Јеһова истәјир ки, бизи сыхан, үрәјимизи вә дүшүнҹәмизи раһат бурахмајан һәр шеји Она ачыб данышаг (Зәбур 55:22). Проблемимизин кичик, јахуд бөјүк олмасындан асылы олмајараг, биз онун һагда дуа едә биләрик. Әҝәр һансыса мәсәлә бизим үчүн өнәмлидирсә, Јеһова Аллаһ үчүн дә өнәмлидир. Буна ҝөрә дә Аллаһа дуа етмәк гәлб раһатлығына апаран ваҹиб аддымдыр (Филиппилиләрә 4:6, 7).

Ментал сағламлыгла бағлы проблемимиз оланда өзүмүзү тамамилә јалныз һисс едә биләрик. Инсанлар нәләр јашадығымызы һәмишә там анлаја билмәз (Мәсәлләр 14:10). Лакин Аллаһа үрәкдән дуа едиб һиссләримизи Онунла бөлүшәндә О бизи шәфгәтлә динләјир. Јеһова бизи ҝөрүр, чәкдијимиз әзаб-әзијјәти дујур вә истәјир ки, бизи нараһат едән истәнилән мәсәлә барәдә Она дуа едәк (2 Салнамәләр 6:29, 30).

Дуа едәндә Јеһова Аллаһын гајғымыза галдығына әминлијимиз артыр. Бир мөмин инсан дуасында белә сөзләр демишди: «Әзаб-әзијјәтими ҝөрдүн, гәлбимдәки дәрди билирсән» (Зәбур 31:7). Доғрудан да, биләндә ки, Јеһова Аллаһ нәләр чәкдијимизи ҝөрүр, проблемләримиздән аҝаһдыр, бу, чәтинликләрә синә ҝәрмәк үчүн ҝүҹүмүзә ҝүҹ гатыр. О, садәҹә нәләр чәкдијимизи мүшаһидә етмәклә кифајәтләнмир. Аллаһ бизи һәр кәсдән јахшы баша дүшүр, нәләрдән кечдијимизи анлајыр вә Кәламы васитәсилә тәсәлли вериб овудур.