Béba Liwanda

Hégda le we mañge, u bi boma “liwanda” jada. A hôla we i nôgda le u nañ, u nhôlôl, i nen-ge yak le a nhôla we i bot mawanda mape. I ngéda u bééna nduña, u bé yi le u nla ke i nyeni inyu kôs ndék “hogbe.” I pam we le, ngandak mam i yé le u nla bé boñ ibale a ta bé ha.

Ndi kiki ngéda i bé tagbege, u yimbe le a gwé su umpe. Kiki hihéga, a ngwés bé le we ni nye ni bagla, hala a mboñ yak le ba mpémés we i ngim bahoma inyu yé. A bak ki le, to ibale a bi hôla we i nôgda le u nhôlôl, a bi lôôs we makon. I ngii mam momasôna, a bé nip yak moni nwoñ.

I ngéda u bi yi hala, u yéñ ke nye ngwéé ndi a bi adbe we, hiki kel, homa nyensôna. A kahal yak énél we. Nano u mbadba inyuki u bi boma nye.

Hala nyen ngandak baôt siga ba ntoñol lelaa siga i mboñ bo. Muda wada le Earline, a bi ôt siga 50 ma nwii, a ntoñol lelaa mam ma bé ha i ngéda i: “Siga i bé me nseñ iloo mut binam. I bé me liwanda jem, ngim mangéda yotama ndik yon me bééna kiki liwanda.” Ndi Earline a bi sôk nok le, i maliga, siga i yé béba liwanda, i mboñ yak nyemede béba. Ibale nyen a tilga i nkwel unu ki bebek a ntoñol le siga i yé kiki u ntip añ i bibôdle, ndi libak jé li bi héñha. I ngéda a bi yi le Djob a ngwés bé le di ôt siga, inyule i nhindis nyuu a bi ti bés, a tjôô yo.—2 Korintô 7:1.

Yak Frank a bi kit le a nwas siga inyu lémél Djob. Ndi yom kiki bo hilo hiada tole ndék iloo ha i mbus le a bi ôt siga yé i nsôk, a bi nyaa nyemede a nkwaye ’isi inyule a bé yéñ bikét bi siga a bi bôk a ôt. Frank a nkal le: “Me bi yôm. Baa men me bé kwaayege ni ndap, me tihbaga mahindi ndik inyule me bé yéñ bikét bi siga? Hala a bi ti me nyega, me kit le ibôdôl len siga to yada y’a jôp ha bé me i nyo.”

Inyuki i ta bé jam li ntomb i nwas siga? Bayimam ba bi léba ngandak manjom: (1) I gwom ba ngwélél inyu bañ siga bi nla yilha mut nkol, ndik kiki hibañga. (2) I ngéda mut a ñôt siga, kule yé yada le nikôtin i nla njôp nye i boña i mbus yom kiki bo tjaktjak isaambok. (3) I ôt siga i yé i yilna mut nseñ kiki bo je, nyo, kwel, hogbe, hala ni hala.

Ndi kiki Earline bo Frank ba di mbôk pôdôl, mut a nla nyodi isi minkôm mi siga. Ibale u ñôt siga, ndi ngôñ yoñ i bak le u téé, añ minkwel mini, mi nla hôla we u bôdôl niñ mondo, ngi siga.