Чохлары Аллаһа инандығыны дејир. Амма Аллаһ һаггында данышанда һәрә бир шеј дејир. Бәзиләри Аллаһын сәрт бир һаким олдуғуну, инсанлары ҝүнаһларына ҝөрә ҹәзаландырдығыны дүшүнүр. Диҝәрләри үчүн О, һәр бир ҝүнаһа ҝөз јуман, бағышлајан Аллаһдыр. Бир башгалары инаныр ки, Аллаһ инсанлардан узагдыр вә инсанларла гәтијјән марагланмыр. Бу ҹүр зиддијјәтли фикирләр уҹбатындан инсанларда белә тәәссүрат јарана биләр ки, Аллаһы јахындан танымаг мүмкүн дејил.

Аллаһы танымаг ваҹибдирми? Бәли. Аллаһы јахындан танымаг һәјатынызы зәнҝинләшдирәҹәк, она мәна гатаҹаг (Һәвариләрин ишләри 17:26—28). Сиз Аллаһа јахынлашдыгҹа Онун сизә мәһәббәти артаҹаг, сизә даһа чох көмәк олаҹаг (Јагуб 4:8). Ән әсасы исә Аллаһ һаггында дәгиг билик инсана әбәди һәјат бәхш едә биләр (Јәһја 17:3).

Аллаһы јахындан неҹә таныја биләрик? Јахшы таныдығыныз јахын достунуз һаггында дүшүнүн. Неҹә олуб ки, достлашмысыныз? Јәгин онун адыны, хасијјәтини, нәдән хошу ҝәлиб-ҝәлмәдијини, нәләр етдијини, ҝәләҹәкдә нәләр етмәји планлашдырдығыны вә саирә кими шејләри өјрәнмисиниз. Онун һаггында өјрәндикләриниз сизи һәмин инсана јахынлашдырыб.

Еләҹә дә, нөвбәти суаллары арашдырмагла Аллаһы јахындан таныја биләрик:

• АЛЛАҺЫН АДЫ НӘДИР?

• АЛЛАҺ ҺАНСЫ ХҮСУСИЈЈӘТЛӘРӘ САҺИБДИР?

• АЛЛАҺ-ТААЛА БУ ҜҮНӘ ГӘДӘР НӘЛӘР ЕДИБ?

• АЛЛАҺ-ТААЛА ҜӘЛӘҸӘКДӘ НӘЛӘР ЕДӘҸӘК?

• АЛЛАҺЫ ЈАХЫНДАН ТАНЫМАҒЫН СИЗӘ ҺАНСЫ ФАЈДАЛАРЫ ОЛАҸАГ?

Бу журналда бу суалларын Мүгәддәс Китаба әсасән ҹавабыны тапа биләрсиниз. Бу мәгаләләри охујанда һәм Аллаһы јахындан таныјаҹаг, һәм дә Онунла јахын мүнасибәтин сизә һансы фајдалары ҝәтирәҹәјини өјрәнәҹәксиниз.