AKHAM AMUYTʼAÑÄNI, nayra libronakani mä museor visittʼiriw sartajja. Libronakajj wali thantha pʼiysutkamakiwa. Mayninakarojj yaqhep cheqajj faltarakiwa. Ukampis mä librojj wali sumäskiwa, janirakiw kamachatäkisa. Wali suma lurtʼatarakiwa. Ukatwa guiar akham sistajja: “¿Mayninakat sipansa jukʼamp machaqati?” sasa. Guiajj “janiwa, uka librojj wali jayaniwa, janirakiw askichaskiti” sasaw sistamjja. Jumajj akham saraktawa: “¿Mä suma lugarar imatänti?” sasa. Guiajj akham saraktamwa: “Janiwa, uka librojj jallunsa lupinsa jan waltʼayatänwa, waljaniw chhaqtayañ munapjjäna” sasa. Jichhajj inas akham jisktʼasta: “¿Uka librojj kunat luratäpachasa?” sasa.

Bibliajja uka libror uñtasitawa. Yaqha libronakat sipansa, Bibliajj jukʼamp maranakaniwa. Cheqas nayra maranakan qellqat walja libronakaw utji, ukampis tiempompejj tukusjjapjjakiwa. Uka nayra libronakajj kuntï ciencia toqet yatichkäna ukajja, jichha tiempon yatjjatasiwayki ukarjamajj janiw pachpäjjeti. Kuntï qollayasiñ toqet yatichkäna ukasa, janiw walëjjeti. Ukampis janiw taqpach utj-jjeti, qʼalaw tiempompejj tukusjjapjjaraki.

Bibliajja janiw uka nayra libronakjamäkiti. 3.500 jila maranakaniwa, ukhamarus phoqatpachäskiwa. Bibliarojj phichantapjjänwa, jarktʼapjjänwa, jiskʼachapjjarakïnwa, ukhampachasa yatichäwinakapajj janiw mayjtʼayaskänti. Walja maranak nayras qellqaskchïnjja, Bibliajj jichhürunakat sum qhanañchjjäna (ukatakejja, “Bibliajj nayra librökchisa jichha tiempot sum qhanañchäna” sat recuadro uñjjattʼäta).

Jichhajj inas akham jisktʼasta: “¿Biblian ewjjanakapajj yanaptʼitaspati?” sasa. Uk yatiñatakejja,  kunanakas jaqenakar llakisiyistu ukanakat amuytʼam. ¿Kunanakas wal tʼaqesiyistu? Inas guerranak utjatapata, aka oraqejj qʼañuchatätapata, jan walinak utjatapat tʼaqestan. Jichhajj kunjamsa Biblian yatichäwinakapajj yanaptʼiristam uk yatjjatam. Yatjjatkasajj akham jisktʼasïta: “Bibliarjam jaqenakajj sarnaqapjjaspa ukhajja, ¿aka oraqen suma jakasiñat utjaspa?” sasa.

SUMANKAÑAR MUNASIÑA

“Kusisiñanïpjjew mayninakampi sumankañ thaqerinakajja, jupanakaw ‘Diosan wawanakapa’ satäpjjani” (Mateo 5:9). “Kawkjakamay wakischini ukhakamajj taqe jaqenakampi sumankapjjam” (Romanos 12:18).

KHUYAPAYASIÑA PERDONAÑA

“Kusisiñanïpjjew khuyapayasirinakajja, jupanakaw khuyaptʼayatäpjjani” (Mateo 5:7). “Jumanak taypin kuna quejasiñas utjchi ukhasa, maynit maynikam aguantasisipkakim, jumanakkamajj taqe chuyma perdonasipjjarakim. Kunjamtï Jehová * Diosajj taqe chuyma perdonapktamjja, ukhamarak jumanakajj perdonasipjjam” (Colosenses 3:13).

TAQE KASTA JAQENAKAMP SUMANKAÑA

Diosajj “mä sapa jaqetakwa taqe markankir jaqenak luri, ukhamat oraqpachan jakapjjañapataki” (Hechos 17:26). “Diosajj janiw khitirus yaqhachkiti. Jan ukasti khitinakatï taqe markanakan jupar ajjsartʼapki, kunatï cheqapäki ukarjam lurapki ukanakajja, jupan katoqatäpjjewa” (Hechos 10:34, 35).

ORAQER SUM UÑJAÑA

‘Jehová Diosajj jaqerojj Edén huertoruw usküna yapuchañapataki ukhamaraki uñjañapataki’ (Génesis 2:15). Diosajj “oraqe tukjasipki ukanakar tʼunja[niwa]” (Apocalipsis 11:18).

TAQE KUN MUNAÑSA QʼAÑU JUCHSA UÑISIÑA

“Taqe kun munañanakatsa amuyasipjjam. Maynejj walja utjirinïkchisa, janiw ukanakajj jupar jakañ churkaspati” (Lucas 12:15). “Qʼañu juchasa, taqe ajjtaskañanak lurañasa, jan ukajj maynitakik taqe kun munañasa janipun jumanak taypinjja arsutäpanti. Santo jaqenakajj janiw ukanak parlapjjañapäkiti” (Efesios 5:3).

HONRADO JAQËÑA TRABAJAÑA

“Taqe kunansa honrado chuymampiw sarnaqañ munapjjarakta” (Hebreos 13:18). “Khititejj lunthataski ukajja, jan jukʼampejj lunthataspanti, antisas wal trabajpan” (Efesios 4:28).

MAYNINAKAR YANAPTʼAÑA

“Llakitanakarus chuymachtʼapjjam, jan chʼamaninakarus yanaptʼapjjarakim, taqenirus pacienciampi uñjapjjam” (1 Tesalonicenses 5:14). “Wajchanakarus viudanakarus jan waltʼäwinakapan yanaptʼaña” (Santiago 1:27).

Bibliajj suma yatichäwinakaniwa, ukhamarus kunjamsa ukarjam sarnaqsna uksa yaticharakistuwa. Jaqenakatï Bibliarjam sarnaqapjjaspa ukhajja, ¿janit jan walinak askichañatakejj yanaptʼkaspa? Biblian ewjjanakapajj jichha tiempon wal yanaptʼistaspa. Ukampis ¿kunjamsa Bibliajj jumar yanaptʼiristam?

Jesusajj sänwa: “Maynin yatiñanïtapajj luratanakapanwa uñjasi” sasa (Mateo 11:19). Ukajj ukhamäskapuniwa. Bibliajj yanaptʼistaspati janicha uk yatiñatakejja, nayraqatajj ewjjanakaparjam sarnaqañaw wakisi. Ukatwa akham jisktʼasiñama: “Bibliantï suma yatichäwinakajj utjchejja, ¿janit jakäwijan yanaptʼañapäki? ¿Jan walinak askichañatakejj yanaptʼarakitaspati?” sasa. Uk jichhajj uñjañäni.

Diana * sat warmejja, wali kusisitaw jakasïna. Ukampis mä akatjamatwa jan walinakan uñjasïna. Phuchapaw jiwjjäna, chachapampiw jaljtäna, jan qollqeniw uñjasirakïna. Dianajj akham siwa: “Jan walinpun uñjasiyäta, jan phuchani, jan chachani, jan utaniw uñjasiyäta. Taqe kun aptʼasiwayta, janiw jakañsa munjjayätti” sasa.

Dianatakejja, aka arunakajj cheqäskapuniwa: “Yaqhepanakajj paqallq tunk maraw jakapjje, chʼamaninakasti kimsaqallq tunk marakamaw puripjje, ukataq jakañasti, jan waltʼañanakamp [chʼama tukuñanakampik apaniraki]. ¡Urunakasti jaqenakjamaw jankʼak tukusiraki!” (Salmo 90:10).

Ukham jan walinakar saykatañatakejja, Dianajj Biblianwa yanaptʼa thaqäna, ukaw juparojj  wal yanaptʼäna. Akjjar jutki uka kimsa yatichäwinakanjja, kunjamsa Bibliajj waljanir yanaptʼawayi ukwa qhan amuyäta. Biblian ewjjanakaparjam sarnaqañajj wal jupanakar yanaptʼawayi. Bibliajja aka yatichäw qalltan parlaniwayktan uka libror uñtasitawa. Janiw yaqha libronakjamäkiti, uka libronakan ewjjanakapajj tiempompejj janiw yanaptʼjjestaspati. Ukhamajj ¿kunatsa Bibliajj jakäwisan yanaptʼistaspa? ¿Diosat Biblia qellqaypachäna? ¿Jan ukajj jaqenakan qellqatakicha? (1 Tesalonicenses 2:13).

Jakäwisajj jankʼakiw pasi, jan walinakamp phoqantatarakiwa sasin inas jumajj amuyaraksta. Jan waltʼäwinakan uñjaskta ukhajja, ¿kawkinsa yanaptʼsa, ewjjanaksa chuymachtʼatäñsa thaqta?

Bibliajj kunjamsa yanaptʼiristam uk kimsa toqet yatjjatañäni:

1. Jan walinakar jan purtʼasiñataki.

2. Jan walinak askichañataki.

3. Jan walinakan aguantañataki.

Akjjar jutki uka yatichäwinakanwa uka kimsa toqet qhanañchasiskani.