NAYRÏR JANAN PʼEQEÑCHÄWIPA | ¿SUPAYAJJ CHEQAPUNIT UTJPACHA?
¿Supayajj cheqapunit utjpacha?
Jaqoqanit mä angelar uñtataw Supayajj mä esculturan uñachtʼayasi (Madrid, España)
“Wawaskäyät ukhajja, jan istʼasirïkt ukhajj ‘Supayaw irpasïtam’ sasaw mamajajj sirïtu. Uk satajja, ‘irpasiskitpanaya’ sasaw sirïta, kunattejj Diosan utjatapwa creyiyäta, janiw Supayan utjatap creykayätti” sasaw El Salvador markankir Rogelio chachajj säna.
Jumajj ¿kunsa Supayat amuyarakta? Akjjar qhanañchaski ukanakat ¿kawkïris jumatak cheqjamajja?
Supayajj janiw utjkiti, jan wali utjki ukakiwa.
Supayajj utjiwa, ukampis janiw jaqenakar kuns kamachkiti.
Supayajj wali chʼaman mä ajayuwa, jaqenakarojj munañaparjamaw apnaqe.
Waljaniw ukham mayj mayja amuyapjje. Ukampis uka amuyunakat ¿kawkïris cheqäpacha? ¿Uk yatiñajj wakisipuniti? Supayatï jan utjkchi ukhajja, utjatap creyipki ukanakajj pantjatäsipkiwa. Utjchi ukat jaqenakar jan kuns kamachkchi ukhajja, jupar ajjsaririnakajj inamayakiw ajjsarasipki. Ukampis Supayatï utjchi ukat jaqenakar munañaparjam apnaqañ munchi ukhajja, ¿janit jupat jukʼampi amuyasiñajj wakiskaspa?
¿Supayajj jan wali utjki ukakïpachati, jan ukajj cheqapunich utjpacha? Utjchi ukhajja, ¿jan walir puriyiristamti? Ukhamächejja, ¿kunjamatsa jarkʼaqasisma? Uka toqet Bibliajj kamsisa uk yatjjatañäni.
