Hesekiel 33:1-33
33 Dung i didok Jahowa ma muse tu au,
2 “Ale anak ni jolma, makkatai ma ho tu dongan sabangsomi.+ Dokkon ma tu nasida,“‘Uppamana, adong ma sada luat na hupasombu diserang musu.+ Dipillit akka halak na di luat i ma sahalak bawa lao gabe panjaga ni nasida.
3 Dung i diida bawa i ma adong musu na ro tu luat ni nasida. Diombus ibana ma tarompetna na sian tanduk i jala dipaingot ma akka halak na di luat i.+
4 Molo adong sasahalak na mambege soara ni tarompet i alai dang diulahon ibana sipasingot i,+ laos gabe dipamate musu ibana, mate ma ibana alani hasalaanna sandiri.*+
5 Ai dibege ibana do soara ni tarompet i alai dang diulahon ibana sipasingot i. Jadi, alani hasalaanna do ibana mate. Ai autsugari diulahon ibana sipasingot i, toktong ma ibana mangolu.
6 “‘Alai autsugari nungnga diida panjaga i naung ro musu, alai dang diombus ibana tarompetna,+ dang adong dipasingot ibana akka halak na tinggal di luat i, laos gabe ro musu jala dipamate sahalak jolma, mate ma ibana alani hasalaanna. Alai pangidookku ma asa martanggung jawab panjaga i ala nungnga mate ibana.’+
7 “Alai anggo ho anak ni jolma, nungnga hupillit be ho gabe panjaga ni halak Israel. Molo adong dibege ho hata na kaluar sian pamanganku, ikkon paboaonmu do sipasingotti tu nasida.+
8 Molo hudok tu halak na jahat, ‘Ale parjahat, ikkon mate do ho!’+ Alai dang dipaboa ho tu halak na jahat i asa muba ibana sian pangalahona na jahat i, mate ma ibana gabe halak na jahat alani hasalaanna.+ Alai pangidookku ma asa martanggung jawab ho ala nungnga mate ibana.
9 Molo nungnga dipasingot ho halak na jahat asa muba, alai dang olo ibana muba sian pangalahona i, mate ma ibana alani hasalaanna.+ Alai anggo ho nungnga dipalua ho be hosam.+
10 “Jala ho anak ni jolma, dokkon ma tu halak Israel, ‘Didok hamu do, “Marsak do hami ala nungnga mangalo tu Debata, jala susa do hami alani dosanami na balga i.+ Saonari aha ma na ikkon diulahon hami asa toktong mangolu?”’+
11 Dok ma tu nasida, ‘“Songon pastina Au Debata na mangolu,”* ninna Jahowa Tuan Natumimbul i, “Dang lomo rohakku molo mate parjahat i,+ unlomo do rohakku molo muba ibana sian pangalahona na jahat i+ jala toktong mangolu.+ Muba ma hamu, muba ma hamu sian pangalahomuna na jahat i.+ Ale halak Israel, boasa pola ikkon mate hamu?”’+
12 “Ale anak ni jolma, paboa ma tu akka dongan sabangsomi, ‘Akka ulaon na sittong na diulahon halak na sittong, dang boi paluahon ibana molo nungnga mangalo ibana.+ Jala akka ulaon na jahat na diulahon sahalak parjahat dang boi mambahen ibana dipamate molo nungnga muba ibana sian ulaon na jahat i.+ Akka ulaon na sittong na diulahon halak na sittong dang boi paluahon ibana di ari tikki na mangulahon dosa ibana.+
13 Molo hudok tu halak na sittong, “Toktong do ho mangolu.” Alai gabe diasakkon ibana ulaonna na sittong i jala gabe diulahon ibana na sala,+ dang diingot be akka ulaonna na sittong i. Ikkon mate do ibana alani ulaon na sala naung diulahonna i.+
14 Jala molo hudok tu halak na jahat, “Pasti mate do ho.” Alai gabe ditinggalhon ibana dosana i jala diulahon ibana na tigor dohot na sittong,+
15 dung i gabe dipaulak parjahat i akka barang naung dibuat ibana gabe jaminan,+ digarar ibana akka barang naung dirampok ibana,+ diulahon ibana akka aturan na parohon hangoluan marhite dang mangulahon na sala, toktong ma ibana mangolu.+ Dang na lao mate ibana.
16 Dang diingot be nanggo sada pe akka dosa na diulahon ibana najolo i.+ Ai nungnga diulahon ibana na tigor jala na sittong. Alani i, toktong ma ibana mangolu.’+
17 “Alai didok dongan sabangsomi do, ‘Dang sittong na binahen ni Jahowa i.’ Hape sasittongna akka na binahenmuna i do na so tigor.
18 “Molo adong halak na sittong manadikkon ulaonna na sittong i, jala gabe diulahon ibana na sala, ikkon mate do ibana alani i.+
19 Alai molo adong halak na jahat na muba sian pangalahona na jahat i, gabe diulahon ibana na sittong jala na tigor, toktong ma ibana mangolu ala nungnga diulahon ibana i.+
20 “Alai didok hamu do, ‘Dang sittong na binahen ni Jahowa i.’+ Ale halak Israel, hukumokku do hamu sude hombar tu pangalahomuna be.”
21 Ujungna, di ari na palimahon, di bulan na pasappuluhon, di taon na pasappulu duahon, dung diboan hami tu luat ni musu, ro ma sahalak bawa na malua sian Jerusalem.+ Didok ma tu au, “Nungnga ditaluhon musu be kota i!”+
22 Jadi di bornginna i, andorang so ro dope bawa i, ro ma tondi parbadia* ni Jahowa tu au. Dibukka Ibana ma babakku. Alani i, di tikki ro bawa i di manogotna i, dang bisu be au. Nungnga boi be au makkatai.+
23 Dung i didok Jahowa ma muse tu au,
24 “Ale anak ni jolma, taringot tu luat ni Israel didok akka pangisi ni kota naung hancur+ on do, ‘Haru si Abraham, holan sahalakna do. Alai boi do dibuat ibana luat on gabe appunana.+ Apalagi ma hita, godang do hita. Pasti boi do luat on gabe appunatta.’
25 “Alani i dokkon ma songon on tu nasida, ‘Songon on do hata ni Jahowa Tuan Natumimbul i, “Diallang hamu do jagal rap dohot mudarna,+ martangiang do hamu tu akka debata na huhagigihon* i, jala mambunu do hamu.+ Alani i, patut dope jaloonmuna luat on gabe appunamuna?
26 Podang do na diasakkon hamu.+ Diulahon hamu do akka ulaon na huhagigihon. Jala mangulahon seks do hamu dohot istri ni donganmuna.+ Alani i, patut dope jaloonmuna luat on gabe appunamuna?”’+
27 “Songon on ma paboa tu nasida, ‘Songon on do hata ni Jahowa Tuan Natumimbul i, “Songon pastina Au Debata na mangolu, ikkon mate hona podang do akka halak na tinggal di kota naung hancur i. Akka halak na di ladang, bahenokku ma gabe siallangon ni binatang buas. Jala akka halak na tinggal di benteng manang di gua, ikkon mate hona sahit.+
28 Bahenokku ma luat i gabe tarulang jala harsang.+ Marujung ma akka na mambahen ginjang roha ni nasida. Tarulang ma akka dolok ni Israel,+ jala dang adong be na lewat sian i.
29 Ai diulahon nasida do sude ulaon na huhagigihon.+ Alani i, bahenokku ma tarulang situtu luat i jala dang diingani be.+ Di tikki i, botoon ni nasida ma na Au do Jahowa.”’
30 “Alai anggo ho anak ni jolma, dipahata-hata akka dongan sabangsomi do ho. Dipahata-hata do ho di sapping ni akka tembok dohot di akka pintu ni jabu.+ Didok nasida do tu akka dongan sabangsona i, ‘Beta, tatangihon ma Jahowa.’
31 Songon na somal diulahon naposokku, godang do nasida ro marpungu tu jolom. Begeon ni nasida do hatami alai dang na lao ulahonon ni nasida i.+ Ai di pamangan ni nasida sai dipuji-puji do ho. Alai anggo di roha ni nasida, sai naeng mangalului uttung do nasida sian cara na so sittong.
32 Ida ma! Songon halak na mangendehon ende taringot cinta do ho di nasida, na malo mamakke alat musik na martali, jala na bagak soarana. Begeon ni nasida do akka hatami, alai dang na lao ulahonon ni nasida i.
33 Pasti masa do sudena i. Di tikki masa i, botoon ni nasida ma na adong do sahalak panurirang* di tonga-tonga ni nasida.”+
Surat na di toru
^ Manang “marsapata tu ibana ma mudarna i”.
^ Sumpa on patuduhon pasti do ikkon saut janji on, songon pastina Debata mangolu.
^ As. “tangan”.
^ Molo di bahasa Heber istilah on berkaitan tu hata “kotoran” jala on patuduhon na magigi situtu do tu sada ulaon.
