Мүгәддәс Китаб тибби китаб олмаса да, орада фајдалы, тәтбиг едә биләҹәјимиз чохлу мәсләһәтләр јер алыр. Бу мәсләһәтләри тәтбиг етмәк психоложи проблемләри олан инсанлара көмәк едә биләр.

«Һәкимә сағлам адамлар јох, хәстәләр мөһтаҹдыр» (МӘТТА 9:12).

Мүгәддәс Китабда дејилир ки, бизим мүалиҹәјә еһтијаҹымыз ола биләр. Чохлары психи проблемләри илә бағлы етибарлы мәнбәләрдән мәлумат әлдә едир вә ихтисаслашмыш мүтәхәссисләрә мүраҹиәт едиб јардым алыр.

«Физики мәшгин фајдасы» вар (1 ТИМУТИЈӘ 4:8).

Физики сағламлығымызын гејдинә галсаг, бу, ментал сағламлығымыза да мүсбәт тәсир едәҹәк. Неҹә дејәрләр, сағлам бәдәндә сағлам руһ олар. Бунун үчүн мүнтәзәм идманла мәшғул олмаг, сағлам гидаланмаг вә кифајәт гәдәр јатмаг ваҹибдир.

«Шад үрәк ҹана мәлһәмдир, сыныг гәлб ҹаны үзәр» (МӘСӘЛЛӘР 17:22).

Мүгәддәс Китабдан тәсәлливериҹи ајәләр охумаг, әлчатан мәгсәдләр гојмаг мүсбәт әһвал-руһијјәни горумаға көмәк едә биләр. Диггәтинизи мүсбәт шејләрә ҹәмләмәк вә ҝәләҹәјә үмидлә бахмаг психоложи проблемләринизин өһдәсиндән ҝәлмәјә сизә ҝүҹ верәҹәк.

 «Һикмәт... тәвазөкар инсанладыр» (МӘСӘЛЛӘР 11:2).

Ишләринизи тәкбашына ҝөрә билмәјәндә башгаларынын көмәјини мәмнунијјәтлә гәбул един. Ола билсин, аиләниз вә достларыныз сизә көмәк етмәјә һазырдырлар, амма нә едәҹәкләрини билмирләр. Конкрет һансы саһәдә көмәјә еһтијаҹ дујдуғунузу онлара дејин. Һәддән артыг тәләбкар олмајын вә сизә ҝөстәрилән көмәјә ҝөрә һәмишә миннәтдарлығынызы билдирин.

«Һисс едирдим ки, сағламлығымда нәсә гајдасында дејил, буна ҝөрә дә һәкимә мүраҹиәт етдим. О, вәзијјәтимлә бағлы диагноз гојду. Проблемин нәдә олдуғуну баша дүшдүм вә сәһһәтими јахшылашдырмаг үчүн мүалиҹә үсулларыны арашдырдым» (Никол a, биполјар позунтудан әзијјәт чәкир).

«Фикир вермишәм ки, јолдашымла бирҝә Мүгәддәс Китабы мүнтәзәм охумаг мәнә ҝүнә позитив вә һәвәслә башламаға көмәк едир. Өзүмү ҝүҹсүз һисс етдијим вахтларда адәтән мүәјјән ајәләр мәнә тәсәлли верир» (Питер, депрессијадан әзијјәт чәкир).

«Сәһһәтимдәки проблем барәдә башгалары илә данышмаг мәнә чәтин иди, чүнки утанырдым. Лакин анлајышлы вә шәфгәтли бир достумун көмәји сајәсиндә өзүмү даһа јахшы һисс еләдим вә ҝөрдүм ки, тәк дејиләм» (Чи Ју, гидаланма позунтусундан әзијјәт чәкир).

«Мүгәддәс Китаб ишә вә истираһәтә таразлы јанашмағыма көмәк едиб. Орадакы һикмәтли нәсиһәтләрин сајәсиндә мәнәви изтирабларымла мүбаризә апара билдим» (Тимоти, обсессив-компулсив позунтудан әзијјәт чәкир).