Yehofan Seeda Diobu nyewa a yɛ̃? Sɔrɔkudo, bɛsɛn gaba ka nun wãa wɔɔ bera tia, gaba sãa wunɛn sɔm kowo kpaasibu, ǹ kun mɛ wunɛn keu bii kpaasibu. Sɔrɔkudo, sa mam ka nun Bibelin gari kua. Tɔn beràn bwesera sa sãa ka gem? Ka mban sɔ̃na sa ra ye sa naanɛ doke bɔnu ko baama kpuro?

Sa ǹ ka nun wunanɛ. Sa weewa saa tem ǹ kun mɛ wusu dabinun di. Bɛsɛ sɔɔ, gaba sãa gbee wukobu, mɛya gaba maa sãa bature sɔm kowobu. Bɛsɛn gaba raa sãanu ganu mɔ̀, bɛsɛn gaba kun daa mam Gusunɔ naanɛ doke. Adama, su sere gɔsia Yehofan Seeda Dio, bɛsɛn baawure u saa yi u ka Bibelin sɔ̃ɔsinu wɛ̃ɛra ka laakari. (Gɔrobun kookoosu 17:11) Ye sa mɛɛra ya ka sun naawa, ma bɛsɛn baawure u ka tii wura u Yehofa Gusunɔ sã.

Sa Bibelin sɔ̃ɔsinun arufaani dimɔ. Gema, nge mɛ n tɔmbu kpuro sãawe, mɛya bɛsɛn tii n da n sun sãawe. Sa ra n hania mɔ̀ su ka wahala ka bɛsɛn tiin dam sariru tabu ko. Adama, nge mɛ sa kookari mɔ̀ su ka Bibelin gee kpɛɛkpɛɛkugii sɔmburu ko tɔ̃ɔ baatere bɛsɛn wãaru sɔɔ, sa waamɔ ma bɛsɛn wãara sanɔ mɔ̀. (Womu 128:1, 2) Yenin saabuwa sa ra ka tɔmbu gãa gee ni sa garimɔ Bibeli sɔɔ bɔnu ko.

Gee yi yi wee saa Gusunɔn min diya yi bɛsɛn wãaru kpare. Gee yi, yi yi sɔ̃ɔsire Bibeli sɔɔ, yi ra de sa n turosibu wãasina gea ka bɛɛrɛ mɔwɛ, ka maa daa ganu nge deedeerun swĩibu ka nuku tia. Yi ra de wuswaa daabu ya n wãa kpa bwãa ya n do. Yi ra maa yɛnusu dam kɛ̃ kpa kom gem mu n wãa tɔmbu sɔɔ. Sa yɛ̃ sãa sãa ma “Gusunɔ u tɔmbu kpuro garisi tia,” sa kĩnasibu mɔ bɛsɛn yigbɛru sɔɔ handunia gira sɔɔ, sa ku ra goo tuko mɛɛri, politiki kun maa sun karanɛ, sa kua bwese teerun tɔmbu. Baa mɛ bɛsɛ Yehofan Seeda Diobu sa ǹ ka bɛɛ wunanɛ, bɛsɛn yigbɛrun bwesera sari handunia sɔɔ! —Gɔrobun kookoosu 4:13; 10:34, 35.

• Swaa yera sɔɔra Yehofan Seeda Diobu ba ǹ ka tɔmbu kpuro wunanɛ?

• Gee yirà Seeda Dio ba wɛ̃ɛra ben Bibelin keu sɔɔ?