Bəli. İsa peyğəmbər yer üzündə olduğu müddətdə Öndər Məsih, yəni «dünyanın Xilaskarı» ilə bağlı bir sıra peyğəmbərlikləri yerinə yetirdi (Dənyal 9:25; 1 Yəhya 4:14). Hətta ölümündən sonra da o, Məsihlə bağlı peyğəmbərlikləri yerinə yetirmişdi (Zəbur 110:1; Həvarilərin işləri 2:34—36).

•  «Məsih» sözünün mənası nədir?

•  Məsihlə bağlı peyğəmbərlikləri bir neçə insan yerinə yetirə bilərdi?

•  Ola bilərmi ki, Məsih gələcəkdə peyda olsun?

•  Müqəddəs Kitabda Məsihlə bağlı neçə peyğəmbərlik qələmə alınıb?

•  İsanın üzərində yerinə yetən Məsihlə bağlı peyğəmbərliklər

 İbranicə Maşiax (Məsih) və yunan ekvivalenti Xristos (Məsih) sözlərinin mənası «məsh edilmiş» deməkdir. Buna görə də «İsa Məsih» deyildikdə İsanın «məsh edilmiş» olduğu nəzərdə tutulur.

 Müqəddəs Kitabın yazıldığı dövrdə insan hakimiyyətdə xüsusi mövqeyə təyin olunanda, adətən, başına yağ tökülüb məsh olunurdu (Lavililər 8:12; 1 İşmuil 16:13). İsanı yüksək səlahiyyət sahibi, yəni Məsih olmağa Allah təyin edib (Həvarilərin işləri 2:36). Lakin Allah İsanı yağla deyil, müqəddəs ruhla məsh edib (Mətta 3:16).

 Xeyr. Bir barmaq izi ilə yalnız bir insan müəyyən edildiyi kimi, Müqəddəs Kitab peyğəmbərliklərinin yerinə yetməsi də yalnız bir Məsihə işarə edir. Bununla belə, Müqəddəs Kitab xəbərdarlıq edir ki, «yalançı məsihlər və yalançı peyğəmbərlər peyda olacaq. Onlar böyük əlamətlər və möcüzələr göstərəcəklər ki, mümkünsə, seçilmişləri də yoldan çıxartsınlar» (Mətta 24:24).

 Xeyr. Müqəddəs Kitabda peyğəmbərlik edilmişdi ki, Məsih İsrail padşahı Davudun nəslindən gələcək (Zəbur 89:3, 4). Lakin Davuda qədər olan yəhudi nəsil şəcərəsinin siyahısı itmişdi. Ehtimal ki, həmin siyahı eramızın 70-ci ilində romalılar Yerusəlimi ələ keçirən zaman məhv olmuşdu a. O vaxtdan bəri kiminsə Davud padşahın nəslindən olduğunu sübut etməsi mümkün deyil. Amma İsanın yaşadığı dövrdə bu nəsil şəcərəsinin siyahısı mövcud idi. İsa Davudun nəslindən gəldiyini deyəndə heç düşmənləri onun dediklərinin əksini sübut edə bilməmişdilər (Mətta 22:41—46).

 Məsihlə bağlı peyğəmbərliklərin dəqiq sayını müəyyən etmək mümkün deyil. Hətta Məsih üzərində yerinə yetdiyini dəqiq bildiyimiz peyğəmbərliklərin yazıldığı parçalarda belə, peyğəmbərliklərin sayılma üsulu müxtəlif ola bilər. Məsələn, Əşiya 53:2—7 ayələrdə Məsihlə bağlı bir neçə təfsilat peyğəmbərlik edilib. Bəziləri bu parçada yazılanları bir peyğəmbərlik kimi, başqaları isə hər bir təfsilatı ayrı-ayrı peyğəmbərlik kimi saya bilər.