PELAJARAN 01

Marguna do Bibel tu Sude Halak

PANGOLU

Sude do ra hita adong sukkun-sukkunna taringot ngolutta, hasusaan, hamatean, dohot taringot masa depan. Asing ni i, tapikkirhon do muse taringot ngolutta ganup ari. Misalna, songon dia asa adong siallangon ni keluargatta, manang songon dia asa marlas ni roha keluargatta. Godang do halak na mandok, boi do Bibel mangalusi sukkun-sukkun ni nasida i. Alai dang holan i. Marguna do muse poda ni Bibel tu ngolu ni nasida ganup ari. Jadi, marguna do Bibel tu sude halak.

1. Sukkun-sukkun aha do na alusna adong di Bibel?

Dipaboa Bibel do alus ni sukkun-sukkun on: Toho do adong na mambahen sude na adong di portibi on? Aha do tujuan ni ngolutta? Boasa susa hita? Aha do na masa tikki mate sasahalak? Boasa masa porang, hape sude do lomo rohana asa mardame? Aha do na lao masa di tano on haduan? Didok do di Bibel asa talului alus ni sukkun-sukkun i, jala nga godang halak naung mandapot alusna.

2. Boha do carana Bibel mangurupi asa denggan ngolutta?

Dipaboa do di Bibel akka poda na denggan. Misalna, dipaboa do songon dia asa marlas ni roha akka keluarga. Dipaboa do muse aha na boi tabahen tikki marsak hita, jala songon dia asa las rohatta tikki karejo. Molo torus hita marsiajar Bibel mamakke bukku on, boi do taboto akka poda taringot on jala godang dope na boi taboto. Gabe pos ma rohamuna, sude na tarsurat di Bibel, “marguna do i”.—2 Timoteus 3:16.

Dang manggattihon Bibel bukku on. Sasittongna molo diparsiajari hamu bukku on, gabe lam jotjot do annon dibukka hamu Bibelmuna. Alani i, jaha hamu ma akka ayat na adong di bukku on. Jala bandingkon hamu ma tu na diboto hamu saleleng on.

ASA LAM TAATTUSI

Parsiajari ma songon dia Bibel mangurupi akka halak, boha carana asa lomo rohatta manjaha Bibel, jala boasa denggan molo adong na mangurupi hita marsiajar Bibel.

3. Boi do Bibel mangurupi hita

Dipatudos do Bibel songon senter. Boi do Bibel mangurupi hita mambahen keputusan na denggan, jala mamboto aha na lao masa haduan.

Jaha Psalmen 119:105, dung i bahas ma sukkun-sukkun on:

Dos songon aha do Bibel menurut panurat psalmen?
Songon dia do pandapotmuna taringot Bibel?

4. Boi do Bibel mangalusi sukkun-sukkunta

Godang do sukkun-sukkun ni sahalak borua, jala nungnga martaon-taon i dipikkirhon ibana. Dung i dapotna ma alusna sian Bibel. Putar ma VIDEO, dung i bahas ma sukkun-sukkun on:

VIDEO: Unang ma Putus Asa! (1:48)

Sukkun-sukkun aha do na hea ro tu pikkiran ni borua i?
Aha do manfaatna dung marsiajar Bibel ibana?

Didok do di Bibel asa talului alus ni sukkun-sukkunta. Jaha Mateus 7:7, dung i bahas ma sukkun-sukkun on:

Sukkun-sukkun aha do na hea ro tu pikkiranmuna taringot parngoluon?

5. Boi do lomo rohamuna manjaha Bibel

Godang do halak na lomo rohana manjaha Bibel, jala marguna do akka poda na di Bibel i tu nasida. Putar ma VIDEO, dung i bahas ma sukkun-sukkun on:

VIDEO: Manjaha Bibel (2:05)

Boasa dang pola lomo roha ni akka naposo di video i manjaha?
Boasa lomo roha ni nasida manjaha Bibel?

Bibel mangalehon janji taringot masa depan na mambahen las rohatta. Jaha Rom 15:4, dung i bahas ma sukkun-sukkun on:

Lomo do rohamuna mamboto janji ni Debata na tarsurat di Bibel?

6. Boi do halak na asing mangurupi hita marsiajar Bibel

Asing ni manjaha Bibel sahalakta, godang do halak na mandok denggan do molo adong na mangurupi hita marsiajar Bibel. Jaha Ulaon ni Apostel 8:26-31, dung i bahas ma sukkun-sukkun on:

Aha do na boi tatiru sian halak Etiopia i asa boi taattusi isi ni Bibel?—Ida ayat 30 dohot 31.

Porlu do sahalak pejabat Etiopia diurupi lao mangattusi Hata ni Debata. Saonari pe, godang do halak na mandok denggan do molo adong na mangurupi nasida marsiajar Bibel

ADONG DO NA MANDOK: “Dang adong be tikki ni iba manjaha Bibel.”

Setuju do hamu tu pandapot ni nasida?

KESIMPULAN

Marguna do akka poda na adong di Bibel tu ngolutta siganup ari, boi mangalusi sukkun-sukkunta, jala mangalehon janji taringot masa depan na mambahen las rohatta.