YOMARA ni bilôk binyañ le Marcelo bo Hiver ba nyééne i man mbai wada i Guatemala. Yomara a bi bôdôl nigil Bibel ni Mbôgi Yéhôva, i mbus ngéda yak bilôk binyañ bi bôdôl nigil Bibel. Ndi ngim jam i bé tééñga. Linyañ li jo liaa li bé ndim, ba bé yi bé to añ matila ma bôt ba ndim (braille). Inyu hala nyen i mankéé nu a bé niiga bo Bibel a bé a añ maben ni minlôñ mi Bibel mi mi yé mu i yigil.

Yak i ke i makoda i bé bo jam li nlet. Botama ba bé bé le ba ke liké li 40 ma manut inyu pam i ndap Ane i i yé bo bebee. Ndi bilôk bikéé bi likoda bi bé hôla bo i ke makoda momasôna. I ngéda linyañ li, li bi bôdôl tégbaha minkwel mi likoda li ñem sonde, bilôk bikéé bi bé bi hôla bo i kôôba minkwel nwap kayéle ba tééda nwo i boña.

I sôñ Mpuye nwii 2019, makoda ma bi bôdôl tagbe nyoo i libôga jap. I mbus, babiina ba ba yé basañal ba ngéda yosôna, ba bi ke i yééne nyoo. Njômbi yap i bé le ba niiga linyañ li jo liaa i añ ni i tila braille. Tolakii babiina ba, ba bé yi bé añ to tila braille, ba bé gwés hôla linyañ lini jo liaa lelaa ba nla pam i boñ hala. Inyu hala nyen ba bi ke i litéédana li bikaat, ba kôhna bikaat bi bi gwé makeñge ma ba nla gwélél inyu niiga bôt bape braille.

I mbus ndék sôñ ndigi, linyañ li jo liaa li bi kahal añ braille loñge loñge; hala a bi kônde lédés maada map ni Yéhôva. a I len ini, Yomara, Marcelo, ni Hiver ba yé basañal ba ngéda yosôna. Marcelo a yé nhôla nson. Ba pégi ni nson u Yéhôva hiki sonde. Makénd ba gwé i gwélél Yéhôva, ma bi tinde i bôt ba yé bo ipañ i bana minlélém mi makénd.

Linyañ jo liaa li nti mayéga inyu gwéha likoda li ñunda bo. Yomara a nkal le: “Ibôdôl i kel bisu di bi boma Mbôgi Yéhôva, ba bi unda bés bañga gwéha i bikristen.” Marcelo a nkônde le: “Di gwé bañga mawanda i likoda jés, di yé ki ikété lihaa li bilôk bikéé bi nkoñ ’isi wonsôna bi bi édi ikété gwéha.” Yomara ni bilôk binyañ ba gwé botñem le ba ga tehe lelaa Yéhôva a ga yilha hisi paradis.​—Tjémbi 37:10, 11; Yésaya 35:5.