Wali aytata jan ukajj wali respetat mä jaqetï mä regalo churistaspajja, jiwasatak wali valoranïspawa. Yaqhep regalonakajj janiw jila alanïpkiti, ukampis mä familiaratï jan ukajj mä amigotï regalistaspajja, wali valoranitwa uñjaraksna. Kunjamtï nayrïr yatichäwin uñjaniwayktanjja, Jordanajj ukhamwa Russell jilatan regalopar uñjäna. Uka sarnaqäwejja, Jesusajj jiwas layku jiwawayki uk sum amuyañatakejj ¿kunjamsa yanaptʼistaspa?

Nayraqatjja, ‘Diosaw khitani mä sapa Wawapa aka oraqeru, wiñay jakañanïñasataki’ sasaw Bibliajj yatichi (1 Juan 4:9). Ukhamajj taqe kunjjar munañani Dios pachpaw uka suma regalo churawayistu, janiw khitis Jupjamajj utjkaspati. Salmo qellqerejj akham sasaw Diosat säna: “Juma sapak [Jehová] Diosätam yatipjjpan, aka oraqjjar juma sapak Alajjpachankirïtam yatipjjarakpan” sasa (Salmo 83:18). Diosakiw ukham mä suma regalo churistaspa.

Maysa toqetjja, Diosajj ‘Awkisarakiwa’ (Isaías 63:16). ¿Kunatsa ukham sissna? Jupaw jakañ churawayistu. Ukatjja, kunjamtï mä munasir awkejj wawanakapat llakiski ukat wali munasiñamp uñjkejja, ukhamarakiw Diosajj uñjistu. Efraín sat tribut parlkasajj akham sasaw Diosajj säna: ‘Efraín markajj munat wawajawa; taqenit sipansa sinti munat wawajawa. Jupatsti wal khuyapayasirakta’ sasa (Jeremías 31:20). Jichhürunakanjja, ukhamarakiw Diosajj servirinakapar wal munasi. Jupajj janiw taqe chʼamani, taqe kun Luririkïkiti, Diosajj Awkisawa munat amigosarakiwa, ukatwa Jupan regalonakapajj wali valoranejja.

Obligatjamaki maynïr mä regalo churañat sipansa, munasiñat regaltʼañaw jukʼamp valoranejja. Ukham munasir jaqejja, janiw kun katoqañ laykukejj maynïr mä regalo churkiti.

Diosajj jiwasar wal munasitap laykuw Yoqapan jakañap loqtawayi. Bibliajj akham siwa: “Diosajj khitaniw mä sapa Wawapa aka oraqeru, wiñay jakañanïñasataki, ukhamanwa Diosajj munasiñap uñachtʼayistu jupa toqe” sasa (1 Juan 4:9). Ukham lurañapatakejj ¿Diosajj obligatäpachänti? Janiwa. Diosajj ‘munasiñapatwa’ mä sapa Wawaparu jiwas layku jiwañapatak aka Oraqer khitaniwayi (Romanos 3:24).

Ukajj ¿kunjamsa Diosajj wali munasirïtap amuytʼayistu? Bibliajj akham siwa: ‘Diosajj munasiñapwa uñachtʼayistu, jiwasajj juchanïskäyätan ukhaw Cristojj jiwasanak layku jiwawayi’ sasa (Romanos 5:8). Diosajj munasiñapatwa jan khitin arjjatirini, aynachtʼata, jucharar jaqenakar yanaptʼawayi. Jiwasajj jiwañat qhespiyatäñatakejj janiw askïktanti, janirakiw Diosar kunjamatsa uka regalot pagsnati. Nayratpachasa jichhakamas Diosakiw ukham suma regalo churawayistu.

Mä regalo churañataki wal chʼamachasipki ukanakan regalopajj wali valoraniwa. Maynitejj kunatï jupan wali munatäki uk churistu ukhajja, wali valoranitwa uka regalopar uñjtanjja.

Diosajj ‘mä sapa Yoqaparuw khitaniwayi’ (Juan 3:16). Janiw khitis jupjamajj Diosan wali munatajj utjkiti. Jesusajj Diosan wali munat wawapawa ukat Jupjam chuymanirakiwa. Janïr taqe kun lurkäna ukhaw Diosajj Yoqapar nayraqat lurawayi. Ukhamajj waranq waranqa maranakaw Diosampi Jesusampejj alajjpachan wali sum apasipjjpachäna (Colosenses 1:13-15).

Ukhamäkchïnsa, Diosajj uka munat Yoqaparuw jiwas layku jiwañapatak khitaniwayi (Romanos 8:32). Cheqas kunatï Jupatak wali valoranïkäna ukwa Diosajj churawayistu. Ukham lurañajj janiw Jupatak faciläkpachänti.

Yaqhep regalonakajja cheqapuniw yanaptʼistaspa, ukatwa ukanakajj wali valoranïspa. Amuytʼañataki, doctorajj ‘jan jiwañatakejj mä tratamiento lurañamawa’ sasin siristam, ukat uka tratamiento pagañatak jan qollqenïtam layku maynejj pagarapiristam ukhajja, ¿janit jupar wal yuspärkasma?

“Kunjämtejj Adán chachankatas laykojj taqe jaqenakajj jiwarapjjejja, ukhamarakiw Cristonkjjasinjja taqe jaqenakajj jakapjjani” sasaw Bibliajj qhanañchi (1 Corintios 15:22). Adanan wawanakapjamajja, taqeniw ‘jiwarasktanjja’, janiw usunakatsa jiwañatsa qhespiyasksnati, janirakiw jiwaspachpajj Diosamp sumankthapksnati, ni Jupa nayraqatansa jan juchani uñjatäksnati. Jiwasajj jaqekïtanwa, janiw khitirus qhespiyksnati. Bibliajj akham siwa: ‘Jaqejj janiw khitirus qhespiykaspati, janirakiw qhespiyañatakejj Diosar qollq churkaspati’ sasa (Salmo 49:7, 8, NM). Qhespiyasiñatakejj janiw Diosarojj kunampsa pagirjamäktanti, ukatwa Jupan yanaptʼap wal muntanjja. Jiwasakejj janiw kunjamatsa qhespiyasksnati.

Jehová Diosajj jiwasar wal munasitap laykuw jiwañat qhespiyawayistu, ukjja Yoqap toqew  lurawayi. ‘Jesucristo Yoqapan wilapajj taqe juchanakasatwa qʼomachistu’ sasaw Bibliajj qhanañchi. Ukhamajj jiwasatï Jesusan jiwas layku wilap wartasiwayki ukar iyawsañäni ukhajja, juchanakasajj perdonatäniwa ukat wiñay jakañwa katoqarakiñäni (1 Juan 1:7; 5:13). Jesusan jiwatapajja, jiwawayjjapjje uka munat familiaranakasarus yanaptʼarakiniwa. Bibliajj akham siwa: “Kunjämatejj jiwañajj aka oraqenjja mä sapa jaqetaki qalltejja, ukhamarakiw jiwatat jakatatañajj mä sapa jaqeta qalltaraki” sasa (1 Corintios 15:21). *

Jesusajj jakañap jiwas layku loqtasiwayki ukajj wali suma regalowa, ¿kunatsa? Taqe kunjjar munañani Diosaw jiwasar wal munasitap laykojj uk churawayistu. Janiw khitis Jehová Diosjamajj ukham mä suma regalo churañatakejj chʼamachasiwaykiti. Janirakiw kuna regalos juchampita jiwañampita qhespiykistaspati. Cheqansa, Diosajj jan kikpani mä suma regalo churawayistu.