SƆ̃ƆSIRU 2
Rebeka u kĩ u Yehofan nukuru dorasia
Rebeka u raa sãawa kurɔ wi u Yehofa kĩ. Win durɔn yĩsira Isaki. Win tii u raa Yehofa kĩ. Amɔsunwa n kua Rebeka ka Isaki ba ka yinna? Amɔsunwa Rebeka u sɔ̃ɔsi ma u kĩ u Yehofan nukuru dorasia? A de su mɛɛri su sosi kurɔ wi sɔɔ.
Isakin mɔwɔba Aburahamu ka Saaraa. Ba raa wãawa Kananin temɔ. Tem min tɔmba ǹ daa Yehofa sãamɔ. Aburahamu u raa kĩ win bii u kurɔ sua. Adama, kurɔ wi, ù n sãa wi u ra Yehofa sã. Yen sɔ̃ Aburahamu u win sɔm kowo, sɔrɔkudo sɔm kowo wi ba mɔ̀ Ɛliesɛɛ gɔra u da u Isaki kurɔ kasuama, wuu ge ba mɔ̀ Haraniɔ. Wuu miya Aburahamun dusi gaba raa wãa.
Rebeka u raa sɔɔru sãa u sɔm bakaru ko, u ka yooyoosu nim taka
Ɛliesɛɛ u wuu ge da ka Aburahamun sɔm kowo gabu. Wuu ge ga tonde too. Ba ka yooyoosu wɔkuru da, yooyoo si su dĩanu ka kɛ̃nu sɔɔwa. Amɔsunwa Ɛliesɛɛ u koo ko u ka tubu kurɔ warà u ko Isaki gɔsia? Sanam mɛ Ɛliesɛɛ ka sɔm kowo be ba nùn swĩi ba tura Haraniɔ, ba yɔ̃ra dɔkɔn bɔkuɔ, domi Ɛliesɛɛ u yɛ̃ ma tɔmba ǹ tɛɛmɔ bu ka nim taka n na. U Yehofa kana u nɛɛ: ‘Wɔndia wi kon nim kana, kpa u man kɛ̃, nɛ ka maa nɛn yooyoosu, kon tubu ma kurɔ wiya a gɔsa.’
Wee, wɔndia wi ba mɔ̀ Rebeka u na dɔkɔ korɔ. Bibeli ya nɛɛ kurɔ burɔn tii tiiwa. Ɛliesɛɛ u wi nim nɔruram kana, ma wɔndia wi u nùn wisa u nɛɛ: ‘Oo, kon nun nim kɛ̃, kon maa wunɛn yooyoosu takiriama su nɔ su debu.’ A bwisikuo! Nim nɔru gà n yooyoosu mɔ̀, nim mɛ su koo nɔ mu koo n kpã. Yen sɔ̃ Rebeka u daa te da ka duka nɔn dabi dabinu. A wa foto ye sɔɔ mɛsum wɔndia wi u hania mɔ̀ u ka sɔmbu te ko?— Ɛliesɛɛ u biti soora ka mɛ Yehofa u win kanaru mwasina.
Ɛliesɛɛ u Rebeka kɛ̃ɛ bura dabinu kã. Rebeka u ka Ɛliesɛɛ ka sɔmɔ be ba nùn swĩi da win yɛnugibun mi. Ɛliesɛɛ u be giasia mban sɔ̃na Aburahamu u wi gɔrima, ka mɛsum Yehofa u win kanaru nua. Ka nuku doba Rebekan yɛnugibu ba wura u Isaki sua durɔ.
Rebeka u Kanani sĩa ka Ɛliesɛɛ ma u Isaki sua durɔ
Adama, wunɛn waaru sɔɔ, Rebeka u kĩ u Isaki sua durɔ ro?— Rebeka u yɛ̃ ma Yehofawa u Ɛliesɛɛ gɔrima mi. Yen sɔ̃na, saa ye win yɛnugiba nùn bikia ù n kĩ u da Kananiɔ kpa u Isaki sua durɔ, u wisa u nɛɛ: ‘Oo, na kĩ n da.’ Yande, u doona ka Ɛliesɛɛ. Sanam mɛ ba tura Kananiɔ, Rebeka u Isaki sua durɔ.
Rebeka u Yehofan kĩru kua, yen sɔ̃na Yehofa u wi domaru kua. Wɔ̃ɔ dabi dabinun biru, ba Yesu mara Rebekan tɔ̃ka sɔɔ! À n mɔ̀ nge mɛ Rebeka u kua, ma a Yehofan nukuru dorasiamɔ, u koo maa wunɛn tii domaru kua.
