1, 2. Hiki wada wés a nlama ba nkwoog nkaa ni limbe jam? (Béñge titii i bibôdle.)

KIKI di nkal i yigil i ntagbe, Nsohop a nkal le Yéhôva a kôli bé énél, ni le i yé loñge le bôt ba binam ba énél bomede. Baa maliga mon Satan a mpot? Di yoñ hihéga, ibale i bôt ba ntjél énél i Djob ba ban-ga niñ boga, baa ki ba yé le ba ba maséé? Baa we w’a lôôha ba maséé ibale u gwé kunde i boñ to kii i nlémél we, u ban-ga ki niñ boga?

² Mut to wada a nla bé timbhe mambadga ma inyu yoñ. Hiki mut nyen a nlama sélés boña wé mu jam li. Ngéda di mboñ hala, d’a léba le Djob toi nyen a kôli énél, le énél yé i yé ilam kiyaga, ni le di kôli nit yo ni ñem wés wonsôna. Bibel i nhôla bés i ba nkwoog nkaa inyu jam li. Kiki hihéga, béñge ki jam Bitilna bi nkal inyu unda le Yéhôva nyen a kôli énél.

3. Inyuki Yéhôva nyetama nyen a gwé kunde yosôna i énél?

³ Yéhôva nyen a kôli énél ngiinda yosôna inyule nyen a yé Nyambe nu ngui yosôna ni Nhek. (1 Miñañ 29:11; Minson mi baôma 4:24) I kaat Masoola 4:11, di  ntehe bôt nyoo ngii, ba yé 144 000, ba ba ga énél ni Kristô, ba yé kal ikété yiinda le: “We, a Nwet wés ni Nyambe wés, wen u kôli ni lipém ni bibégés, ni lipémba; inyule wen u hek gwom gwobisôna, inyu sômbôl yoñ ki nyen bi bane, bi héga ki.” Ntiik, kiki Yéhôva nyen a bi hek mam momasôna, nyetama nyen a gwé kunde yosôna i énél bôt ba binam, lôñni bihégél bi mbuu.

4. Inyuki i kolba énél i Yéhôva i yé i bep gwélél ngap yés i yoñ makidik més bésbomede?

⁴ Satan a mah hek bé jam i niñ yé. Jon a kôli bé bat le ba ti nye kunde i énél ngiinda yosôna. Ngéda nye ni babiina ba bisu ba bi kolba kunde i Yéhôva i énél, ba bi unda toi le ba yé ngôk. (Yérémia 10:23) I yé maliga le, kiki bihégél bi Djob bi gwé ngap i yoñ makidik map bomede, ba bé le ba pohol i kôm Djob mbus. Ndi baa hala a bé ti bo kunde i boñ hala? Heni. Bôt ba nlama tibil gwélél ngap yap i yoñ makidik bomede inyu mam map ma hiki kel. Ndi ba gwé bé kunde i kolba Nhek wap nu a nti bo niñ. Ibabé pééna, nu ni nu a nkolba Yéhôva a mbep toi gwélél ngap yé i yoñ makidik. Bés bôt ba binam, tel yés i yéne isi énél i Yéhôva.

5. Kii i nkwés bés nkaa le makidik ma Djob ma téé sép?

⁵ Yéhôva nyen a kôli ki énél ngiinda inyu njom ipe. A ñénél ni telepsép i yôni. Nyemede a nkal le: “Me yé Yéhôva nu a ñunda loñgeñem, ni sép, ni telepsép hana isi; inyule mam mana mon ma nkônha [me] maséé.” (Yérémia 9:24) A mbéñge bé bikaat bi mambén bi bikwéha bi bôt inyu kal kii i yé loñge ni sép. Nyemede nyen a yé telepsép, ndi a pémhak mambén inyu bôt ba binam. Kiki “telepsép ni mbagi sép ba yé hikuu hi yééne [yé] ane,” jon di nla bana bôdôl le mambén mé, matiñ mé ni makidik mé ma téé sép. (Tjémbi 89:15; 119:128) Ndi to hala, kiki Satan a nkal le énél i Yéhôva i téé bé sép, nyemede Satan a yé ngi pam i hek nkoñ isi het telepsép i yé.

6. Imbe njom Yéhôva a gwé i énél nkoñ isi?

⁶ Jam lipe li li mboñ le Yéhôva nyen a kôli énél, li yé le a gwé yi ni pék i i mbéda inyu tibil tééda ngiinda yosôna. Kii héga hoñol ki ngui Yéhôva a bi ti Man wé inyu mélés makon ma bé bum bidokta. (Matéô 4:23, 24; Markô 5:25-29) Ndi inyu Yéhôva, i mam ma, ma bé bé hélha. Kiki a nyi lelaa nyuu i yé nhegek, a gwé ngap i tibil yo ngéda i nkile bé. Inyu hala nyen a nla yak tugul bawoga ni mélés bikuu bikeñi.

7. Lelaa pék i Yéhôva i nlôôha lel pék i bet ba yé isi énél i Satan?

⁷ Nkoñ isi u Satan u ngi yéñék manjel inyu mélés mindañ ipôla matén ni biloñ. Ndi Yéhôva nyetama nyen a gwé pék i lona nsañ ikété nkoñ isi. (Yésaya 2:3, 4; 54:13) Ngéda di ntehe lelaa yi ni pék i Yéhôva bi yé bikeñi di gwé minlélém mi mahoñol kiki ñôma Paul, nu Yéhôva a tinde i tila le:“Yoo, ndip ki la lingwañ li Nyambe li yé, ni pék yé, yak ni yi yé! Matibil a ntip mam mé ma mbuma ñañ kiyaga! To manjel mé ma nyiba bé njañ!”​—Rôma 11:33.

8. Kii i nlémél we ngéda u ntehe lelaa Yéhôva a ñane?

⁸ Bibel i nkal bé ndik bés le Yéhôva  nyen a kôli énél. Ndi i nkal yak bés inyuki énél i Yéhôva i nloo biénél bipe. Njom yada i yé le Yéhôva a ñane ni gwéha. I pot maliga, hala a nkônha bés maséé i tehe lelaa Yéhôva a ñénél ngiinda. A yé “Nyambe nu konangoo, ni nu karis, nu a mpala bé unup, ndi a nyaba ni loñgeñem ni maliga.” (Manyodi 34:6) Djob a nti bagwélél bé lipém ni ét nyuu. A ntôñ bés iloo yak bésbomede. Mahéñha ni jam Nsohop a nkal, Yéhôva a nim bé bagwélél bé ba maliga jam lilam jo ki jo. Ngo a bi ti yak Man wé nu gwéha inyu yible bés njel i bana niñ boga!​—Añ Tjémbi 84:12; Rôma 8:32.

9. Kii i nyis bés le Djob a ntôñ hiki mut?

⁹ Yéhôva a ntôñ bé ndigi ntôñ u bagwélél bé. A ñunda yak le a ntôñ hiki mut. Kiki hihéga, inyu mbôgôl nwii aa, Yéhôva a bi téé bakéés, a tinak bo ngui i tohol litén li Israel i bisu bi baoo bap. Ndi to mu mangéda ma yubda ma, a bi yimbe loñ ipe wada le Ruth. A bi boñ sesema ikeñi inyu jôp i base i maliga. Yéhôva a bi sayap Ruth, a ti nye nlôm, ni man munlôm. Ndi bisai bipe bi ngi bemek Ruth. Ngéda a ga lo bitugne, Ruth a’ yi le man wé a bi ba sôgôlsôgôl nu Mésia. Hégda maséé a ga bana i yi le ñañ wé u yé ntilga ikété kaat i Bibel yada i i gwé jôl jé!​—Ruth 4:13; Matéô 1:5, 16.

10. Inyuki énél i Yéhôva i nlôôha bé ba nledek?

¹⁰ Énél i Yéhôva i ta bé énél i mbanda, i mbémbe bé to bôt. Énél yé i nti bés kunde, i boñok ki le di ba maséé. (2 Korintô 3:17) David a bi pot jam li lana le: “Lipém ni bai i lipém ba yé bisu gwé [Djob]; ngui ni maséé ba yé i homa wé.” (1 Miñañ 16:7, 27) Nlélém jam won ntôptjémbi le Etan a tila le: “Bôt ba nyi liyôgbe li maséé ba yé bokimasoda, ba nhiumul ikété mapubi ma su woñ, a Yéhôva. Ba nséé nkôm kel i jôl joñ; ba mbédhana ki ikété telepsép yoñ.”​—Tjémbi 89:16, 17.

11. Lelaa di nla kônde ba nkwoog nkaa le énél i Yéhôva yon i yé lam kiyaga?

¹¹ Ibale di nsoñda bisai énél i Yéhôva i nlona, hala a ga kônde kwés bés nkaa le énél yé i yé ilam kiyaga. D’a pam i kal kiki ntôptjémbi le: “Inyule hilo hiada ikété bikotoo gwoñ hi nloo hikôô hi dilo homa numpe!” (Tjémbi 84:11) Énél i Yéhôva i yé toi ilam. Kiki Yéhôva nyen a yé Nhek wés, a nyi i mam ma mbéda toi bés inyu ba maséé, a ti ki bés mo ngandak. I mam momasôna a mbat le di mboñ ma yé inyu loñge yés, ma nsôk ndigi ma lona bés maséé. Hala a yé maliga to ibale i mbéda le di boñ bisesema.​—Añ Yésaya 48:17.

12. Njom bisu i ntinde bés i nit énél i Yéhôva i yé le kii?

¹² Bibel i nkal le mbus énél i hikôô hi nwii i Kristô, ngim bôt i ga pohol i kolba énél i Yéhôva. (Masoola 20:7, 8) Ndi kii i nla tinde bo i boñ nya jam i? Kiki ba ntémb ba pémés Nsohop i mok, a ga noode ki yumus bôt ba binam; ibabé nkaa, a’ gwélél ngôñ minsôn inyu lop i bôt ba kiki lem. Bebeg a ga noode kwés bôt nkaa le, njel ipe i yé inyu niñ mba ni mba, ibabé i nôgôl Yéhôva. Ndi hala a’ ba ndigi bitembee bipe. Baa ni nla yén nwee ngéda ni nok nya tembee ini? Ibale di ngwés Yéhôva, di gwéélak ki nye inyu loñge yé ñem ni inyule nyen  a kôli énél ngiinda yosôna, ki nya jam i, i ga lémél bé bés. Di yé mbén i bana ngôñ ni niñ ipe, handugi niñ isi énél i telepsép ni i gwéha i Yéhôva.

13. Inyuki i kôna Djob i nkobla le di nit énél yé?

¹³ Ibabé nkaa, énél i Yéhôva i kôli le di nit yo ni ñem wés wonsôna. Kiki di ntehe, Yéhôva nyen a kôli énél, énél yé i yé ki lam kiyaga. Di nla nit énél i Yéhôva ngéda di ntéñbe i gwélél nye, di téédaga ki libak jés li maliga. Kii ipe di nla boñ inyu unda le di nit énél i? Di nla boñ hala ngéda di mboñ mam ma Yéhôva a ngwés. Ngéda di mboñ mam kiki Yéhôva a ngwés, di ñunda le di ngwés nye ni le di nit énél yé.​—Añ Efésô 5:1, 2.

14. Lelaa basañ mbai ni mimañ ba nlama kôna Yéhôva?

¹⁴ Yigil yés Bibel i niiga bés le Yéhôva a ñénél ni gwéha. Inyu noñ ndémbél yé, basañ mbai ni mimañ, ba ba ngwés énél i Djob, ba nlama bé nyégsa bôt i boñ mam wengoñle ba gwé yap énél. Ndi, ba nlama kôna Yéhôva. Paul a bé kôna Yéhôva ni Man wé Yésu. (1 Korintô 11:1) Paul a bé wéha bé bôt nyuu, to nyégsa bo i boñ ngim jam. Ndi a bé tihba miñem nwap. (Rôma 12:1; Efésô 4:1; Filémôn 8-10) Hala nyen Yéhôva a mboñ mam. Hala ki nyen yak ba bobasôna ba ngwés nye, ba nidik ki énél yé ba nlama boñ mam.

15. Inyuki li noñ oda ikété ntôñ li ñunda le di ngwés énél i Yéhôva?

¹⁵ Lelaa di nla unda le di ndiihe énél i telepsép i Djob? Ngéda di nsal lôñ ikété lipém, di ñunda le di nit énél i Yéhôva. To di nok bé, tole di neebe bé ngim makidik, di nlama ndik bana ngôñ i noñ oda i yé ikété ntôñ. Hala a yé maselna ngandak ni  maboñok ma nkoñ isi, ndi hala nyen mam ma mbôña isi énél i Yéhôva. (Efésô 5:22, 23; 6:1-3; Lôk Héber 13:17) Di gwé ki nseñ i boñ hala inyule loñge yés yon Yéhôva a nyéñ.

16. Lelaa di nla unda le di nit énél i Djob ngéda di nyoñ makidik?

¹⁶ Di nla ki unda le di nit énél i Djob ni njel makidik més. Yéhôva a gwé bé lem i ti bés mbén inyu hiki jam. Ndi, a nkal bés sômbôl yé inyu éga bés ngéda di nyoñ makidik. Kii hihéga, a ntoñol bé hiki isii jam li mbéñge mambot, ma bikristen bi nlama haba. Ndi a nyeelene bés le, sômbôl yé i yé le, mambot més ni bieñg gwés bi unda libak jés li bikristen. (1 Timôtéô 2:9, 10) A nsômbôl bé le di yilna bôt bape ngok baagene tole makidik més ma tééñga bo. (1 Korintô 10:31-33) Ibale di mboñ bé mam kiki ñem u nkal bés, ndi inoñnaga ni sômbôl i Yéhôva ndugi, di ñunda le di ngwés nye ni le di nit énél yé.

17, 18. Ni mambe manjel babiina ba nla unda le ba nit kahap i Yéhôva?

¹⁷ Béñge ntjep wada het babiina ba ba yé bikristen ba nla unda le ba nit manjel ma Yéhôva, ni hala ba nidik yak kunde yé i énél. Kii hihéga, kii w’a boñ ibale mindañ mi yé ikété libii joñ? Tole i nene we le u yé i béba libii. Bebeg y’a béda we le u yoñ ngéda i soñda maada Yéhôva a bééna ni litén li Israel. Djob a bi kal le a yé nlôm inyu litén li Israel. (Yésaya 54:5; 62:4) Ndi kinje béba “libii” inyu Yéhôva! Ndi to hala, a bi pala bé bos. Ngandak ngélé, a bi kônôl lôk Israel ngoo, a téñbe ki i yônôs malômbla mé ni bo. (Añ Tjémbi 106:43-45.) Baa nya ndéñbe i gwés i, i ntinde bé bés i kôôge Yéhôva bebee?

¹⁸ Nlélém jam won babiina ba ba ngwés manjel ma Yéhôva ba nlama kôna. Ba nyéñ bé manjel ma nkiha bé ni Bibel inyu so béba libii. Ba nyi le Yéhôva nyen a bi at bo, ni le a nsômbôl le ba “adbe” wada ni nuu. Mpom njom Bitilna bi nti inyu bos ni i témb biiba i yé ndéñg. (Matéô 19:5, 6, 9) Ibale babiina ba mbok mis ngii mam malam ma libii jap, ba noodege ki lémés jo, ba ga unda le ba nit énél i telepsép i Yéhôva.

19. Ibale di nhôs, kii di nlama boñ inyu nit sômbôl i Yéhôva?

¹⁹ Kii di yé bikwéha bi bôt, di nhañ bé boñ mam ma mbébél Yéhôva. A nyi hala, jon a bi yoñ bitelbene inyu yés ni njel binoñ bi Kristô. Inyu hala nyen ngéda di nhôs, di nlama bat Yéhôva nwéhél. (1 Yôhanes 2:1, 2) Ilole di nwas le kiññem i kahal kéés bés, di nlama boñ biliya i ôt biniigana mu mahôha més. Ibale di nyén bebee ni Yéhôva, a ga nwéhél bés, a hôla ki bés i mbôôp, ni i yoñ makidik malam ibale nlélém jam u mpémél bés dilo di nlo.​—Tjémbi 103:3.

20. Inyuki di nlama unda le di nit énél i Yéhôva len?

²⁰ I mbok yondo bôt bobasôna ba ga nit kahap i Yéhôva i ngii bihégél gwé, ba nigil ki manjel mé ma ma téé sép. (Yésaya 11:9) Ndi i suklu i, bés di mbôdôl yo nano. Yéhôva a yé unda le nyen a kôli énél. Ngéda ini le di nit énél i Djob lôñni libak jés li maliga, ni nson wés, ni biliya gwés i kôna nye ikété mam momasôna di mboñ.