“JAQERUW jiwayatayna” sasaw mä kutejj pä chachanakar mä markan tumpantapjjäna, tribunalajj jiwapjjañapatakiw uka chachanakar juchañchäna. Juicionjja, cheqapunit juchanipjjäna janicha uk janiw sum qhanañchaskänti. Abogadonakajj uka juicion pantjasipjjatap yatisajja, wal chʼamachasisaw maynïr qhespiyapjjäna. Ukampis maynirojj janiw khitis qhespiykaspänti, kunattejj jiwayatäjjänwa.

Ukham pantjasiñjja, kawkïr markans utjakispawa. Ukatwa kunatï “cheqa[ki]” ukarjamaw luräta sasin Bibliajj akham ewjjtʼi (Deuteronomio 16:20). Juezanakajj cheqaparjam kuns lurapjje ukhajja, taqeniw sum jikjjatastanjja. Israel markarojj jan khitir yaqhachasiñapataki ukat cheqaparjam kuns lurañatakejja, Diosajj mä Ley churäna. Ukhamajj Diosan ‘leyinakapajj cheqaparjamati’ janicha, uk jichhajj yatjjatañäni (Deuteronomio 32:4).

Juezanakatï cheqaparjam kuns lurapjje, qollqemp jan chilltayasipjje ukhajja, taqenitakis wali askiwa. Diosan Leyipajj ukham juezanakarojj wali askitwa uñjäna. Israel markajj Egiptot mistjjäna uka qhepatjja, Moisesarojj akham ewjjtʼasïna: “Ajllim suma amuytʼan chachanaka, [...] Diosaru ajjsartirinakañapawa, ukhamarak qhana luririnaka, janiwa jupatakiki kunsa thaqherïñapäkiti” sasa (Éxodo 18:21, 22). Ukat 40 maranak qhepatjja, Moisesajj akham saskakïnwa: juezäpjjañapatakejj ‘sum amuytʼasiri, yatiñäni ukat experienciani jaqenak thaqhapjjäta’ sasa (Deuteronomio 1:13-17).

Walja maranak qhepatjja, Judá marka apnaqeri Jehosafat * chachajja akham sasaw juezanakar ewjjtʼäna: ‘Sum amuyasipjjam, janiw jaqenakatak juzgapktati, jan ukasti Diosatakiw juzgaptajja, Jupaw jumanakampïskani. Tatitur ajjsarapjjam, ukhamarak sum amuyasipjjarakim kuntï lurapkäta ukanakanjja, jiwasan Diosasasti janiw aleqaki uñjkaniti jan cheqapar luratjja, mä qawqhaniruki uñjatarusa, ni qollqe chilltañanaksa’ sasa (2 Crónicas 19:6, 7). ‘Qollqempitï chilltayasipjjäta jan ukajj yaqhachapjjätajja, kuna jan walitsa Diosaw juchañchapjjätam’ sasaw reyejj juezanakar amtayaskäna.

Juezanakajj ukarjam lurapjjäna ukhajja, taqeniw sum jikjjatasipjjäna. Ukampis Diosajj janiw ukham arunakampik ewjjtʼkänti, jan ukasti, cheqaparjam kuns lurapjjañapatakejj walja aski yatichäwinak churäna. Ukanakat mä qawqha uñjañäni.

Juezanakajja, sum amuytʼasiri, ukat yatiñani jaqenakapjjañapäkchinsa, janiw amuyuparjamaki ni yatiñaparjamakis juzgapjjañapäkänti. Jupanakar yanaptʼañatakejj Jehová Diosajj aski yatichäwinak churäna. Sañäni:

Taqe kun sum yatjjataña. Jehová Diosajj akhamwa Moisés toqnam juezanakar ewjjtʼäna: “Sapaqat mayniruraki suma cheqa kankañampi  uñjapjjam” sasa (Deuteronomio 1:16). Mä juezajj taqe kun sum yatjjatasakiw cheqaparjam kuns amtaspa. Ukatwa Diosajj juicio sarayirinakarojj sum yatjjatapjjañapatak ewjjtʼäna. Juicio janïr qalltkasajja, kunanakattï maynïr juchañchaski ukajj cheqapunïskiti janicha uk juezanakajj sum yatjjatapjjañapäna (Deuteronomio 13:14; 17:4).

Testigonakar istʼaña. Sum yatjjatañatakejja, testigonakar istʼañajj wali wakiskirïnwa. Leyejj akham säna: “Mä sapa testigon mayni jucha lurir jaqeru qhanañchatapajja janiw askïkiti, kunapachatejj pani jan ukajj kimsa testigonaka qhanañchapjjani ukaw walïnejja” sasa (Deuteronomio 19:15). Testigonakarusti Diosan Leyipajj akham ewjjtʼarakïna: “Jan kʼari arunakjja parlamti, janirak kʼari arunak parliri jaqerus arjjatasin yanaptʼamti” sasa (Éxodo 23:1).

Sum yatjjatas juzgaña. Testigonakatak utjkäna uka Leyjja, kʼarinak jan parlapjjañatakiw yanaptʼäna. Leyejj akham säna: “Juesanakasti [...] suma amuyumpiw ukanakjjatjja [yatjjatapjjani], ukattï uka kʼari testigon arsutanakapajj jilap contra jan cheqäkani ukapachajj, pachpa arsüwimpiw juparojj tʼaqhesiyani, kunjämtejj jupajj maynitaki munkän ukhama” sasa (Deuteronomio 19:18, 19). Amuytʼañataki, mä chachatï maynin herenciapa katusiñ layku kʼarinak parlaspänjja, uka herenciajj qawqhakantï ukjpach churañapäna. Ukat jan juchanir jiwayapjjañapataki kʼarisispän ukhajja, jupaw jiwañapäna. Uka leyejja, kunatï cheqäki uk parlapjjañapatakiw jaqenakarojj yanaptʼäna.

Jan yaqhachas juzgaña. Taqe kun sum yatisjjäna ukhajja, ukarjamaw juezanakajj sum amuytʼas mä amtar puripjjañapäna. Ukatakejj Diosan Leyipajj akham ewjjtʼäna: “Janiraki pisi chʼamanirusa arjjatamti ni munañanina nayraqataparusa altʼasimti. Kunapachatejj mä queja uñjkäta ukapachasti  kunatejj cheqapäki ukaru jaysasa luram” sasa (Levítico 19:15). Juezanakajj luratanakarjamaw juzgapjjañapäna, janiw uñnaqaki ni qollqeniti janicha ukanak uñjasaki juzgapjjañapäkänti.

Uka Leyinakajj nayra tiempons Israel markar churaschïnjja, jichhürunakan utjki uka tribunalanakan yanaptʼarakispawa. Ukarjam lurapjjaspajja, janiw utjkaspati jan cheqaparjam uñjat juchañchäwinaka ni ina chʼusa juicionakasa.

Moisesajj akhamwa israelitanakar jisktʼäna: “¿Kawkïri jachʼa markaraki utji leyinakapasa, arsutanakapas cheqa, kunjamtï nayajj aka yatichäwinak jumanakar churapjjsma ukhamajja?” (Deuteronomio 4:8). Janiw yaqha markajj juicionak toqeta suma leyinakanïpkänti. Salomón reyit amtañäni, waynäkäna ukhajja, Diosan leyinakaparjam sarnaqañatakiw chʼamachasïna. Israelitanakasti jan ajjsarasaw sum jakasipjjäna; taqeniw ‘manqʼasipjjäna, umapjjäna ukat kusisipjjarakïna’ (1 Reyes 4:20, 25).

Ukampis israelitanakajj janiw Diosar istʼjjapjjänti. Jeremías profeta toqnamjja, Diosajj akham säna: “¿Kawkinkaraki yatiñapasti niyaki arunakapajj apanukupjjchi ukapachasti?” sasa (Jeremías 8:9). Jerusalén markajj “jaqe jiwayiri” markäjjänwa, ukat ‘ajjtaskañ luräwinakampiw’ phoqantatäjjäna. Qhepatjja, tʼunjatäjjänwa, 70 maranakarakiw apanukuta uñjasïna (Ezequiel 22:2; Jeremías 25:11).

Israel markan sinti jan walinak utjkäna ukhaw Isaías profetajj jakäna. Nayra maranakat amtasisajja, Jehová Diosata ukat Leyinakapat akham säna: “Kunapachatejj jumajj taqe aka oraqpachar uñjkäta ukkhajj, jaqenakajj yateqapjjaniwa kunatejj cheqapäki ukjja” sasa (Isaías 26:9).

Jesucristojj kunjamsa jutïrin apnaqjjani uka toqetjja, Isaías profetajj akhamwa säna: “Jupajj janiw aleq uñkatasaki kunsa uñjkaniti, chʼajjwanaksa janirakiw aleqa parlanak istʼasaki tʼaqjkaniti. Aynachtʼatanakarusti cheqa luräwimpiw uñjani” sasa (Isaías 11:3, 4). Khitinakatï Diosan Reinopan Jesucristomp apnaqatäpkani ukanakajja, wali kusisitaw jakasipjjani (Mateo 6:10).