1. ¿Kunjam uñjatäñsa taqenis muntanjja?

MÄ UÑTʼATAMPIS jikisksna ukham amuytʼañäni, juparojj sum uñtʼtanjja respetaraktanwa, ukampis jupajj kuna sutinïtansa khitïtansa uk jan amtkaspati ukhajja, ¿kunjamakis jikjjatassna? Llaktʼassnawa, cheqas taqeniw sum uñjatäñ muntanjja. Ukampis janiw khitïtansa ukak yatipjjañap munktanti jan ukasti kunjam jaqëtansa, kunanaktï lurktan ukanak wali valoranit uñjapjjaspa ukwa muntanjja (Núm. 11:16; Job 31:6).

2, 3. Mayninakampi sum uñjatäñ munañajj walikïskchisa, ¿kunanakatsa amuyasiñasa? (Aka paginankir dibujo uñjjattʼäta).

² Mayninakampi sum uñjatäñ munañajj walikïskchisa, pantjasirïtas laykojj jachʼañchayasiñwa munjjsna, ukajj janiw walïkaspati. Supayan apnaqat akapachajja, taqenin sumat uñjatäña, wali uñtʼatäñ munañasatakiw chʼamañchistu. Ukhamäñatak chʼamachassna ukhajja, janiw alajjpachankir Jehová Dios Awkisar jachʼañchjjsnati, ni honra katoqañapatakis yanaptʼjjsnati (Apoc. 4:11).

 ³ Jesusajj aka oraqenkkäna ukhajja, religión pʼeqtʼirinakampejj ukaw pasäna. Ukatwa Jesusajj discipulonakapar akham säna: “Escribanakat amuyasipjjam, jupanakajj suma jachʼa isinakamp isintasisaw taqe cheqans sarnaqañ munapjje, qhatunakan aruntayasiñs wal munapjjaraki. Sinagoganakansa nayraqataruw qontʼasiñ munapjje, cenanakansa suma lugarankañpun munapjje” sasa. Ukatjja “jupanakajj jukʼamp juchañchatäpjjani[wa]” sasaw sarakïna (Luc. 20:46, 47). Ukampis Jesusajj jukʼa valorani qollqe churkäna uka pobre viuda warmirojj jachʼañchänwa, jaqenakajj inas jan ukham lurapkchispänti (Luc. 21:1-4). Cheqas Jesusajj janiw jaqenakjamajj mayninakar uñjkänti. Aka yatichäwejja, kunjamtï Jehová Diosajj jaqenakar uñjki ukham uñjañatakiw yanaptʼistani.  

4. ¿Khitimp sum uñjatäñas jukʼamp wakiskirejja, ukat kunatsa?

⁴ ¿Khitimp sum uñjatäñsa thaqañasa? Jiwasajj janiw akapachankir jaqenakjam universidadar sarasa, qollqe ganañ amtampi jachʼa negocionak lurasa, sum anatañ yatis jachʼañchatäñ munktanti. Jan ukasti kuntï apóstol Pablojj siskäna ukwa muntanjja, jupajj akham sänwa: “Jichhajj niyakejjay jumanakajj Diosar uñtʼjjapjjstajja jan ukajj niyakejjay Diosajj jumanakar uñtʼjjapjjstamjja, ¿kunataraki akapachan inamaya jan serviri amuyunakapar mayamp kuttʼapjjtasti, kunataraki ukanakar mayampi mä esclavjam serviñ munapjjtasti?” sasa (Gál. 4:9). Taqe kunjjar munañani Diosampi uñtʼatäñajj mä suma bendicionawa. Jupajj jiwasampi sum apasiñwa muni. Kunjamtï Bibliat yatjjatat mä chachajj siskänjja, “Jupajj sum uñjistu, yanaptʼarakistuwa”. Jehová Diosajj amigoparjam uñtʼistu ukhajja, kuna amtampitï lurkistu ukajj phoqasiwa (Ecl. 12:13, 14).

5. ¿Kunsa Jehová Diosamp uñtʼatäñatakejj lurañasa?

⁵ Ukaw Moisés chachampejj pasäna. Thakinakam uñtʼayita sasin Jehová Diosar mayïna ukhajja, Diosajj akham sänwa: “Kuntejj jumajj siskta ukhamarojj luräwa, nayansti jumaruw confiansajjajja utjitu [mä arunjja, ‘jumarojj sutimatwa uñtʼsma’, NM], ukatwa nayana yanapajja jikjjattajja” sasa (Éx. 33:12-17). Jehová Diosajj sapa maynir uñtʼistu ukhajja, ukhamarakiw walja bendicionanak katoqtanjja. Ukampis ¿kunsa Jehová Diosamp uñtʼatäñatakejj lurañasa? Juparojj munasiñasawa, jakäwissa katuyañasarakiwa (1 Corintios 8:3 liytʼañataki).

6, 7. ¿Kunas Jehová Diosamp sum apasiñ aptʼasiyistaspa?

⁶ Jehová Diosan amigopäskakiñatakejj chʼamachasiñasawa. Apóstol Pablojj qellqkäna uka Galacia markankir jilat kullakanakjamarakiw jiwasajj ‘akapachan inamaya jan serviri amuyunakapat’ jitheqtañasa, janirakiw akapachampi suma uñjatäñsa thaqañasäkiti (Gál. 4:9). Galacia markankir cristianonakajja, Diosampejj suma uñtʼatäjjapjjänwa. Ukampis apóstol Pablojj ‘akapachan inamaya jan serviri amuyunakaparuw kuttʼasipktajja’ sasaw jupanakar säna. Mä arunjja, akhamsa siskaspa ukhamänwa: “Diosar serviñan nayrar ukham sartasajja, ¿kunataraki akapachan inamaya jan serviri amuyunakapar mayamp kuttʼasipktasti?” sasa.

⁷ ¿Jiwasajj ukhaman uñjasiraksnati? Jïsa. Jehová Diosar uñtʼasajja, inas apóstol Pabljam Supayan apnaqat akapachan jachʼañchatäñ apanukuwaystan (Filipenses 3:7, 8 liytʼañataki). Inas universidadan yateqañsa, trabajosan  suma puesto katoqañsa, jan ukajj walja qollqe ganañ amtampi negocionak lurañsa apanukuwaystan, jan ukajj música tocañsa anatañsa sum yatchiyätan, ukhamïpanjja wali qollqeni, wali uñtʼata ukhamäsnänwa. Ukampis taqe ukanak apanukuwaytanwa (Heb. 11:24-27). ¿Ukham luratasat arrepentistanti? Ukhamäspa ukhajj janipuniw walïkaspati. Kunanaktï ‘inamaya jan servirit’ uñjkayätan ukanak thaqañaruw wasitampi kuttʼsna.

8. ¿Kunas Jehová Diosampi sum uñjatäñ munaskakiñatak yanaptʼistaspa?

⁸ Akapachampi sum uñjatäñat sipansa ¿kunas Jehová Diosampi sum uñjatäñ munaskakiñatak yanaptʼistaspa? Akanakwa amtañasa. Maya, Jehová Diosajj jupat jan jitheqtiri servirinakapat janipuniw armaskiti (Hebreos 6:10 liytʼañataki; Hebreos 11:6). Diosajj sapa mayni servirinakaparuw wal munasi, jupanakar ukham jan uñjañajj janipuniw Jupatak walïkaspati. “Diosajja jupankirinakarojj uñtʼasiwa”, mä arunjja suma jaqetwa uñji (2 Tim. 2:19). Ukhamarus Jehová Diosajja, ‘aski jaqenakan sarnaqäwip yatiwa’, yantʼan uñjasipki ukanakar salvañsa yatirakiwa (Sal. 1:6; 2 Ped. 2:9).

9. Kunjamanakatsa Jehová Diosajj markapar yanaptʼäna uk qhanañchtʼma.

⁹ Awisajja Jehová Diosajj musparkañanak lurasaw markapar yanaptʼäna, ukhamatwa munasitap uñachtʼayäna (2 Crón. 20:20, 29). Mar Rojo sat qotanjja, Jehová Diosajj kunjamsa israelitanakar faraonan ejercitopat salväna uk amtañäni (Éx. 14:21-30; Sal. 106:9-11). Jehová Diosan ukham luratapajj wali musparkañänwa, 40 maranak qhepatsa jaqenakajj uka toqet parlasipkakïnwa (Jos. 2:9-11). Gog de Magog sasin uñtʼatäki ukajj niyaw Jehová Diosan markapar jan waltʼayañatak sartani, ukampis kunjamsa Jehová Diosajj munasiñapsa chʼamapsa nayra tiempon markapar uñachtʼayäna uk amtañaw wal chʼamañchtʼistu (Ezeq. 38:8-12). Uka pachanjja, Jehová Diosamp uñtʼatäñ thaqatasat janipuniw arrepentiskañäniti.

10. ¿Kunsa Jehová Diosat amtañasaraki?

¹⁰ Paya, Jehová Diosajj kuntï jan suyktan ukanakampiw bendisistaspa ukwa amtañasaraki. Jupajj janiw mayninakampi jachʼañchatäñ laykuki sumanak lurapki ukanakarojj bendiskiti. ¿Kunatsa? ‘Jupanakajja, kunatejj waktʼki ukanak katoqjjapjjewa’ sasaw Jesusajj säna (Mateo 6:1-5 liytʼañataki). Ukatjja jan jachʼañchayasiñ thaqasa mayninakat khuyapayasipki ukanakarojj Diosaw ‘jamasat uñjaski’ sasaw sarakïna. Diosajj suma luratanakap uñjasaw maynir bendisi, awisajj kuntï jan suyki ukampiw bendisi. Uk jichhajj mä qhawqha uñjañäni.   

11. ¿Kunjamsa Jehová Diosajj Mariar bendisïna?

¹¹ Yoqap nasiñapataki horasajj purinjjäna ukhajja, Jehová Diosajj María sutini humilde virgen tawaqoruw Yoqapar ususiñapatak ajllïna. Mariajj Nazaretanwa jakasïna, uka markajj jan yäqañjam markänwa, Jerusalenatsa ukankir templotsa jayankarakïnwa (Lucas 1:26-33 liytʼañataki). ¿Kunatsa Jehová Diosajj Mariar ajllïna? Gabriel sutini angelajj Mariar akham sänwa: “Jumajj Diosan suma warmit uñjatätawa” sasa. Mariajj sumwa Diosampejj apasïna, Elisabet familiarapampi parlasaw uk uñachtʼayäna (Luc. 1:46-55). Cheqas Mariajja Jehová Diosar jan  jitheqtas servirïnwa, ukatwa Diosajj kuntï jan suykäna ukampi bendisïna.

12, 13. Naskäna ukhasa templor apatäkäna ukhasa, ¿kuna jachʼañchäwsa Jesusajj katoqäna?

¹² Jesusajj nasïna uka qhepatjja, janiw Jehová Diosajj Jerusalén, Belén uka markankir wali uñtʼata jilïrinakarojj nasïwipat yatiykänti. Jan ukasti angelanakap toqejj ovej awatir humilde chachanakaruw yatiyäna, jupanakajj Belén marka pampanwa ovejanakap awatipjjerïna (Luc. 2:8-14). Awatirinakasti jichhak nasit Jesusar visitiriw sarapjjäna (Luc. 2:15-17). Mariampi Joseampejj kunjamsa uka awatirinakajj Jesusar jachʼañchapjjäna uk uñjasajj kusisipjjpachänwa. Jehová Diosajj kunjamtï lurki ukajj janiw kunjamtï Supayajj lurki ukhamäkiti. Supayajj Jesusampir awk taykapampir visittʼapjjañapatak warawaranak uñchʼukisin yatirinakar khitäna uka qhepatjja, Jerusalén markpachanwa Jesusan nasïwipat yatipjjäna, ukajj jan walinakwa utjayäna (Mat. 2:3). Ukhamïpanjja, taqe yoqall wawanakaw jiwarayatäpjjäna (Mat. 2:16).

¹³ Jesusan nasitapat 40 urunak pasjjäna uka qhepatjja, Mariajj Jerusalenankir temploruw Jehová Diosar sacrificio loqtañatak saräna, templojj Belén markat llätunka kilometronak jayankänwa (Luc. 2:22-24). Mariajj Joseampi Jesús wawapampi viajkäna ukhajja, ¿sacerdotejj Jesusar jachʼañchpachäniti? sasin inas jisktʼaschïna. Cheqas Jesusajj jachʼañchatänwa, ukampis janiw kunjamtï Mariajj suykäna ukham jachʼañchatäkänti. Jan ukasti Jehová Diosajj “cheqapar sarnaqeri ukhamarak Dios chuyma” Simeón toqe, ukat 84 marani Ana viuda warmi toqew jachʼañchäna, jupanakajja Jesusajj Cristötapa, jutañapäkäna uka Mesiasätapwa qhanañchapjjäna (Luc. 2:25-38).

14. ¿Jehová Diosajj kunjamanakatsa Mariar bendisïna?

¹⁴ ¿Jesusar uywatapatsa sum uñjatapatsa Jehová Diosajj Mariar bendispachänti? Jïsa bendisïnwa. Kuntï Mariajj siskäna, lurkäna ukanak Bibliaruw qellqayäna. Jesusajj kimsa maranak chikatani aka oraqen yatiykäna ukhajja, Mariajj janiw Jesusamp chika sarkpachänti. Inas viuda warmïtap laykojj Nazaretanak qheparchïna. Kuna bendicionanaktï Jesusamp chika saririnakajj katoqapkäna uk janis jupajj katoqkchïnjja, Jesusajj jiwayatäkäna ukhajj ukankänwa (Juan 19:26). Ukampis 33 maran Pentecostés fiesta nayrajja, mä arunjja Diosajj espíritu santo apayankäna uka nayrajja, Mariajj discipulonakampi chikaw Jerusalén markankaskäna (Hech. 1:13, 14). Jupajj mayninakjamarakiw alajjpachar sarañatak ajllitäpachäna. Ukhamächi ukhajja, alajjpachan wiñayatakiw Jesusamp chika jakaspachäni. ¡Ukajj mä suma bendicionawa, Diosar jan jitheqtas servitapatwa uk katoqäna!

15. Jesusajj aka oraqenkkäna ukhajja, ¿kunjamsa Jehová Diosajj jupar jachʼañchäna?

¹⁵ Jesusajj religión pʼeqtʼirinakampi, politiconakampi sum uñjatäñat sipansa, Jehová Diosamp sum uñjatäñwa munäna. Diosajj kimsa kutiw Jesusar alajjpachat parlanïna, ukajj walpun chʼamañchpachäna. Jordán Jawiran bautisasïna ukhajja, Jehová Diosajj akham sänwa: “Jupajj Wawajawa, wali munatawa, nayajj wal jupat kusista” sasa (Mat. 3:17). Amuyatajja, Jesusampi Bautisir Juanampikiw uka arunak istʼapjjpachäna. Jesusar janïr jiwayapkäna uka mä mara nayrajja, kimsa apostolonakaw Diosan aka arunakap istʼapjjäna: “Jupajj Wawajawa, wali munatawa, nayajj wal jupat kusista. Jupar  istʼapjjam” sasa (Mat. 17:5). Qhepatsti, Jesusajj janïr jiwayatäkäna uka mä qhawqha urunak nayraw Jehová Diosajj alajjpachat parlanirakïna (Juan 12:28).

16, 17. ¿Kunjamsa Jehová Diosajj Jesusar jachʼañchäna?

¹⁶ Jesusajj Dios contra parlir jaqjam phenqʼachataw jiwayatäñapäna, jupajj uk yatïnwa. Ukhamäkchïnsa, ‘jan nayajj munkta ukham luraspanti, jan ukasti juman munañam luraspan’ sasaw Awkipar mayisïna (Mat. 26:39, 42). ‘Mä tʼaqesiñ lawan jiwañkamas aguantkchïnjja, phenqʼachatas uñjaskchïnjja janiw ukarojj yäqkänti’, janirakiw akapachampi sum uñjatäñsa thaqkänti, jan ukasti Awkipampi sum uñjatäñwa thaqäna (Heb. 12:2). ¿Kunjamsa Jehová Diosajj sum uñjatap uñachtʼayäna?

¹⁷ Jesusajj aka oraqenkaskäna ukhajja, ‘nayajj jakʼaman jachʼañchatäyätwa, jichhasti uka pachparakiy jakʼamar jachʼañchita’ sasaw Awkipar mayïna (Juan 17:5). Jupajj ukat sipan jukʼamp jachʼañchatäñsa munkaspa ukham janiw Bibliajj qhanañchkiti. Ukampis ¿kunsa Jehová Diosajj luräna? Jiwatat jaktayasajja, “nayrat sipansa jukʼam[piw] jachʼañchäna”, Jesusajj janiw uk suykpachänti. Jan jiwir cuerpsa churarakïnwa, ukhakamajj janiw khitis ukham jakañ katoqkänti (Filip. 2:9; 1 Tim. 6:16). * Jehová Diosat jan jitheqtatapatwa Jesusajj uka bendición katoqäna.

18. ¿Kunas akapachampi jachʼañchatäñ jan thaqañatakejj yanaptʼistani?

¹⁸ ¿Kunas akapachampi jachʼañchatäñ jan thaqañatakejj yanaptʼistani? Jehová Diosajj jupat jan jitheqtiri servirinakapat janipuniw armaskiti, ukhamarus kuntï jan suyktan ukanakampiw bendisistaspa uk janipuniw armañasäkiti. Jutïrin kunanakampis bendisistani uk janiw sum yatktanti. Ukampis aka jan wali pachan jakkasajja, ak janipun armapjjañäniti: akapachasa akapachampi jachʼañchatäñasa janiw wiñayatakïkiti (1 Juan 2:17). Jehová Diosajj cheqapar uñjir Diosawa, jupajj janiw luratanakasatsa ni sutipar munasitasatsa armaskaniti (Heb. 6:10). Jupajj jiwasat khuyaptʼayasiniwa, kuntï jan suyktan ukanakampiw bendisistani.