Kaat Markô 12:1-44
12 I mbus, a bôdôl pôdôs bo ni dihéga: “Mut wada a bi bel wom u minkôô mi wai,+ a kéña wo ni lipénd, a tém waa wai,* a oñ nkum ndap;+ a ti wo basalnwom, a ke i loñ ipe.+
2 Kiki ngéda libumbul li matam i bi kola, a ep nkol wé yak basalnwom, le u yôñôl nye mé matam ma wom u minkôô mi wai.
3 Ndi ba gwel nkol, ba bép wo, ba huuha wo moo nso.
4 A témb a ep nkol umpe i boni, ndi ba babaa wo i ño, ba wéha wo nyuu.+
5 A ep ki nkol umpe, ba nol yak wo; a ep ki ngandak ipe, ndi ba bép bahogi, ba nol ki bape.
6 A bé a ngi gwé ndigi man wé nu gwéha.+ Nyen a bi sôk a ep i boni, a kalak le: ‘B’a ti man wem lipém.’
7 Ndi bana basalnwom ba kalna le: ‘Nkôdôlbum nunu.+ Loga, di nol nye, ha nyen bum y’a ba yés.’
8 Ha nyen ba bi gwel nye, ba nol nye, ba leñ nye i mbus wom u minkôô mi wai.+
9 Kii nwet wom u minkôô mi wai a’ boñ? A’ loo, a nol basalnwom, a ti bôt bape wom u minkôô mi wai.+
10 Baa ni maa bé añ i tilna ini le: ‘Ngok bôt ba maoñ ba bi tjél, yon i bi yila ngok likas i bisu.*+
11 Hala a nlôl yak Yéhôva,* hala a yé ki jam li hélha i mis més’?”+
12 Ha nyen baoo bé ba bé sômbôl gwel* nye inyule ba bi yi le bon a bééna ikété mahoñol i ngéda a bi yoñ hihéga hini, ndi ba bé kon limut woñi. Jon ba bi nwas nye, ba ke.+
13 I mbus, ba ômle nye bahogi ikété Farisai ni bahogi ikété ntôñ u banit Hérôdé inyu gwel nye mu bibañga gwé.+
14 Kiki ba nlo, ba kal nye le: “A Lét, di nyi le u yé maliga, u nyéñ bé to lémél mut binam nye ki nye, inyule u mbéñge bé bôt inoñnaga ni yom i nene i mis, ndi u niiga njel Nyambe inoñnaga ni maliga. Baa i yé kunde* i saa Kaisa tas tole to?
15 Baa di saa tole di saa bañ?” Kiki a ntehe bihéñba gwap, a kal bo le: “Inyuki ni noode me? Ni lona me dinariô* yada le me béñge yo.”
16 Ba lona nye yada, ha nyen a kal bo le: “Titii i njee ini? Jôl* li njee ki lini?” Ba timbhe nye le: “Kaisa.”
17 Jon Yésu a bi kal bo le: “Timbhana ni Kaisa mam ma Kaisa,+ Nyambe ki mam ma Nyambe.”+ A hélés bo ngandak.
18 I mbus, Sadukai, i i nkal le bitugne bi ta bé,+ i lo, i bat nye le:+
19 “A Lét, Môsi a bi tilna bés le ibale mut a nwo ndi a yék bé man, manyañ a nlama bii yik yé, a bot mbôda inyu lôñ manyañ.+
20 Di bééna linyañ lisaambok hana. Nu bisu a bii nwaa, ndi a wo, a yék bé man.
21 Yak nu yônôs iba a bii i muda nu, ndi a wo, a yék bé man; nlélém jam u pémél nu yônôs aa.
22 Bo basaambok ba yék bé man. Sôk i nsôk, yak muda a wo.
23 I bitugne, a’ ba nwaa wen ikété yap? Inyule a bi ba nwaa wap bo basaambok.”
24 Yésu a kal bo le: “Ngo inyu hala nyen ni nyoba inyule ni nyi bé Bitilna, to ngui i Nyambe.+
25 Inyule i ngéda ba nlo i bitugne, bôlôm ba mbii bé, to bôda ba nke bé i mabii, ndi ba yé kiki biañgel i ngii.+
26 Ndi inyu bawoga ba ba ntuge, i ngéda Môsi a bé i homa man e biloo, baa ni bi añ bé ikété kaat Môsi i jam Nyambe a kal nye le: ‘Me yé Nyambe nu Abraham, Nyambe nu Isak ni Nyambe nu Yakôb’?+
27 A ta bé Nyambe nu bawoga, ndi nu bayômi. Ni yé i yoba yaga iloo hihéga.”+
28 Nyimbén wada a bi lo, a nok bo ba yé i pééna; kiki a nyi le Yésu a ntimbhe bo loñge, a bat nye le: “Imbe mbén i yé i bisu* ikété mambén momasôna?”+
29 Yésu a timbhe le: “I bisu i yé le: ‘A Israel, emble, Yéhôva* Nyambe wés a yé Yéhôva* wada,
30 u nlama ki gwés Yéhôva* Nyambe woñ ni ñem woñ wonsôna, ni niñ* yoñ yosôna, ni mahoñol moñ momasôna, yak ni ngui yoñ yosôna.’+
31 I nyônôs iba i yé le: ‘U nlama gwés mut woñ libôk kiki wemede.’+ Mbén ipe yo ki yo i nloo bé mambén mana.”
32 Nyimbén a kal nye le: “A Lét, u mpot loñge, inoñnaga ni maliga, ‘A yé Wada, numpe a ta bé, ndik nye’;+
33 ibale mut a ngwés nye ni ñem wé wonsôna, ni yi yé yosôna, ni ngui yé yosôna, a gwéhék ki mut wé libôk kiki nyemede, hala a yé nseñ iloo bisesema gwobisôna bi ntul i hié ni bini bisesema bipe.”+
34 Kiki Yésu a ntehe le a ntimbhe ni pék, a kal nye le: “U ta bé haa ni Ane Nyambe.” Ndi mut to wada a bi bana ha bé makénd i bat nye mbadga.+
35 Yésu a ke ni bisu i niiga i témpel, a kal le: “Inyuki bayimbén ba nkal le Kristô a yé man David?+
36 David nyemede a bi pot ni njel mbuu mpubi+ le: ‘Yéhôva* a bi kal Nwet wem le: “Yén i woo wem walôm letee me ha baoo boñ isi makôô moñ.”’+
37 Ibale David nyemede a nsébél nye le Nwet, lelaa ni a nla ba man wé?”+
Yak limut li bôt likeñi li bé emble nye ni maséé.
38 Ndi kiki a bé niiga, a kônde kal le: “Yoña yihe ni bayimbén ba ba ngwés ba nhiômna mimbôñgô mi mambot, ba gwéhék mayéga ma tôbôtôbô i bibôm,+
39 ba gwéhék ki biyééne bi bisu* i mandap ma bibégés ni biyééne bi bañga bôt i mangand.+
40 Ba nip nkus u biyik bi bôda,* ba boñok ki mimbôñgô mi masoohe inyu nene.* I bôt bana b’a kôhna kogse ikeñi.”*
41 I mbus, a yén, a tehge minkuu mi makébla,+ a bôdôl béñge lelaa limut li nleñ moni ikété minkuu mi makébla, yak ngandak mingwañ mi bôt i bé leñ ngandak batjañtjañ.+
42 Ha nyen hiyeyeba hi yik muda hi bi lo, hi leñ bon ba batjañtjañ iba ba ba bééna yaga bé bañga nseñ.*+
43 Jon a bi sébél banigil bé ipañ yé, a kal bo le: “Me nkal bé maliga le, i hiyeyeba hi yik muda hini, hi nha iloo ba bobasôna ba nleñ moni ikété minkuu mi makébla.+
44 Inyule bobasôna ba nyôñôl ikété ngandak yap nkus, ndi nye a nyôñôl ikété ndék a gwé,* a ti kii yosôna a ban-ga, gwom gwobisôna a ban-ga inyu niñ.”+
Ndoñi
^ Tole “homa ba ntjôl matam ma nkôô wai.”
^ Tole “ño u likas.”
^ Béñge Ndoñi bibuk.
^ Tole “ha nye moo.”
^ Tole “i téé sép.”
^ Béñge Ndoñi bibuk.
^ Tole “Tel.”
^ Tole “i nlôôha ba nseñ.”
^ Béñge Ndoñi bibuk.
^ Béñge Ndoñi bibuk.
^ Béñge Ndoñi bibuk.
^ Âme ni hop Pulasi. Béñge Ndoñi bibuk.
^ Béñge Ndoñi bibuk.
^ Tole “bi tôbôtôbô.”
^ Ni hop Grikia, “Ba nje mandap ma biyik bi bôda.”
^ Tole “inyu kaaba.”
^ Tole “i ñét ngandak.”
^ Ni hop Grikia, “lepta iba, hala wee kadrañ yada.” Béñge Ndoñi bibuk.
^ Tole “ikété liyep jé.”
