1. Иса Мәсиһ үчүн тәблиғ иши нә гәдәр ваҹиб иди?

ИСА МӘСИҺ Аллаһын Падшаһлығы һагда данышмағы чох севирди. Мүгәддәс Китабда јазыланлара әсасән, о, башга мөвзулардан чох Падшаһлыг һагда данышмышды. Хидмәти әрзиндә бу мөвзуја 100 дәфәдән чох истинад етмишди. Падшаһлыг она чох әзиз иди. (Мәтта 12:34 ајәсини охујун.)

2. Мәсиһ Мәтта 28:19, 20 ајәләриндә јазылан әмри верәндә орада нә гәдәр адам вар иди вә нәјә ҝөрә белә нәтиҹәјә ҝәлирик? (Һашијәјә бахын.)

² Иса дириләндән бир аз сонра беш јүздән чох инсана ҝөрүнмүшдү. Онлар ҝәләҹәкдә онун шаҝирди олаҹагды (1 Кор. 15:6). Јәгин ки, «бүтүн халгларын ичиндә» Падшаһлыг хәбәрини јајмаг әмрини Мәсиһ елә һәмин вахт вермишди. О вахт үчүн бу, чох чәтин тапшырыг иди *. Иса пејғәмбәрлик етмишди ки, бу бөјүк иш «дөврүн јекунуна кими» иҹра олунаҹаг. Неҹә демишдисә, елә дә олду. Чох јәгин ки, бу тапшырығын вә пејғәмбәрлијин јеринә јетмәсиндә сизин дә пајыныз вар (Мәт. 28:19, 20).

3. Мүждәни тәблиғ етмәк үчүн һансы үч саһәдә тәҹһиз олунмушуг?

 ³ Иса тәблиғ етмәк тапшырығыны верәндән сонра «сизинләјәм» дејә вәд верди (Мәт. 28:20). Тәблиғ иши онун рәһбәрлији алтында иҹра олунаҹагды. Аллаһымыз бу әмри јеринә јетирә билмәјимиз үчүн бизи «һәр ҹүр јахшы шејлә» тәҹһиз едиб (Ибр. 13:20, 21). Бу мәгаләдә һәмин јахшы шејләрдән үчүнү арашдыраҹағыг: 1) алдығымыз вәсаитләр, 2) истифадә етдијимиз үсуллар вә 3) алдығымыз тәлим. Илк өнҹә ҝәлин өтән 100 ил әрзиндә истифадә етдијимиз вәсаитләрдән бәзиләрини нәзәрдән кечирәк.

4. Нәјә ҝөрә тәблиғ ишиндә мүхтәлиф вәсаитләрдән истифадә етмишик?

⁴ Иса «Падшаһлыг һаггындакы сөзү» мүхтәлиф нөв торпаға сәпилмиш тохумла мүгајисә етмишди (Мәт. 13:18, 19). Әкинчи тохумун ҹүҹәрмәси үчүн әввәлҹә мүхтәлиф аләтләрлә торпағы шумлајыр. Ејнилә, Падшаһымыз да илләр әрзиндә милјонларла инсанын Падшаһлыг хәбәрини гәбул едә билмәси үчүн бизә мүхтәлиф вәсаитләр вериб. Бәзи вәсаитләр онилликләр әрзиндә истифадә едилиб, бир башгалары исә индијәдәк ишләнир. Анҹаг бу вәсаитләрин һамысы бизә мүждәчи кими пүхтәләшмәјә көмәк едиб.

5. Шаһидлик вәрәгәси нәдир вә ондан неҹә истифадә олунурду?

⁵ Падшаһлығын мүждәчиләри 1933-ҹү илдә шаһидлик вәрәгәсиндән истифадә етмәјә башладылар. Бу вәрәгә чохларына тәблиғ етмәјә башламаға көмәк етди. Ени тәхминән 8, узунлуғу 13 сантиметр олан вәрәгәләрдә Мүгәддәс Китаба әсасланан гыса мәлумат јазылырды. Вахташыры вәрәгәләр јениләнир вә орада Мүгәддәс Китаба әсасланан башга мәлуматлар јер алырды. Тәгдимә чох садә олурду. Ерленмајер гардаш илк дәфә бу ҹүр шаһидлик едәндә тәхминән он јашы вар иди. О дејир: «Адәтән, ҝириш сөзләри белә олурду: “Бу вәрәгәни охуја биләрсиниз?”» Ев сакини вәрәгәни охудугдан сонра биз она әдәбијјат верир вә чыхыб ҝедирдик.

6. Шаһидлик вәрәгәси һансы мәгсәдә хидмәт едирди?

⁶ Шаһидлик вәрәгәсинин чох саһәдә көмәји дәјмишди. Мәсәлән, бәзи тәблиғчиләр утанҹаг идиләр, тәблиғ етмәк истәсәләр дә, билмирдиләр нә десинләр. Башгалары исә чох данышмағы севирди. Онлар бир нечә дәгигәјә бүтүн билдикләрини данышырдылар, амма чох вахт буну нәзакәтлә етмирдиләр. Анҹаг јығҹам вә ајдын јазылмыш шаһидлик вәрәгәси илә тәблиғчи јахшы шаһидлик едә билирди.

7. Шаһидлик вәрәгәләри илә тәблиғ едәндә һансы чәтинликләр олурду?

⁷ Лакин бунун да өзүнәмәхсус чәтинликләри вар иди. Јеһоваја узун мүддәт хидмәт етмиш Грејс Естеп баҹы дејирди: «Бәзән биздән сорушурдулар: “Бурада нә јазылыб? Өзүнүз дејә билмәзсиниз?”» Бәзи адамлар охумағы баҹармырды. Еләләри дә вар иди ки, вәрәгәни алыб гапыны бағлајырдылар. Ев сакини мүждәјә пис јанашанда вәрәгәни ҹырыб атырды. Буна бахмајараг, шаһидлик вәрәгәси сајәсиндә гардашларымыз тәблиғ етмәји өјрәнирди вә Падшаһлығын мүждәчиләри кими танынырдылар.

8. Патефондан неҹә истифадә олунурду? (Мәгаләнин әввәлиндәки шәклә бахын.)

⁸ 1930-ҹу илдән 1940-ҹы илин әввәлләринә гәдәр диҝәр бир вәсаитдән — патефондан истифадә олунмушду. Гардашлар онун адыны Һарун гојмушдулар, чүнки  о, тәблиғчиләрин јеринә данышырды. (Чыхыш 4:14—16 ајәләрини охујун.) Тәблиғчи ев саһибинин изни илә Мүгәддәс Китаба әсасланан дөрд дәгигә јарымлыг нитги патефонда охутдурурду, сонра исә әдәбијјат тәклиф едирди. Бәзән исә бүтүн аилә јығышыб Мүгәддәс Китабдан олан хәбәрә гулаг асырды. 1934-ҹү илдә Ҝөзәтчи Гүлләси Ҹәмијјәти мәхсуси олараг тәблиғ хидмәти үчүн патефон дүзәлтмәјә башлады. Сонда јазыја алынмыш мөвзуларын сајы 92-ә чатмышды.

9. Патефонла тәблиғ етмәјин һансы фајдасы олду?

⁹ Һилари Гослин адлы бир нәфәр нитгләрин биринә гулаг асандан сонра тәблиғчидән патефону бир һәфтәлик алды ки, гоншулары да мүждәјә гулаг ассын. Тәблиғчи нөвбәти дәфә ҝәләндә ҝөрдү ки, ону јени мараглананлар ҝөзләјир. Тәдриҹән онлардан бир нечәси өзүнү Јеһоваја һәср етди. Һиларинин ики гызы исә Ҝилад Мәктәбинә дәвәт алды вә башга өлкәјә тәјин олунду. Шаһидлик вәрәгәси кими, патефон да бир чохларына тәблиғ етмәјә башламаға көмәк етди. Сонралар Падшаһ тәблиғчиләрә өз дилләри илә тәблиғ етмәји өјрәтди.

10, 11. Һәгигәтин јајылмасында һансы үсуллардан истифадә олунмушду вә нәјә ҝөрә бу үсуллар еффектив иди?

¹⁰ Падшаһын рәһбәрлији алтында Аллаһын халгы мүждәни даһа чох инсана чатдырмаг үчүн мүхтәлиф үсуллардан истифадә едиб. Бичинчиләрин аз олдуғу дөврдә бу хүсусилә ваҹиб иди. (Мәтта 9:37 ајәсини охујун.) XX әсрин әввәлләриндә Јеһованын хидмәтчиләринин аз олдуғу јерләрдә даһа чох инсана мүждәни чатдырмаг үчүн гәзетләрдән истифадә олунурду. Чарлз Тејз Рассел гардаш һәр һәфтә гәзет синдикатына (саһибкарлар иттифагы) телеграфла моизә ҝөндәрирди. Синдикат да һәмин моизәни Бирләшмиш Штатлар, Канада вә Авропадакы гәзет редаксијаларына ҝөндәрирди. 1913-ҹү илә гәдәр Рассел гардашын моизәләри 2000 гәзетдә чап олунмушду вә онлары 15 000 000 инсан охумушду.

¹¹ Рассел гардашын өлүмүндән сонра мүждәни јајмаг үчүн даһа бир еффектив үсул мејдана чыхды. 1922-ҹи ил апрелин 16-да Ҹозеф Рутерфорд гардаш радиода илк чыхышларындан бирини етди. Бу чыхыша тәхминән 50 000 инсан гулаг асмышды. 1924-ҹү ил февралын 24-дә тәшкилатын илк радиостансијасы WBBR истифадәјә верилди. Бу јени тәблиғ үсулуна даир «Ҝөзәтчи гүлләси»нин 1 декабр 1924-ҹү ил сајында дејилмишди: «Радио һәгигәт хәбәрини јајмаг үчүн индијәдәк истифадә олунан ән уҹуз вә сәрфәли үсулдур». Гәзет кими, радионун да тәблиғчиләрин аз олдуғу әразиләрдә хош хәбәрин ҝениш күтләјә чатдырылмасында бөјүк көмәји дәјмишди.

12. а) Иҹтимаи шаһидлијин һансы нөвү лап чох хошунуза ҝәлир? б) Иҹтимаи шаһидлик етмәјә горхурсунузса, сизә нә көмәк едә биләр?

¹² Һал-һазырда исә биз иҹтимаи јерләрдә — автобус, машын дајанаҹагларында, стансијаларда, иш јерләриндә, мејданларда вә тиҹарәт јерләриндә шаһидлијә хүсуси диггәт ајырырыг. Әҝәр бу хидмәтин һансыса нөвүндә иштирак едәркән һәјәҹанланырсынызса, онда бу барәдә дуа едә биләрсиниз. Һәмчинин узун мүддәт сәјјар нәзарәтчи кими хидмәт едән Анжело Манера гардашын сөзләринә диггәт јетирин. О демишди: «Биз һәр јени хидмәт нөвүнә Јеһоваја  хидмәт етмәк, Она садиглијимизи, нөгсансызлығымызы сүбут етмәк имканы кими бахырдыг вә истәјирдик ки, О, неҹә дејир, елә дә хидмәт едәк». Һәтта бизә раһат олмаса да, хидмәтин јени нөвүндә иштирак едәндә Јеһоваја етибарымыз вә иманымыз ҝүҹләнир. Бу исә бизим руһанилијимизи мөһкәмләндирир. (2 Коринфлиләрә 12:9, 10 ајәләрини охујун.)

13. jw.org вебсајты сајәсиндә нәјә наил олунур вә сајтла бағлы һансы мараглы һадисә илә үзләшмисиниз?

¹³ Бир чох тәблиғчиләр инсанлары jw.org вебсајтына јөнәлдирләр. Бу сајтда 700-дән чох дилдә Мүгәддәс Китаба әсасланан нәшрләри охумаг вә јүкләмәк мүмкүндүр. Һәр ҝүн 1,6 милјондан чох инсан сајтымыза дахил олур. Радио кими, вебсајтын сајәсиндә дә мүждә һәтта ән уҹгар әразиләрдә јашајан инсанлара чатыр.

14. Нәјә ҝөрә Падшаһлығын тәблиғчиләринә тәлим вермәк лазым иди вә онлара сәриштәли мүәллим олмаға һансы мәктәб көмәк етди?

¹⁴ Мүждәнин јајылмасы үчүн истифадә олунан вәсаитләрин вә үсулларын бәзиләрини нәзәрдән кечирдик. Бәс тәлим барәдә нә демәк олар? Туталым ки, кимсә патефонда нитгә гулаг асандан сонра етиразыны билдирирди, јахуд шаһидлик вәрәгәсини охујандан сонра хәбәрлә марагланырды. Белә олан һалда тәблиғчи етираза нәзакәтлә ҹаваб вермәји, Аллаһы ахтаран инсанлары өјрәтмәји билмәли иди. Сөзсүз ки, Аллаһын мүгәддәс руһунун тәшвиги илә Нејтан Норр гардаш баша дүшдү ки, тәблиғчиләрә хидмәтдә дүзҝүн данышмағы өјрәтмәк лазымдыр. Беләликлә, 1943-ҹү илдә јығынҹагларда Теократик Хидмәт Мәктәби тәсис олунду. Бу мәктәб бизә сәриштәли мүәллимләр олмаға көмәк едир.

15. а) Теократик Хидмәт Мәктәбиндә чыхыш едәнләрин бәзиләри һансы һиссләри кечирмишләр? б) Јеһованын Зәбур 32:8 ајәсиндәки вәдини өз үзәриниздә неҹә һисс етмисиниз?

¹⁵ Чохлары аудиторија гаршысында данышмаға өјрәшмәмишди. Хулио Раму гардаш мәктәбдә илк чыхышыны 1944-ҹү илдә етмишди. Мөвзу Мүгәддәс Китабын ҹәми дөрд ајәсиндә ады чәкилән Дуәг һагда иди. Чыхышыны бу ајәләр әсасында гуран Хулио гардаш дејир: «Мәним дизләрим, әлләрим әсирди, дишләрим бир-биринә дәјирди. Чыхышымы үч дәгигәјә гуртардым. Бу, күрсүдән етдијим илк чыхыш иди,  бунунла белә, сәһнәдән јарымчыг дүшмәдим». Ушаглар да мәктәбә јазылырдылар. Онлардан бәзиләри үчүн јығынҹаг гаршысында чыхыш етмәк чәтин иди. Јухарыда адыны чәкдијимиз Анжело Манера гардаш орта мәктәбә тәзә ҝедән балаҹа оғланын илк чыхышындан данышараг демишди: «О, елә һәјәҹанлы иди ки, ағзыны ачан кими ағламаға башлады. Амма чыхышы јарымчыг гојмады, ағлаја-ағлаја ахыра чатдырды». Ола билсин, сиз дә јығынҹагда ҹаваб вермәјә утанырсыныз, јахуд да баҹармајаҹағыныздан горхараг тапшырыгла чыхыш етмирсиниз. Јеһовадан көмәк истәјин. О, Теократик Хидмәт Мәктәбиндә охујан әввәлки шаҝирдләрә неҹә көмәк етмишдисә, сизә дә елә көмәк едәҹәк. (Зәбур 32:8 ајәсини охујун.)

16. Ҝилад мәктәбинин әввәлләр мәгсәди нә иди, бәс инди һансы мәгсәдә хидмәт едир?

¹⁶ Јеһова Өз халгына тәкҹә Теократик Хидмәт Мәктәбиндә тәлим вермир. Хүсуси тәјинатлы мүждәчиләр вә башгалары Ҝилад мәктәбиндә охујараг бөјүк фајда әлдә едибләр. Орада дәрс дејән мүәллимләрдән биринин сөзләринә әсасән, мәктәбин мәгсәди «шаҝирдләрин үрәјиндә мүждәчилик ишиндә иштирак етмәк арзусуну даһа да аловландырмагдыр». Ҝилад мәктәби 1943-ҹү илдә тәсис олунмушду вә о вахтдан етибарән 8500 нәфәр бу мәктәбин мәзуну олуб. Ҝиладда тәлим алмыш хүсуси тәјинатлы мүждәчиләр 170-дән чох өлкәдә хидмәт етмишләр. 2011-ҹи илдән мәктәбә артыг хүсуси таммүддәтли хидмәтдә оланлар — хүсуси өнҹүлләр, сәјјар нәзарәтчиләр, бејтеллиләр, Ҝиладда охумамыш хүсуси тәјинатлы мүждәчиләр дәвәт олунурлар.

17. Ҝилад мәктәбиндәки тәлим нә дәрәҹәдә еффектив олуб?

¹⁷ Бу тәлим нә дәрәҹәдә еффектив олуб? Бир нүмунәјә бахаг. 1949-ҹу илин августунда Јапонијада јерли тәблиғчиләрин сајы он нәфәрдән аз иди. Һәмин илин сонунда орада Ҝилад мәктәбини гуртармыш 13 хүсуси тәјинатлы мүждәчи тәблиғ едирди. Бу ҝүн Јапонијада тәхминән 216 000 нәфәр тәблиғчи вар вә онларын тәгрибән 42 фаизи өнҹүл кими хидмәт едир.

18. Јеһованын халгынын руһани ҹәһәтдән инкишафына көмәк едән мәктәбләрдән бәзиләринин адыны чәкин.

¹⁸ Диҝәр мәктәбләр, мәсәлән, Падшаһлыг Хидмәти Мәктәби, Өнҹүл Мәктәби, Падшаһлыг мүждәчиләри мәктәби, Рајон Нәзарәтчиләри вә Һәјат Јолдашлары үчүн Мәктәб, Филиал Комитәләринин үзвләри вә Һәјат Јолдашлары үчүн Мәктәб Јеһованын халгынын руһанилијинин вә баҹарығынын артмасында мисилсиз рол ојнајыр. Бәли, Падшаһ өз тәбәәләринә тәлим верир.

19. Рассел гардаш тәблиғ иши илә бағлы нә демишди вә бу, неҹә јеринә јетди?

¹⁹ Аллаһын Падшаһлығынын гурулмасындан артыг 100 илдән чох вахт кечиб. Падшаһымыз Иса Мәсиһ бизә һәлә дә тәлим верир. 1916-ҹы илдә өлүмүндән бир гәдәр әввәл Чарлз Тејз Рассел гардаш узагҝөрәнликлә тәблиғ ишинин чох бөјүк вүсәт алаҹағыны сөјләмишди. О, јахын бир достуна белә демишди: «Иш сүрәтлә артыр, һәлә бундан сонра да артаҹаг. Чүнки Падшаһлыг һагда мүждә бүтүн дүнјаја тәблиғ олунмалыдыр» («Маршда иман», А. Макмиллан, сәһ. 69). О, һаглы иди. Биз чох хошбәхтик ки, сүлһ Аллаһы бу мөһтәшәм иши иҹра етмәк үчүн бизи һәр шејлә тәҹһиз едир, Онун ирадәсини јеринә јетирмәк үчүн бизә һәр ҹүр јахшы шеји верир.