¿Kunats wali wakiskirïpacha milagronakat yatjjatañajja?

“Milagronakajj janiw utjkaspati ukajj ciencia contrawa.” (RICHARD DAWKINS, EX CATEDRÁTICO PARA LA COMPRENSIÓN PÚBLICA DE LA CIENCIA)

“Milagronakajj utjapuniwa. Religionankirinakajj wali askitwa uk uñjapjje. Antisas milagronak lurasajja, Diosajj luratanakapar wali munasitapwa uñachtʼayi.” (ROBERT LARMER, FILOSOFÍA TOQET YATJJATTʼATA)

¿MILAGRONAKAJJ utjiti? Jaqenakajj mayj mayjwa amuyapjje, ukwa uka pä qhanañchäwin uñjaniwaytanjja. ¿Jumajj kunjams amuyarakta?

Milagronakarojj creytwa sañajj inas jumatak chʼamächi. Creyirista ukhajja, jan amuyunïkiristsa ukat taqe kunarus creykakiristsa ukham amuyapjjaspa sasin inas mayninakjam amuyaraksta.

Milagronakajj utjaskapuniwa sasin inas amuyaraksta. Ukat Moisesajj Wila Lamar Qota payar jaljtayäna sasin Bibliajj parlki ukat yaqha milagronakats parlkaraki inas jan ukanakaruk creykstati, jan ukasti jichhürunakan milagronak utjatap creyiraksta. Jichhak mistsur mä qellqatajj akham siwa: “Inti jalanta toqen jakirinakajja, mä arunjja, Estados Unidos markankirinakatjja, sapa pusinit kimsaniw milagronakar creyipjje ukat Gran Bretaña markankirinakatjja, sapa patakat kimsa tunka kimsaqallqoniw milagronakarojj creyipjjaraki” sasa (The Cambridge Companion to Miracles [Guía Cambridge de los milagros], Graham H. Twelftree chachan qellqata). Ukampis janiw cristianonakakejj milagronakar creyipkiti. Britannica Encyclopedia of World Religions qellqatajja, “taqe religionanakaw milagronakarojj creyipjje” sasaw qhanañcharaki.

 Ukat inas mayninakjam akham saraksta: “Janiw yatkti, ni yatiñs munkarakti, jakäwijanjj janiw milagrojj utjkiti” sasa. Ukampis, milagronakat yatjjatañamajj ¿kunats wakisi?

Jan qollkañ usump usuntatäkasmas ukham amuytʼañäni, ukat mä uñtʼat revista toqe usumatak qolla utjatap yatisma ukhajja, ¿janit uka toqet jukʼamp yatjjatañatak chʼamachaskasma? Mä jukʼa tiempotjja aka Oraqen jakasirinakatakejj walja milagronakaw utjäni siw Biblianjja. Uka suma yatiyäwejj cheqapunit janicha uk yatjjatañatakejj ¿janit tiempsa, chʼamsa apstʼasiñajj wakiskaspa?

Kuna milagronakänisa uk janïr yatjjatkasajja, milagronakar jan creyirinakajj kunjams amuyapjje uk kimsa toqet uñjañäni.

[3 janan recuadropa]

¿KUNAS MILAGROJJA?

Mä wali muspharkañ luräwiwa, janiw aleq jaqekejj uk lurkaspati ukat mä wali chʼaman ajayuts jutkaspa ukham uñtʼasi.