Godang do petunjuk na massai denggan di Bibel na mangurupi hita boi mambahen keputusan na denggan. Petunjuk na sian Bibel i mambahen hita ‘marbisuk jala asa manat marpikkir’. (Poda 4:5) Adong do akka masalah naung dibahen langsung keputusanna di Bibel. Alai molo masalah na asing dang pittor dipaboa songon dia keputusanna, holan petunjuk do na dilehon asa boi tabahen keputusan na denggan.

Na dibahas di artikel on

•  Akka saran na boi mangurupi hamu mambahen keputusan na denggan

•  Boi do huubah keputusan naung hubahen?

•  Aha do na boi huulahon molo hubahen sada keputusan na so denggan na so boi be huubah?

•   Unang ma terburu-buru mambahen sada keputusan. Bibel mandok, “Dipikkiri halak na marbisuk do ganup lakkana.” (Poda 14:15) Molo buru-buru hita mambahen sada keputusan, boi do gabe taabaihon informasi na penting. Jadi lehon hamu ma tikki lao mambahen keputusan.—1 Tessalonik 5:21.

•   Unang ma bahen keputusan holan ala mangihutton perasaanmuna sandiri. Nungnga dipasingot di Bibel asa unang taandalhon pikkiran dohot rohatta sandiri. (Poda 28:26; Jeremia 17:9) Contohna dang boi tabahen keputusan na denggan di tikki hita muruk, tertekan, mandele, tikki lungun rohatta, terburu-buru, manang tikki palojahu.—Poda 24:10; 29:22.

•   Martangiang mangido bisuk. (Jakobus 1:5) Las do roha ni Debata mangalusi tangiangta molo tajalo bisuk sian Ibana. Dos songon sahalak bapak do Debata. Lomo do rohana asa terhindar anakna sian masalah. Didok di Bibel, “Sian Jahowa do bisuk, jala sian pamanganna do kaluar akka hata na boi mambahen halak mandapot parbinotoan jala boi mangattusi.” a (Poda 2:6) Diparade Ibana do Bibel asa boi mambahen hita marbisuk.—2 Timoteus 3:16, 17.

•   Lului ma informasi taringot masalahmuna i. Porlu do talului informasi na jelas taringot masalahta i asa boi tabahen keputusan na denggan. Songon na didok di Bibel, “Lomo do roha ni halak na marbisuk manangihon jala marsiajar.” (Poda 1:5) Jadi, sian dia do boi dapotmuna informasi na sittong jala na boi dihaporseai?

   Na parjolo, taida ma songon dia pandangan ni Bibel taringot masalahta. Ai marisi akka nasehat na massai denggan do Bibel i, alana Debata do na mangalehon Bibel i tu hita, Ibana do na mamboto aha na dumenggan tu hita. (Psalmen 25:12) Adong do langsung dipaboa di Bibel songon dia keputusan na ikkon tabahen taringot piga-piga masalah. Tarida do i sian patik manang sian akka paretta na disurat di Bibel. (Jesaya 48:17, 18) Alai godang dope masalah na ikkon hita sandiri na mambahen keputusan. Alani i ma diparade prinsip na boi taihutton lao mambahen keputusan na denggan. Jala keputusanta on bisa jadi berbeda do sian keputusan ni halak na asing. Asa boi dapotmuna prinsip ni Bibel na cocok tu masalahmuna, bahen ma riset sian artikel manang publikasi na dibahen sesuai tu isi ni Bibel, songon na adong di situs web on jala gratis do i. b

   Lao mambahen keputusan na denggan, sipata porlu do talului sumber informasi na asing na boi tahaporseai. Misalna sebelum manuhor sada barang tarlumobi barang na arga, ikkon talului do informasi taringot barang i dohot songon dia i dibahen. Termasuk ma i taringot garansina molo sega barang na tatuhor i manang molo naeng tapaulak. Ikkon tapastihon do muse nungnga sesuai produk na lao tatuhor i tu kebutuhanta.

   Didok di Bibel, “Sundat do sakkap molo so jolo dihatai.” (Poda 15:22) Sebelum tabahen keputusan, tapangido ma saran sian halak na boi dihaporseai. Misalna sebelum mambahen keputusan taringot kesehatan na lao tadalani, tasukkun ma saran ni dokter. (Mateus 9:12) Boi do muse hamu makkatai dohot halak na hea mangalami situasi na sarupa songon hamu, jala jalo ma saran sian nasida. Alai ingot ma unang ma halak na asing na mambahen keputusan di hamu, ikkon hamu sandiri do ala hamu do na lao mandalani.—Galatia 6:4, 5.

•   Partimbakkon ma sude informasi. Molo dung dipapungu hamu informasi taringot masalahmuna i, bahen ma piga-piga pilihan na lao diihutton hamu. Bahen ma kelebihan dohot kekurangan ni setiap pilihan i. Jala pikkirhon ma muse aha akibat ni setiap keputusan i. (5 Musa 32:29) Misalna pikkirhon ma, songon dia do keputusanmuna i berpengaruh tu dirimuna, tu keluargamuna, dohot tu halak na asing? (Poda 22:3; Rom 14:19) Molo dipikkirhon hamu do prinsip ni Bibel tikki mangalusi sukkun-sukkunmuna i, boi ma dibahen hamu keputusan na denggan jala na patuduhon holong tu na asing.

•   Bahen ma keputusan. Sipata maol do tabahen keputusan molo ragu hita tu hasil ni keputusan i. Alai molo torus hita ragu, boi do gabe mago kesempatan na denggan manang gabe terjadi situasi na so taharappon. Jadi dang adong gunana molo ragu-ragu hita mambahen keputusan, ai gabe sarupa do hasil ni i tikki hita mambahen keputusan na sala. Dos ma on songon peribahasa ni partani na disurat di Bibel na mandok, “Molo sai alogo do na dipaida-ida halak, dang saut be ibana manuan boni. Molo sai ombun do na dipaida-ida halak, dang saut be ibana mamanen.”—Parjamita 11:4.

 Taingot ma, keputusan na denggan i dang selalu sempurna hasilna. Jotjot do ikkon adong na takorbanhon tikki mambahen sada keputusan. Jala olo do terjadi peristiwa na so taharappon. (Parjamita 9:11) Jadi tapakke ma denggan informasi na tapapungu jala tabahen ma piga-piga pilihan na mungkin denggan hasilna.

 Adong do keputusan na boi berubah. On boi terjadi molo berubah situasimuna, manang hasil ni keputusan na sebelumna dang sesuai tu na taharappon. Jadi denggan do dipikkirhon hamu muse masalahmuna i jala mamillit sada keputusan na mungkin lebih sesuai hasilna tu na diharappon hamu.

 Alai adong do keputusan na so boi berubah. (Psalmen 15:4) Misalna, dituntut Debata do asa toktong setia suami dohot istri tu ikrar perkawinan ni nasida. c (Maleaki 2:16; Mateus 19:6) Jadi tikki adong masalah di perkawinan, ikkon berupaya do suami dohot istri pasaehon masalah ni nasida jala dang boi bercerai.

 Pasti hea do tabahen keputusan na sala. (Jakobus 3:2) Jala wajar do molo merasa menyesal hita manang merasa bersalah alani i. (Psalmen 69:5) Jala kadang-kadang denggan do muncul perasaan sisongon i, asa unang taulahon be kesalahan na sarupa. (Poda 14:9) Alai nang pe songon i dipaboa do di Bibel asa unang torus tasalahon diritta, ala boi do i manegai roha dohot pikkiratta. (2 Korint 2:7) d Bibel mandok, “Na burju jala parasi roha do Jahowa.” (Psalmen 103:8-13) Jadi coba ma buat parsiajaran sian keputusan na sala i, ai dang boi be i diubah. Ulahon ma na boi diulahon hamu lao padenggatton masalah i.