Adanajj nayrïr chachjamajja, walja patak maranakaw jakäna. Ukampis awkiptasinwa jiwjjäna, ukhat jichhakamajj jan jiwañatakejj jaqenakajj kunaymaninakwa lurawayapjje, ukampis janiw khitis jiwañat qhespiwaykiti. ¿Kunatsa? Kunattejj Adán chachajj Diosar jan istʼatapatwa jiwäna, ukatwa jiwasajj uka jucha katoqasin jiwaraktanjja. (Génesis 5:5 ukat Romanos 5:12 liytʼäta.)

Ukhamajj wiñay jakañatakejj juchanakasat mä qhespiyiriw wakisïna (Job 33:24, 25). Mä qhespiyäwejja, mayniru jan walit apsuña, jan ukajj qhespiyaña sañ muni. Jiwasajja jiwañatwa qhespiñasäna (Éxodo 21:29, 30). Ukhamajj jiwasanakar jiwañat qhespiyañatakejja, Jesusaw jakäwip aptʼasiwayi. (Juan 3:16 liytʼäta.)

Janiw taqpach jaqenakajj usunakatsa ni jiwañatsa qhespiyatäpkaniti. Khitinakatï Adán chachjam Diosar jan istʼapkani ukanakajj jiwapjjaniwa. Ukampis khitinakatï juchanakapat perdón katoqapkani, ukanakakiw wiñayatak jakasipjjani. (Isaías 33:24; 35:3-6 liytʼäta.)

Ukhamajj perdón katoqañatakejj ¿kunsa lurañasa? Bibliat yatjjatasaw Diosat yateqañasa. Jïsa, Bibliakiw sum jakasiñataki ukat Diosampi askit uñjatäñataki ukhamarak wiñay jakañ jikjjatañatakis yanaptʼistaspa. (Juan 17:3 ukat Hechos 3:19 liytʼäta.)