1. Inyuki Yéhôva a kôli yaga kal le nyen a yé nwet gwom gwobisôna? (Béñge titii i bibôdle.)

GWOM gwobisôna bi nlôl ni Yéhôva! A yé Nwet “ngii, ni ngii i ngii, ni hisi . . . ni gwom gwobisôna bi yé mu.” (Ndiimba Mbén 10:14; Masoola 4:11) Jon, kiki Yéhôva nyen a bi hek bôt ba binam, bés bobasôna di yé bé. (Tjémbi 100:3) Ndi ibôdôl nu bôt ba binam ba niñ, Djob a bi pohol ngim bôt inyu ba bôt bé i nya i tôbôtôbô.

2. Ikété Bibel bonjee Yéhôva a pohol inyu ba bôt bé i nya i tôbôtôbô?

² Kiki hihéga, kaat Tjémbi 135 i mpôdôl bagwélél ba Yéhôva ba ba bé ba tiñi ni nye i nlômbi Israel, “kiki yom yé nyemede.” (Tjémbi 135:4) Yak kaat Hôséa i bi bôk legel le bôt bahogi ba matén, ba ba bé bé bon ba Israel, ba bé lama yila bagwélél ba Yéhôva. (Hôséa 2:23) Mbañ Hôséa i bi yon ngéda Yéhôva a bi neebe le i bôt ba bé bé bon ba Lôk Yuda, ba jôp nsoñgi u bôt ba gwé botñem i énél ntôñ ni Kristô. (Minson mi baôma 10:45; Rôma 9:23-26) “Loñ i pubhaga” ini, i yé “lôk Nyambe nyemede” i nya i tôbôtôbô, ni ini njel le bôt ba, ba nkôs mbuu mpubi, ba pohlana ki inyu ke niñ i ngii. (1 Pétrô 2:9, 10) Ndi kii di nla kal inyu lini libim li bikristen li li tiñi ni Djob, li ban-ga  botñem i niñ hana isi? Yéhôva a nsébél yak bo le “bôt bem” ni “mintebek nwem mi bôt.”​—Yésaya 65:22.

3. (a) Bonjee ba gwé maada ma tôbôtôbô ni Yéhôva i len ini? (b) Kii di ga wan munu yigil ini?

³ I len ini, “bémba titigi” i i gwé botñem i niñ ngii, lôñni “mintômba mimpe” mi mi gwé botñem i niñ hana isi, ba yé “bémba yada” i Yéhôva a bi yoñ kiki litén jé. (Lukas 12:32; Yôhanes 10:16) Di gwé toi ngôñ i ti Yéhôva mayéga inyu nsima a nti bés i bana maada ma tôbôtôbô ni nye. Yigil ini i ga wan ngandak manjel di nla gwélél, inyu ti Yéhôva mayéga inyu nsima tôbôtôbô a bi ti bés.

4. (a) Lelaa di nla ti Yéhôva mayéga kiki a bi ti bés pôla i bana maada ni nye? (b) Lelaa Yésu a bi boñ nlélém?

⁴ Di nti Yéhôva mayéga ngéda di nti bésbomede nkikip i boñ sômbôl yé. Ni njel sôble, di ñunda i mbamba le di neebe le di yé bôt ba Yéhôva, ni le di yé bebee i suhus bésbomede i si yé. (Lôk Héber 12:9) Yésu a boñ nlélém jam ngéda a sôblana, i bé wengoñle a bé kal Yéhôva le: “A Nyambe wem, me nkon maséé i boñ sômbôl yoñ.” (Tjémbi 40:8, 9) Yésu nyemede a bi neebe boñ sômbôl i Yéhôva, to hala kii a bi gwééne litén li li bé li ma ti jomede nkikip yak Djob.

5, 6. (a) Kii Yéhôva a bi nôgda ngéda Yésu a bi sôblana? (b) Ti hihéga hi hi ñéba inyuki Yéhôva a yé maséé ngéda di nti bésbomede nkikip, tolakii gwom gwobisôna bi yé gwé.

⁵ Kii Yéhôva a bi nôgda ngéda Yésu a bi sôblana? Bibel i ñañal le: “Yésu a sôblana bañ, a nyodi lép bitéé bilôñi; ndi nun-ki! Ngii i yibla, a tehe mbuu Nyambe u nsôs kiki hibeñ, u bedep ngii yé; ndi nun-ki! Kiñ i lôl ngii, i kal le: ‘Man wem nu gwéha nunu, a nlémél me.’” (Matéô 3:16, 17) Tolakii Yésu a bé a ma bôdôl unda le a yé nu Isañ Nungingii, Yéhôva a bé maséé i tehe Man wé a mboñ ndik sômbôl Yé ni ñem wé wonsôna. Nlélém, Yéhôva a yé maséé ni bés ngéda di nti bésbomede nkikip, a ga kôp ki bés bisai.​—Tjémbi 149:4.

⁶ Di yoñ hihéga hi mut a mbel mbônji ilam i wom wé. Kel yada, ngond yé i ket mbônji yada mu, a ti nye yo kiki likébla. Baa yak mbônji a nket, i ta bé mbônji i isañ? Lelaa a yé le a ti ki isañ yom i yé yé? I nya mambadga i, i ga tagbe bé to ndék i mahoñol ma ngim mut a ngwés man wé. Maselna ni hala, a’ ba maséé i neebe likébla li kiki yimbne i gwéha i ngond yé. A’ diihe ki mbônji ngond yé i nti nye iloo mbônji yosôna i yé mu wom. Yak Yéhôva a yé a ba maséé ngéda di nti bésbomede nkikip inyu bégés ndik nyetama.​—Manyodi 34:14.

7. Lelaa kaat Malaki i nhôla bés i nok kii Yéhôva a nôgda inyu bôt ba nti bomede nkikip inyu boñ sômbôl yé ?

⁷ Añ Malaki 3:16. Ibale u ntinak bé wemede nkikip to kôs sôble, yoñ ngéda i soñda kii makidik ma ma nkobla. I yé maliga le, ibôdôl nu u bi gwéé, u yé nu Yéhôva. Ndi, hoñol lelaa Yéhôva a nla ba maséé ngéda u neebe kahap yé, ni ngéda u nti wemede nkikip inyu boñ nsômbôl yé. (Bingéngén 23:15) Yéhôva a nyi bôt ba ngwélél nye ni ñem wap wonsôna, a ntila yak môl map i “kaat mbigda” yé.

8, 9. Kii Yéhôva a mbat i bet môl ma yé ntilga i “kaat mbigda” le ba boñ?

⁸ Ibale di ngwés le Yéhôva a tila jôl  jés i “kaat mbigda” yé, di nlama boñ ngim jam. Inyu hala nyen Malaki a kal le di nlama ‘kon Yéhôva woñi, di hoñlak [soñdaga] ki jôl jé.’ Ngéda di nti mut numpe tole yom ipe bibégés, hala a nla boñ le jôl jés li nyoi i kaat niñ i Yéhôva.​—Manyodi 32:33; Tjémbi 69:29.

⁹ Hala a kôli ndik bé le di bôn Yéhôva i mbamba le di ga boñ sômbôl yé, ni le di sôblana. I ti bésbomede nkikip ni kôs sôble, bi nyoñ ndik bés hilo hiada, ndi i bégés Yéhôva i yé jam li niñ yés yosôna. Hiki kel, ntel ngéda wonsôna di yé niñ, di nlama yoñ bitelbene bi ngui i ba i pes Yéhôva, ni njel i nyen di ñunda le di nôgôl nye.​—1 Pétrô 4:1, 2.

10. Mambe maselna ma yé ipôla bôt ba ngwélél Yéhôva ni ba ba ngwélél bé nye?

¹⁰ I yigil i ntip ntagbe, di bi tehe miñañ mi Kain, Salômô, ni bon ba Israel. Bobasôna ba bé kadba le ba mbégés Yéhôva, ndi ba bi téñbe bé i gwélél nye. Dihéga ti, di ñunda le i bet ba yé ba Yéhôva ba nlama yoñ bitelbene i adbe ni telepsép, ba ke ki haa ni béba. (Rôma 12:9) Mbus Malaki a bi pôdôl inyu “kaat mbigda,” Yéhôva a unda le “mbagla i yé ipôla bôt ba téé sép ni bôt ba biyabda, ni ipôla mut a ngwélél Nyambe ni nu a ngwélél bé nye.”​—Malaki 3:18.

11. Inyuki hala a nlama toi nene i mis ma bôt bape le di mbégés ndik Yéhôva nyetama?

¹¹ Di tehe ki njel ipe di nla gwélél inyu unda le di nti Yéhôva mayéga mu kii a pohol bés kiki bôt bé: Mahol més i pes mbuu ma nlama “nene bisu bi bôt bobasôna.” (1 Timôtéô 4:15; Matéô 5:16) Badba le: ‘Baa bôt bobasôna ba ntehe toi le me tiñi ni Yéhôva? Baa me nyéñ manjel i yis bôt le me yé Mbôgi Yéhôva?’ Yéhôva a yé le a unup ibale a mpohol bés kiki bôt bé, ndi mbus di kahal nok ison i yis bape le di yé bôt bé.​—Tjémbi 119:46; añ Markô 8:38.

12, 13. Lelaa lôk kéé ihogi i nsôô libak jap li Mbôgi Yéhôva?

¹² Ngoo le, bilôk bikéé bihogi bi bi  bôdôl hép “mbuu nkoñ isi” kayéle ngéda bi yé lôñ ni bôt ba nkoñ isi, njel i ta ha bé i boñ maselna “ipôla mut a ngwélél Nyambe ni nu a ngwélél bé nye.” (1 Korintô 2:12) Mbuu u, u ntôdôl ngôñ “minheña mi minsôn.” (Efésô 2:3) Kiki hihéga, to hala kii di nkôs ngandak maéba mu jam li, bilôk bikéé bihogi bi ngi kenek ni bisu i gwés mahabga, libagak tole lieñg ño, bi bi kôli bé inyu bikristen. Ba nhaba mambot ma ma nit bo, ma ma ñunda môñga map ma nyuu, ba lon-ga yak i nya mambot i makoda. Tole ba mpohol i eñg miño, tole i bak tjôñ kiki bôt ba njék inyu nene. (1 Timôtéô 2:9, 10) Sôk i nsôk, ngéda ba yé ikété limut li bôt, i nla ba nledek i yi njee a yé toi Mbôgi Yéhôva tole njee a yé toi “liwanda ni nkoñ ‘isi.”​—Yakôbô 4:4.

¹³ Mbôgi Yéhôva ihogi i yé ngi tibil bagla ni maboñok ma nkoñ isi ikété manjel mape. Masak map ni maboñok map i mangand, ma ta bé mahéñha ni ma nkoñ isi. Bifôtô gwap ba ñep i internet ni yom ba ntila mu, bi kôli bé ni bañga bikristen. Bebek, mintén mi bôt mi, mi mboñok bé béba keñi inyu kôhna bikodlene ikété likoda, ndi mi nla ba bilôñ bibe inyu bilôk bikéé bipe bi bi njo sañ i bana bihiumul bilam ipôla bagwélél ba Yéhôva.​—Añ 1 Pétrô 2:11, 12.

14. Limbe jam li mahee di nlama boñ inyu sôñ liwanda jés ni Yéhôva?

¹⁴ Nkoñ isi u nlôôha hôñôs “minheña mi minsôn, ni minheña mi mis, ni humbulnyuu i nom ini.” (1 Yôhanes 2:16) Ndi, kiki di yé bôt ba Yéhôva, di nlama “nwas liyan Nyambe, di noñ ha bañ minheña mi nkoñ ‘isi, ndi di hôt manyuu més, di boñok mam ma téé sép, di singge ki Nyambe miñem i hiai hini hanano.” (Titô 2:12) Jon, bipôdôl gwés, bilem di gwé i mam ma je ni nyôba, haba wés, bieñg gwés, tole bôlô yés​—hala wee mam momasôna di mboñ​—ma nlama unda bôt ba mbégés bés le di mbégés ndik Yéhôva nyetama.​—Añ 1 Korintô 10:31, 32.

15. Inyuki di nlama gwés lôk kéé yés ni unda bo loñgeñem?

¹⁵ Maada di gwé ni lôk kéé yés ma ñunda ibale di ndiihe liwanda jés ni Yéhôva. Yak bo ba yé bôt ba Yéhôva. Ibale di nhôya bé hala, di ga ke ni bisu i gwés lôk kéé yés, di undga ki bo loñgeñem. (1 Tésalônika 5:15) Yésu a kal banigil bé le: “Hala nyen bôt bobasôna b’a yi le ni yé banigil bem​—ibale ni ngwéhna.”​—Yôhanes 13:35.

16. Himbe hihéga hi Mbén Môsi hi ñunda yom Yéhôva a nôgda inyu bagwélél bé?

¹⁶ Inyu tibil nok lelaa di nla gwés lôk kéé yés, di yoñ hihéga. Bisélél bi bi bé témpel i Yéhôva bi bé nlômblak, tole mbaglak, hala wee bi bé gwéélana ndigi inyu nson mpubi. Mbén Môsi i bé tibil toñol lelaa Lôk Lévi i bé lama bôñgôl bisélél bi, nu ni nu a bé noñ bé mabéhna ma, a bé lama nôla. (Ñañga bôt 1:50, 51) Ibale Yéhôva a bé bebee i sôñ bisélél ba bé gwélél inyu bégés nye, bôô ni ngélé yañen a’ sôñ bagwélél bé ba ba bi ti bomede nkikip i gwélél nye, ni ba a bi pohol kiki bôt bé! Mu kii a bé pôdôs litén jé, Yéhôva a kal le: “Ngo mut a ntihba bé, wee a ntihba ndigi hitéé hi jis [jem].”​—Sakaria 2:8.

17. Yéhôva ‘a nsédi ôô’ inyu emble kii?

¹⁷ Mu kii bôt ba litén li Djob ba bé kwel ntôñ, Malaki a kal le Yéhôva ‘a sédi ôô, a emblege bo.’ (Malaki 3:16) Yéhôva a nyi toi “ba ba yé bé.” (2 Timôtéô 2:19) A nyi hiki jam di mboñ ni li di mpot. (Lôk Héber 4:13) Ngéda di ñunda bé lôk kéé yés loñgeñem, Yéhôva ‘a nsédi ôô, a emblege bés.’ Ngéda di nyi leege bakén, di kabak, di nwéhlak, di bak liyômba, di nla ba nkwoog nkaa le Yéhôva a nyimbe jam li loñge loñge.​—Lôk Héber 13:16; 1 Pétrô 4:8, 9.

18. Lelaa di nla ti Yéhôva mayéga inyu lipém a bi ti bés i ba bôt bé?

¹⁸ Di gwé ngôñ i ti Yéhôva mayéga inyu lipém a ti bés i ba bôt bé. Di nyi le, i ti bésbomede nkikip yak Yéhôva i yé njel i nlôôha ilam di mpohol. To hala kii di niñil “ngembe hiai hi kôdi ni hi nkagda,” di nlama unda bôt le di ‘gwé bé nsohi, to pii ñem, . . . homa di mbai kiki tjôdôt hana nkoñ isi.’ (Filipi 2:15) Jon, di yoñ makidik ma ngui i ke haa ni béba. (Yakôbô 4:7) Di gwés yak bilôk bikéé gwés, di diihege bo, inyule yak bo ba yé bôt ba Yéhôva.​—Rôma 12:10.

19. Lelaa Yéhôva a mbom bôt ba yé bé?

¹⁹ Bibel i nti bés mbônga le: “Yéhôva a’ lep bé bôt bé.” (Tjémbi 94:14) Mbônga u, u ga set bé, to di mboma imbe ndutu. To nyemb i nla bé bagal bés ni gwéha Yéhôva a gwééne bés. (Rôma 8:38, 39) “Inyule ibale di niñ, wee di niñil ndigi inyu [Yéhôva]; to di nwo yaa, wee di nwél ndigi inyu [Yéhôva]. Jon to di niñ, to di nwo, wee di yé ndigi ba [Yéhôva].” (Rôma 14:8) Di nyamnda ni ngôñ i tehe lelaa Yéhôva a’ lona mawanda mé momasôna ma ma bi wo, i bitugne. (Matéô 22:32) To i len ini, Djob a ñumbe bés bisai. Bibel i nkal le: “Loñ i Nyambe wap a yé Yéhôva i yé kimasoda, bôt a tep kii ngababum yé yomede.”​—Tjémbi 33:12.