1. Мүгәддәс Китаба ҝөрә нә үчүн миннәтдарсыныз?

 БИЗӘ Мүгәддәс Китабы бәхш етдијинә ҝөрә Јеһоваја чох миннәтдарыг. Орадакы һикмәтли мәсләһәтләр проблемләримизин өһдәсиндән ҝәлмәјә көмәк едир. Бу китаб һәмчинин бизә ҝөзәл ҝәләҹәјә үмид верир. Ән әсасы исә Јеһова Кәламы васитәсилә бизә Өз хүсусијјәтләрини ачыглајыр. Онун ҝөзәл хүсусијјәтләри барәдә дүшүндүкҹә үрәјимиз ҹуша ҝәлир, Онунла јахын дост олмаға ҹан атырыг (Зәб. 25:14).

2. Јеһова һансы үсуллар васитәсилә Өзүнү инсанлара әјан едиб?

² Јеһова истәјир ки, инсанлар Ону танысын. О, гәдимдә рөјалар, вәһјләр вә мәләкләр васитәсилә Өзүнү әјан етмишди (Сај. 12:6; Һәв. 10:3, 4). Әҝәр бу рөјалар, вәһјләр вә мәләкләрин чатдырдығы хәбәрләр гәләмә алынмасајды, биз онлары неҹә арашдырардыг? Елә бу сәбәбдән Јеһова лазым билдији мәлуматлары «бир китаба» јаздырыб (Әрм. 30:2). «Аллаһын јолу камил» олдуғуна ҝөрә әмин ола биләрик ки, бизимлә үнсијјәт етмәк үчүн сечдији үсул мүкәммәлдир вә бизим хејримизәдир (Зәб. 18:30).

3. Јеһова Мүгәддәс Китабын бизим дөврә гәдәр ҝәлиб чатмасы үчүн һансы тәдбири ҝөрмүшдү? (Әшија 40:8).

³ Әшија 40:8 ајәсини охујун. Аллаһын Кәламындакы һикмәтли мәсләһәтләр мин илләрдир ки, садиг киши вә гадынлара фајда ҝәтирир. Бу неҹә мүмкүн олуб? Ахы Мүгәддәс Китабын јазылмасынын үстүндән гәринәләр өтүб. Онун јазылдығы материаллар вахт кечдикҹә хараб олдуғу үчүн һеч бир орижинал әлјазма дөврүмүзә гәдәр ҝәлиб чатмајыб. Амма Јеһованын истәјилә бу мүгәддәс кәлмәләрин үзү көчүрүлүрдү, онларын чохлу нүсхәси јарадылырды. Көчүрүҹүләр гејри-камил инсанлар олсалар да, һәдсиз дәрәҹәдә диггәтли идиләр. Мәсәлән, бир алим Төвратын мәтни илә бағлы белә бир шәрһ вермишди: «Гәтијјәтлә дејә биләрик ки, һеч бир башга гәдим әсәр бу дәрәҹәдә дәгигликлә бизә ҝәлиб чатмамышдыр». Бәли, бахмајараг ки, Мүгәддәс Китаб чохдан јазылыб,  орижинал әлјазмалар вахт кечдикҹә чүрүјүб вә көчүрүҹүләр гејри-камил олуб, амма әмин ола биләрик ки, бу ҝүн охудуғумуз Мүгәддәс Китаб Мүәллифи Јеһованын фикирләрини дәгигликлә әкс етдирир.

4. Бу мәгаләдә нә һагда данышаҹағыг?

⁴ Јеһова «һәр бир ҝөзәл пај вә һәр бир камил немәт»ин Мәнбәјидир (Јаг. 1:17). Онун бизә вердији ән ҝөзәл пајлардан бири Мүгәддәс Китабдыр. Адәтән бизә верилән пајдан билмәк олур ки, ону верән кәс бизи нә дәрәҹәдә јахшы таныјыр, бизим еһтијаҹларымызы нә дәрәҹәдә јахшы билир. Ејни шеји Мүгәддәс Китаб барәдә дә демәк олар. Бу пајдан биз Јеһова һаггында чох шеј өјрәнирик. Ҝөрүрүк ки, О бизи чох јахшы таныјыр, еһтијаҹларымызы чох јахшы билир. Бу мәгаләдән ҝөрәҹәјик ки, Мүгәддәс Китаб Јеһованын үч хүсусијјәтиндән — һикмәтиндән, әдаләтиндән вә мәһәббәтиндән хәбәр верир. Әввәла, ҝәлин ҝөрәк Мүгәддәс Китаб Јеһованын һикмәтли олдуғуну неҹә сүбут едир.

5. Мүгәддәс Китабын Аллаһын һикмәтиндән хәбәр вердијини нә ҝөстәрир?

⁵ Јеһова билир ки, бизим һикмәтли мәсләһәтә еһтијаҹымыз вар. Буна ҝөрә дә һикмәт чешмәси олан Мүгәддәс Китабы бизә пај вериб. Орадакы мәсләһәтләр инсанларын хејринәдир. Мүгәддәс Китаб инсанларын һәјатыны дәјишир. Муса пејғәмбәр Мүгәддәс Китабын илк бөлмәләрини гәләмә аланда Исраил халгына белә демишди: «Бу, бош сөз дејил, өлүм-дирим мәсәләсидир» (Ган. 32:47). Орада јазыланлара әмәл едәнләр хошбәхт өмүр сүрә биләрдиләр (Зәб. 1:2, 3). Заман Аллаһын Кәламынын гүдрәтини зәифләтмәјә мүвәффәг олмајыб. Мәсәлән, jw.org сајтында «Мүгәддәс Китаб һәјатлары дәјишир» бөлмәсиндә 50-дән чох һәјат һекајәси вар. Бу нүмунәләрдән ајдын ҝөрүнүр ки, Аллаһын Кәламы иманлы инсанларда ҝүҹлү фәалијјәт ҝөстәрир (1 Салон. 2:13).

6. Нәјә әсасән дејә биләрик ки, Мүгәддәс Китаба тај олан икинҹи бир китаб јохдур?

⁶ Дүнјада сајсыз-һесабсыз китаб вар, амма онларын әксәријјәтинин мүәллифи чохдан өлүб, бу китабларын өзү исә заманла дәјәрини итириб. Мүгәддәс Китаб исә тамам фәрглидир, она тај олан икинҹи китаб јохдур. Чүнки онун Мүәллифи әбәдидир, бәнзәрсиз һикмәтә вә гүдрәтә саһибдир. Орадакы принсипләр һеч вахт дәјәрдән дүшмүр; онлар һәр дөврдә јашајан инсанлара фајда ҝәтириб. Биз Мүгәддәс Китабы охујанда вә өјрәндикләримиз барәдә дүшүнәндә Јеһова мүгәддәс руһу илә көмәк едир ки, орадакы мәсләһәтләри өз һәјатымызда неҹә тәтбиг етмәји биләк (Зәб. 119:27; Мәл. 3:16; Ибр. 4:12). Бәли, Мүгәддәс Китабын вар олан Мүәллифи бизә көмәк етмәк истәјир. Мәҝәр бу бизи Мүгәддәс Китабы мүнтәзәм охумаға тәшвиг етмәмәлидир?

7. Кечмишдә Мүгәддәс Јазылар Аллаһын халгы арасында бирлији неҹә јарадырды?

⁷ Мүгәддәс Китабын илаһи һикмәтдән хәбәр вердијини даһа нә ҝөстәрир? О, Аллаһын халгы арасында бирлик јаратмаға гадирдир. Исраиллиләр Вәд едилмиш дијара дахил оланда өлкәнин мүхтәлиф әразиләриндә мәскунлашдылар. Кимиси балыгчылыгла, кимиси һејвандарлыгла, кимиси дә әкинчиликлә мәшғул олмаға башлады. Бир-бириндән узагда јашајан исраиллиләрин мүнасибәтләри асанлыгла сојуја биләрди. Амма Јеһова онларын бирҝә топлашмасы үчүн мүәјјән мәрасимләр тәшкил етмишди. Бу мәрасимләрдә онлар Аллаһын Кәламынын гираәтинә вә изаһына гулаг асырдылар (Ган. 31:10—13; Нәһ.  8:2, 8, 18). Бир тәсәввүр един, исраиллиләр Јерусәлимә ҝәләндә вә өлкәнин дөрд бир тәрәфиндән ахышыб ҝәлән милјонларла сојдашларыны ҝөрәндә һансы һиссләри кечирирдиләр! Бу јолла Јеһова халгына араларындакы бирлији горумаға көмәк едирди. Сонралар мәсиһи јығынҹағы јаранды. Јығынҹаға ҝәлән киши вә гадынлар фәргли дилләрдә данышырдылар, араларында варлылар, касыблар, вәзифә саһибләри вә садә инсанлар вар иди. Амма онларын һамысы Аллаһын Кәламыны севдији үчүн бирлик ичиндә тәк олан Аллаһа ибадәт едирдиләр. Имана јени ҝәләнләр Аллаһын Кәламыны јалныз диндашларынын көмәји вә онларла бирҝә топлашмағын сајәсиндә баша дүшә биләрдиләр (Һәв. 2:42; 8:30, 31).

8. Бу ҝүн Мүгәддәс Јазылар Аллаһын халгы арасында бирлији неҹә јарадыр?

⁸ Бизим дөврүмүздә дә һикмәтли Аллаһымыз Јеһова Мүгәддәс Китаб васитәсилә халгына тәлим верир вә онлар арасында бирлик јарадыр. Мүгәддәс Китаб Аллаһ һаггында билмәли олдуғумуз бүтүн һәгигәтләрин мәнбәјидир. Бу һәгигәтләр јығынҹаг ҝөрүшләриндә вә топлантыларда сәсләнир. Орада Мүгәддәс Китаб охунур, изаһ олунур вә мүзакирә едилир; бунлары динләмәк үчүн биз мүнтәзәм олараг бирҝә топлашырыг. Бу јолла Мүгәддәс Китаб Јеһованын нијјәтинин иҹра олунмасында ваҹиб рол ојнајыр; О истәјир ки, хидмәтчиләри «чијин-чијинә Она гуллуг етсин» (Сәф. 3:9).

9. Аллаһын Кәламыны баша дүшмәк үчүн инсанда һансы хүсусијјәт олмалыдыр? (Лука 10:21).

 ⁹ Јеһованын һикмәтиндән хәбәр верән башга дәлил дә вар. Мүгәддәс Китабын чох һиссәси елә тәрздә јазылыб ки, онлары јалныз тәвазөкар инсанлар баша дүшә биләр. (Лука 10:21 ајәсини охујун.) Белә баханда, Мүгәддәс Китабы бүтүн дүнјада һамы охујур. Бир алим демишкән, «Мүгәддәс Китаб бүтүн китабларын ичиндә ән чох охунан китаб олмагла јанашы, һәм дә ән диггәтлә охунан китабдыр». Амма јалныз һәлим инсанлар ону баша дүшүр вә һәјатында тәтбиг едир (2 Кор. 3:15, 16).

10. Мүгәддәс Китаб Јеһованын һикмәтли олдуғуну даһа неҹә сүбут едир?

¹⁰ Мүгәддәс Китаб Јеһованын башга бир саһәдә дә һикмәтиндән хәбәр верир. Јеһова Мүгәддәс Китаб васитәсилә Өз хидмәтчиләрини һәм үмумиликдә, һәм дә ајры-ајрылыгда өјрәдир вә тәскинлик верир. Кәламы охујанда Јеһованын бизимлә шәхсән марагландығыны һәр биримиз һисс едә биләрик (Әшј. 30:21). Јәгин, сиздә дә дәфәләрлә олуб ки, проблеминиз оланда Мүгәддәс Китабы ачыб охумусунуз вә сизә елә ҝәлиб ки, охудуғунуз ајә мәһз сизин үчүн јазылыб. Амма билдијимиз кими, Мүгәддәс Китаб милјонларла инсана үнванланыб. Бәс неҹә ола биләр ки, орадакы мәсләһәтләр һәмишә актуал олсун вә шәхсән сизин тәләбатыныза ујғун ҝәлсин? Бу јалныз бир шејин сајәсиндә мүмкүндүр: Мүгәддәс Китаб мисилсиз һикмәтә саһиб Мүәллифин әсәридир (2 Тим. 3:16, 17).

11. Мүгәддәс Китабын јазылдығы дилләрдән Јеһованын ајры-сечкилик етмәјән Аллаһ олдуғу неҹә ҝөрүнүр?

¹¹ Әдаләт Јеһованын диҝәр хүсусијјәтидир (Ган. 32:4). Әдаләтли олмаг һәмчинин ајры-сечкилик етмәмәк демәкдир вә Јеһова да ајры-сечкилик етмәјән Аллаһдыр (Һәв. 10:34, 35; Ром. 2:11). Онун ајры-сечкилик етмәдијини Мүгәддәс Китабын јазылдығы дилләрдән ҝөрмәк олар. Мүгәддәс Китабын илк 39 бөлмәси, әсасән, ибрани дилиндә јазылыб. Һәмин дөврдә Аллаһын халгы о дилдә данышырды. Амма ерамызын биринҹи әсриндә артыг әксәр инсанлар јунан дилиндә данышырды. Буна ҝөрә дә Мүгәддәс Китабын галан 27 бөлмәси, әсас етибарилә, јунан дилиндә јазылмышды. Јеһова Кәламынын һансыса конкрет бир дилдә јазылмасынын тәрәфдары олмајыб. Бу ҝүн дүнјада мүхтәлиф дилләрдә данышан сәккиз милјарда јахын инсан вар. Бәс бу гәдәр инсан Јеһова һагда неҹә өјрәнә биләр?

12. Дәнјал 12:4 ајәси ахырзаманда неҹә јеринә јетир?

¹² Јеһова Дәнјал пејғәмбәр васитәсилә демишди ки, ахырзаманда Мүгәддәс Китабдакы «һәгиги елм чохалаҹаг». Хејли инсан ону баша дүшәҹәк. (Дәнјал 12:4 ајәсини охујун.) Бу билик неҹә артыр? Бунун бир јолу Мүгәддәс Китабын вә она әсасланан нәшрләрин тәрҹүмә едилмәси, дәрҹ олунмасы вә пајланмасыдыр. Мүгәддәс Китаб дүнјада ән чох дилә тәрҹүмә олунмуш вә ән ҝениш јајылмыш китабдыр. Коммерсија ширкәтләринин һазырладығы Мүгәддәс Китаб тәрҹүмәләри бәзән чох баһа олур. Јеһованын халгы бу ҝүнә гәдәр Мүгәддәс Китабы там вә ја гисмән 240-дан чох дилә тәрҹүмә едиб вә истәнилән инсан ону пулсуз әлдә едә биләр. Бунун сајәсиндә сон ҝәлмәздән өнҹә бүтүн милләтләрдән олан инсанларын Падшаһлыг һаггындакы мүждәни ешитмәк имканы олур (Мәт. 24:14). Әдаләтли Аллаһымыз Јеһова истәјир ки, мүмкүн гәдәр чох инсан Онун Кәламыны охусун вә Ону танысын. Чүнки Јеһова һамымызы чох севир.

13. Нәјә әсасән дејә биләрик ки, Мүгәддәс Китаб Аллаһын мәһәббәтини әкс етдирир? (Јәһја 21:25).

¹³ Мүгәддәс Китабдан Онун Мүәллифинин ән али хүсусијјәтинин мәһәббәт олдуғуну өјрәнирик (1 Јәһ. 4:8). Јеһованын Мүгәддәс Китаба һансы мәлуматлары дахил етдији, һансыларыны дахил етмәдији барәдә дүшүнәндә Онун мәһәббәтини ајдын ҝөрүрүк. Јеһова Мүгәддәс Китаба Онунла сых мүнасибәт гурмағымыза, инди хошбәхт јашамағымыза вә әбәди һәјат әлдә етмәјимизә көмәк едән мәлуматлары дахил едиб. Јеһова бизи о гәдәр севир ки, бизи әлавә мәлуматларла јүкләмәјиб. (Јәһја 21:25 ајәсини охујун.)

14. Јеһованын бизә мәһәббәти Мүгәддәс Китабда неҹә әкс олунуб?

¹⁴ Јеһованын бизи севдијини башга бир саһәдә дә ҝөрүрүк. О бизимлә үнсијјәт едәркән ләјагәтимизә һөрмәт едир. Мүгәддәс Китабда сајсыз-һесабсыз гајдалар јохдур. Јеһова һәр аддымбашы неҹә давранаҹағымызы диктә етмир. О, ҝерчәк һадисәләр, мөһтәшәм пејғәмбәрликләр вә фајдалы мәсләһәтләр васитәсилә дүшүнҹәмизи ишә салмаға көмәк едир. Беләҹә, Аллаһын Кәламы бизи тәшвиг едир ки, Ону үрәкдән севәк вә итаәт едәк.

15. а) Аллаһын бизә биҝанә јанашмадығыны Мүгәддәс Китабдан неҹә ҝөрмәк олар? б) Шәкилдәки балаҹа гыз, ҝәнҹ гардаш вә јашлы баҹы Мүгәддәс Китабдакы һансы персонажлар барәдә дүшүнүр? (Јар. 39:1, 10—12; 2 Пад. 5:1—3; Лука 2:25—38).

¹⁵ Мүгәддәс Китабдан өјрәнирик ки, Јеһова бизә биҝанә јанашмыр. Нәјә әсасән белә демәк олар? Чүнки Мүгәддәс Китабда чох инсанын һадисәси јазылыб, онларын кечирдији һиссләр гәләмә алыныб. Һәмин инсанларын  һиссләри бизә танышдыр, чүнки онлар да «биздәки кими дујғулара малик» олуб (Јаг. 5:17, һаш.). Ән әсасы исә Јеһованын бизим кими ади инсанларла рәфтарындан ајдын ҝөрүрүк ки, О, чох «меһрибан вә мәрһәмәтлидир» (Јаг. 5:11).

16. Мүгәддәс Китабдан сәһв едән инсанларын һадисәси һагда охујанда Јеһова барәдә нә өјрәнирик? (Әшија 55:7).

¹⁶ Мүгәддәс Китабда Јеһованын бизи севдијинин башга сүбуту да вар. Орада гејд олунуб ки, биз сәһв едәндә Јеһова бизи тәрк етмир. Исраиллиләр Јеһоваја гаршы дәфәләрлә ҝүнаһ едирдиләр, амма онлар үрәкдән төвбә едәндә Јеһова онлары бағышлајырды. (Әшија 55:7 ајәсини охујун.) Биринҹи әсрдәки мәсиһиләр дә Јеһованын онлары севдијини билирдиләр. Һәвари Булус Јеһованын илһамы илә диндашларыны тәшвиг етмишди ки, ҝүнаһлы һәјат сүрән, амма сонра төвбә едән инсаны бағышласынлар вә она тәсәлли версинләр (2 Кор. 2:6, 7; 1 Кор. 5:1—5). Нә јахшы ки, хидмәтчиләри сәһв едәндә Јеһова онлардан үз дөндәрмирди! Әксинә, онлара дајаг олурду, дүзәлиш едирди вә гуҹаг ачыб јенидән Она дөнмәјә сәсләјирди. Јеһова вәд едир ки, бу ҝүн дә төвбә едән бүтүн ҝүнаһкарларла ејни ҹүр давранаҹаг (Јаг. 4:8—10).

17. Нәјә ҝөрә Мүгәддәс Китаб һејрәтамиз пајдыр?

¹⁷ Јеһова бизә чох ҝөзәл бир пај вериб. Нәјә ҝөрә Онун Кәламы белә һејрәтамиздир? Өјрәндијимиз кими, Мүгәддәс Китаб Јеһованын һикмәтли, әдаләтли вә мәһәббәтли олдуғундан хәбәр верир. Бу китаб сүбут едир ки, Јеһова бизим Ону танымағымызы, Онунла дост олмағымызы истәјир.

18. Јеһовадан «ҝөзәл пај» олан Мүгәддәс Китаба ҝөрә миннәтдарлығымызы неҹә ҝөстәрә биләрик?

¹⁸ Биз Аллаһын Кәламынын «ҝөзәл пај» олдуғуну унутмамалыјыг (Јаг. 1:17). Одур ки, ҝәлин бу һәдијјәјә ҝөрә миннәтдарлығымызы даима ҝөстәрәк. Буну неҹә едә биләрик? Орадакы мүгәддәс сөзләри охумагла вә онларын үзәриндә дүшүнмәклә. Белә етсәк, әмин ола биләрик ки, Мүгәддәс Китабын улу Мүәллифи зәһмәтимизә бәрәкәт верәҹәк вә биз «Аллаһын елминә» јетишәҹәјик (Мәс. 2:5).