Ngim bôt i bi kôs sôble, i yila Mbôgi Yéhôva, ndi bebeg le ndék ni ndék ba bi waa téé likalô, ba waa yak kodba ni bés. Mintén mi bôt mi, di nkengle bé nwo. I pot maliga, di mboñ yak biliya i boma bo inyu tiimba ti bo ngôñ i mam ma mbuu.

 Ibale mut a mboñ béba keñi, di nhéya bé nye ntôñ kunda yada. Ndi ibale Mbôgi Yéhôva i i yé nsôblege, i mbôdôl niñ ikété béba, i yanak mambém ma Bibel ibabé le a tam bibéba gwé, ba nhéya ntén mut u ikété ntôñ. Bibel i ntibil yaga kal le: “Héana ni mut mbe nu ikété nan.”—1 Korintô 5:13.

 Ndi kii di nla kal inyu mut ba nhéya ikété ntôñ, ndi nwaa ni boñ bé ba ngi yii Mbôgi Yéhôva? Maada map inyu mam ma base ma nhéñha, ndi maada ma lihaa ma mal bé. Libii lôñni gwéha i lihaa bi nlama ke ni bisu.

 I bôt ba nhéya ikété ntôñ ba nla lo i makoda més. Ibale ba ngwés, mimañ mi likoda mi nla yak ti bo maéba i pes mbuu. Maéba ma, ma yé inyu hôla bo i boñ mam ma nsômbla inyu témb yila Mbôgi Yéhôva. Ibale ba nhéya mut ikété ntôñ, ndi a kôm béba yé niñ mbus, a unda ki le a nsômbôl toi niñ inoñnaga ni matiñ ma Bibel, di mba maséé i leege nya mut i le a témb kiki Mbôgi Yéhôva ikété ntôñ.