5 Dugas Yesus ningalin liu anaké mekumpul, ditu ia menék ke gunungé lantas negak lan murid-muridné pade teke. 2 Yesus mulai ngajahin lan ngomong kéné:

3 ”Bagia anaké ané sadar yén ia merluang tuntunan Tuhan, krane ia bise dadi bagian uli Kerajaan suargan.

4 ”Bagia anaké ané merase sebet, krane ia lakar kehibur.

5 ”Bagia anaké ané polos, krane ia lakar ngewarisin gumi.

6 ”Bagia anaké ané ngedotang keadilan, krane ento lakar isinine.

7 ”Bagia anaké ané ngelah rase pedalem krane ia lakar pedaleme.

8 ”Bagia anaké ané atiné tulus, krane ia lakar ningalin Tuhan. a

9 ”Bagia anaké ané seneng ngai damai krane ia lakar kesebut pianak-pianak Tuhan.

10 ”Bagia anaké ané sengsare ulian nyalanang ané beneh, krane ia bise dadi bagian uli Kerajaan suargan.

11 ”Bagia cening yén ade anak ané nyacadin, nyakitin, lan misune cening ulian tiang. 12 Nabi-nabi setondén cening masih kesakitin care kéto. Bagia lan girangje, krane upah ceningé gedé di suargan.

13 ”Cening care uyah di guminé, yén uyahé sube tusing pakeh, kéngkénang buin apang pakeh? Ento sube tusing megune, kutang ke rurungé apang jekjeke tekén anaké.

14 ”Cening care galang ané nyinarin guminé, tusing ngidaang ngengkebang kota ané ade di muncuk gunungé. 15 Anaké ané ngidupang lampu ané nganggon lengis, tusing lakar ngejang ento di betén keranjangé, kéwale di tongosé ané tegeh apang tengah umahé galang. 16 Kéto masih, depang galang ceningé tepukine tekén anaké lén apang ulian laksanan ceningé ané melah, anaké ngormatin Bapan ceningé ané ade di suargan.

17 ”Ede ngadén tiang teke buat ngilangang Taurat lan Kitab Para Nabi. Tiang teke tusingje lakar ngilangang, kéwale ngai ento mekejang dadi nyata. b 18 Percayeje care langit lan guminé tetep ade, kéto masih isin Tauraté lakar terus ade. Abesik hurupné ané paling cenike tusing lakar ilang nganti isiné mekejang dadi nyata. 19 Dadiné, nyénje ané ngelanggar hukum ané paling cenik lan ngajahang unduké ento tekén anak lén, ia tusing pantes dadi bagian uli Kerajaan suargan. Kéwale nyénje ané nyalanang lan ngajahang préntahé ento, lakar keanggep pantes dadi bagian uli Kerajaan suargan. 20 Tiang ngorahin cening, yén laksanan ceningé tusing luungan tekén laksanan para guru agama Yahudi lan anak Farisiné, cening tusing lakar maan bagian di Kerajaan suargan. c

21 ”Cening taén ningeh pitutur anaké imaluan ané ngorahang: ’Ede ngematiang anak. Yén ade anak ané ngematiang, lakar abane ke pengadilan.’  22 Kéwale tiang ngorahin cening, nyénje ané terus gedeg tekén nyamané lakar abane ke pengadilan. Nyénje ané ngerendahang nyamané nganggon omongan ané tusing pantes, lakar abane ke Mahkamah Agung. Nyénje ané ngorahang, ’Mule jeleme lengeh!’ lakar hakimine lan musnah.

23 ”Yén cening ngabe aturan ke mezbah, lan ditu cening inget ade nyaman ceningé enu merase gedeg tekén cening, 24 ejang, kalahin malu aturané ditu di mezbah, lantas alih nyaman ceningé ento, pragatang malu masalahé sube kéto mare balik aturang buin aturané ento.

25 ”Yén ade anak ané nuntut cening di pengadilan, énggalang pragatang masalahé dugas nuju ke pengadilan, apang ia tusing nyerahang cening tekén hakim, lantas uli hakim ke petugas pengadilan lan cening celepange ke penjara. 26 Tiang ngomong amen benehné, cening tusing lakar ngidaang bebas uli ditu setondén cening pragat mayah utang ceningé kanti pis krécékan ané paling cenik.

27 ”Cening sube taén ningeh tutur kéné, ’Ede memitra.’ 28 Nanging tiang ngomong tekén cening, nyénje ané terus nlektekang anak luh kanti ia ngedotang anaké luh ento, ia sube memitra di kenehné. 29 Jani, yén peningalan kenawan ceningé ngeranaang cening medosa, cungkil lan kutang ento. Adénan cening pécéng ketimbang ukudan ceningé musnah. 30 Kéto masi, yén lime kenawan ceningé ngeranaang cening medosa, getep lan kutang ento. Adénan cening ngelah lime abesik bandingang tekén enu tileh buke ukud kéwale musnah.

31 ”Ade masi tutur kéné: ’Nyénje ané melasang kurenan, ia harus ngemaang surat cerai.’ 32 Kéwale tiang ngomong tekén cening, yén ade anak ané melasang kurenané yapin kurenané tusing memitra, ia sube ngeranaang kurenané memitra, lan nyénje ané nyuang anaké ané palasange ento, ia sube memitra ajak anaké ento.

33 ”Cening masih taén ningeh yén tua-tuané ipidan orahine tutur kéné: ’Ede mesumpah yén tusing bisa nyalanin. Cening patut mayah janjin ceningé tekéning Yehuwa.’ 34 Kéwale, tiang ngomong tekén cening: Ede gati ngai sumpah, ape buin kanti nyambat suargan, krane suargan ento tahtané Tuhan. 35 Ede mesumpah nyambat gumi, krane guminé aled batis Idané. Ede mesumpah nyambat Yerusalém, krane kotané ento kota raja ané agung. d 36 Ede mesumpah nyambat duur ceningé, krane cening tusing bise nyelemang atau mutihang bok ceningé akatih. 37 Yén cening ngorahang ’Nah’ ento artiné nah, yén ’Tusing,’ artiné tusing. Apaje ané lebihan tekén ento asalné uli I Setan.

38 ”Cening taén ningeh tutur kéné: ’Mata ganti aji mata lan gigi ganti aji gigi.’ 39 Kéwale, tiang ngomong tekén cening: Ede ngelawan anak jaat. Tungkalikané, yén ade anak nampél pipi kenawan ceningé, serahang masi pipi kébot ceningé. 40 Yén ade anak ané nuntut cening ke pengadilan ulian ngedotang bajun ceningé, serahang masih jikét ceningé. 41 Yén ade anak ané ngelah kuasa nundén cening mejalan akilométer, jalanin ajak ia duang kilométer. 42 Yén ade anak ané nagih ngidih gelah ceningé, baang ento, yén ade anak nagih nyilih ede tolake.

43 ”Cening taén ningeh ajahan kéné: ’Sayangang nyaman ceningé lan musuhin anak ané jaat tekén cening.’ 44 Kéwale, tiang ngajahin cening: Terusje sayangang musuh-musuh ceningé lan berdoa buat anak ané  nyakitin cening, 45 apange cening dadi pianak-pianak Bapan ceningé ané di suargan, krane Ida ngai matan ai mesunar buat anak jaat lan anak jemet, lan nuunang ujan buat anak ané beneh kéto masih anak ané tusing beneh. 46 Yén cening sayang tuah tekén anak ané nyayangin cening, ape upahné buat cening? Tusingké tukang duduk pajeg masi melaksane kéto? e 47 Lan, yén cening nyapatin nyama-nyaman ceningé dogén, ape istimewané? Tusingké anak-anak uli bangsa lénan masih melaksane kéto? 48 Dadiné, cening patut nunjukang rasa sayang ané sempurna, patuh care Bapan ceningé ané di suargan.

6 ”Yén cening melaksane ané luung, ede kanti cening ngelah tujuan pamér. Yén kéto, cening tusing lakar maan upah uli Bapan ceningé di suargan. 2 Yén cening ngemaang ngidih anak lén, ede ngomong kemu mai care anak ngupin terompét. Ento care anak munafik di rurungé lan di tongos ibadah apang ajumange tekén anak lén. Amen benehné tiang ngorahang, ia sube nerima upahné. 3 Kéwala, yén cening mekidihang, ede tuturange tekén anak lén, 4 apange perbuatan ceningé tusing tawange tekén anak lén. Yén kéto, Bapan ceningé ané sube nawang mekejangné lakar ngemaang cening upah.

5 ”Kéto masih, yén berdoa, ede care anak munafik ané demen berdoa mejujuk di rurungé lan di tongos ibadah, apang tingaline tekén anak lén. Amen benehné tiang ngorahang, ia sube nerima upahné mekejang. 6 Sebalikné, yén cening lakar berdoa, mecelep ke kamar ceningé, ubetang jelanané, lantas berdoa tekén Bapan ceningé. Yén kéto, Bapan ceningé ané ningalin mekejang lakar ngemaang cening upah. 7 Dugasé berdoa, ede terus-terusan ngomongang ané patuh care anaké uli bangsa lénan. Ia ngadén yén doané lantang, ento lakar dingehange. 8 Ede milu kéto, krane Bapan ceningé sube nawang ape ané perluang cening, setondén cening ngidih.

9 ”Kéné benehné cening berdoa:

”’Bapan tiangé di suargan, dumadakje anaké ngormatin adan Bapaké. 10 Dumadakje pemréntahan Bapaké memréntah di guminé. Apange guminé dadi patuh care di suargan buke tetujon Bapaké. 11 Icénje tiang ajengan buat dinané jani, 12 ampuninje dosan tiangé care tiang sube ngampunin dosan anak lén tekén tiang. 13 Tulungin tiang apang tusing nyerah dugas nemu gegodan, nanging selametangje tiang uli I Setan.’

14 ”Yén cening ngampunin anak ané pelih tekén cening, Bapan ceningé ané di suargan masih lakar ngampunin cening. 15 Kéwale yén cening tusing nyak ngampunin anak ané pelih tekén cening, Bapan ceningé masih tusing lakar ngampunin cening.

16 ”Dugas mepuasa, ede buin ngédéngang mue ané sebet care anak munafik, ané nyelapang apang tawange tekén anak lén yén ia mepuasa. Amen benehné tiang ngorahang, ia sube nerime upahné mekejang. 17 Yén cening mepuasa, suginin muané lan apunin boké, 18 apang tusing ade anak nawang yén cening mepuasa, tuah Bapan ceningé di suargan ané nawang. Lan Bapan ceningé di suargan ané lakar ngemaang cening upah.

19 ”Suud munduhang kesugihan di guminé, krane ento bise karatan lan amah nget-nget, lan bisa ilang pelaibang maling. 20 Sebalikné, punduhangje kesugihané di suargan, krane ditu tusing ade nget-nget, karat, lan anak ngemaling. 21 Krane dijeje  kesugihan ceningé, ditu masih keneh ceningé.

22 ”Peningalan care penerang buat ukudan ceningé. Yén peliat ceningé cedang, ukudan ceningé lakar galang. 23 Yén peningalan ceningé nolih unduk-unduk ané tusing beneh, idup ceningé lakar sengsara. Yén galang di ukudan ceningé ento nyatané peteng, ambaté peteng dedet déwék ceningé!

24 ”Tusing ade ané bisa ngayahin majikan dadue, krane ia pasti meilonan, ané abesik jemetange ané buin besik tusing runguange. Dadiné yén Kesugihan ané paling penting di idup ceningé, cening tusing ngidaang ngayahin Tuhan.

25 ”Ulian ento tiang ngomong tekén cening: Suud sube jejeh unduk idup ceningé, unduk ape ané lakar daar, unduk ape ané lakar minum, unduk ukudan lan penganggon ceningé. Tusingké idup lebih penting ketimbang dedaaran, lan ukudan ketimbang penganggo? 26 Tegarang tolih kedis di langité. Ia tusing nyambehang bibit, tusing manyi, tusing ngumpulang amah-amahan, kéwale Bapan ceningé ané di suargan ngemaang ia amah-amahan. Tusingké cening lebih maji tekéning kedis? 27 Nyénké di pantaran ceningé ané bise nawanang tuuh idupné abedik ulian merase jejeh? 28 Kéto masih, kenape cening inguh unduk penganggo? Melajahje uli bunga-bungané ané tumbuh di alasé. Ia tusing megaé, tusing nyait, 29 nanging tiang nuturin cening, yapin Salomo Raja ané paling agung tusing mepenganggo luungan tekén bunga-bungané ento. 30 Nah, yén Tuhan nyediaang penganggo buke kéto buat taneman di alasé, ané jani ade lan buin mani tunjele, ape buin buat cening, tusingké cening lakar sediaange ané luungan, ih cening ané imané cenik! 31 Jani, ede buin inguh lan mekeneh, ’Ape ané lakar daar tiang?’, ’Ape ané lakar minum tiang?’, lan ’Ape ané lakar saluk tiang?’ 32 Unduké ento mekejang, uberine tekén bangsa-bangsané. Bapan ceningé di suargan sube nawang yén cening merluang unduké ento mekejang.

33 Jani, terusje utamaang Pemréntahan Tuhan lan taatin Ida. Unduk-unduk ané lénan, mekejang lakar sediaange buat cening. 34 Dadiné ede buin inguh unduk buin mani, krane buin mani enu ade buin ané ngeranaang inguh. Sebilang wai lakar ade masalahné pedidi lan ento sube cukup.

7 ”Suud ngakimin apang cening tusing hakimine, 2 krane cening lakar hakimine patuh care carané cening ngakimin. Yén cening jemet tekén anak lén, anak lén lakar jemet masih tekén cening. 3 Kenape cening ningalin sumi di peningalan nyaman ceningé kéwale tusing nepukin balok di peningalan ceningé pedidi? 4 Adi bise cening ngomong tekén nyaman ceningé: ’Mai baang tiang mesuang sumi uli peningalan ragané,’ padahal ade balok di peningalan ceningé pedidi? 5 Jeleme munafik! Pesuang malu balok uli peningalan ceningé, sube kéto mare bise nelahin sumi uli peningalan nyaman ceningé.

6 ”Barang-barang ané suci gelah Tuhan ede baange kuluk, kéto masih mutiarané ede baange céléng, apang tusing jekjeke sube kéto mebading ngepung cening.

7 ”Terusje ngidih, lan cening lakar baange. Terusje alih lan cening lakar makatang. Terusje dogdog ditu cening lakar ampakine. 8 Krane sebilang ade anak ngidih lakar baange, sebilang anak ngalih lakar makatang, lan sebilang anak nogdog lakar ampakine. 9 Nyén di pantaran ceningé ané ngemaang batu yéning panakné ngidih jaje,  10 kéto masih ngemaang lelipi yéning ia ngidih bé? 11 Yén cening ané medosa dogén nawang carané ngemaang ape ané luung tekén pianak-pianak ceningé, ape buin Bapan ceningé ané di suargan! Ida pasti lakar ngemaang unduk-unduk ané luung ané tunas cening tekén Ida.

12 ”Mekejang ané dotang cening apang jalanange tekén anak lén, jalanang malunan buke kéto tekén anaké ento. Sebenehné ento inti uli Taurat lan Kitab Para Nabi.

13 ”Mecelepje di jelanan ané cupit, krane jelanané ané gedé lan rurungé ané linggah nuju sengkale, lan liu anaké mecelep kemu. 14 Sebalikné jelanan ané cupit lan rurung ané cenik ento nuju kehidupan, lan tuah abedik anaké ané nepukin.

15 ”Hati-hati tekén anak bobab ané ngomongang unduk Tuhan, ia nyaru-nyaru buke domba padahal ia cicing alasan ané rakus. 16 Patuh care cening nawang punyan-punyanan ané luung uli buahné, cening lakar nawang anak ané luung uli laksanané. Tusing ade punyan kétkét ané ngasilang buah anggur, kéto masih tusing ade padang gérét ané ngasilang buah ané manis. 17 Kéto masih, sebilang punyan-punyanan ané luung, ngasilang buah ané luung, kéwale punyan-punyanan ané jelék ngasilang buah ané berek. 18 Punyan-punyanan ané luung tusing lakar ngasilang buah ané jelék, lan punyan-punyanan ané jelék tusing lakar ngasilang buah ané luung. 19 Sebilang punyan-punyanan ané tusing ngasilang buah ané luung lakar entebe lan tunjele. 20 Kéto masih, uli tingkah solahné cening lakar nawang yén anaké ento nabi palsu.

21 ”Tusing sebilang anak ané merase déwékné ngayahin tiang, lakar dadi bagian uli Kerajaan suargan. Ané lakar maan bagian, tuah anak ané nyalanang préntah Bapan tiangé di suargan. 22 Kayangé ento, liu lakar ade anak ané ngomong tekén tiang kéné: ’Tuan, Tuan, tiang sube nyeritaang unduk tuan tekén anak lén, tiang sube nganggon adan tuan buat ngusir roh-roh jaat, lan tiang sube liu ngai mukjizat nganggo kuasan tuané, apaké tuan tusing inget?’ 23 Jani terus terang tiang ngomong: ’Tiang tusing taén nawang ibe! Megedi ibe, ih jeleme jaat!’

24 ”Anak ané ningeh lan nyalanang omong tiangé, ia care anak bijaksane ané ngai umahné medasar aji batu. 25 Dugas tuun ujan bales, belabar gedé, lan angin baret, umahé ento tusing lakar pungkat krane dasarné uli batu. 26 Tungkalikané, anak ané ningehang omong tiangé kéwale tusing nyak nyalanang, ia care jeleme belog ané ngai umahné medasar aji bias. 27 Dugas ujan bales, belabar gedé, lan angin baret, umahé ento bah mebriug kanti asah ajak tanah.”

28 Disubané Yesus suud ngomongang unduké ento, anaké pade ngon tekén carané ia ngajahin, 29 krane carané ia ngajahin nganggo kuasa ané tekané uli Tuhan, tusing care para ahli Kitab Suci.