Dua hali saminggu, marpungu do Saksi Jahowa di Bale Harajaon. Aha do na diulahon di Bale Harajaon? Aha do gunana molo ro tu parpunguan i?

•  Aha do na diulahon di Bale Harajaon?

•  Boasa ikkon ro ho tusi?

•  Na didok akka donganmu

 Bale Harajaon, i ma inganan ni akka halak lao mamparsiajari Bibel jala marguna do i tu ngolumuna siganup ari. Parpunguan i boi do mangurupi hamu lao:

•   mandapot informasi na sittong taringot Debata.

•   mamboto aha do arti ni akka na masa saonari on.

•   mambahen hamu gabe halak na lam burju.

•    mandapot akka dongan na burju.

 Diboto hamu do? Boasa didok inganan parpunguan ni Saksi Jahowa i Bale Harajaon? Alana, taringot Harajaon ni Debata do na jotjot dibahas disi.​—Mateus 6: 9, 10; 24:14; Lukas 4:43.

 Informasi na dapotmuna disi marguna do tu hamu. Akka prinsip ni Bibel na dibahas di parpunguan ni Saksi Jahowa, boi do mangurupi hamu asa marbisuk. (Poda 4:5) Bibel, boi do mangurupi hamu mambahen keputusan na denggan di ngolumuna. Jala, Bibel boi do mangalusi akka sukkun-sukkun na penting, songon:

•   Aha do tujuan ni ngolu on?

•   Debata do na mambahen hita susa?

•   Songon dia do keadaan ni halak naung mate?

 Dison adong do piga-piga judul ni jamita na dipasahat di tikki parpunguan di ari minggu:

•   Boasa Bibel i Sada Petunjuk na Denggan?

•   Sian Dia do Hamu Boi Mandapot Bantuan Tikki Susa?

•   Aha do na Diulahon Harajaon ni Debata tu Hita Saonari?

 “Adong ma dongan sasikkolakku na ro tu parpunguan. Rap hundul do ibana dohot keluargakku, jala rap do hami mambukka bukku. Dukkon i didok ibana ma, longang hian do rohana tu akka komentar ni akka halak tikki adong sesi tanya jawab. Didok ibana muse, molo di garejana dang adong parsiajaran sisongon i.”​—Brenda.

 Diboto hamu do? Di Bale Harajaon i, gratis do acarana jala dang adong kolekte.

 Akka dongan na disi boi patoguhon roha. Didok di Bibel, sada alasan boasa porlu ro hita marpungu, i ma asa boi do tapatogu akka dongan. (Heber 10:24, 25) Di portibi on, makkarikkotton dirina sandiri do akka halak. Alai tikki di parpunguan, boi ma hita marsaor dohot akka halak na makkarikkotton Debata dohot makkarikkotton akka dongan. Tontu, on mambahen las roha.

 “Ala sadari manipat do au karejo, sipata loja do huhilala jala gabe hurang semangat. Alai tikki ro au tu Bale Harajaon, gabe semangat do au muse dibahen akka dongan disi. Dung mulak sian i, gabe las ma rohakku. Jala rade ma au muse lao mangulahon ulaonku marsogotna i.”​—Elisa.

 Diboto hamu do? Adong lobi sian 120.000 huria ni Saksi Jahowa di liat portibi on. Lobi sian 60.000 ma inganan ni nasida marpungu. Ala lam godang do halak na ro marpungu, ganup taon ikkon dibangun do hira-hira 1.500 Bale Harajaon. a