Biblian yatichäwinakapa

¿Kunas Diosan amtapax aka uraqitakixa?

Aka yatichäwixa, kawkïr jisktʼanaktï jumax jisktʼasirïta ukwa pachpa Bibliamampi yatxatañ yanaptʼätam. Jumatï munsta ukhaxa, Jehová Diosan Qhanañchirinakapampiw aka jisktʼanakat yatxatasma.

1. ¿Kunas Diosan amtapax aka Uraqitakixa?

Jehová Diosax walja angelanak alaxpachan jakapxañapatak lurasinxa, jaqiruw aka Uraqin jakañapatak luratayna (Job 38:4, 7). Nayrïr chacharuxa Edén sat paraisoruw Jehová Diosax uchatayna, ukat ukanxa jupasa wawanakapasa wiñayatakiw jakapxañapäna (Génesis 2:15-17; Salmo 115:16 liytʼäta).

Edén paraisox Uraqinxa mä jiskʼa chiqankakïnwa. Adanamp Evampix wawanakanïpxañapänwa, ukat jilxattatarjamaw jukʼat jukʼat Uraqpach mä suma paraisor tukuyapxañapäna (Génesis 1:28). Janipuniw aka Uraqix tukjatäkaniti sasaw Bibliax qhanañchi. (Salmo 104:5 liytʼäta.)

2. ¿Kunatsa Uraqix jan paraisüki?

Adanamp Evampix Jehová Diosaruw kutkatasipxäna, ukatwa uka suma paraisot jaqsut uñjasipxäna. Ukhamatwa uka suma paraíso aptʼasiwaytanxa ukat janirakiw khitis kuttʼayirjamäxiti. Ukatwa Bibliax akham sispacha: “Ñanqha jaqinakarux [‘Uraqiʼ, NM] katuyxi” sasa (Job 9:24, Génesis 3:23, 24 liytʼäta).

Ukampis Jehová Diosax amtapxa janiw armkiti ukat arsutanakapxa phuqaskakiwa (Isaías 45:18). Ukhamasti kunjamäpkänti jaqinakax ukaruw Diosax wasitat kuttʼayxani. (Salmo 37:11 liytʼäta.)

3. ¿Kunsa Diosax aka Uraqin sumankañ utjañapatakix lurani?

Taqi jaqinakax sumankañan jakasipxañapatakixa, Jehová Diosax jan wali jaqinakarux chhaqtayañapawa. Ukxa Armagedón jachʼa chʼaxwäwipanwa lurani, kunapachatï angelanakapax uñisirinakapar qʼal tukjani ukha. Ukatxa Supayax waranq maranakaw jistʼantatäni, ukat Diosar munasir jaqinakax sumankañanwa aka Uraqin jakasipxani. (Apocalipsis 16:14, 16; 20:1-3; 21:3, 4 liytʼäta.)

  4. ¿Kunapachas tʼaqhisiñax tukusxani?

Uka waranq maranakanxa, Jesucristow alaxpachat aka Uraqxar apnaqani ukat mä paraisor tukuyarakini. Ukat Diosar munir jaqinakan juchanakapsa pampachaniwa, ukhamatwa usuntañanaksa, chuymankipstañsa ukat jiwañsa chhaqtayarakini. (Isaías 11:9; 25:8; 33:24; 35:1 liytʼäta.)

¿Kunapachas Diosax jan walinak tukjani? Uka urunak jakʼankxatap amuyapxañapatakixa Jesusax mä ‘chimpuʼ churawayäna. Taqi kunatï jichhürunakan pasaski ukaxa jaqinakar chhaqtayirjamawa, ukaw ‘akapachan tukusiñapʼ urunakan jakaskatasxa uñachtʼayistu. (Mateo 24:3, 7-14, 21, 22; 2 Timoteo 3:1-5 liytʼäta.)

5. ¿Khitinakas paraison jakapxani?

Jesusaxa, jaqinakar nayar arkir tukuyapxam ukat Diosjam munasiñanïpxañapatak yatichapxam sasaw arkirinakapar khitäna (Mateo 28:19, 20). Jehová Diosax taqi markanakan jakasir millón millón jaqinakaruw suma Uraqin jakasipxañapatak yatichaski (Sofonías 2:3). Khitinakatï Jehová Diosan Qhanañchirinakapamp tantachasipki jupanakaxa, suma chachäpxañapataki, suma warmïpxañapataki ukat suma awk taykäpxañapatakiw yatiqapxi. Ukanwa familianakax mä suytʼäwinïpxatap yatiqapxi. (Miqueas 4:1-4 liytʼäta.)

Diosar munasiri ukat Jupar kusisiyañ munir jaqinakaruxa, Jehová Diosan Qhanañchirinakapan Tantachasiñ Utanwa jikxatäta. (Hebreos 10:24, 25 liytʼäta.)

Jukʼamp yatxatañatakixa, ¿Kunsa Bibliax chiqpachapuni yatichi? aka libron 3 jaljap uñxattʼäta, ukax Jehová Diosan Qhanañchirinakapan luratawa.