1, 2. Aha do na hinirim ni si Petrus tingki marbarita na uli Jesus di Kapernaum, alai aha do na masa?

MARSAK do roha ni si Petrus mangida halak na manangihon Jesus di parguruan (sinagoga) di Kapernaum. Di kota on do si Petrus tading jala disi do ibana manjala dengke, di utara ni Tao Galilea. Angka aleale, sisolhot dohot dongan saparkarejoanna pe tading di kota on. Tontu, hirim do roha ni si Petrus asa lomo rohanasida mananda Jesus, dohot marsiajar taringot tu Harajaon ni Debata na pinaboa ni Jesus. Alai, ndang masa songon na di rohana i.

² Torop halak ndang olo be manangihon Jesus. Lam marsak ma si Petrus tingki diida ibana ndang marlas ni roha be angka sisean manjalo pangantusion taringot tu hasintongan. Alai, gabe sogo do rohanasida jala muruk tu Jesus. Didok nasida, hata na kasar do na nidok ni Jesus i, jala ndang tama begeon. Alani i, ditadingkon nasida ma parguruan i, jala ndang diihuthon nasida be Jesus.​—Jaha Johannes 6:60, 66.

3. Songon dia do haporseaon ni si Petrus mangurupi ibana?

³ Borat do on di si Petrus dohot di apostel na asing. Ndang diantusi si Petrus sude hata ni Jesus di tingki i. Alani i, molo ndang dipatorang Jesus hata i, boi do gabe asing lapatanna. Aha do diulahon si Petrus? Mulahulak do si Petrus diuji, alai dipatudu do na marsihohot ibana tu Jesus. Taparrohahon ma songon dia haporseaon ni si Petrus mangurupi ibana mangadopi marragam pangunjunan.

4, 5. Aha do diulahon Jesus tingki maralo pangidoan ni torop halak tu lomo ni roha ni Jahowa?

⁴ Jotjot do tarhatotong si Petrus ala sai maralo do pangkataion dohot na diulahon Jesus tu roha ni torop halak. Sadari  andorang so masa i, dilehon Jesus do marribu halak mangan marhite tanda halongangan. Pangkorhon ni i, dipaksa nasida ma Jesus gabe raja. Alai, longang do roha ni na torop i tingki ndang dioloi Jesus pangidoan ni nasida, jala disuru ibana angka siseanna marparau tu Kapernaum. Songgot do muse roha ni angka siseanna tingki mardalan Jesus di ginjang ni aek, di Tao Galilea. Laos i ma patoguhon haporseaon ni si Petrus.

⁵ Marsogotna i, diida nasida ma torop halak ro tu bariba ni tao i. Ndang na mauas di partondion umbahen na ro nasida. Alai, asa dilehon Jesus do muse nasida mangan marhite tanda halongangan. Dipinsang Jesus ma nasida taringot i. (Joh. 6:25-27) Dungkon i, laho ma Jesus tu parguruan di Kapernaum. Diajarhon Jesus ma muse hasintongan na ringkot botoon ni na torop i. Alai, ndang dihalomohon nasida barita i.

6. Aha do tudosan na diajarhon Jesus, jala songon dia pandapot ni na torop?

⁶ Ndang lomo roha ni Jesus na torop i mananda ibana sahalak na boi mangalehon mangan, marhite tanda halongangan. Alai, naeng ma nian ibana ditanda gabe halak na pinarade ni Debata laho paluahon nasida marhite mangalehon ngoluna, na mambahen nasida boi mandapot hangoluan na salelengna. Alani i, dipatudos Jesus ma dirina tu Manna, roti na sian surgo di tingki ni si Musa. Tingki adong na so sapandapot, didok Jesus ma muse molo sasahalak ringkot mangallang dagingna dohot manginum mudarna asa mangolu salelengna. Alani i, gabe muruk situtu ma na torop i. Adong na mandok, ”Hata na kasar do i; ise pabegebege i?” Jala godang do sisean ni Jesus na so mangihuthon Jesus be. *—Joh. 6:48-60, 66.

7, 8. (a) Aha do na so diantusi si Petrus? (b) Aha do alus ni si Petrus tu Jesus?

⁷ Molo si Petrus, songon dia? Sungkunsungkun do rohana tu hata ni Jesus i. Ndang diantusi boasa ingkon mate Jesus laho mangulahon lomo ni roha ni Debata. Alai, ndang diihuthon si Petrus sisean na asing na manadingkon Jesus. Adong do na mangurupi si Petrus umbahen imbar sian na asing. Aha ma i?

⁸ Didok Jesus ma tu angka apostelna, ”Nda tung dohot hamu naeng laho?” (Joh. 6:67) Nang pe Jesus mangkatai tu 12 apostelna, alai si Petrus do na olo mangalusi. Jala jotjot do on masa. Ra, si Petrus do na umtua sian sude sisean i, jala ndang olo ibana manabunihon na di pingkiranna. Alani i, dialusi  ibana ma, ’Tung tu ise ma hami laho, ale Tuan? Di Ho do hata hangoluan sisalelenglelengna!’​—Joh. 6:68.

9. Songon dia do si Petrus tongtong marsihohot tu Jesus?

⁹ Hona do ra tu rohamu alus ni si Petrus i. Haporseaon ni si Petrus tu Jesus mangurupi ibana boi patuduhon parange na mansai ringkot, i ma marsihohot. Diantusi si Petrus ma, Jesus do Sipalua jala parohon haluaon do ajaranna taringot tu Harajaon ni Debata. Nang pe adong na so diantusi si Petrus, alai diboto ibana do, ndang adong be dalan na asing asa boi dihalomohon Debata jala mangolu salelengna.

10. Songon dia do hita boi maniru haporseaon ni si Petrus?

¹⁰ Songon i do pangkilalaanmu? Torop do halak di portibi on mandok na dihaholongi nasida Jesus, alai ndang marsihohot tu ibana. Alani i, molo naeng marsihohot do hita tu Kristus, ingkon dos ma pangkilalaanta songon si Petrus taringot tu ajaran ni Jesus. Ingkon taparsiajari, taantusi, jala taulahon, nang pe tahilala imbar tu na tahalomohon. Molo tapatudu hita marsihohot, boi ma hita mangolu salelengna, songon na hinalomohon ni Jesus.​—Jaha  Psalmen 97:10.

11. Tudia do diboan Jesus angka siseanna? (Ida surat na di toru.)

¹¹ Ndang leleng dungkon i, laho ma Jesus dohot pigapiga siseanna tu sabola utara. Sipata, boi do diida nasida sian Tao Galilea i punsu ni Dolok Hermon na marsalju di sabola utara ni Tano Kanaan. Lam tangkas ma diida nasida timbo ni dolok i, tingki nangkok nasida mamolus sian angka huta na jonok tu Kaesarea Pilippi. * Huhut manatap angka luat na uli di humaliangnasida dohot ma i Tano Kanaan, mangkatai ma Jesus tu angka siseanna.

12, 13. (a) Boasa ringkot botoon ni Jesus pandapot ni na torop taringot tu ibana? (b) Songon dia do si Petrus patuduhon haporseaonna tu Jesus?

¹² Disungkun Jesus ma siseanna, ”Ise do Ahu didok natorop?” Boi ma tapingkirhon songon dia si Petrus mamparrohahon jala mamboto bisuk ni Jesus. Las do roha ni Jesus mamboto songon dia pangantusion ni angka siseanna, sian naung diida jala ditangihon nasida. Dialusi angka siseanna i ma Jesus, alai angka hata ni na torop taringot Jesus do na pinaboa nasida. Alai, ringkot do naeng botoon ni Jesus dos manang ndang  pangantusion ni sisean i tu torop halak. Disungkun Jesus ma muse, ”Ise do Ahu didok hamu?”​—Luk. 9:18-20.

¹³ Si Petrus do muse na parjolo mangalusi Jesus. Marhite hata na jempek dipaboa ibana ma, ”Kristus (Messias), Raja na pinarbagabaga i do Ho, Anak ni Debata na mangolu!” Tontu, dipuji Jesus do si Petrus alani pangantusionna i. Alai, tangkas do dipaboa Jesus, ndang jolma na papatarhon i, alai Jahowa do na mambahen hasintongan i patar tu halak na marhaporseaon. Sada hak na sumurung do di si Petrus boi mangantusi hasintongan na so pinaboa ni Jahowa dope, i ma taringot tu Messias manang Kristus na dijanjihon i!​—Jaha Mateus 16:16, 17.

14. Aha do hak na sumurung na dilehon Jesus tu si Petrus?

¹⁴ Kristus do na manggohi surirang taringot tu batu na binolongkon ni angka tukang. (Ps. 118:22; Luk. 20:17) Marhite angka surirang on, dipaboa Jesus ma na laho pajongjongon ni Jahowa sada huria di ginjang ni batu, songon na pinaboa ni si Petrus. Dung i, dilehon Jesus ma tu si Petrus hak na sumurung di huria i. Ndang na sumurung si Petrus dibahen sian sisean na asing, songon na nidok ni pigapiga halak. Alai on patuduhon, dilehon Jesus tanggung jawab tu si Petrus. Dilehon ma tu si Petrus ”hinsu ni harajaon”. (Mat. 16:19) Marhite si Petrus ma halak Jahudi, halak Samaria, dohot halak na so Jahudi mandapot pangkirimon Harajaon ni Debata.

15. Aha do didok si Petrus tu Jesus, jala boasa didok ibana i?

¹⁵ Dipaboa Jesus do muse, tu ise na gumodang dilehon tanggung jawab, tu ibana do gumodang tungguon. Masa do hata on tu si Petrus. (Luk. 12:48) Dipapatar Jesus do tu si Petrus angka na laho masa tu Messias. Dipaboa do taringot tu sitaononna, jala na laho mate Messias di Jerusalem. Susa do roha ni si Petrus mamboto i, alani i dipasingot ibana ma Jesus, ’Asi ma roha ni Debata di Ho, Tuan! Unang ma songgop i tu Ho!’​—Mat. 16:21, 22.

16. Songon dia do Jesus maminsang Jesus, jala aha na boi taparsiajari sian hata ni Jesus i?

¹⁶ Songgot do roha ni si Petrus mambege alus ni Jesus, ala ninna rohana, denggan do na tinujuna. Ditundalhon ma si Petrus, jala diida Jesus ma tu sisean na asing jala didok, ”Laho ma  ne ho, bolis! Gasip do ho di Ahu, ai ndang diparrohahon ho angka na di Debata, angka na di jolma do.” (Mat. 16:23; Mrk. 8:32, 33) Poda na denggan do on tu hita. Taboto ma, ummura do patujolohon pingkiran ni jolma martimbangkon pingkiran ni Debata. Nang pe denggan na tinuju ni rohanta laho mangurupi sasahalak, alai di na so pamotoanta, boi do i mambahen nasida palashon roha ni Sibolis, ndang Debata. Alai, songon dia do pangkilalaan ni si Petrus?

17. Aha do lapatan ni hata ni Jesus tu si Petrus na mandok, ”laho ma ne ho, bolis”?

¹⁷ Diboto si Petrus do, ndang na dipatudos Jesus ibana tu Sibolis. Imbar do hata ni Jesus tu si Petrus, dohot hatana tu Sibolis. Sogo do roha ni Jesus tu Sibolis. (Mat. 4:10) Alai dihaholongi Jesus do si Petrus. Godang do na denggan diida Jesus sian si Petrus. Antong, boasa didok Jesus tu si Petrus, ”Laho ma ne ho, bolis”? On patuduhon na dipareso Jesus do pingkiran ni si Petrus. Sasintongna, ndang tama si Petrus mangambati aha na laho ulahonon ni Tuanna, alai ingkon patoguonna do roha ni Jesus mangulahon i.

18. Songon dia do si Petrus patuduhon na marsihohot, jala aha na boi tatiru sian ibana?

¹⁸ Sogo do roha ni si Petrus tu hata ni Jesus i? Ndang sogo. Marserep ni roha do ibana tingki dipinsang. Tarida ma molo ibana marsihohot. Sude do naposo ni Debata mandapot sipasingot sian tingki tu tingki. Alai, molo tajangkon sipasingot, jala mambahen hamubaon, boi ma hita tongtong jonok tu Jesus Kristus dohot tu Jahowa.​—Jaha Poda 4:13.

19. Aha do muse na didok Jesus, jala aha do na boi ro tu pingkiran ni si Petrus?

¹⁹ Didok Jesus ma muse, ”Na tutu do na hudok on tu hamu: Ndang na mangae hamatean anggo deba sian angka na jongjong dison, so jolo diida ro Anak ni jolma i di bagasan harajaonna.” (Mat. 16:28) Aha do lapatan ni hata ni Jesus on? Ala ndang leleng dope si Petrus dipasingot Jesus, ra sungkunsungkun do  rohana, parsidohot manang ndang ibana mandapot hak na sumurung i.

20, 21. (a) Patorang ma parnidaan na masa tu si Petrus. (b) Songon dia do parnidaan i mangurupi si Petrus marpangantusion?

²⁰ Saminggu dungkon i, ditogihon Jesus ma si Jakobus, si Johannes dohot si Petrus mardalan pigapiga kilometer tu ”dolok na timbo”, ra tu Dolok Hermon. Nunga borngin nasida tusi, ala dipaboa do molo nasida na tolu tarpodom tingki i. Alai, tingki martangiang Jesus, adong ma na masa na mambahen nasida ndang mondokondok be.​—Mat. 17:1; Luk. 9:28, 29, 32.

²¹ Diida angka sisean i ma marsinondang bohi ni Jesus songon mata ni ari. Pangkeanna pe mansai saksak. Dung i, diida nasida adong dua halak mangkatai dohot Jesus, sahalak songon si Musa, jala sahalak nai songon si Elia. Dihatai nasida ma taringot tu ”ujung ni langkana, sipasidungonna di Jerusalem”,  i ma taringot tu ujung ni ngolu ni Jesus dohot haheheonna. Alani i, tangkas ma ndang sintong pamingkirion ni si Petrus na mandok, molo Jesus ndang tutu mangadopi sitaonon sisongon i!​—Luk. 9:30, 31.

22, 23. (a) Songon dia do si Petrus patuduhon las ni rohana tu parnidaan i? (b) Aha do muse na masa tu si Petrus, si Jakobus, dohot si Johannes di borngin i?

²² Sai naeng dohot do si Petrus mangkatai rap dohot nasida. Diida ibana, naeng tadingkonon ni si Musa dohot si Elia nama Jesus. Alani i, didok si Petrus ma, ”O Guru, dengganna i dison! Hupauli hami ma soposopo tolu: Sada di Ho, sada di si Musa, sada di si Elia.” Sasintongna, holan parnidaan do on. Ndang tutu ro si Musa dohot si Elia, ala nunga leleng nasida mate. Alani i, ndang ringkot patupaon tenda di nasida. Nang pe ndang manat dipingkirhon si Petrus sidohononna, alai boi do tatiru angka na denggan sian ibana.​—Luk. 9:33.

²³ Diida si Petrus, si Jakobus dohot si Johannes ma muse pungu angka ombun di langit mangalinggomi nasida. Hak na sumurung do on di nasida. Dibege nasida ma soara ni Jahowa na mandok, ’On do Anakku na tarpillit i; tangihon hamu ma Ibana!’ Dung i, marujung ma parnidaan i, jala diboto ma holan nasida dohot Jesus do na adong di dolok i.​—Luk. 9:34-36.

24. (a) Aha do laba na dapot ni si Petrus sian parnidaan i? (b) Songon dia do hita mandapot laba sian parnidaan i?

²⁴ Pasupasu do parnidaan on tu si Petrus dohot tu hita. Marpulu taon dungkon na masa on, disurat ibana ma taringot tu hak na sumurung na niidana di borngin i. Didok ibana ma, ”Diida matanami do hatongamonna i.” Dihatindangkon ibana do na naeng gabe raja Jesus di surgo. Parnidaan on, patoguhon angka surirang na asing, jala mangurupi si Petrus lam marhaporseaon tingki mangadopi marragam pangunjunan. (Jaha 2 Petrus 1:16-19.) Songon si Petrus, mandapot pasupasu ma hita molo marsihohot tu Jesus, marsiajar sian ibana, rade manangihon poda dohot sipasingotna, jala mangulahon i ganup ari.