1, 2. 1) Mä cristianotï casarasiñ munchi ukhajj ¿kunsa nayraqat amuytʼasiñapa? 2) ¿Maynimp noviañajj kamsañs muni? (“Amtañataki” siski uk liytʼäta).

 ¿CASARASIÑ munasmati? Kusisitäñatakejj janis casadöñajj wakiskchejja, kunayman maran jilat kullakanakaw casarasiñ munapjje. Ukampis casarasiñatak maynir janïr uñtʼkasajja, Jehová Diosampejj sumwa apasiñama, juma pachpas sumwa uñtʼasiñamaraki, qollq sum apnaqañs yatiñamarakiwa (1 Cor. 7:36). a Ukhamtï lurätajja, casarasisajj kusisitäyätawa.

² Ukampis casarasiñatak maynir ajlliñajj janiw faciläkiti (Prov. 31:10). Khitirutï jukʼamp uñtʼañ munkta ukar jikjjatjjsta ukhasa, jupamp noviañ qalltañajj janiw faciläkaspati. b Aka yatichäwinjja, kunas mä soltero jilatarusa jan ukajj mä kullakarus jupatakjam maynir jikjjatañatakisa jupamp noviañ qalltañatakis yanaptʼaspa ukwa yatjjataskañäni. Casarasiñ munirinakarojj kunjamsa congregacionankir jilat kullakanakajj yanaptʼapjjaspa uka toqetsa yatjjataskarakiñäniwa.

 ¿KUNJAMSA CASARASIÑATAK MAYNIR AJLLISMA?

3. Casarasiñatak maynir janïr ajllkasajj ¿kunsa mä solterojj amuytʼasiñapa?

³ Janïr noviañ qalltkasajja, casaraskäta ukajj kunjamäñapsa munta uk sum amuytʼasiñamawa. Janitï sum amuytʼaskasmajja, khititï jumatakjamäkaspa ukarojj janiw yäqjjasmati jan ukajj jan jumatakjamäki ukampiw noviañ qalltasma. Cheqansa khitimpitï casaraskäta ukajj bautisat Testigöñapawa, ukajj wali importantewa (1 Cor. 7:39). Ukampis “bautisatak bautisatäpan walikïniwa” sasajj janiw amuyañamäkiti. Antisas akham sasaw jisktʼasiñama: “¿Kunanaksa jakäwijan lurañ muntjja? Khitimpitï casaraskä ukajj ¿kunjam chuymanïñapasa? ¿Kunanaktï munkta ukajj amuytʼirïtajti uñachtʼayi” sasa.

4. ¿Kuna toqenakatsa yaqhep solteronakajj orasipjje?

⁴ Casarasiñ munsta ukhajja, uka toqet Jehová Diosar orasjjpachätawa (Filip. 4:6). Cheqas Jehová Diosajj janiw khitirus mä parej thaqarapiñ arsuwaykiti. Ukampis kunjamas jikjjatasta, kunanaks necesitta uk jupajj sum yati, kuntï thaqkta uk jikjjatañatakis yanaptʼarakiristamwa. Ukhamajj kunanaksa munta kunjamas jikjjatasta ukanakat jupar yatiyaskakim (Sal. 62:8). Diosaruw paciencia ukat yatiña mayiñama (Sant. 1:5). Estados Unidos markankir John c sat mä soltero jilatajja, kunanakatsa oracionanakapan mayisi uk akham siwa: “Kunjam chuyman kullakarus thaqaskta uk Jehová Diosaruw yatiyta. Maynir uñtʼañatak oportunidadanak utjañapatakiw mayirakta. Suma esposöñatakejj suma chuymanïñatak yanaptʼita sasaw Diosar mayisirakta” sasa. Sri Lanka markankir Tanya kullakajj akham sarakiwa: “Nayatakjam  maynir thaqkasajja, jumat jan jitheqtañatakisa, jan aynachtʼañatakisa, kusisitäñatakis yanaptʼita sasaw Jehová Diosar mayista” sasa. Jumatï walja tiempo suykasin casarasiñatak jan maynir jikjjatksta ukhajja, Jehová Diosajj jumar sum uñjaskakiña munasiskakiñwa arsuwayi (Sal. 55:22).

5. Jehová Diosar munasipki ukanakar uñtʼañatakejj ¿kunas soltero jilat kullakanakarojj yanaptʼaspa? (1 Corintios 15:58; fotonak uñjjattʼarakïta).

⁵ Bibliajj ‘Tatitur serviñan walja lurañanakamp ocupatäñasatakiw’ mayistu (1 Corintios 15:58 liytʼäta). Jumatï uka ewjjtʼarjam luräta ukhajja, walja jilat kullakanakampiw chikachasïta. Janiw jupanakampejj sumak apaskätati, jan ukasti Jehová Diosar serviñ nayrar uchapki uka soltero jilat kullakanakaruw uñtʼarakïta. Ukampis niyakejjay Jehová Diosar kusisiyañatak taqe kun lurchïtajja, wali kusisitäyätawa.

6. Mä pareja thaqkasajj ¿kunsa soltero jilat kullakanakajj amtapjjañapa?

⁶ Mä pareja jikjjatañajj janiw jakäwiman wali importantëñapäkiti (Filip. 1:10). Mä cristianojj janiw solterösakisa jan ukajj casadösakis cheqpach kusisitäkaspati, jan ukasti Jehová Diosan amigopäsaw kusisitäspa (Mat. 5:3). Ukhamarus solterökasajj Diosar jukʼamp serviñatakejj tiemponïsmawa (1 Cor. 7:32, 33). Ukhamajj solterökasajj jan tiempom ina chʼusar aptʼasimti. Estados Unidos markankir Jessica kullakajja, niya 40 maranïkasaw casarasïna. Jupajj akham siwa: “Casarasiñsa munkchiyätjja, predicación nayrar uchañaw kusisitäñatakejj yanaptʼitäna” sasa.

TIEMPOMPIW MAYNIROJJ SUM UÑTʼASMA

7. Maynir janïr parljjaykasajj ¿kunatsa jukʼamp uñtʼañamatak tiempojj wakisi? (Proverbios 13:16).

⁷ ¿Khitimpitï casaraskäta ukarojj ajlljjtati? Ukhamächi ukhajj ¿jankʼakit uka toqet jupamp parlañamäspa? Yatiñan jaqejj janïr kun lurkasajj nayraqat yatjjatiwa, ukarjamaw luraraki sasaw Bibliajj qhanañchi (Proverbios 13:16 liytʼäta). Ukhamajj janïr jupamp parlkasajja, jupajj kunjam chuymanisa ukwa mä qhawqha tiempojj amuyañama. Países Bajos uksa toqenkir Albert sat mä jilatajj akham siwa: “Maynir munasitamajj jankʼakiw chhaqtaspa. Ukhamajj maynir uñtʼañatakejj tiempow wakisi, ukham lurasajja janiw jan amuytʼasisajj maynimp noviañ qalltkätati” sasa. Maysa toqetjja, maynir jukʼamp uñtʼjjasajj inas jupamp casarasiñ jan munjjchïtati.

8. ¿Kunjamsa soltero jilatasa jan ukajj soltera kullakas maynir jukʼamp sum uñtʼaspa? (Fotonak uñjjattʼarakïta).

⁸ Inas akham sasin jisktʼassta: “¿Kunjamsa jupar jan amuykañak jukʼamp sum uñtʼirista?” sasa. Jupajj kunjam chuymanisa kunanaksa luri jan ukajj Diosar serviñan kunjamäskisa ukjja, inas Salonana jan ukajj yaqha tantachäwinakan amuychisma. ¿Khitinakas amigonakapajja? ¿Kuna toqenakatsa parli? (Luc. 6:45). ¿Jupan amtanakapajj jumankirjamarakiti? Inas congregacionapankir ancianonakarusa jan ukajj jupar uñtʼir experiencian jilat kullakanakarus jisktʼaschisma (Prov. 20:18). Jupajj kunjam jaqet uñtʼatasa, kunjam chuymanisa ukanakatwa jisktʼasisma (Rut 2:11). Ukampis janiw jupar mayjtʼasiyañamäkiti. Juparojj respetomp uñjañamawa, janiw jupar sapa kut jakʼachasiñamäkiti, janirakiw jupat taqe kun jiskjjatañamäkiti.

9. Janïr maynir parljjaykasajj ¿kunatsa seguröñama?

⁹ Maynir uñtʼañatak janïr parljjaykasajj ¿qhawqha tiempos jupar uñaqañama? Jupar uñtʼañatak jankʼak arjjayasma ukhajja, jan amuytʼasisakis jupar uk siskasma ukhamwa  jupajj amuyaspa (Prov. 29:20). Ukampis jupatï jupampïñ munatam amuychi ukat uk sañatakejj walja tiempo pasayjjaraksta ukhajja, payachasirïkasmas ukham inas amuychini (Ecl. 11:4). Ak amtapunim: maynir janïr arjjaykasajj jupamp casarasiñajj segurökaspas ukham janiw amuyañamäkiti. Ukampis casarasiñatakejj wakichtʼatäñamawa, parlkta ukamp casarasiñatakis seguröñamarakiwa.

10. Maynitï jumampïñ munchi, ukampis jumajj jan munksta ukhajj ¿kunsa lurasma?

¹⁰ Jumatï maynin jumampïñ munatap amuysta ukhajj ¿kunsa lurasma? Jumatï jan jupampïñ munksta ukhajja, luratanakamanwa ukajj qhan amuyasiñapa. Janitï jupampïñ munkstajja, jupampïñs munkasma ukham amuyayañamajj janipuniw walïkaspati (1 Cor. 10:24; Efes. 4:25).

11. Parrafon parlaniwayktan uka costumbrenakatï lugaraman utjchi ukhajj ¿kunanaks amuyañama?

¹¹ Yaqhep lugaranakanjja, awk taykanakapa jan ukajj yaqha jilïr jaqenakaw khitimpis mä solter familiarapajj casarasini uk amtapjjañapa. Yaqha lugaranakanjja, familiapa jan ukajj amigonakapaw khitimpis solteröki jan ukajj solteräki ukajj casarasini uk amtapjje, ukatjja jupanakkam uñtʼasipjjañapatakiw amtapjje, ukhamat sumt apasipjjani janicha uk amuyasipjjañapataki. Uk lurañ mayipjjestani ukhajja, kunsa sapa maynejj munapjje, necesitapjjaraki ukwa amuytʼañasa. Mä amigosataki jan ukajj mä familiarasatak maynir ajllirapstan ukhajja, jupajj kunjam jaqesa, kunjam chuymanisa ukwa amuyañasa, jukʼampis Diosampejj kunjamsa apasi ukwa amuyañasa. Qollqenïñat sipansa, suma yatjjatatäñat sipansa, suma familiat jutirïñat sipans Jehová Diosamp sum apasiñaw jukʼamp importantejja. Jan ak armapjjañäniti: casarasipjjaniti janicha ukjja, solterompi solterampiw amtapjjañapa (Gál. 6:5).

¿KUNJAMSA NOVIAÑ QALLTASMA?

12. Jumatï noviañ munsta ukhajj ¿kunjams jupamp uk parlasma?

¹² Jumatï noviañ munsta ukhajj ¿kunjamsa jupar uk sasma? d Inas jaqenakajj utjki ukjana, telefonota jan ukajj videollamada toq jupamp parlchisma. Jupampïñ munatamsa,  jupar jukʼamp sum uñtʼañ munatams qhan jupar sañama (1 Cor. 14:9). Jupatï amuytʼasïwa sätam ukhajj tiempo churañamawa (Prov. 15:28). Jupatï jumampïñ jan munkchi ukhajja, uka amtaparojj respetañamawa.

13. Maynitï jumampïñ munatap siristam ukhajj ¿kunsa lurasma? (Colosenses 4:6).

¹³ Maynitï jumampïñ munatap siristam ukhajj ak amtañamawa: jumamp parlañatakejj jan ajjsarañatakiw chʼamachasi, ukhamajj munasiñampi respetompiw uñjañama (Colosenses 4:6 liytʼäta). Jumatï amuytʼasiñatak tiempo munsta ukhajja, juparojj uk sañamawa. Ukampis janiw jaya tiempot mä respuesta churañamäkiti (Prov. 13:12). Jumatï jan jupampïñ munksta ukhajja, munasiñampiw qhan sañama. Austria markankir Hans sat mä jilatajja, mä kullakajj jupar jukʼamp sum uñtʼañ munatap siskäna ukhajj jupajj kamsänsa uk akham sasaw qhanañchi: “Jan jupampïñ munataj munasiñampiw qhan sayäta. Nayajj jupampïñs munkirista ukham jan amuyañapatakiw uk jankʼak sayäta. Ukat uksarojj wali amuyumpirakiw kuns arsuyäta jan ukajj lurayäta” sasa. Maysa toqetjja, jupampïñ munsta ukhajj qhanwa uk jupar sañama, kunjamsa noviapjjäta uks jupamp parlapjjañamarakiwa. Noviañ toqetjja, kawkjantï jakaskta uka costumbrenakarjama jan ukajj yaqha ukhamanakarjamaw may maya amuyapjjaspa.

¿KUNJAMSA SOLTERONAKARUS SOLTERANAKARUS YANAPTʼSNA?

14. Soltero jilatanakaru kullakanakar yanaptʼañatakejj ¿kunsa lurañasa?

¹⁴ ¿Kunjamsa casarasiñ munirinakarojj yanaptʼsna? Mä toqetjja, wali amuyumpiw kuns parlañasa (Efes. 4:29). Akham jisktʼasiñasawa: “¿‘Laruyañatakikit’ kuns parltjja? Mä soltero jilatampir kullakampir parlir uñjta ukhajj ¿niyas noviañ munjjapjjaspa ukhamti amuytjja?” sasa (1 Tim. 5:13). Maysa toqetjja, janipuniw mä jilatarojj jan casaratätap laykojj kunas faltkaspa ukham amuyayañasäkiti. Párrafo 13 ukan parlaniwayktan uka Hans jilatajj akham siwa: “Yaqhep jilat kullakanakajja, ‘¿kunatsa jan casaraskta? Janiw waynitöjjtati, casarasiñatak tiempos pasjjaniwa’ sasaw sapjje. Ukham arunakajja, solteronakajj janis valoranit uñjatäpkaspa, casarasipjjañapajj wakisipunkaspas ukhamwa amuyayaspa” sasa. Cheqas kunanakatï jupanakar chʼamañchtʼkaspa ukanak sañatak oportunidad  thaqañaw jukʼamp wakiskirejja (1 Tes. 5:11).

15. 1) Romanos 15:2 textorjamajj ¿kunsa mä solteror janïr yanaptʼkasajj amtañasa? (Foto uñjjattʼarakïta). 2) ¿Videorjamajj kunsa jumajj yateqta? (Nota liytʼäta).

¹⁵ Jiwasatï mä jilatampi mä kullakampejj suma parejäpjjaspawa sasin amuystan ukhajj ¿kunsa lursna? Kunjamas mayninakajj jikjjatasipjje uk amuyañasawa sasaw Bibliajj yatichistu (Romanos 15:2 liytʼäta). Jilaparte solteronakajj janiw khitirus casarasiñatakejj presentayasiñ munapkiti, uka amuyuparojj respetañasawa (2 Tes. 3:11). Inas yaqhepanakajj yanaptʼayasiñ munapjjchi, ukampis mayipkistani ukhakiw uk lurañasa (Prov. 3:27). e Yaqhepanakajj jan amuykañakiw yanaptʼayasiñ munapjje. Alemania markankir Lydia sat mä soltera kullakajj akham siwa: “Soltero jilatarusa jan ukajj kullakarus mä jachʼa gruporuw invitasma. Jikisipjjañapatakikiw yanaptʼasma, ukampis jupanakaw kuns amtjjapjjani” sasa.

16. ¿Kunsa solteronakas solteranakas amtapjjañapa?

¹⁶ Solteronakas casadonakas taqeniw kusisit jakassna (Sal. 128:1). Ukhamajj jumatï casarasiñ munsta, ukampis jan khitimp casarasiñas utjkchi ukhajja, Jehová Diosar serviñ nayrar uchaskakim. Macao markankir Sin Yi kullakajj akham siwa: “Paraison wiñayatakiw esposomampis esposamampis jakasïta, solteröñajj jukʼa tiempotakikiwa. Ukhamajj solterökasajj aprovechtʼañamawa, disfrutañamarakiwa” sasa. Ukampis jumatï casarasiñatak maynir ajlljjsta, jupamp noviañ qalltjjaraksta ukhajj ¿kunsa lurasma? Maynimp uñtʼaskasajj kunjamsa suma amtanakar purisma ukwa jutïr yatichäwin yatjjataskañäni.