Surirang, i ma hata na dipasahat ni Debata. Didok di Bibel, ‘sian Debata do ro na didok akka panurirang i marhite panogu-noguon ni tondi parbadia’. (2 Petrus 1:​20, 21) Jadi panurirang, i ma halak na dipillit Debata lao pasahatton hatana tu na asing.​—Ulaon ni Apostel 3:​18.

Songon dia do cara ni Debata pasahatton Hatana i tu akka panurirang?

 Adong do piga-piga cara na dipakke Debata lao pasahatton Hatana:

•   Disuratton. Hea do sahali dipakke Debata cara on tikki pasahatton Patik na Sappulu i tu si Musa. Jahowa do na langsung manuratton isi ni Patik i.​—2 Musa 31:18.

•   Marhite akka suru-suruan. Contohna, dipakke Debata do akka suru-suruan lao manuru si Musa pasahatton Hatana tu si Firaun raja ni Mesir. (2 Musa 3:​2-4, 10) Jotjot do dipakke Jahowa akka suru-suruanna lao pasahatton Hatana molo massai penting hian do Hatana i ikkon dipasahat. Contohna didok Debata do tu si Musa, “Suratton ma akka hata on, alana marhite hata on do Au mambahen parjanjian tu ho dohot tu halak Israel.”​—2 Musa 34:27. a

•   Marhite parnidaan. Sipata olo do parnidaan i dipasahat Debata langsung tu akka panurirang. (Jesaya 1:1; Habakuk 1:1) Adong do parnidaan i hira na nyata hian, seolah-olah parnidaan i terjadi di jolo ni halak na mandapot parnidaan i. (Lukas 9:​28-​36; Pangungkapon 1:​10-​17) Olo do muse dipasahat Debata parnidaan i marhite cara na asing, songon na dipasahat Ibana tu si Petrus dohot tu si Paulus. (Ulaon ni Apostel 10:10, 11; 22:17-​21) Jala olo do i muse dipasahat marhite nipi.​—Daniel 7:1; Ulaon ni Apostel 16:​9, 10.

•   Manogu-nogu pikkiran ni panurirangna. Ditogu-togu Debata do pikkiran ni akka panurirangna tikki pasahatton Hatana. Sesuai do on tu na didok di Bibel, “Sian Debata do sude Surat na Badia i.” Hata “sian Debata” boi do tong diterjemahon gabe “diombusson Debata”. (2 Timoteus 3:​16) Marhite tondi parbadiana manang huasona, hira na “diombusson” Debata ma isi ni pikkiranna tu pikkiran ni akka naposona. Jadi nang pe i marisi pikkiran ni Debata, alai boi do akka panurirang pasahatton Hata ni Debata i marhite hata ni nasida sandiri.​—2 Samuel 23:​1, 2.

Holan taringot ari na naeng ro do na dipaboa di surirang?

 Daong. Alai memang jotjotan taringot ari na naeng ro do na dipaboa di surirang. Contohna, mulak-ulak do panurirang ni Debata paingotton halak Israel najolo asa muba nasida sian pangalahona na jahat. Takkas do dipaboa, molo olo nasida muba mandapot pasu-pasu ma nasida di ari na naeng ro. Alai molo dang olo nasida muba, gabe susa do ngolu ni nasida. (Jeremia 25:​4-6) Jadi, masa depan ni halak Israel i bergantung tu pilihan na dibahen nasida.​—5 Musa 30:19, 20.

Piga-piga surirang di Bibel na so paboahon taringot ari na naeng ro

•   Hea do halak Israel mangido bantuan sian Debata. Alai disuru Debata ma sahalak panurirangna paboahon na so olo Debata mangurupi nasida ala dang olo nasida mangoloi parettana.​—Panguhum 6:​6-​10.

•   Tikki makkatai Jesus tu sahalak borua Samaria, diurupi Debata do Jesus lao mamboto aha na masa tu borua i di tikki naung salpu, dang na lao masa tu borua i di ari na naeng ro. Nang pe dang dipaboa Jesus tu borua i aha na lao masa di ari na naeng ro, alai diboto borua i do molo Jesus sahalak panurirang.​—Johannes 4:​17-​19.

•   Tikki dianiaya Jesus, ditutup akka musuna do bohi ni Jesus jala dipukkuli do ibana. Didok nasida ma tu Jesus, “Molo panurirang do ho, paboa ma tu hami ise na mamukkul ho!” Dang adong dipangido nasida asa dipaboa Jesus taringot aha na lao masa di ari na naeng ro. Alai, na dipangido nasida asa dipaboa Jesus do ise na mamukkul ibana i.​—Lukas 22:63, 64.