Me bi nañ i tison i Montréal. Ngéda me bééna nwii minsamal, pua yem a bi wo, a yék mama ni mbegee ikeñi. Di bé bon juem, men me bé nu nsôk.

Ngéda me bé nañ, niñ yem i bé ndigi hibañga, mintuk mi moni, bisañ, me nhiômôk ni mintonba. Ngéda me bi bolna jôm li nwii, me kahal kil bôda ba libambe manwin, yak i bôt ba bé pôôs bôt bape moni. Me bé tembee bôt, me gwéélak mandon inyu nibil bo. I niñ i i bé lémél me ngandak.

Ngéda me bolna 14 nwii, me bé lôôha yi lôk bôt. Kiki hihéga, me bé me somb biklok bi yé ni plaquè or, minkôm ni dilonde, me bép sitamp mu wengoñle bi yé ni gôl yomede, me tiimba nuñul gwo minloñ, tole i bisu bi bisabe. Me bé maséé i kôs ngandak moni ibabé ndutu yo ki yo. Lisañ jada, me bi kôhna iloo didun 6 di frank pes hilo hiada nga ndigi!

Ngéda me bi bana 15 nwii, ba luhul me i suklu i het ba ñep boñge ba ba yé mintonba. To homa linañle me bééna bé. Me bé nañal nloñ, bipark, ni mandap ma mawanda mem.

Kiki me bé gwel minson mi wip, bisônda bi bé béna kena me ñamb wap inyu bat me mambadga. Ndi me bé pei mok hiki ngéda inyule me mah nuñul bé gwom bi wip. Kogse me bé béna bana i bé le ba bé ba fane me ngéda me mpôs mut mu kii me nuñul gwom, tole bebek inyule mut a nyik léba le i yom a hoñlak le a nsomb, yo bé i, tole bebek me nuñul ngim yom ki le me gwé bé mapep ma nti me kunde i nuñul yo. Me bé kon bé mut nye ki nye woñi, yak bapôôs bôt moni, me kahal pôs bo. Hala a bé béba bôlô le, jon me bé hiômna ngaa ngim mangéda. I bi pam yak le me sal ni ngim nlôñ mintonba.

Ngélé bisu me bi nigil Bibel, me bééna 17 nwii. Me bé niñ ni hingonda hiada, hion hi bi bôdôl nigil ni Mbôgi Yéhôva. Ndi kiki me bé gwés bé nôgôl i yom Bibel i niiga, di bi bagla, me ke i niñ ni muda numpe.

Hala a bi hélés me le yak mbok wem u nyônôs iba u bôdôl nigil ni Mbôgi Yéhôva! A bi pala héñha ngandak, me bé nhelek i tehe le a bé nwee ngandak nano, to me nsuu nye a timbhe bé. Hala a bi boñ le me neebe i ke likoda i ndap Ane. I bôt ba bi leege me ba bé ba hééba loñge, ba bak minyaô. Kinje maselna ni i yom me bé tehe bahoma bape! Ibôdôl me mañge, mut nye ki nye a unda bé me gwéha, to bop ba bi bop bé me; lihaa jem li mah yéñ bé to me. I lék ni gwéha me bé tehe ipôla Mbôgi Yéhôva i bé toi i yom i bé héñél me. Jon ngéda ba bi bat me too ba nla nigil ni me, me bi pala neebe.

Mam me bé nigil i Bibel ma bi sôñ niñ me. Inyule me kôôba lini lisañ i ke nip ni mawanda mem ima, inyu saa i pil me bééna mintuk mi moni, u bé bebee le 33 didun ni pes. Kinje maséé i yi le me bi tjél ke ni bo! Ndi bo ba bi ke toi i wip. Ba gwel wada wap, nunu numpe ba nol nye.

Kiki yigil yem i Bibel i bé ke ni bisu, me nôgda le me bé lama boñ ngandak mahéñha. Kiki hihéga, me bi nigil i kaat 1 Korintô 6:10: “To bôt ba wip, to bôt ba huluk ñem, to bôt ba lihiua, to bôt ba nsola, to bôt ba ngadla b’a kôdôl bé Ane Nyambe.” Ngéda me bi añ nlôñ u, gwiiha bi bi kahal kuli me i mis. Me nôgda le me nlama toi héñha niñ yem héñha yosôna. (Rôma 12:2) Niñ yem i bé ndigi bisañ ni bisañ, tembee ni wip.

Masoda le, me bi nigil yak le Yéhôva a yé konangoo, a nwéhél ki. (Yésaya 1:18) Me bi yible Yéhôva ñem, me yemhege nye le a hôla me i héñha. Ni mahôla mé, me bi pam i héñha ndék ni ndék. Mahéñha ma bi ke letee me ni mbok wem di biiba.

Ha ngéda i me bééna 24 nwii, ni bon baa. I bé béda le me yéñ bôlô i kristen i nla sal. Ndi me bi boñ bé bañga suklu, to diplôm to jada, me bééna bé. Jon me bi témb me yible Yéhôva ñem. Mbus me kahal yéñ bôlô. Me bé kal i bet ba bé énél bahoma bôlô me bé ke le, me nyoñ makidik i héñha, jon me nyéñ bôlô i i ga hôla me i bana koga i kel. Ngim mangéda me bé añle bôt le me nigil Bibel, inyule me bé sômbôl yila loñge mut. Ngandak baéga bahoma bôlô i bi tjél me. Sôk i nsôk lisañ jada, mbus le me bi añle nwet a bé lama yoñ me i bôlô le me bé ntonba, a kal me le: “Me nyi bé inyuki ndi, me nôgda le, me nlama yoñ we i bôlô.” Inyu yem, hala a bé ndimbhe i masoohe mem. Mbus me ni nwaa wem di sôblana.

Ibale me niñ len, a yé ndigi inyule me nigil Bibel, me biak matiñ mé bibôñôl i niñ yé. Me gwé loñge lihaa. Nano me gwé kiññem i mpôp inyule me yé nkwoog nkaa le Yéhôva a nwéhél me.

Mu 14 nwii mi mi ntip tagbe, me nsal kiki ngwelnson nu ngéda yosôna, me hôlga bôt i yi yom Bibel i niiga, yak nwaa wem a noñ me mu nson u, nano a yé ndék ngéda. Mu 30 nwii mi ntagbe, me nhôla solôñ yem i bôlô, hala wee 22 bôt, i yi Yéhôva ni i bégés nye. Me ngi kenek bisabe, ndi he bé inyu nibil bôt kiki i ngéda kôba. Me nke nyoo inyu tééne bôt likalô. Ngôñ yem i yé le me ti bo ngim yom: Botñem i niñ i mbok yondo i het bibéba bi bôt bi ga ba ha bé.—Tjémbi 37:10, 11.