Poda 26:1-28
26 Songon salju tikki musim panas jala songon udan di tikki musim panen,Suang songon i ma, dang patut halak na oto mandapot hasangapon.+
2 Adong do na mambahen pidong lao jala na mambahen habang burung walet,Suang songon i ma, dang mungkin diburai sasahalak molo so adong alana.*
3 Tu hoda do lissing-lissing jala tu halode do kokkang,+Alai tu tanggurung ni halak na oto do attuk-attuk.+
4 Unang ma alusi halak na oto mangihutton haotoonna,Asa unang sarupa ho tu ibana.
5 Alusi ma halak na oto mangihutton haotoonna,Asa unang dirippu ibana na marbisuk ibana.+
6 Dos songon halak na mambahen lumpu patna sandiri jala na mangalului jea tu dirina sandiri,Songon i ma halak na pos rohana pasahatton sada ulaon tu halak na oto.
7 Dos songon pat ni halak na pakpang na mekkat-ekkat mardalan,Songon i ma poda na nidok ni halak na oto.+
8 Dos songon batu na diikkat tu ambalang,*Songon i ma hasangapon na dilehon tu halak na oto.+
9 Dos songon suga-suga na di tangan ni halak na mabuk,Songon i ma poda na nidok ni halak na oto.
10 Dos songon halak na asal mamanah jala na mambahen lukka na asing,Songon i ma molo manggaji halak na oto manang halak na so ditanda.
11 Dos songon biang na mulak lao mangallang uta-utana,Songon i ma halak na oto na mulak-ulak patuduhon haotoonna.+
12 Hea do diida ho halak na mandok dirina marbisuk?+
Ummura do mangurupi halak na oto sian ibana.
13 Didok sigurbak ulu do, “Adong singa di luar,Adong singa di tonga dalan!”+
14 Songon pintu na marputar di engselna,Songon i ma sigurbak ulu na sai peak-peak di podomanna.+
15 Dipamasuk sigurbak ulu do tanganna tu makkuk na marisi sipanganon,Alai nanggo pamasukkon sipanganon i pe tu babana, loja do dihilala ibana.+
16 Dirippu sigurbak ulu do umbisuk ibanaSian pitu halak na mangalehon alus na sittong.
17 Dos songon halak na manarik pinggol ni biang,Songon i ma halak* na muruk alani parbadaan ni na asing.+
18 Dos songon halak na rittik na mamakke panah na marapi dohot tombak* na pamatehon,
19 Songon i ma halak na mangoto-otoi donganna dung i mandok, “Holan na margait-gait do au!”+
20 Molo so adong soban, mittop do api,Molo so adong halak na mandok na so tutu, sae ma parbadaan.+
21 Songon arang na dibahen tu gara jala songon soban na dibahen tu api,Songon i ma parbada na mambahen lam balga parbadaan.+
22 Songon siallangon na tabo do hata ni halak na paboa-boahon na so sittong.Pittor naeng bodduton ni halak do i.+
23 Dos songon sapponggol gucci naung maputtar na dilappis perak,Songon i ma halak na lambok-lambok hatana hape marsakkap na jahat.+
24 Didok halak do akka hata na denggan lao manabunihon sogo ni rohana,Hape naeng mangoto-otoi do di bagasan rohana.
25 Nang pe lambok-lambok hatana, unang ma porsea ho tu ibana,Ai gok* do akka na jahat di bagasan rohana.
26 Nang pe margabus halak lao manabunihon sogo ni rohana,Alai na lao patar do hajahatonna i di jolo ni akka halak.
27 Halak na manggali lubang, ibana sandiri do na madabu tusi,Jala manang ise na manggulikkon batu, ibana sandiri do tipaon ni batu i.+
28 Sogo do roha ni halak na margabus tu halak na nigabusanna,Jala parohon jea do halak na mamanggar-manggar na asing.+
Surat na di toru
^ Manang boi do “dang na lao saut molo diburai sasahalak so adong alana”.
^ Manang “halak na lewat”.
^ Manang “hujur”.
^ As. “Ai pitu”.
