MBÔGI YÉHÔVA yada i Kanada le Don, i mboñ biliya bi ngui inyu tééne bôt ba niñ i mbaa nloñ likalô. Inyu pôdôl wada mu bôt ba, Don a ntoñol le: “Pétrô a bé mut wada nu a bé lal i mbédgé, a bak mut mahindi me mah tehe bé i niñ yem. A bé mut nyega, kayéle bôt ba bé ke nye ngwéé. Ngandak ngélé a bi tjél mahôla ma bôt.” To hala, ikété iloo 14 nwii, Don a bi sal ibabé waa inyu hôla mut nu a bé niñik i mbaa nloñ.

Kel yada, Pétrô a bi bat Don le: “Inyuki u nlep ngéda inyu yem? Hiki mut a nke me ngwéé. Inyuki we u ntôñ me? Ibabé babal nye, Don a bi gwélél minlôñ mi Bibel maa inyu tihba ñem u Pétrô. A bi bôk a bat Pétrô ibale a nyi le Djob a gwé jé jôl, a bat ki nye le a añ jam Bibel i nkal i kaat Tjémbi 83:19. I mbus, inyu unda nye inyuki a bé tôñ nye, Don a bi éñél Pétrô kaat Rôma 10:13, 14, i i nkal le: “Tonjee a’ lôndôl [jôl li] Nwet a’ tohlana.” Sôk bi sôk, Don a bi añ Matéô 9:36, mbus a bat ki Pétrô le a añ nlôñ u nyemede. Nlôñ u u nkal le: “Ndi ngéda a tehe mamut, ma kônha nye [Yésu] ngoo, inyule ma ba bahelga ni nwambaga, kikii mintômba mi ngi ntééda.” A nok bañ hala, Pétrô a bat ni gwiiha i mis le: “Baa me yé wada munu mintômba mini?”

Pétrô a bi bôdôl héñha. A nogop, a homb mayéé mé, a haba biloñge bi mambot Don a bé ti nye. Pétrô a bi kônde ke ni bisu i tééda mapubi mé.

Pétrô a bééna man kaat het a bé tilna mam momasôna. Mam a bé tila ngéda bisu, ma bé ndik mabe ni mabe, ndi masañ ma bi noñ minkwel nwé ni Don, mam a bé tila ma bé mahéñha. A ntila homa wada le: “Me nigil jôl li Djob len. Nano ngéda me nsoohe, me nla soohe Yéhôva. Kinje loñge jam i yi jôl jé. Don nye Yéhôva a nla ba liwanda jem, mut nu  a nyoñ ngéda i emble me, to imbe ngéda, to kii me gwé i kal nye.”

Bipôdôl bi nsôk bi Pétrô bi mbéñge lôknyañ. A tila le:

“Me nok bé loñge len. Biuni bi ntééñga me. Ndi to ibale hilo hiem hi nsôk hini, me nyi le m’a témb me tehe liwanda jem [Don] i Paradis. Ngéda ni ga añ bibañga bini, m’a ba ha bé. Ndi ibale ni ntehe mut i majôna mem nu a mpôna bé bôt ba libôga jés, ni kwel ni nye, soho ni yiga añ man kaat nunu [a bé pôdôl i kaat i bi hôla nye i nigil Bibel le “La vérité qui conduit à la vie éternelle,” i a bi kôs ndék nwii bisu bi ngéda]. * Kaat i i ñunda le, m’a témb me tehe liwanda jem i Paradis. Me nhémle hala ni ñem wem wonsôna. Manyuñ nan nu gwéha le Pétrô.”

I mbus majôna mé, manyañ Pétrô nu muda le Ummi a ntoñol le: “Nano a yé bebee le nwii ima le Pétrô a bi sébél me. Inyu ngélé bisu ikété ngandak nwii, a bé nene maséé. Yak nol, a bé nol.” A kal Don le: “M’a añ kaat i inyule yom yo ki yo i yé le i tihba mankéé i nlama ba yom i tôbôtôbô.” Ummi a bi neebe ki nigil kaat ini le Qu’enseigne réellement la Bible? ni Mbôgi Yéhôva yada.

Yak bés di nla tehe iloo jam li li nene mis, di nla ki unda bañga gwéha, ni hônba mintén mi bôt nwominsôna. (1 Timôtéô 2:3, 4) Mu kii di mba di mboñ hala, di nla tihba miñem mi bôt kiki Pétrô, ba ba nkiha bôt ngwéé inyu nene yap, ki le ba gwé loñge ñem. Di nla ba nkwoog nkaa le Djob, nu a “mbéñge ñem,” a ga boñ le maliga ma hol miñem mi bôt ba téé sép.​—1 Samuel 16:7; Yôhanes 6:44.