Patik na Sappulu i, i ma hukum na dilehon Debata tu halak Israel najolo. Digoari do tong on Hata na Sappulu i, na diterjemahon sian bahasa Heber asereth haddevarim. Adong do tolu hali on dipaboa di Pentateukh (Patik), i ma lima bukku na parjolo na dipaboa di Bibel. (2 Musa 34:28; 5 Musa 4:​13; 10:4) Jala hata on di bahasa Junani, i ma deka (sappulu) logous (hata). Digabung ma dua hata on gabe “Dekalog”.

 Disurat Debata do Patik na Sappulu i di dua batu jala dilehon ma i tu si Musa tikki di Dolok Sinai. (2 Musa 24:12-​18) Patik na Sappulu on adong disurat di 2 Musa 20:​1-​17 dohot di 5 Musa 5:​6-​21.

•  Daftar ni Patik na Sappulu i

•  Boasa adong perbedaan pendapat taringot urutan ni Patik na Sappulu i?

•  Aha do tujuan ni Patik na Sappulu i dilehon?

•  Ikkon diulahon halak Kristen do sude na didok di Patik na Sappulu i?

•  Marguna dope Patik na Sappulu i di tikkitta saonari?

•  Prinsip sian Patik na Sappulu i na adong di Perjanjian Baru

1.   Holan Debata Jahowa do na ikkon disomba.​—2 Musa 20:3.

2.   Unang manomba akka patung.​—2 Musa 20:​4-6.

3.   Unang ma sembarangan mamakke goar ni Debata.​—2 Musa 20:7.

4.   Ikkon mangulahon Ari Sabat.​—2 Musa 20:​8-​11.

5.   Pasangap ma natua-tuamuna.​—2 Musa 20:12.

6.   Unang mambunu.​—2 Musa 20:13.

7.   Unang mangalakkup.​—2 Musa 20:14.

8.   Unang manakko.​—2 Musa 20:15.

9.   Unang makkatahon na so tutu.​—2 Musa 20:16.

10.   Unang makkalomohon appuna ni halak.​—2 Musa 20:17.

 Sebenarna dang adong dibahen di Bibel nomor ni ganup paretta i. Jadi gabe adong ma perbedaan pendapat taringot songon dia seharusna akka paretta i diurutton. Biasana, songon na dipaboa di daftar na di ginjang nakkin ma urutanna. Alai adong do tong versi urutan na berbeda. Biasana na berbeda i ma, di patik na parjolo, paduahon, dohot na parpudi. a

 Bagian sian Patik ni si Musa do Patik na Sappulu i. Alai adong dope lobi sian 600 nai paretta na termasuk tu Patik ni si Musa. Jala marhite Patik i ma Debata mambahen parjanjian tu bangso Israel najolo. (2 Musa 34:27) Marjanji do Debata tu halak Israel najolo, molo dioloi nasida sude Patik ni si Musa i pasti denggan do ngolu ni nasida. (5 Musa 28:​1-​14) Alai tujuan utama ni Patik i, lao mamparsiappon halak Israel tu haroro ni Messias na dijanjihon.​—Galatia 3:​24.

 Daong. Holan tu bangso Israel najolo do dilehon Debata Patik ni si Musa, termasuk ma Patik na Sappulu i. (5 Musa 5:​2, 3; Psalmen 147:19, 20) Dang dipakke halak Kristen be Patik ni si Musa, bahkan halak Kristen Jahudi pe ‘nungnga malua sian Patik i’. (Rom 7:6) b Asing ni i, nungnga digatti be Patik ni si Musa tu “patik ni Kristus”, i ma sude paretta na disuru Jesus na ikkon diulahon akka siseanna.​—Galatia 6:2; Mateus 28:19, 20.

 Marguna. Alana molo taparsiajari Patik na Sappulu i, gabe boi ma taboto songon dia cara marpikkir ni Debata. (2 Timoteus 3:​16, 17) Akka prinsip di balik ni Patik na Sappulu i pe, marguna do tu hita saonari jala dang ketinggalan jaman. (Psalmen 111:​7, 8) Godang do muse sian akka prinsip i na gabe dasar ni Perjanjian Baru.​—Ida “ Prinsip sian Patik na Sappulu i na adong di Perjanjian Baru”.

 Didok Jesus, “‘Ikkon haholonganmu do Jahowa Debatam sian nasa roham, sian nasa ngolum dohot sian nasa pikkiranmu.’ I ma paretta na umbalga jala na parjolo. Paretta na paduahon na dos tusi, i ma, ‘Ikkon haholonganmu do donganmu jolma doshon dirim.’” Sian hata ni Jesus on gabe taboto ma, dua paretta on ma na gabe dasar ni sude Patik ni si Musa, termasuk ma Patik na Sappulu i. (Mateus 22:34-​40) Nang pe dang ikkon diulahon halak Kristen be Patik ni si Musa, alai diparettahon do tu hita asa makkaholongi Debata dohot donganta jolma.​—Johannes 13:34; 1 Johannes 4:​20, 21.