Aka marajja, 31 de mayo urut 11 de junio urukamajj Feria Internacional del Libro ukaw Santa Cruz (Bolivia) markan apasïna. Ukarojj 120.000 jila jaqenakaw sarapjjäna. Jehová Diosan Testigonakapajj ukan mä puestonkapjjarakïnwa (stand), “Llaki usuninakarojj ¿kunjamsa Bibliajj yanaptʼaspa?” sat pʼeqeñchäwini Yatiyañataki (número 1, 2023) revistampiw predicapjjarakïna.

Mä 200 jilat kullakanakaw 20.000 jila jaqenakar uka pueston predicapjjäna. Internetan jw.org cheqankir videonak uñtapjjañapatakejj televisoranakaw utjäna, walja jaqenakarakiw kunjamsa jw.org cheqan kunayman yatichäwinak thaqtapjjaspa uk yateqapjjäna. Niya 5.500 qellqatanakwa jaqenakajj apasipjjäna, mä 600 videonakaw uñtayasirakïna. 45 jaqenakarakiw Internetan jw.org cheqar mantasajj Bibliat yatichayasiñataki mä formulario phoqantapjjäna.

Testigonakan puestopar jakʼachasisajja, mä warmejj “mamajajj llaki usuniwa” sasaw mä kullakar säna. “Nayas llaki usunirakïtwa” sasaw uka warmejj sarakïna. Jupamp parlkäna uka kullakajja, llaki usuninakat parlki uka Yatiyañataki revista ukhamarak ¡Wiñayatakiw kusisit jakasisma! sat folleto celularapar apaqasiñapatakiw yanaptʼäna. Uka warmejja, jankʼakiw Bibliat maynimp yatichayasiñatakejj Internetan jw.org cheqan utjki uka formulario phoqantäna.

Mä psicólogo chachaw uka feriar sararakïna, llaki usuninakat parlki uka revista katoqasajja, “pacientenakajaruw churañ munta” sasaw säna, “taqe kuntï revistan parlki ukasa, Biblian versiculonakapas pacientenakajar wal yanaptʼani” sasaw sarakïna. Mä warmin taykapajj uka nayrakiw jiwjjatayna, jupajj wali llakitaw jikjjatasïna, ukampis “Cuando muere uno de los padres” sat yatichäwi uñjjattʼayapjjäna ukhajja, wali chuymachtʼataw jikjjatasjjäna, ukajj Internetan jw.org cheqankir “Felicidad y paz interior” siski uka cheqankiwa.

Jichhürunakanjja, walja jaqenakaw llaki usump wal tʼaqesisipki. Ukatwa Bolivia markankiri jilat kullakanakasajja, jaqenakar Bibliamp chuymachtʼasasa, Jehová Diosan ewjjtʼanakap Biblian jikjjatapjjañapatak yanaptʼasas wal kusisipjje (Salmo 34:18).