Di Bibel disurat do hata ni Debata lao tu saluhut jolma. Ikkon taparsiajari do Bibel asa boi tatanda Pangarangna. (Johannes 17:3; 2 Timoteus 3:16) Di akka halaman ni Bibel on dipaboa Debata Jahowa do sakkapna tu jolma dohot tu tano on.—1 Musa 3:15; Pangungkapon 21:3, 4.

Bibel boi paubahon ngolu ni jolma. Dang adong bukku na boi songon i. Di Bibel dijujui do hita asa maniru parange ni Debata. Dijujui do hita asa burju, patuduhon holong, jala marasi roha. Jala di Bibel dipaboa do janji ni Debata tu ari na naeng ro. On mangurupi akka halak asa toktong sabar nang pe manaon hasusaan na massai borat. Jala dipaboa do muse di Bibel akka aha na adong di portibi on na so sadalan dohot lomo ni roha ni Debata.—Psalmen 119:105; Heber 4:12; 1 Johannes 2:15-17.

Mulana, Bibel disurat di bagasan bahasa Heber, Aram, dohot Junani. Alai saonari nungnga diterjemahon be Bibel na lengkap manang na sabagian tu lobi sian 3.000 bahasa. On dope bukku na hea diterjemahon songon i godangna. Dang pola heran hita disi, ala nungnga dipaboa hian di Bibel taringot i. Didok, “Dibaritahon ma barita na uli taringot tu Harajaon i di liat portibi on, asa saluhut bangso mambege barita i. Dung masa i ro ma ujungna.”—Mateus 24:14.

Ala massai penting isi ni Bibel, didok rohanami penting do dibahen perubahan. Alai tikki dibahen hami perubahan i marsitutu do hami asa unang gabe muba isi ni Bibel i. Diboto hami dang mura menerjemahon Bibel. Bibel on diterjemahon sian Bibel New World Translation of the Holy Scriptures (Bibel Hata ni Debata tu Akka Jolma na Naeng Mangolu di Tano na Imbaru). Bibel on parjolo sahali dirilis lobi sian 60 taon na salpu. Ala nungnga marpulu-pulu taon, nungnga muba be bahasa Inggris. Alani i, didok roha ni Panitia Penerjemahan ni Bibel on, porlu do dibahen perubahan di Bibel on. Tujuanna, dang holan lao manerjemahon isi ni Bibel songon na adong di bahasa aslina. Alai marsitutu do hami manerjemahon Bibel on asa takkas jala mura dijaha. Di lampiran na marjudul “Tudu-Tudu Lao Menerjemahon Bibel,” “Akka na Adong di Bibel on,” dohot “Sejarah ni Bibel,” dipaboa ma akka perubahan aha do na dibahen di Bibel on.

Lomo do roha ni halak na makkaholongi Debata Jahowa mangattusi terjemahan ni Bibel. Jala lomo roha ni nasida mamboto aha do sasittongna isi ni Bibel. (1 Timoteus 2:4) Alani i ma dibahen hami perubahan on di bahasa Inggris, asa boi diterjemahon tu akka bahasa na asing. Sai anggiat ma terjemahan on boi marlaba tu hamu. Jala ditangiakkon hami do asa boi terjemahan on mangurupi hamu ‘mangalului Debata, . . . jala juppangmuna Ibana’.—Ulaon ni Apostel 17:27.