I bôt ba nkil i telepsép, bagwal bap, mawanda map ni basañ bap ba bôlô ba mbéna bôdôl bo ñem. Inyule ba ndiihe mambén map, ba yônhak mimbônga nwap, ba bén-ga ki pot maliga.

Bôt ba mbéna ti bés kunde ikété manjel momasôna ndik inyule ba gwééne bés botñem.

“Jam li li nlôôha lémél bagwal banan kayéle ba mbôdôl bé ñem li yé le, ni nlama unda le ni yé minhôôlak, ni nyoñ makidik malam to ngéda ni yé lôñni bo, to ngéda ni ta bé lôñni bo.”​—Sarahi.

LITIÑ LI BIBEL: “Bébomede noodana miñem minan.”​—2 Korintô 13:5.

Ibale u ngwés le ba bôdôl we ñem, tole i botñem bôt ba bééna inyu yoñ i témb i loo, boñ biliya i hôlôs bilem bilam bi bi noñ ha.

Ba mut a téé sép. Bitembee gwon bi mbéna suhus botñem bôt ba gwééne we. Ndi maselna ni hala, ngéda u nyibil ñem woñ, u kilak ki i telepsép​—téntén ngéda u mboñ hihôha, hala a ntinde bôt i kônde bôdôl we ñem.

“I kil i telepsép ngéda mam ma nke loñge i yé jam li ntomb. Ndi yak i yéñ kil i telepsép ikété mam ma ma téé bé sép, jo li nkônde yaga boñ le bôt ba bôdôl bañ bés ñem.”​—Kaiman.

LITIÑ LI BIBEL: “Di nsômbôl hiôm loñge ikété manjel momasôna.”​—Lôk Héber 13:18.

Ba mut nu ba mbôdôl ñem. Nyiña wada i loñ Amérika u ñéba le 78 ma bôt ba bôlô i ngii mbôgôl ma bi kal le i ba mut ba nla bôdôl ñem i yé “jam jada ikété mam ma ma nlôôha ba nseñ inyu mut nu a ntip kôs bôlô.” I ba mut nu ba mbôdôl ñem i ga hôla we ngéda u ga ba jôga li mut.

“Kiki bagwal bem ba bi yimbe le me nsal bibôlô ba nti me i mbai ibabé bo i nyégsa me nyuu, me kenek ki ni bisu i boñ hala, jon ba nkônde ki bôdôl me ñem.”​—Sarah.

LITIÑ LI BIBEL: “Me mbôdôl manôgla moñ ñem, . . . lakii me nyi le w’a boñ iloo kiki me nkal.” ​—Filémôn 21.

Bana wongut. Maselna ma yé le mahol ma minsôn ma nhoo nene i mis ma bôt, ndi i mbéda ngandak ngéda inyu boñ le bôt bape ba yimbe le di nhol yak ikété mahoñol més.

“He inyu jam lilam jada bé jon bagwal boñ ni bôt bape ba ga bôdôl we ñem. Ndi u nlama boñ biliya inyu boñ mam malam hiki ngéda.”​—Brandon.

LITIÑ LI BIBEL: “Eñgbana ni . . . Wongut.” ​—Kôlôsé 3:12.