Familianakataki

Chacha warminakajj Dios chuymäpjjañapaw wakisi

Enrique *: “Jaqechasipjjta ukhatpachaw Lilianamp Bibliat yatjjatañatak amtawayta. Sum amuytʼañapwa munayäta, ukampis janiw walja tiempo sum istʼirjamäkänti. Ukat jisktʼirïta ukhajja, jïsa, janiwa sasakiw jaysirïtu. Ukham satapajj janjamakiw yatjjatañatak yanaptʼkänti”.

Liliana: “Enriquemp jaqechasta ukhajj 18 maranikïyätwa. Qalltanjja panpachaniw Bibliat yatjjatapjjayäta, ukampis pantjasitanakajata ukat kunjamsa suma warmïristjja ukakwa sapa kuti arjjayaskirïtu. Ukaw wal chuym ustʼayirïtu ukat yatjjatañ janiw munirëjjti”.

¿KUNATSA Enriquempi Lilianampejj jan waltʼayasipkäna? Panpachaniw suma amtanipjjäna, Diosarus munasipjjäna ukat kunja wakiskiris Bibliat yatjjatañajj uks amuyapjjarakïnwa. Ukampis kunatï jupanakar mayachkañapäna ukajj jukʼampikiw jaljtayaskäna. Bibliat yatjjatasipkchïnsa janiw Dios chuymäpkänti.

¿Kunas Dios chuymäñajja? ¿Kunatsa chacha warminakajj Dios chuymäpjjañapa? Ukampis ¿kuna jan waltʼäwinakas utjaspa ukat kunjamsa ukar saykatapjjaspa?

¿Kunas Dios chuymäñajja?

Dios chuyma siski uka arojja, kunjamsa maynejj jakäw uñji ukarjamaw Biblian parlasi (Judas 18, 19). Kunjamäpjjes Dios chuymäpki ukanakajja ukat jan Dios chuymäpki ukanakasa uk sum Pablojj Biblian qhanstayäna. Aruparjamajj jan Dios chuymäki ukajj jupa pachpatakwa llakisi. Kuntï amuyaparjam askïki uk luri ukat janiw Diosan kamachinakapsa yäqkiti (1 Corintios 2:14; Gálatas 5:19, 20).

Ukampisa, Dios chuymäki ukajja wali askirjamwa Jehová Diosan kamachinakapar uñji. Diosajj amigopäkaspas ukhamwa uñji ukat Jupjamäñatakiw chʼamachasiraki (Efesios 5:1). Ukatwa mayninakarojj wali munasiñampi ukat llampʼu chuymamp uñji (Éxodo 34:6). Chʼamäkchi ukhasa, Diosan kamachinakap istʼapuniwa (Salmo 15:1, 4). Dariojj Canadá  markanwa jakasi, 35 maranakaw jaqechatäjje, jupajj akham siwa: “Amuyatajarjamajja, Dios chuymäki ukan luratapas ukat arsutapasa Jehová Diosamp sum apasiñti yanaptʼani janicha ukwa amuyi” sasa. Julia sat warmipajj akham sarakiwa: “Dios chuymäki uka warmejja, sapürutjamaw qollan ajayun luräwinakaparjam sarnaqañatak chʼamachasi” sasa (Gálatas 5:22, 23).

Dios chuymäñatakejja, janiw jaqechatäñapunejj wakiskiti. Sapa mayniw Diosar uñtʼañataki ukat jupat yateqasiñapatak chʼamachasiñapa sasaw Bibliajj yatichi (Hechos 17:26, 27).

¿Kunatsa Dios chuymäpjjañapa?

Niyakejjay sapa mayni Dios chuymäñatak chʼamachasiñapächejja, ¿kunatsa chacha warmejj Dios chuymäñatak chʼamachasipjjañapa? Ukatakejj aka toqet amuytʼañäni: Pä jaqew pachpa qallparu verduranak yapuchañ munapjje. Maynejja mä uruw yapuchañ amti, ukampis maynejj suytʼayañwa muni. Maynejj oraq wanunchañ muni, ukampis maynitakejj janiw ukajj wakisirjamäkiti. Maynejj sapürutjam jan samartʼas irnaqañ muni, maynïristi jan kun lurasakiw suytʼañ muni. Inas yapojj jiltasin achoqchispa, ukampisa panpachanitï mä suma amtar purisin irnaqtʼapjjaspa ukhajja, jukʼamp sumwa achoqaspa.

Chacha warmimpejj niya ukhamarakiw pasaspa. Jupanakat maynitï Dios chuymäñatak chʼamachasispa ukhajja, panpachanejj sumwa apasipjjaspa (1 Pedro 3:1, 2). Ukampis panpachanitï Diosan kamachinakaparjam sarnaqañataki ukat Diosar yupaychañatak chʼamachasipjjaspa ukhajja, jukʼamp sumwa apasipjjaspa. Kunjamtï Salomón reyejj siskänjja: “Mayni sapat sipansa paniniw jukʼamp askejja”. ¿Kunatsa? Kunattejj “ukhamatwa jukʼamp luratas utjaraki”, ukat “maynitejj jupanakat liwischi ukajja, mayniwa wayti” (Eclesiastés 4:9, 10).

Jumanakajj Dios chuymäñ munapjjpachätawa. Ukampis kunjamtï yapuchañatakejj wal trabajiñajj wakiskejja, ukhamarakiw panpachanejj wal chʼamachasipjjañama. Kuna pä toqetsa jan waltʼayasiñanakajj utjaspa ukat kuna ewjjtʼanakas yanaptʼapjjeristam uk uñjañäni.

NAYRÏRI: “Janiw tiemponïpkti”. “Chachajajj 7:00 jaypʼu horasaruw trabajojat irptir jutitu. Ukat utar puripjjta ukhajja, walja lurañanakaw utjapjjetu. Kuns lurañäni uk janiw amtirjamäpkti: chuymanakajan Bibliat wal yatjjatañ munasipkta, ukampis cuerpojj samartʼañ muni” sasaw jichhak jaqechasita Susy sat warmejj qhanañchi.

¿Kunas yanaptʼapjjeristam? Tiempo apstʼasipjjañamawa ukat kunjamanakatsa yanaptʼasipjjasma uks amuyapjjañamarakiwa. Susijj akham saskakiwa: “Panpachaniw alwat sartasin janïr trabajor sarkasinwa Biblia liytʼaña ukat uka toqet yatjjatañ amtawayapjjta. Ukhamarusa, utan lurañanakajj utjkitu ukanakampis yanaptʼarakituwa ukhamat jukʼamp tiemponïñataki” sasa. ¿Ukham chʼamachasipjjatapatjj kuna askinaksa jikjjatawayapjje? Eduardo chachapajj akham siwa: “Panpachani Bibliat jan jaytas yatjjatapjjatajatjja jan kunakiw jan waltʼäwinakar saykatapjjta ukat janirakiw sints llakisjjapjjti” sasa.

Ukat panpachani Diosat mayisipjjañamajj wali wakiskiripunïspawa. ¿Kunatakis yanaptʼapjjätam? “Warmijamp nämpejj janiw waltʼayasipkayätti. Ukat sapa aruma Diosat mayisiñatak amtawayapjjta, ukhamat taqe kunanakatejj llakisiyapkitu ukanakat Diosar yatiyañataki. Ukaw jan waltʼayasiñanakaj askichañataki ukat chacha warmi sum jakasiñatak yanaptʼawayapjjetu” sasaw Ramón sat chachajj qhanañchtʼi, jupajj 16 maranakaw jaqechatäjje.

¿JANIT AKHAM LURAPKASMA? Kunanakatsa Diosar yuspärapjjasma ukat kunas kusisiyapjjtam ukanakatwa utar purisajj mä qhawqha minutonak parltʼasipjjañama. Ukat kuna jan waltʼäwinakar saykatañatakis Diosan yanapap munapjjta ukanaksa amuytʼapjjañamarakiwa. Ukampis uka ratojj janiw maynin pantjasitap qhanstayañamäkiti.  Jan ukasti Diosat mayisipkäta ukhajj kunanakansa panpachanejj chʼamachasipjjañama uka toqetakwa yanap mayisipjjañama. Ukat qhepürojj luratanakamampiw kunjamäñs munapjjta uk uñachtʼayapjjañama.

PAYÏRI: “Janiw nayjamäkiti”. “Janipuniw libronak liyiñajj gustkitänti” sasaw Tonijj arsusi. Ukampis Natalia warmipajj janiw ukhamäkiti. Jupajj akham siwa: “Liyiñsa ukat kuntï yateqta ukanakat parlañas wal gustitu. Ukat Bibliat yatjjatapkta ukhajj Tonirojj ajjsaraykiristsa ukham awisajj amuyasta”.

¿Kunas yanaptʼapjjeristam? Jiskʼachasiñata jan ukajj khitis sum yati ukanak yantʼasiñat sipansa, maynit maynikamaw yanaptʼasipjjañama. Kunanaksa chachamasa jan ukajj warmimas sum lurañ yati ukanakwa amuyañama ukat walik ukhamanak lurtajj sasaw sañama. Tonijj akham siwa: “Warmijajja Biblian yatichäwinakapat yatjjatañsa ukat parlañsa wal munirïna, ukaw mä jukʼa aynachtʼayirïtu, ukatwa jupampejj Bibliat jan yatjjatañ munirïkti. Ukampis jupajj llampʼu chuymaniwa. Jichhajj jan jaytasaw Bibliat yatjjatapjjta, ukat janiw kuna ajjsarañajas utj-jjetuti. Cheqansa, Biblian yatichäwinakapat wal jupamp parltʼasiñ munta. Ukaw chacha warmjam sum jakasiñatak yanaptʼawayapjjetu” sasa.

Sapa semana Biblia liytʼañataki ukat yatjjatañatak tiempo apstʼasiñaw walja jaqechasitanakarojj sum apasiñatak yanaptʼawayi. Aka toqet amuyasipjjapunim: kunansa chʼamachasiñama ukwa amuytʼasiñama, janiw chachamana jan ukajj warmiman pantjasitapak uñchʼukiñamäkiti (Gálatas 6:4). Bibliat yatjjatapkta ukhajja, kuna jan walsa askichapjjañama uk janiw parlapjjañamäkiti. ¿Kunatsa?

Familiamampis manqʼtʼasiskasma ukham amuytʼasma. ¿Jimqʼechrantat llagam qollasismati? Janejjaya, ukhamtï lurasmajja janiw khitis manqʼañ munjjaspati. Diosat yatjjatañasa ukat munañap lurañasa manqʼtʼasksnas ukhamaw sasaw Jesusajj säna (Mateo 4:4; Juan 4:34). Jumatï Bibliat yateqasipkta ukhajj chuyma ustʼayasitamat parläta ukhajja, chachamasa jan ukajj warmimasa janiw Bibliat yatjjatañ munjjaniti. Jan waltʼäwinakat parlañajj awisajj wakisiwa, ukampisa yaqha rato parlañatakiw amtapjjañama (Proverbios 10:19; 15:23).

¿JANIT AKHAM LURAPKASMA? Kunjam jaqes chachamasa jan ukajj warmimasa uk paya jan ukajj kimsa toqet qellqtʼasim. Ukat mayan Bibliat uka toqenakat yatjjatapkäta ukhajja, ukhamätapajj kunja askis jumatakejja ukwa jupar yatiyañama.

Kuntï yapuchktan ukwa apthaptanjja

Panpachanitï Dios chuymäñatak chʼamachasipjjäta ukhajja, luratanakamarjamaw askinak jikjjatapjjäta. Diosan Arupajj akham sasaw qhanañchtʼistu: “Kuntejj jaqejj yapuchki ukrakwa apthapini” sasa (Gálatas 6:7).

Enriquempit Lilianampit qalltan parlaniwayktan jupanakajj Biblian uka arunakapajj cheqätapwa yateqawayapjje. 45 maranakaw jaqechatäjjapjje, ukat Bibliat jan jaytas yatjjatañajj yanaptʼapunitapsa yatipjjewa. “Jan sum apasisajj warmijaruw juchañchirïta. Ukampis nayajj chʼamachasiñajarakïnwa, ukwa tiempompejj amuyawayta” sasaw Enriquejj qhanañchi. Lilianajj akham sarakiwa: “Ukham jan waltʼäwin jikjjatasipkayäta ukhajja, Jehová Diosar munasipjjatajaw yanaptʼapjjetu. Taqe uka maranakanjja, panpachaniw Bibliat jan jaytas yatjjatawapjjta ukat Diosatsa mayisiwayapjjaraktwa. Ukat kunjamsa Enriquejj qollan ajayun achuparjam sarnaqañatak chʼamachasi uk uñjasajja, jukʼampwa jupar munasta”.

[Qhanañchäwi]

AMUYTʼAÑATAKI JISKTʼANAKA

▪ ¿Diosat panpachani mayisitajatjja qhawqha tiempöjjesa?

▪ ¿Chachajasa jan ukajj warmijasa Biblian yatichäwinakap nayamp yatjjatañapatakejj kunjamsa yanaptʼiristjja?