Alicante sat markanwa jilsuwayta, ukajj Mediterráneo sat lamar qota jakʼankiwa. Utajan chʼajjwañanakakiw utjaskiri, ukatwa calleruk sarjjerïta. Utaj jakʼanjja, llantanaka askichañatak mä talleraw utjäna, ukanwa José María sat mä chachajj irnaqäna, jupampiw wali suma amigopjjayäta. Niyakejjay familiajajj nayat jan sinti llakisipkchïnjja, Jupajj wali suma jaqënwa, ukat sum uñjarakirïtu. Nayat pä tunka maranak jilïrïkchïnsa, llakit uñjasirïta ukhajj mä jiljamaw yanaptʼitäna, jupajj cheqpach amigojänwa.

José Mariajj Bibliatwa Jehová Diosan Testigonakapampi yatjjataskäna. Kuntï yateqkän ukanakajja, chuymaparuw purtʼäna ukajj qhanaw amuyasïna, kunatejj ukanakatwa nayar parlirïtu. Wali respetompis istʼirïkstjja, janiw uka toqet yatjjatañ munkayätti. Nayajj waynaskayätwa, yaqhanak lurañ munayäta. Ukampis ukajj mayjtʼañampiskänwa.

Kunjamatsa uka jan walir purtʼasta uka toqet janiw parlañ munkti, akak sirista, ‘jan sum amuytʼasisaw ukhamar purtʼasta’ sasa. Mä urunakwa jakäwijajj mayjtʼäna, wali chʼamani qʼajjo waynatjja, mä qollayasiñ utan ikiñar jaqkatataw uñjasta. Ukhaman uñjasiñajj nayatak wali chʼamänwa. Ukatwa ‘kunatakis jakaskta’ sasin sapa kuti jisktʼasirïta.

José Mariajj jankʼakiw uñjir jutatayna, ukatjja, visittʼapjjañapatakejj qollayasiñ uta jakʼan jakir Jehová Diosan Testigonakaparuw yatiyatayna. Tumptʼir jutapjjatapajj chuymajaruw purtʼitäna. Mä jukʼa walichasjjasajja, Testigonakampiw Bibliat yateqañ qalltawayta. Ukanjja, kunatsa jaqenakajj tʼaqhestan, jiwaraktan, ukat kunatsa Diosajj jan walinak jan chhaqtaykpacha ukanakwa yateqta. Ukatjja, kunjamsa aka Oraqer Diosajj jan juchani jaqenakampi phoqantani, ukat ‘janiw khitis sisjjaniti: “Usutätwa” sasajja’ ukanaksa liytʼaraktwa (Isaías 33:24). Ukhat aksaruw jakäwir wali sum uñjañ qalltawayta.

Qollayasiñ utat mistjjayäta ukhatakejja, jaypachaw Bibliat yatjjatjjayäta. Ukatwa Testigonakan tantachäwinakaparusa, ukat Bibliat jaqenakar yatiyiris sarjjayäta, yatiyirejj silla de ruedat sarirïta. Noviembre 5, 1988 maratakejja, 20 maranëjjayätwa, ukhaw Diosar jakäwejj katuyasis bautisasiwajjta. Jehová Diosaw jan aynachtʼañatak yanaptʼawayitu.

Jehová Diosar taqe chuymaw serviñ munayäta, ukatwa kunanaktï lurirjamäkayät ukanak lurañatak chʼamachasiyäta (1 Timoteo 4:15). Qalltan ukajj chʼamakïnwa, familiajajj janiw Jehová Diosan Testigopäñaj munapkänti. Ukampis jilat kullakanakaw tantachäwinakaru, ukat yatiyir sarañatakis wal yanaptʼawayapjjetu.

Qhepatjja, uruy arumaw yanap munjjayäta. Kawkhantï usurnukstatanakar uñjapki uka uta walpun thaqasajja, Valencia sat markänwa jikjjatta, ukasti Alicante markat 160 kilometronak alay toqenkiwa. Jichhakamaw uka cheqan jakasiskta.

Janis ikiñat sartirjamäkstjja, Jehová Diosar taqe chuymaw serviñ munta. Usurnukstat jaqenakar gobiernojj qollqemp yanaptʼki, ukat yaqhanakajj qollq wajjtʼapkitu ukanakampiw mä computador alasta. Ukjja, ikiñ jakʼaruw uchtʼarapipjjetu, ukat mä celularamp kun alasirakta. Sapa alwaw qollayasiñ utankirit maynejj computadora, celulara naktayarapitu. Computadorjja, barbilla satäkis uka cheqampiw apnaqta, qellqtʼañatakejj mä jiskʼa lawar uñtasita varillaw yanaptʼitu.

¿Kunjamsa ukanakajj yanaptʼawayitu? Internetan jw.org sat cheqar mantañasa ukhamarak Watchtower INTERNETANKIR BIBLIOTECA sat cheqar mantañas janiw chʼamäjjeti. Sapüruw Bibliat apstʼat qellqatanak yatjjatañatak mantta, ukaw Diosar jukʼamp sum uñtʼañataki, kunjam Diosasa uk yatjjatañatakis yanaptʼawayitu. Llakita ukat sapak uñjaskta ukhajja, chuymar purtʼkir yatichäwinakwa uka cheqan jikjjatta, ukaw wal chuymachtʼitu.

Ukatjja, tantachäwinak computador toqew istʼta. Janiw ukakïkiti, uka toqew arstʼta, Diosar oracionsa mayta, arstʼäwinak churta ukat Yatiyañataki sat revistsa liytʼaraktwa. Taqe ukanakjja, jakaskta uka cheqatwa lurta. Janiw tantachäwinakar sarirjamäkti, ukampis tamajj taypinkaskataj sum amuyasta.

Janis mayni jilat kullakanakjam utat uta yatiyir sarirjamäkstjja, computador toqe, telefon toqew yatiyta. Ukanakampi yatiyañajj wal gustitu. Ukatwa tamajankir irpir chuyman jilatanakajj teléfono toqe yatiyañ sarayañajatak mayipjjetu. Walja jilat kullakanakaw teléfono toqe yatiyapjje, jupanakajj janiw utat uta yatiyir misturjamäpkiti.

 Ukampis janiw uka aparatonaka apnaqasak tiempo paskti, jan ukasti walja amigonakajaw visitir jutapjje. Jupanakamp chikajj familiaranakapaw jutapjje, ukat Bibliatsa jupanakajj yatjjatañ munapjjarakiwa, amigonakajajj nayaruw Bibliat yatichañajatak mayipjjetu. Awisajja, familjam Diosar yupaychañataki aruman yatjjatañatakiw familpach jutapjje. Jiskʼa wawanakar ‘kunatsa Jehová Diosar munasipjje’ uk jisktʼañas wal kusisiyarakitu.

Ukham visittʼir jutapjjatapat wal jilat kullakanakar yuspärta, taqe cheqat amigonakajajj visitir jutapjje. Ukajj qollayasiñ utan irnaqapki ukanakarojj wal muspharayi. Sapüruw walja jilat kullakanakampi bendecitapat Jehová Diosar yuspärta.

‘¿Kunjamasktasa?’ sasin jisktʼapjjetu ukhajja, “chʼamachasisktwa” sasaw sista. Janiw naya sapak jan walinakan uñjaskti, taqe cristianonakaw kunayman jan walin uñjasipjje, ukhamasti taqeniw ‘iyawsäwin suma nuwasiñapan nuwastanjja’ (1 Timoteo 6:12). ¿Kunas jan sinti llakisiñatak yanaptʼawayitu? Jehová Diosar sapür mayista, taqe chuyma Jupar serviñatakiw chʼamachasta, kuntï churapjjamaw siski ukanakarus taqe chuymaw confiyarakta, ukanakaw jan aynachtʼañatak yanaptʼawayitu.

Paraison kunjamsa jakasjjañäni uka toqet lupʼiñaw wal kusisiyitu, ukan thoqtañasa, tʼijtañas kunja sumänis ukwa munta. Awisajj José María amigojampiw chanstʼasipjjerïta, jupajj poliomielitis satäkis ukamp usuntataw uñjasi. Juparojj akham sasaw sirïta: ‘¿Khitis tʼijtañat atipaspa?’ sasa. Ukampis jupajj akham sirïtuwa: “Khitisay atipaskpan ukajj janiw añcha wakiskirïkiti, Paraison tʼijnaqañaw jukʼamp wakiskirejja” sasa.

Usurnukstat jakasiñajj nayatak chʼamakiwa. Cheqas waynäkasaw jan sum amuytʼasis sarnaqas jan walir purtʼasiwayta. Jehová Diosarojj jan jaytatapat walpun yuspärta. Jupajj waljanak churawayitu, walja jilat kullakanaka, jakañ munaskakiña, mayninakar yanaptʼaña ukat jutïritak mä suytʼäw kun churawayitu. Cheqas Jehová Diosajj walpun yanaptʼawayitu.