ИСА МӘСИҺ шаҝирдләринә хош хәбәри неҹә тәблиғ етмәли олдугларыны өјрәдәркән бу хәбәрин һеч дә һамы тәрәфиндән хош гаршыланмајаҹағыны да демишди (Лука 10:3, 5, 6). Бизим дөврүмүз һаггында да ејни шеји демәк олар. Биз хидмәтдә агрессив данышан, һәтта кобуд рәфтар едән инсанлара раст ҝәлирик. Бу ҹүр инсанларла үзләшән заман онлара гаршы шәфгәтли давранмаг чәтин ҝәлә биләр.

Шәфгәтли инсан башгасынын нәјә еһтијаҹ дујдуғуну, һансы проблемләринин олдуғуну ҝөрүр, она ҹаны јаныр вә көмәк етмәк истәјир. Амма әҝәр тәблиғ етдијимиз инсанлара гаршы шәфгәт һиссини итирсәк, онлара тәблиғ етмәк үчүн шөвгүмүз дә, көмәк етмәк истәјимиз дә сөнәҹәк. Оҹаға нә гәдәр чох оксиҝен дахил олурса, о, бир о гәдәр ҝур јаныр. Ејнилә, шәфгәт һиссимиз чохалдыгҹа, хидмәтә шөвгүмүз дә аловланаҹаг! (1 Салон. 5:19).

Шәфгәт ҝөстәрмәк чәтин олан вәзијјәтләрдә белә, бу хүсусијјәти тәзаһүр етдирмәјә бизә нә көмәк едә биләр? Ҝәлин ҝөрәк бу саһәдә Јеһовадан, Иса Мәсиһдән вә һәвари Булусдан неҹә өрнәк ала биләрик.

Минилликләрдир Јеһованын адына гара јахылыр. Амма јенә дә «О, нашүкүрләрә вә писләрә гаршы хејирхаһдыр» (Лука 6:35). Онун хејирхаһлығы сәбриндә әкс олунур. Јеһова «һәр ҹүр инсанын» хилас олмасыны истәјир (1 Тим. 2:3, 4). О, пислијә нифрәт етсә дә, инсанлар Онун үчүн чох дәјәрлидир. Јеһова һеч кимин өлмәсини истәмир (2 Бут. 3:9).

Шејтанын имансызларын зеһнини неҹә кор етдији Јеһоваја мәлумдур (2 Кор. 4:3, 4). Чохлары јалан тәлимләрин тәсири алтында бөјүјүб, одур ки, онлара һәгигәти гәбул етмәк чәтиндир. Јеһова бу ҹүр инсанлара көмәк етмәји чох истәјир. Буну һарадан билирик?

Јеһованын нејнәвалылара гаршы мүнасибәтини хатырлајаг. Халгын зоракы олмасына бахмајараг, Јеһова Јунус пејғәмбәрә демишди: «Бәс Мән бу бөјүк шәһәрә, Нејнәваја неҹә гыјым? Ахы орада јахшыны писдән ајыра билмәјән јүз ијирми миндән чох инсан вар» (Јун. 4:11). Јеһова Онун һаггында һәгигәти билмәјән бу халгын һалына аҹыјырды, буна ҝөрә дә Јунус пејғәмбәри ҝөндәрмишди ки, онлары доғру јола чағырсын.

Јеһовадан өрнәк алан бизләр дә инсанлары гијмәтләндиририк. Одур ки, һәтта хош хәбәрә һај вермәјәҹәјини дүшүндүјүмүз инсанлара белә, тәблиғ етмәјә ҹан атырыг.

Инсанлар чатдырдығымыз мүждәни хош гаршыламајанда, бунун сәбәби барәдә дүшүнә биләрик. Ола билсин, бәзиләринин Төврат, Зәбур вә Инҹиллә бағлы јанлыш тәсәввүрләри вар. Јахуд онлар бизи башга динләрин нүмајәндәләри илә сәһв  салырлар. Ја да кимләрәсә һаггымызда јалан мәлуматлар верилиб. Бир башгалары исә горхурлар ки, бизимлә мүнасибәтләринә ҝөрә гоһумлары вә ја гонум-гоншулары онлара пис бахаҹаг.

Тәблиғ етдијимиз бәзи инсанларын хош хәбәрә һај вермәмәләринә сәбәб алдыглары емосионал травма ола биләр. Хүсуси тәјинатлы мүждәчи олан бир баҹымыз дејир: «Тәблиғ етдијим әразинин бир һиссәсиндә јашајан әһали баш вермиш мүһарибәдә бүтүн мал-мүлкүнү итириб. Бу инсанларын ҝәләҹәјә һеч бир үмиди јохдур. Чох пәришан һалдадырлар вә һеч кәсә етибарлары галмајыб. Бу әразидә тәблиғ етмәјимизә мане олан инсанларла тез-тез растлашырыг. Һәтта бир дәфә тәблиғ едән заман үстүмә һүҹум чәкмишдиләр».

Инсанларын пис рәфтарына бахмајараг, бу баҹы шәфгәт һиссини неҹә горујур? О дејир: «Бу ҹүр һалларла үзләшәндә Мәсәлләр 19:11 ајәсини јадыма салырам. Орада дејилир: “Анлајыш һиддәти ләнҝидәр”. Тәблиғ етдијим инсанларын нәләрдән кечдији барәдә дүшүнмәјин сајәсиндә онлара шәфгәтлә јанаша билирәм. Һәм дә ки, онларын һамысы агрессив мүнасибәт ҝөстәрмир. Һәмин әразидә тәкрарән сөһбәт етдијимиз мүлајим инсанлар аз дејил».

Ҝәлин өзүмүзә суал верәк: «Тәблиғ етдијим инсанларын јериндә олсајдым, хош хәбәрә неҹә јанашардым?» Мисал үчүн, әҝәр сизә дәфәләрлә Јеһованын Шаһидләри һагда јаланлар данышсајдылар, онлара гаршы неҹә давранардыныз? Бәлкә дә, бу вәзијјәтдә сиз дә онлары гәбул етмәздиниз. Бу заман сизә тәблиғ едән инсанын шәфгәт ҝөстәрмәси лазым ҝәләрди. Иса Мәсиһ демишди ки, инсанларын бизимлә неҹә рәфтар етмәсини истәјириксә, биз дә онларла елә рәфтар етмәлијик. Одур ки, онларын вәзијјәтләрини баша дүшмәјә вә буну етмәк чәтин олса белә, шәфгәт ҝөстәрмәјә чалышмалыјыг (Мәт. 7:12).

Һәвари Булус һәтта тәблиғинә шиддәтлә гаршы чыханлара шәфгәт ҝөстәрирди. Ҝөрәсән нә үчүн? Булус өз кечмишини унутмурду. О дејир: «Әввәлләр мән күфр данышыр, Аллаһын халгыны тәгиб едирдим вә чох азғын адам идим. Бүтүн бунлара бахмајараг, мәнә мәрһәмәт ҝөстәрилди, чүнки мән ҹаһил вә имансыз олдуғум үчүн белә һәрәкәт едирдим» (1 Тим. 1:13). О баша дүшүрдү ки, Јеһова Аллаһ вә Иса Мәсиһ она бөјүк мәрһәмәт ҝөстәриб. Јәгин тәблиғ етдији бәзи инсанлар Булуса өзүнү хатырладырды.

Һәвари Булус бәзән јалан дини тәлимләрә сых бағлы олан инсанларла гаршылашырды. О, бу заман неҹә давранырды? Һәвариләрин ишләри 17:16 ајәсиндә дејилир ки, Афинада оларкән Булус шәһәрин  бүтләрлә долу олдуғуну ҝөрүб бәрк әсәбиләшмишди. Бунунла белә, о, мәһз әсәбинә сәбәб олан бүтләр һагда данышараг инсанлара ҝөзәл шаһидлик вермишди (Һәв. 17:22, 23). О, тәблиғ етдији инсанларын вәзијјәтини нәзәрә алараг тәблиғ үсулуну дәјиширди ки, «кимләрисә хилас едә» билсин (1 Кор. 9:20—23).

Биз дә тәблиғ заманы пис мүнасибәт ҝөстәрән, јалан тәлимләрә инанан инсанларла растлашаркән һәвари Булус кими давраныб, онлар һаггында билдикләримизин әсасында хош хәбәри мүждәләјә биләрик (Әшј. 52:7). Дороти адлы бир баҹы дејир: «Тәблиғ етдијим әразидәки инсанлара Аллаһын гәддар олдуғу вә һамыны ағыр һөкмә дүчар едәҹәји ашыланыр. Мән онлары Аллаһа олан иманларына ҝөрә тәрифләјир вә диггәтләрини Онун Мүгәддәс Китабда јазылмыш ҝөзәл хүсусијјәтләринә, ҝәләҹәклә бағлы вердији вәдә јөнәлдирәм».

Биз һәмчинин тәблиғдә әмәкдашымызы да руһландырмалыјыг. Ҹесика баҹы дејир: «Икимиздән биринин тәблиғи хошаҝәлмәз һадисә илә нәтиҹәләнән заман чалышырам бу һагда чох данышмајым. Әксинә, сөһбәти руһландырыҹы мөвзулара, мәсәлән, бәзиләринин мәнфи мүнасибәтинә бахмајараг, хидмәтимизин јахшы алынмасына јөнәлдирәм».

Јеһова хидмәтдә гаршылашдығымыз чәтинликләрдән аҝаһдыр. Ҝөрүн Ондан өрнәк алараг мәрһәмәтли даврандығымызы ҝөрәндә О, неҹә шад олур! (Лука 6:36). Әлбәттә, Јеһованын мәрһәмәтинин бир һәдди вар. Әминик ки, О, лазым билдији вахтда бу шәр дүнјаја сон гојаҹаг. О вахта гәдәр исә тәблиғимизин тәхирәсалынмаз олдуғуну унутмамалыјыг (2 Тим. 4:2). Ҝәлин бизә һәвалә олунан тәблиғ ишини бундан сонра да бөјүк шөвглә иҹра едәк вә «һәр ҹүр инсана» шәфгәт ҝөстәрәк.