwäwinxa (I Guerra Mundial), Edmund Allenby sat generalan pʼiqtʼata británico soldadonakaxa Turquiankir soldadonakarux Meguidó jakʼanwa atipapxarakïna. Chʼaxwäwinakat yatxatir mä jaqixa Edmund Allenby sat chachan atipatapatxa akham sänwa “jankʼakipuniw atipjäna” ukat “taqi nuwasïwinakat sipansa janiw ukham atipjäwix utjkänti” sasa.

Meguidó jakʼan jachʼa chʼaxwäwinakax apaskän ukanakat kamsis Bibliaxa. Amuytʼañataki, Barac sat taripirixa, Sísara sat chachan pʼiqtʼat cananeo soldadonakaruw uka chiqan atipjäna (Jueces 4:14-16; 5:19-21). Gedeón chachaxa, 300 soldadonakampikiwa walja madianita soldadonakar Meguidó jakʼan atipjäna (Jueces 7:19-22). Kunapachatix filisteonakax israelitanakaru atipjapkäna ukharakiw Saúl reyimpi Jonatán sat yuqapampix Guilboa sat qullu jakʼan jiwapxäna, uka qullux Jezreel vallet Inti jals tuqinkänwa (1 Samuel 31:1-7).

Nuwasiñataki suma lugarätapatwa, pasïr pusi waranq maranakanxa, Meguidó markansa Jezreel vallensa walja chʼaxwañanakax apasitayna. Uka tuqit yatxatir mä jaqix 34 chʼaxwäwinakaw uka chiqanakan apasïna sasaw yatiyaskaraki.

Meguidó markanxa kunanakas pasatayna ukhamaraki uka markax kawkjankisa ukanak yatiñawa, Armagedón arux kamsañsa muni uk amuyañxa yanaptʼistu. Biblianxa, Apocalipsis  libronaksay mä chiqan uka tuqit parlkchixa, ukampis Armagedonat parlkasax kuna tuqitsa uka chiqan parlaraki uk uñxattʼañaw Armagedonat sum amuytʼayistu, kunattix aka Uraqpachan utjasiri jaqinakaw jiwatasa jan ukax jakkiris uñjasipxaspa.

Armagedonat kamsis Bibliaxa

Meguidó chiqan chʼaxwankkasax mä atipirisay utjchïnxa, ukampis jan walinakxa janiw khitis chhaqtaykänti. Ukhamaraki uka chiqanxa, janirakiw Armagedonanjam aski tuqit saytʼirinakamp jan wali tuqit saytʼirinakampixa mä kutis nuwasipkänti. Chiqpachansa, Dios tuqitwa uka chʼaxwäwix jutani, kunattix aski tuqit jilïr saytʼirixa Diosakiwa. Kunjamtï Jesusax siskänxa “sumax maynikiw utji, ukasti Diosawa” sasa (Lucas 18:19). Ukat Bibliax qhanwa sistu, Armagedonax Diosan nuwasiñ urupawa sasina.

‘Taqi reyinakaruw tantachasini’ “taqi chʼaman Diosan jachʼa urupana” nuwasiñataki sistuwa Apocalipsis libroxa (Apocalipsis 16:14). Ukatxa ‘reyinakaruxa Armagedón satäkis uka chiqaruw tantachasini’ sarakiwa (Apocalipsis 16:16). * Uka qhipatxa akham sasaw qhanañcharaki ‘akapach reyinakampi ejercitonakapampixa’ “caballor latʼxatatäkän uka tuqi, ukhamarak ejercitop tuqi nuwasiñatakiw” tantachatäpxani sasa (Apocalipsis 19:19). Caballor latʼxatatäkän siski ukax Jesucristowa (1 Timoteo 6:14, 15; Apocalipsis 19:11, 12, 16).

¿Kunsa qillqatanakax qhanañchistu? Armagedonanxa Diosampi jan istʼasir jaqinakampiw nuwasipxani. ¿Kunatsa Jehová Diosampi Jesucristo Yuqapampixa nuwasïwi utjayapxani? Kunattix Armagedonanxa ‘aka uraqi tʼunjirinakaruwa tʼunjani’ (Apocalipsis 11:18). Ukatxa, suma pacharuw mantxañäni, “mä machaq uraqi[mpiru], mä machaq alaxpachampi[ru]” “ukansti taqi kunasa chiqapapunïniwa” (2 Pedro 3:13).

 ¿Kunatsa Armagedón chʼaxwäwin puriniñapaxa wakisi?

¿Kunatsa ‘munasir Diosax’ “Sumankañan jilïripa[ruxa]”, mä arunxa, Yuqaparux nuwasiñapataki khitanpachäni? ¿Uk sumti amuyxta? (2 Corintios 13:11; Isaías 9:6.) Uk amuyañatakixa, kuna amtampis khitanini uk amuyañasawa. ¿Kunatsa Jesusax nuwasi? Salmo libronxa, Jesusax caballor latʼxatatawa ukat “chiqa layku chʼamachasisa, llampʼu chuymaninakar chiqapar uñjasa[w]” saranti sasaw qhanañcharaki. Mä arunxa, Jesusax kunatix chiqapäki ukaruw munasi ukat jan chiqapäki ukarux uñisiwa, ukatwa Jesusax nuwasi (Salmo 45:4, 7).

Ukat akapachan ina chʼusat tʼaqhisiñax utjki ukaruxa, ¿kunjamsa Jehová Diosax uñji? Isaías profetax akham sasaw qillqäna: “Tatitusti mayjtʼasiwayarakiwa jan chiqa kankaña utjatap laykuxa” sasa. Ukham colerasitap laykuwa soldadükaspas ukham isthapisi, akham siwa: “Atipjañampisti hierro chalecompjamaw isthapisi, qhispiyasiñampix pʼiqipar mä cascompjamaw uchasi, phuqsusiñampisti mä isimpjamaw isthapisi, colerasiñapampisti mä mantompjamaw llawuntasiraki” (Isaías 59:15, 17).

Kunapachkamaxay qhuru jaqinakax munañanïchini ukhakamaxa, janiw aski jaqinakax jan axsaras suman jakasipkaniti (Proverbios 29:2; Eclesiastés 8:9). Chiqpachansa, ñanqha jaqinakax utjaskakispa ukhaxa, janiw ñanqha luräwinakax chhaqtkaspati. Ukhamasti, sumana ukat chiqapar uñjatäsa sarnaqañatakixa wakisiwa ñanqhanakar chhaqtayxañaxa. “Kʼari jucharar jaqixa, aski chiqa jaqin tʼaqhisiñapwa tʼaqhisini” sasaw Salomonax qillqäna (Proverbios 21:18).

Diosawa Taripirixa, jupawa jucharar jaqinakarux chiqaparjam juchanchaskani. “Jumax aka mundpachana jachʼa juesätawa, ¿janiti chiqaparu uñjkäta?” sasaw Abrahamax jisktʼäna. Ukatxa Jehová Diosax chiqaparupuniw uñji ukxa jupa kikpaw uñjawayäna (Génesis 18:25). Ukhamaraki, Jehová Diosax janiw khitin jiwañapsa munkiti siw Bibliaxa; janipun istʼasiñ munxapxiti ukhakiw jiwarayxi (Ezequiel 18:32; 2 Pedro 3:9).

Janiw ukhamak uñjañasäkiti

Uka chʼaxwäwinxa, ¿jiwasax khiti tuqitsa saytʼasiñäni? Taqiniwa sisnaxa, nayax askïki uka tuqit saytʼirinakampiwa chikachasïxa sasa. Ukampis ¿chiqpachapunit jupanakampïñäni? Sofonías sat profetax akham iwxtʼistu: “Chiqa kankañampi llampʼu chuymampirak sarnaqapxam” sasa (Sofonías 2:3). Diosax “taqinin qhispiyatäñapwa muni, kunatix chiqäki uk uñtʼapxañaparaki” sasaw apóstol Pablox säna (1 Timoteo 2:4).

Ukhamax qhispiyasiñatakixa Jehová Diosat chiqa yatichäwinakwa nayraqat yatiqañama, ukat Diosax aka Uraqit jan walinak chhaqtayañ amtki ukanaksa yatiqañamarakiwa. Ukatxa, yaqhamp lurañaw wakisi, taqi kunsa chiqaparuw lurañama, ukhamatwa Diosax katuqistani ukhamatarakwa jarkʼaqasistani.

Ukhamarjam sarnaqañäni ukhaxa, taqi chʼaxwanaka chhaqtayañapataki Armagedonan puriniñapxa wal suyantañäni. Armagedón pasatatxa, chʼaxwañanakax aka Uraqpachankir taqi jaqinakatakixa janiw amuyañjamäxaniti ukat axtaskañäxarakiniwa. “Janirakiw guerran nuwasiñatakis yatichäwinakxa katuq[xapxa]niti.” (Isaías 2:4.)

[Qhanañchäwi]

[3 janan qhanañchäwipa]

Diosax jaqinakan jan wali luratanakap chhaqtayir jutkani ukaw Armagedón sataxa

[4 janan fotopa]

Meguidó

[4 janan fotopa]

Gedeonampi soldadonakapampixa Meguidó jakʼanwa nuwasiñan atipjapxäna

[4, 5 jananakan fotopa]

Armagedón pasatatxa, aka Uraqpachankir jaqinakaxa, chʼaxwañanak janiw amuyxapxaniti ukat axtasiñäxarakiniwa

[6 janan fotopa]

Qhispiyatäñatakixa, nayraqat Jehová Diosampita ukhamaraki amtapampita yatiqañawa