Мүгәддәс Јазылар васитәсилә Һагг-Таала ачыг шәкилдә Өз исмини бәјан едир: «Мән Јеһовајам, исмим одур» (Пејғәмбәрин китаблары, Јешаја 42:8, Китабы Мукаддес, түркҹә). Аллаһа мүхтәлиф формаларда мүраҹиәт олунур, мәсәлән, «Пәрвәрдиҝара», «Јарадан» вә «Күлли-Ихтијар» (Төврат, Јарадылыш 17:1; Инҹил, Һәвариләрин ишләри 4:24; 1 Петер 4:19). Лакин Јарадан бујурур ки, биз Она тәк бир ады илә мүраҹиәт едәк.

Мүгәддәс Јазыларда Муса пејғәмбәр тәрәфиндән гәләмә алынан сөзләрдә Аллаһын «Јеһова» ады чәкилир: «Ибраһимә, Исһага вә Јагуба Гадир олан Аллаһ олараг ҝөрүндүм; фәгәт онлара Јеһова исмим илә мәлум олмадым» (Төврат, Чыхыш 6:3, Китабы Мукаддес, түркҹә).

Әсрләр боју Аллаһа мүраҹиәтдә бу аддан истифадә едилмишдир. Инҹилин 2010-ҹу илдә дәрҹ едилмиш азәрбајҹанҹа тәрҹүмәсиндә бу ад «Јеһова» формасында ишләнир. «Азәрбајҹан Милли Енсиклопедијасы»нда «Јәһва» кими верилиб (I ҹилд, сәһ. 333). Јазылышы сағдан сола олан гәдим ибрани дилиндә гәләмә алынан Мүгәддәс Јазыларда Аллаһын уҹа ады дөрд самитлә јазылырды: יהוה. «Тетраграмматон» адландырылан бу дөрд ибрани һәрфини ЈҺВҺ кими транслитерасија етмәк олар.